၁. သန္ဓိကပ္ပ

ပဌမကဏ္ဍ

(က)

သေဋ္ဌံ တိလောကမဟိတံ အဘိဝန္ဒိယဂ္ဂံ၊

ဗုဒ္ဓဉ္စ ဓမ္မမမလံ ဂဏမုတ္တမဉ္စ၊

သတ္ထုဿ တဿ ဝစနတ္ထဝရံ သုဗုဒ္ဓုံ၊

ဝက္ခာမိ သုတ္တဟိတမေတ္ထ သုသန္ဓိကပ္ပံ.

(ခ)

သေယျံ ဇိနေရိတနယေန ဗုဓာ လဘန္တိ၊

တဉ္စာပိ တဿ ဝစနတ္ထသုဗောဓနေန၊

အတ္ထဉ္စ အက္ခရပဒေသု အမောဟဘာဝါ၊

သေယျတ္ထိကော ပဒမတော ဝိဝိဓံ သုဏေယျံ.

၁. ၊ ၁. အတ္ထော အက္ခရသညာတော.

သဗ္ဗဝစနာနမတ္ထော အက္ခရေဟေဝ သညာယတေ. အက္ခရဝိပတ္တိယံ ဟိ အတ္ထဿ ဒုန္နယထာ ဟောတိ၊ တသ္မာ အက္ခရကောသလ္လံ ဗဟူပကာရံ သုတ္တန္တေသု.

၂. ၊ ၂. အက္ခရာပါဒယော ဧကစတ္တာလီသံ.

တေ စ ခေါ အက္ခရာ အပိ အကာရာဒယော ဧကစတ္တာ လီသ သုတ္တန္တေသု သောပကာရာ.

တံ ယထာ? အ အာ ဣ ဤ ဥ ဦ ဧ ဩ၊ က ခ ဂ ဃ င၊ စ ဆ ဇ ဈ ဉ၊ ဋ ဌ ဍ ဎ ဏ၊ တ ထ ဒ ဓ န၊ ပ ဖ ဗ ဘ မ၊ ယ ရ လ ဝ သ ဟ ဠ အံ၊ ဣတိ အက္ခရာ နာမ.

တေန ကွတ္ထော? အတ္ထော အက္ခရသညာတော.

၃. ၊ ၃. တတ္ထောဒန္တာ သရာ အဋ္ဌ.

တတ္ထ အက္ခရေသု အကာရာဒီသု ဩဒန္တာ အဋ္ဌ အက္ခရာ သရာ နာမ ဟောန္တိ.

တံ ယထာ? အ အာ ဣ ဤ ဥ ဦ ဧ ဩ၊ ဣတိ သရာ နာမ.

တေန ကွတ္ထော? သရာ သရေ လောပံ.

၄. ၊ ၄. လဟုမတ္တာ တယော ရဿာ.

တတ္ထ အဋ္ဌသု သရေသု လဟုမတ္တာ တယော သရာ ရဿာ နာမ ဟောန္တိ.

တံ ယထာ? အ ဣ ဥ၊ ဣတိ ရဿာ နာမ.

တေန ကွတ္ထော? ရဿံ.

၅. ၊ ၅. အညေ ဒီဃာ.

တတ္ထ အဋ္ဌသု သရေသု ရဿေဟိ အညေ ပဉ္စ သရာ ဒီဃာ နာမ ဟောန္တိ.

တံ ယထာ? အာ ဤ ဦ ဧ ဩ၊ ဣတိ ဒီဃာ နာမ.

တေန ကွတ္ထော? ဒီဃံ.

၆. ၊ ၈. သေသာ ဗျဉ္ဇနာ.

ဌပေတွာ အဋ္ဌ သရေ သေသာ အက္ခရာ ကကာရာဒယော နိဂ္ဂဟိတန္တာ ဗျဉ္ဇနာ နာမ ဟောန္တိ.

တံ ယထာ? က ခ ဂ ဃ င၊ စ ဆ ဇ ဈ ဉ၊ ဋ ဌ ဍ ဎ ဏ၊ တ ထ ဒ ဓ န၊ ပ ဖ ဗ ဘ မ၊ ယ ရ လ ဝ သ ဟ ဠ အံ၊ ဣတိ ဗျဉ္ဇနာ နာမ.

တေန ကွတ္ထော? သရာ ပကတိ ဗျဉ္ဇနေ.

၇. ၊ ၉. ဝဂ္ဂါ ပဉ္စပဉ္စသော မန္တာ.

တေသံ ခေါ ဗျဉ္ဇနာနံ ကကာရာဒယော မကာရန္တာ ပဉ္စပဉ္စသော အက္ခရဝန္တော ဝဂ္ဂါ နာမ ဟောန္တိ.

တံ ယထာ? က ခ ဂ ဃ င၊ စ ဆ ဇ ဈ ဉ၊ ဋ ဌ ဍ ဎ ဏ၊ တ ထ ဒ ဓ န၊ ပ ဖ ဗ ဘ မ၊ ဣတိ ဝဂ္ဂါ နာမ.

တေန ကွတ္ထော? ဝဂ္ဂန္တံ ဝါ ဝဂ္ဂေ.

၈. ၊ ၁၀. အံ ဣတိ နိဂ္ဂဟိတံ.

အံ ဣတိ နိဂ္ဂဟိတံ နာမ ဟောတိ.

တေန ကွတ္ထော? အံ ဗျဉ္ဇနေ နိဂ္ဂဟိတံ.

၉. ၊ ၁၁. ပရသမညာ ပယောဂေ.

ယာ စ ပန ပရေသု သက္ကတဂန္ထေသု သမညာ ဃောသာတိ ဝါ အဃောသာတိ ဝါ၊ တာ ပယောဂေ သတိ ဧတ္ထာပိ ယုဇ္ဇန္တေ.

တတ္ထ ဃောသာ နာမ-ဂ ဃ င၊ ဇ ဈ ဉ၊ ဍ ဎ ဏ၊ ဒ ဓ န၊ ဗ ဘ မ၊ ယ ရ လ ဝ ဟ ဠ၊ ဣတိ ဃောသာ နာမ. အဃောသာ နာမ-က ခ၊ စ ဆ၊ ဋ ဌ၊ တ ထ၊ ပ ဖ၊ သ၊ ဣတိ အဃောသာ နာမ.

တေန ကွတ္ထော? ဝဂ္ဂေ ဃောသာဃောသာနံ တတိယပဌမာ.

၁၀. ၊ ၁၂. ပုဗ္ဗမဓောဌိတ မဿရံ သရေန ဝိယောဇယေ.

တတ္ထ သန္ဓိံ ကတ္တုကာမော ပုဗ္ဗဗျဉ္ဇနံ အဓောဌိတံ အဿရံ ကတွာ သရဉ္စ ဥပရိ ကတွာ သရေန ဝိယောဇယေ.

တတြာယမာဒိ.

၁၁. ၊ ၁၄. နယေ ပရံ ယုတ္တေ.

အဿရံ ခေါ ဗျဉ္ဇနံ အဓောဌတံ ပရက္ခရံ နယေ ယုတ္တေ. တတြာဘိရတိမိစ္ဆေယျ.

ယုတ္တေတိကသ္မာ? အက္ကောစ္ဆိ မံ အဝဓိ မံ၊ အဇိနိ မံ အဟာသိ မေ. ဧတ္ထ ပန ယုတ္တံ န ဟောတိ.

ဣတိ သန္ဓိကပ္ပေ ပဌမော ကဏ္ဍော.

ဒုတိယကဏ္ဍ

၁၂. ၊ ၁၃. သရာ သရေ လောပံ.

သရာ ခေါ သရေ ပရေ လောပံ ပပ္ပေါန္တိ.

ယဿိန္ဒြိယာနိ သမထင်္ဂတာနိ. နော ဟေတံ ဘန္တေ သမေတာယသ္မာ သံဃေန.

၁၃. ၊ ၁၅. ဝါ ပရော အသရူပါ.

သရမှာ အသရူပါ ပရော သရော လောပံ ပပ္ပေါတိ ဝါ.

စတ္တာရော’မေ ဘိက္ခဝေ ဓမ္မာ၊ ကိန္နု’ မာဝသမဏိယော. ဝါတိ ကသ္မာ? ပဉ္စိန္ဒြိယာနိ၊ တယဿု ဓမ္မာ ဇဟိတာ ဘဝန္တိ.

၁၄. ၊ ၁၆. ကွစာသစဏ္ဏံ လုတ္တေ.

သရော ခေါ ပရော ပုဗ္ဗသရေ လုတ္တေ ကွစိ အသဝဏ္ဏံ ပပ္ပေါတိ.

သင်္ချံ နောပေတိ ဝေဒဂူ၊ ဗန္ဓုဿေဝ သမာဂမော.

ကွစီတိ ကသ္မာ? ယဿိန္ဒြိယာနိ၊ တထူပမံ ဓမ္မဝရံ အဒေသယိ.

၁၅. ၊ ၁၇. ဒီဃံ.

သရော ခေါ ပရော ပုဗ္ဗသရေ လုတ္တေ ကွစိ ဒီဃံ ပပ္ပေါတိ. သဒ္ဓီဓ ဝိတ္တံ ပုရိသဿ သေဋ္ဌံ၊ အနာဂါရေဟိ စူဘယံ.

ကွစီတိ ကသ္မာ? ပဉ္စဟုပါလိ အင်္ဂေဟိ သမန္နာဂတော. နတ္ထညံ ကိဉ္စိ.

၁၆. ၊ ၁၈. ပုဗ္ဗော စ.

ပုဗ္ဗော စ သရော ပရသရလောပေ ကတေ ကွစိ ဒီဃံ ပပ္ပေါတိ.

ကိံသူဓ ဝိတ္တံ ပုရိသဿ သေဋ္ဌံ၊ သာဓူတိ ပဋိဿုဏိတွာ၊ ကွစီတိ ကသ္မာ? ဣတိဿ မုဟုတ္တမ္ပိ.

၁၇. ၊ ၁၉. ယမေဒန္တဿာဒေသော.

ဧကာရဿ အန္တဘူတဿ သရေ ပရေ ကွစိ ယကာရာဒေသော ဟောတိ.

အဓိဂတော ခေါ မျာယံ ဓမ္မော၊ တျာဟံ ဧဝံ ဝဒေယျံ၊ တျာဿ ပဟီနာ ဟောန္တိ.

ကွစီတိ ကသ္မာ? နေ’နာဂတာ၊ ဣတိ နေတ္ထ.

၁၈. ၊ ၂၀. ဝမောဒုဒန္တာနံ.

ဩကာရုကာရာနံ အန္တဘူတာနံ သရေ ပရေ ကွစိ ဝကာရာဒေသော ဟောတိ.

အထ ခွဿ၊ သွဿ ဟောတိ၊ ဗဟွာဗာဓော၊ ဝတ္ထွေတ္ထ ဝိဟိတံ နိစ္စံ စက္ခာပါထမာဂစ္ဆတိ.

ကွစီတိကသ္မာ? စတ္တာရော’မေ ဘိက္ခဝေ ဓမ္မာ၊ ကိန္နုမာဝ သမဏိယော.

၁၉. ၊ ၂၂. သဗ္ဗော စံတိ.

သဗ္ဗော ဣစ္စေသော တိသဒ္ဒေါ ဗျဉ္ဇနော သရေ ပရေ ကွစိ စကာရံ ပပ္ပေါတိ.

ဣစ္စေတံ ကုသလံ၊ ဣစ္စဿ ဝစနီယံ၊ ပစ္စုတ္တရိတွာ၊ ပစ္စာဟရတိ.

ကွစီတိ ကသ္မာ? ဣတိဿ မုဟုတ္တမ္ပိ.

၂၀. ၊ ၂၇. ဒေါ ဓဿ စ.

ဓဣစ္စေတဿ သရေ ပရေ ကွစိ ဒကာရာဒေသော ဟောတိ.

ဧကမိဒါဟံ ဘိက္ခဝေ သမယံ.

ကွစီတိ ကသ္မာ? ဣဓေဝ မရဏံ ဘဝိဿတိ.

ဝဂ္ဂဟဏေန ဓကာရဿ ဟကာရာဒေသော ဟောတိ သာဟု ဒဿန မရိယာနံ.

သုတ္တဝိဘာဂေန ဗဟုဓာ သိယာ-

တော ဒဿ၊ ယထာ? သုဂတော.

ဋော တဿ၊ ယထာ? ဒုက္ကဋံ.

ဓော တဿ၊ ယထာ? ဂန္ဓဗ္ဗော.

တြော တ္တဿ၊ ယထာ? အတြဇော.

ကော ဂဿ၊ ယထာ? ကုလူပကော.

လော ရဿ၊ ယထာ? မဟာသာလော.

ဇော ယဿ၊ ယထာ? ဂဝဇော.

ဗ္ဗော ဝဿ၊ ယထာ? ကုဗ္ဗတော.

ကော ယဿ၊ ယထာ? သကေ.

ယော ဇဿ၊ ယထာ? နိယံပုတ္တံ.

ကော တဿ၊ ယထာ? နိယကော.

စ္စော တ္တဿ၊ ယထာ ဘစ္စော.

ဖော ပဿ၊ ယထာ? နိပ္ဖတ္တိ.

ခေါ ကဿ၊ ယထာ? နိက္ခမတိ. ဣစ္စေဝမာဒီ ယောဇေတဗ္ဗာ.

၂၁. ၊ ၂၁. ဣဝဏ္ဏော ယံ နဝါ.

ပုဗ္ဗော ဣဝဏ္ဏော သရေ ပရေ ယကာရံ ပပ္ပေါတိ နဝါ. ပဋိသုန္ထာရဝုတျဿ၊ သဗ္ဗာ ဝိတျာနုဘူယတေ.

နဝါတိ ကသ္မာ? ပဉ္စဟင်္ဂေဟိ သမန္နာဂတော၊ မုတ္တစာဂီ အနုဒ္ဓတော.

၂၂. ၊ ၂၈. ဧဝါဒိဿ ရိ ပုဗ္ဗော စ ရဿော.

သရမှာ ပရဿ ဧဝဿ ဧကာရဿ အာဒိဿ ရိကာရော ဟောတိ၊ ပုဗ္ဗော စ သရော ရဿော ဟောတိ နဝါ.

ယထရိဝ ဝသုဓာတလဉ္စ သဗ္ဗံ၊ တထရိဝ ဂုဏဝါ သုပူဇနိယော.

နဝါတိ ကသ္မာ? ယထာ ဧဝ၊ တထာ ဧဝ.

ဣတိ သန္ဓိကပ္ပေ ဒုတိယော ကဏ္ဍော.

တတိယကဏ္ဍ

၂၃. ၊ ၂၆. သရာ ပကတိ ဗျဉ္ဇနေ.

သရာ ခေါ ဗျဉ္ဇနေ ပရေ ပကတိရူပါနိ ဟောန္တိ.

မနောပုဗ္ဗင်္ဂမာ ဓမ္မာ၊ ပမာဒေါ မစ္စုနော ပဒံ၊ တိဏ္ဏော ပါရင်္ဂတော အဟု.

၂၄. ၊ ၃၅. သရေ ကွစိ.

သရာ ခေါ သရေ ပရေ ကွစိ ပကတိရူပါနိ ဟောန္တိ.

ကော ဣမံ ပထဝိံ ဝိစေဿတိ.

ကွစီတိ ကသ္မာ? အပ္ပဿုတာယံ ပုရိသော.

၂၅. ၊ ၃၇. ဒီဃံ.

သရာ ခေါ ဗျဉ္ဇနေ ပရေ ကွစိ ဒီဃံ ပပ္ပေါန္တိ.

သမ္မာ ဓမ္မံ ဝိပဿတော၊ ဧဝံ ဂါမေ မုနီ စရေ၊ ခန္တီ ပရမံ တပေါ တိတိက္ခာ.

ကွစီတိ ကသ္မာ? ဣဓ မောဒတိ ပေစ္စ မောဒတိ၊ ပတိလီယတိ၊ ပဋိဟညတိ.

၂၆. ၊ ၃၈. ရဿံ.

သရာ ခေါ ဗျဉ္ဇနေ ပရေ ကွစိ ရဿံ ပပ္ပေါန္တိ.

ဘောဝါဒိနာမ သော ဟောတိ၊ ယထာဘာဝိ ဂုဏေန သော.

ကွစီတိ ကသ္မာ? သမ္မာသမာဓိ၊ သာဝိတ္တီ ဆန္ဒသော မုခံ၊ ဥပနီယတိ ဇီဝိတမပ္ပမာယု.

၂၇. ၊ ၃၉. လောပဉ္စ တတြာကာရော.

သရာ ခေါ ဗျဉ္ဇနေ ပရေ ကွစိ လောပံ ပပ္ပေါန္တိ. တတြ စ လောပေ ကတေ အကာရာဂမော ဟောတိ.

သ သီလဝါ. သ ပညဝါ ဧသ ဓမ္မော သနန္တနော၊ သ ဝေ ကသာဝမရဟတိ၊ သ မာနကာမောပိ ဘဝေယျ၊ သ ဝေ မုနိ ဇာတိဘယံ အဒဿိ.

ကွစီတိ ကသ္မာ? သော မုနိ၊ ဧသော ဓမ္မော ပဒိဿတိ၊ န သော ကာသာဝမရဟတိ.

၂၈. ၊ ၄၀. ပရ ဒွေဘာဝေါ ဌာနေ.

သရမှာ ပရဿ ဗျဉ္ဇနဿ ဒွေဘာဝေါ ဟောတိ ဌာနေ.

ဣဓပ္ပမာဒေါ၊ ပုရိသဿ ဇန္တုနော၊ ပဗ္ဗဇ္ဇံ ကိတ္တယိဿာမိ၊ စာတုဒ္ဒသိ၊ ပဉ္စဒ္ဒသိ၊ အဘိက္ကန္တတရော စန္ဒော.

ဌာနေတိ ကသ္မာ? ဣဓ မောဒတိ ပေစ္စ မောဒတိ.

၂၉. ၊ ၄၂. ဝဂ္ဂေ ဃောသာဃောသာနံ တတိယပဌမာ.

ဝဂ္ဂေ ခေါ ပုဗ္ဗေသံ ဗျဉ္ဇနာနံ ဃောသာဃောသဘူတာနံ သရမှာ ယထာသင်္ချံ တတိယပဌမက္ခရာ ဒွေဘာဝံ ဂစ္ဆန္တိ ဌာနေ.

ဧသေဝ စဇ္ဈာနပ္ဖလော၊ ယတြဋ္ဌိတံ နပ္ပသဟေယျ မစ္စု၊ သေလေ ယထာ ပဗ္ဗတမုဒ္ဓနိဋ္ဌိတော၊ စတ္တာရိဋ္ဌာနာနိ နရော ပမတ္တော.

ဌာနေတိ ကသ္မာ? ဣဓ စေတသော ဒဠှံ ဂဏှာတိ ထာမသာ.

ဣတိ သန္ဓိကပ္ပေ တတိယော ကဏ္ဍော.

စတုတ္ထကဏ္ဍ

၃၀. ၊ ၅၈. အံ ဗျဉ္ဇနေ နိဂ္ဂဟိတံ.

နိဂ္ဂဟိတံ ခေါ ဗျဉ္ဇနေ ပရေ အံ ဣတိ ဟောတိ.

ဧဝံ ဝုတ္တေ၊ တံ သာဓူတိ ပဋိဿုဏိတွာ.

၃၁. ၊ ၄၉. ဝဂ္ဂန္တံ ဝါ ဝဂ္ဂေ.

ဝဂ္ဂဘူတေ ဗျဉ္ဇနေ ပရေ နိဂ္ဂဟိတံ ခေါ ဝဂ္ဂန္တံ ဝါ ပပ္ပေါတိ.

တန္နိစ္စုတံ၊ ဓမ္မဉ္စရေ သုစရိတံ၊ စိရပ္ပဝါသိံ ပုရိသံ. သန္တန္တဿ မနံ ဟောတိ၊ တင်္ကာရုဏိကံ၊ ဧဝင်္ခေါ ဘိက္ခဝေ သိက္ခိတဗ္ဗံ.

ဝါဂ္ဂဟဏေနနိဂ္ဂဟိတံ ခေါ လကာရာဒေသော ဟောတိ. ပုဂ္ဂလံ.

ဝါတိ ကသ္မာ? န တံ ကမ္မံ ကတံ သာဓု.

၃၂. ၊ ၅၀. ဧဟေ ဥံ.

ဧကာရဟကာရေ ပရေ နိဂ္ဂဟိတံ ခေါ ဉကာရံ ပပ္ပေါတိ ဝါ.

ပစ္စတ္တညေဝ ပရိနိဗ္ဗာယိဿာမိ၊ တညေဝေတ္ထ ပဋိပုစ္ဆိဿာမိ၊ ဧဝဉှိ ဝေါ ဘိက္ခဝေ သိက္ခိတဗ္ဗံ. တဉှိ တဿ မုသာ ဟောတိ.