၂. နာမကပ္ပ
ပဌမကဏ္ဍ
၅၂. ၊ ၆၀. ဇိနဝစနယုတ္တံ ဟိ.
‘‘ဇိနဝစနယုတ္တံ ဟိ’’ ဣစ္စေတံ အဓိကာရတ္ထံ ဝေဒိတဗ္ဗံ.
၅၃. ၊ ၆၁. လိင်္ဂဉ္စ နိပ္ပဇ္ဇတေ.
ယထာ ယထာ ဇိနဝစနယုတ္တံ ဟိ လိင်္ဂံ၊ တထာ တထာ ဣဓ လိင်္ဂဉ္စ နိပ္ပဇ္ဇတေ.
တံ ယထာ? ဧသော နော သတ္ထာ၊ ဗြဟ္မာ အတ္တာ၊ သခါ၊ ရာဇာ.
၅၄. ၊ ၆၂. တတော စ ဝိဘတ္တိယော.
တတော ဇိနဝစနယုတ္တေဟိ လိင်္ဂေဟိ ဝိဘတ္တိယော ပရာ ဟောန္တိ.
၅၅. ၊ ၆၃. သိ ယော၊ အံ ယော၊ နာ ဟိ၊ သ နံ၊ သ္မာ ဟိ၊ သ နံ၊ သ္မိံ သု.
ကာ စ ပန တာယော ဝိဘတ္တိယော? သိ၊ ယော ဣတိ ပဌမာ၊ အံ၊ ယောဣတိ ဒုတိယာ၊ နာ ဟိ ဣတိ တတိယာ၊ သ၊ နံဣတိ စတုတ္ထီ၊ သ္မာ၊ ဟိ ဣတိ ပဉ္စမီ၊ သ၊ နံ ဣတိ ဆဋ္ဌီ၊ သ္မိံ၊ သု ဣတိ သတ္တမီ.
ဝိဘတ္တိဣစ္စနေန ကွတ္ထော? အမှဿ မမံ သဝိဘတ္တိဿ သေ.
၅၆. ၊ ၆၄. တဒနုပရောဓေန.
ယထာ ယထာ တေသံ ဇိနဝစနာနံ အနုပရောဓော. တထာ တထာ ဣဓ လိင်္ဂဉ္စ နိပ္ပဇ္ဇတေ.
၅၇. ၊ ၇၁. အာလပနေ သိ ဂ သညော.
အာလပနတ္ထေ သိ ဂသညော ဟောတိ.
ဘောတိ အယျေ၊ ဘောတိ ကညေ၊ ဘောတိ ခရာဒိယေ.
အာလပနေတိ ကိမတ္ထံ? သာ အယျာ.
သီတိ ကိမတ္ထံ? ဘောတိယော အယျာယော.
ဂဣစ္စနေန ကွတ္ထော? ဃတေ စ.
၅၈. ၊ ၂၉. ဣဝဏ္ဏုဝဏ္ဏာ ဈလာ.
ဣဝဏ္ဏုဝဏ္ဏာဣစ္စေတေ ဈလသညာ ဟောန္တိ ယထာသင်္ချံ.
ဣသိနော၊ အဂ္ဂိနော၊ ဂဟပတိနော၊ ဒဏ္ဍိနော. သေတုနော၊ ကေတုနော၊ ဘိက္ခုနော. သယမ္ဘုနော၊ အဘိဘုနော.
ဈလဣစ္စနေန ကွတ္ထော? ဈလတော သဿ နော ဝါ.
၅၉. ၊ ၁၈၂. တေ ဣတ္ထိချာ ပေါ.
တေ ဣဝဏ္ဏုဝဏ္ဏာ ယဒါ ဣတ္ထိချာ၊ တဒါ ပသညာ ဟောန္တိ.
ရတ္တိယာ၊ ဣတ္ထိယာ၊ ဓေနုယာ၊ ဝဓုယာ.
ဣတ္ထိချာတိ ကိမတ္ထံ? ဣသိနာ၊ ဘိက္ခုနာ.
သဣစ္စနေန ကွတ္ထော? ပတော ယာ.
၆၀. ၊ ၁၇၇. အာ ဃော.
အာကာရော ယဒါ ဣတ္ထိချော၊ တဒါ ဃသညော ဟောတိ.
သဒ္ဓါယ၊ ကညာယ၊ ဝီဏာယ၊ ဂင်္ဂါယ၊ ဒိသာယ သာလာယ၊ မာလာယ၊ တုလာယ၊ ဒေါလာယ၊ ပဘာယ၊ သောဘာယ၊ ပညာယ၊ ကရုဏာယ နာဝါယ၊ ကပါလိကာယ.
အာတိ ကိမတ္ထံ? ရတ္တိယာ၊ ဣတ္ထိယာ.
ဣတ္ထိချောတိ ကိမတ္ထံ? သတ္ထာရာ ဒေသိတော အယံ ဓမ္မော.
ဃဣစ္စနေန ကွတ္ထော? ဃတော နာဒီနံ.
၆၁. ၊ ၈၆. သာဂမော သေ.
သကာရာဂမော ဟောတိ သေ ဝိဘတ္တိမှိ.
ပုရိသဿ၊ အဂ္ဂိဿ၊ ဣသိဿ၊ ဒဏ္ဍိဿ၊ ဘိက္ခုဿ၊ သယမ္ဘုဿ၊ အဘိဘုဿ.
သေတိ ကိမတ္တံ? ပုရိသသ္မိံ.
၆၂. ၊ ၂၀၆. သံသာသွေကဝစနေသု စ.
သံသာသု ဧကဝစနေသု ဝိဘတ္တာဒေသေသု သကာရာဂမော ဟောတိ.
ဧတိဿံ၊ ဧတိဿာ ဣမိဿံ၊ ဣမိဿာ၊ တိဿံ၊ တိဿာ၊
တဿံ တဿာ၊ ယဿံ၊ ယဿာ၊ အမုဿံ၊ အမုဿာ.
သံသာသွီတိ ကိမတ္ထံ? အဂ္ဂိနာ၊ ပါဏိနာ.
ဧကဝစနေသွီတိ ကိမတ္ထံ? တာသံ၊ သဗ္ဗာသံ.
ဝိဘတ္တာဒေသေသွီတိ ကိမတ္ထံ? မနသာ၊ ဝစသာ၊ ထာမသာ.
၆၃. ၊ ၂၁၇. ဧတိမာသမိ.
ဧတာဣမာဣစ္စေတေသမန္တော သရော ဣကာရော ဟောတိ သံသာသု ဧကဝစနေသု ဝိဘတ္တာဒေသေသု.
ဧတိဿံ၊ ဧတိဿာ၊ ဣမိဿံ၊ ဣမိဿာ.
သံသာသွီတိ ကိမတ္ထံ? ဧတာယ၊ ဣမာယ.
ဧကဝစနေသွီတိ ကိမတ္ထံ? ဧတာသံ၊ ဣမာသံ.
၆၄. ၊ ၂၁၆. တဿာ ဝါ.
တဿာ ဣတ္ထိယံ ဝတ္တမာနဿ အန္တဿ အာကာရဿ ဣကာရော ဟောတိ ဝါ သံသာသု ဧကဝစနေသု ဝိဘတ္တာဒေသေသု.
တိဿံ၊ တိဿာ၊ တဿံ၊ တဿာ.
၆၅. ၊ ၂၁၅. တတော သဿ ဿာယ.
တတော တာ ဧတာ ဣမာတော သဿ ဝိဘတ္တိဿ ဿာယာဒေသော ဟောတိ ဝါ.
တိဿာယ၊ ဧတိဿာယ၊ ဣမိဿာယ.
ဝါတိ ကိမတ္ထံ? တိဿာ၊ ဧတိဿာ၊ ဣမိဿာ.
၆၆. ၊ ၂၀၅. ဃော ရဿံ.
ဃော ရဿမာပဇ္ဇတေ သံသာသု ဧကဝစနေသု ဝိဘတ္တာဒေသေသု.
တဿံ၊ တဿာ၊ ယဿံ၊ ယဿာ၊ သဗ္ဗဿံ၊ သဗ္ဗဿာ.
သံသာသွီတိ ကိမတ္ထံ? တာယ၊ သဗ္ဗာယ.
ဧကဝစနေသွီတိ ကိမတ္ထံ? တာသံ၊ သဗ္ဗာသံ.
၆၇. ၊ ၂၂၉. နော စ ဒွါဒိတော နံမှိ.
ဒွိဣစ္စေဝမာဒိတော သင်္ချာတော နကာရာဂမော ဟောတိ နံမှိ ဝိဘတ္တိမှိ.
ဒွိန္နံ၊ တိန္နံ၊ စတုန္နံ၊ ပဉ္စန္နံ၊ ဆန္နံ၊ သတ္တန္နံ၊ အဋ္ဌန္နံ၊ နဝန္နံ၊ ဒသန္နံ.
ဒွါဒိတောတိ ကိမတ္ထံ? သဟဿာနံ.
နံမှီတိ ကိမတ္ထံ? ဒွီသု၊ တီသု.
စဂ္ဂဟဏေနဿဉ္စာဂမော ဟောတိ. စတဿန္နံ ဣတ္ထီနံ တိဿန္နံ ဝေဒနာနံ.
၆၈. ၊ ၁၈၄. အမာ ပတော သ္မိံသ္မာနံ ဝါ.
ပဣစ္စေတသ္မာ သ္မိံသ္မာဣစ္စေတေသံ အံအာအာဒေသာ ဟောန္တိ ဝါ ယထာသင်္ချံ.
မတျံ၊ မတိယံ၊ မတျာ၊ မတိယာ၊ နိကတျံ. နိကတိယံ၊ နိကတျာ၊ နိကတိယာ၊ ဝိကတျံ၊ ဝိကတိယံ၊ ဝိကတျာ၊ ဝိကတိယာ၊ ဝိရတျံ၊ ဝိရတိယံ၊ ဝိရတျာ၊ ဝိရတိယာ၊ ရတျံ၊ ရတိယံ၊ ရတျာ၊ ရတိယာ၊ ပုထဗျံ၊ ပုထဝိယံ၊ ပုထဗျာ၊ ပုထဝိယာ၊ ပဝတျံ၊ ပဝတျာ၊ ပဝတ္တိယံ၊ ပဝတ္တိယာ.
၆၉. ၊ ၁၈၆. အာဒိတော ဩ စ.
အာဒိဣစ္စေတသ္မာ သ္မိံဝစနဿ အံဩအာဒေသာ ဟောန္တိ ဝါ.
အာဒီံ၊ အာဒေါ.
ဝါတိ ကိမတ္ထံ? အာဒိသ္မိံ၊ အာဒိမှိ နာထံ နမဿိတွာန၊
စဂ္ဂဟဏေန အညသ္မာပိ သ္မိံ ဝစနဿ အာ ဩ အံအာဒေသာ ဟောန္တိ. ဒိဝါ စ ရတ္တော စ ဟရန္တိ ယေ ဗလိ. ဗာရာဏသိံ အဟု ရာဇာ.
၇၀. ၊ ၃၀. ဈလာနမိယုဝါ သရေ ဝါ.
ဈလဣစ္စေတေသံ ဣယ ဥဝဣစ္စေတေ အာဒေသာ ဟောန္တိ ဝါ သရေ ပရေ ယထာသင်္ချံ.
တိယန္တံ ပစ္ဆိယာဂါရေ၊ အဂ္ဂိယာဂါရေ၊ ဘိက္ခုဝါသနေ နိသီဒတိ၊ ဝုထုဝါသနေ နိသီဒတိ.
သရေတိ ကိမတ္ထံ? တိမလံ၊ တိဖလံ၊ တိစတုက္ကံ၊ တိဒဏ္ဍံ၊ တိလောကံ၊ တိနယနံ၊ တိပါသံ၊ တိဟံသံ၊ တိဘဝံ၊ တိခန္ဓံ၊ တိပိဋကံ၊ တိဝေဒနံ၊ စတုဒ္ဒိသံ၊ ပုထုဘူတံ.
ဝါတိ ကိမတ္ထံ? ပဉ္စဟင်္ဂေဟိ တီဟာကာရေဟိ. စက္ခာယတနံ.
ဝါတိ ဝိကပ္ပနတ္ထံ၊ ဣကာရဿ အယာဒေသော ဟောတိ၊ ဝတ္ထုတ္တယံ.
၇၁. ၊ ၅၀၅. ယဝကာရာ စ.
ဈလာနံ ယကာရ ဝကာရာဒေသာ ဟောန္တိ သရေ ပရေ ယထာသင်္ချံ.
အဂျာဂါရံ၊ ပက္ခာယတနံ၊ သွာဂတံ၊ တေ မဟာဝီရ.
စဂ္ဂဟဏံ သမ္ပိဏ္ဍနတ္ထံ.
၇၂. ၊ ၁၈၅. ပသညဿ စ.
ပသညဿ စ ဣဝဏ္ဏဿ ဝိဘတ္တာဒေသေ သရေ ပရေ ယကာရာဒေသော ဟောတိ.
ပုထဗျာ၊ ရတျာ၊ မတျာ.
သရေတိ ကိမတ္ထံ? ပုထဝိယံ.
၇၃. ၊ ၁၇၄. ဂါဝ သေ.
ဂေါဣစ္စေတဿ ဩကာရဿ အာဝါဒေသော ဟောတိ သေ ဝိဘတ္တိမှိ.
ဂါဝဿ.
၇၄. ၊ ၁၆၉. ယောသု စ.
ဂေါဣစ္စေတဿ ဩကာရဿ အာဝါဒေသော ဟောတိ ယောဣစ္စေတေသု ပရေသု.
ဂါဝေါ ဂစ္ဆန္တိ၊ ဂါဝေါ ပဿန္တိ၊ ဂါဝီ ဂစ္ဆန္တိ၊ ဂါဝီ ပဿန္တိ.
စဂ္ဂဟဏံ ကိမတ္ထံ? နာသ္မာသ္မိံသု ဝစနေသု အာဝါ ဒေသော ဟောတိ.
ဂါဝေန၊ ဂါဝါ၊ ဂါဝေ၊ ဂါဝေသု.
၇၅. ၊ ၁၇၀. အဝမှိ စ.
ဂေါဣစ္စေတဿ ဩကာရဿ အာဝအဝဣစ္စေတေ အာဒေသာ ဟောန္တိ အံမှိ ဝိဘတ္တိမှိ.
ဂါဝံ၊ ဂဝံ.
စဂ္ဂဟဏေန သာဒိသေသေသု ပုဗ္ဗုတ္တဝစနေသု ဂေါဣစ္စေတဿ ဩကာရဿ အဝါဒေသော ဟောတိ.
ဂဝဿ၊ ဂဝေါ၊ ဂဝေန၊ ဂဝါ၊ ဂဝေ၊ ဂဝေသု.
၇၆. ၊ ၁၇၁. အာဝဿု ဝါ.
အာဝဣစ္စေတဿ ဂါဝါဒေသဿ အန္တ သရဿ ဥကာရာဒေသော ဟောတိ ဝါ အံမှိ ဝိဘတ္တိမှိ.
ဂါဝုံ၊ ဂါဝံ.
အာဝဿေတိ ကိမတ္ထံ? ဂါဝေါ တိဋ္ဌန္တိ.
၇၇. ၊ ၁၇၅. တတော နမံ ပတိမှာ လုတ္တေ စ သမာသေ.
တတော ဂေါသဒ္ဒတော နံဝစနဿ အံအာဒေသော ဟောတိ၊ ဂေါဣစ္စေတဿ ဩကာရဿ အဝါဒေသော ဟောတိ ပတိမှိ ပရေ အလုတ္တေ စ သမာသေ.
ဂဝပတိ.
အလုတ္တေတိ ကိမတ္ထံ? ဂေါပတိ.
စဂ္ဂဟဏေန အသမာသေပိ နံဝစနဿ အံအာဒေသော ဟောတိ၊ ဂေါဣစ္စေတဿ ဩကာရဿ အဝါဒေသော ဟောတိ.
ဂဝံ.
၇၈. ၊ ၃. ဩသရေ စ.
ဂေါဣစ္စေတဿ ဩကာရဿ အဝါဒေသော ဟောတိ သမာသေ စ သရေ ပရေ.
ဂဝဿကံ၊ ဂဝေဠကံ၊ ဂဝါဇိနံ.
စဂ္ဂဟဏေန ဥဝဏ္ဏဣစ္စေဝမန္တာနံ လိင်္ဂါနံ ဥဝအဝဥရာဒေသာ ဟောန္တိ သ္မိံယောဣစ္စေတေသု ကွစိ.
ဘုဝိ၊ ပသဝေါ၊ ဂုရဝေါ၊ စတုရော.
သရေတိ ကိမတ္ထံ? ဂေါဓနော၊ ဂေါဝိန္ဒော.
၇၉. ၊ ၄၆. တဗ္ဗိပရီတူပပဒေ ဗျဉ္ဇနေ စ.
တဿ အဝသဒ္ဒဿ ယဒါ ဥပပဒေ တိဋ္ဌမာနဿ တဿ ဩကာရဿ ဝိပရီတော ဟောတိ ဗျဉ္ဇနေ ပရေ.
ဥဂ္ဂတေ သူရိယေ၊ ဥဂ္ဂစ္ဆတိ၊ ဥဂ္ဂဟေတွာ.
စဂ္ဂဟဏမဝဓာရဏတ္ထံ. အဝသာနေ၊ အဝကိရဏေ၊ အဝကိရတိ.
၈၀. ၊ ၁၇၃. ဂေါဏ နံမှိ ဝါ.
သဗ္ဗဿေဝ ဂေါသဒ္ဒဿ ဂေါဏာဒေသော ဟောတိ ဝါ နံမှိ ဝိဘတ္တိမှိ.
ဂေါဏာနံ သတ္တန္နံ.
ဝါတိ ကိမတ္ထံ?
ဂေါနဉ္စေ တရမာနာနံ၊ ဥဇုံ ဂစ္ဆတိ ပုင်္ဂဝေါ.
သဗ္ဗာ ဂါဝီ ဥဇုံ ယန္တိ၊ နေတ္တေ ဥဇုံ ဂတေ သတိ.
ယောဂဝိဘာဂေန အညတြာပိ ဂေါဏာဒေသော ဟောတိ. ဂေါဏဘူတာနံ.
၈၁. ၊ ၁၇၂. သုဟိနာသု စ.
သုဟိနာဣစ္စေတေသု သဗ္ဗဿ ဂေါသဒ္ဒဿ ဂေါဏာဒေသော ဟောတိ ဝါ.
ဂေါဏေသု၊ ဂေါဏေဟိ၊ ဂေါဏေဘိ၊ ဂေါဏေန.
ဝါတိ ကိမတ္ထံ? ဂေါသု၊ ဂေါဟိ၊ ဂေါဘိ၊ ဂဝေန.
စဂ္ဂဟဏေန သျာဒိသေသေသု ပုဗ္ဗုတ္တရဝစနေသုပိ ဂေါဏ ဂု ဂဝယာဒေသာ ဟောန္တိ. ဂေါဏော၊ ဂေါဏာ၊ ဂေါဏံ၊ ဂေါဏေ၊ ဂေါဏဿ၊ ဂေါဏမှာ. ဂေါဏမှိ၊ ဂုန္နံ၊ ဂဝယေဟိ၊ ဂဝယေဘိ.
၈၂. ၊ ၁၄၉. အံမော နိဂ္ဂဟိတံ ဈလပေဟိ.
အံဝစနဿ မကာရဿ စ ဈလပဣစ္စေတေဟိ နိဂ္ဂဟိတံ ဟောတိ
အဂ္ဂိံ၊ ဣသိံ၊ ဂဟပတိံ၊ ဒဏ္ဍိံ၊ မဟေသိံ၊ ဘိက္ခုံ၊ ပဋုံ၊ သယမ္ဘုံ၊ အဘိဘုံ၊ ရတ္တိံ၊ ဣတ္ထိံ၊ ဝဓုံ၊ ပုလ္လိင်္ဂံ၊ ပုမ္ဘာဝေါ၊ ပုင်္ကောကိလော.
အံမောတိ ကိမတ္ထံ? အဂ္ဂိနာ၊ ပါဏိနာ၊ ဘိက္ခုနာ၊ ရတ္တိယာ၊ ဣတ္ထိယာ၊ ဝဓုယာ.
ဈလပေဟီတိ ကိမတ္ထံ? သုခံ၊ ဒုက္ခံ.
ပုနာရမ္ဘ ဟဏံ ဝိဘာသာနိဝတ္တနတ္ထံ. အဂ္ဂိံ၊ ပဋုံ၊ ဗုဒ္ဓိံ၊ ဝဓုံ.
၈၃. ၊ ၆၇. သရလောပေါ’ မာဒေသ ပစ္စယာဒိမှိ သရလောပေ တု ပကတိ.
သရလောပေါ ဟောတိ အမာဒေသပစ္စယာဒိမှိ သရ လောပေ တု ပကတိ ဟောတိ.
ပုရိသံ၊ ပုရိသေ၊ ပါပံ၊ ပါပေ၊ ပါပိယော၊ ပါပိဋ္ဌော.
အမာဒေသပစ္စယာဒိမှီတိ ကိ တ္ထံ? အပ္ပမာဒေါ အမတံ ပဒံ.
သရလောပေတိ ကိမတ္ထံ? ပုရိသဿ၊ ဒဏ္ဍိနံ.
တုဂ္ဂဟဏမဝဓာရဏတ္ထံ. ဘိက္ခုနီ၊ ဂဟပတာနီ.
ပကတိဂ္ဂဟဏသာမတ္ထေန ပုန သန္ဓိဘာဝေါ စ ဟောတိ. သေယျော၊ သေဋ္ဌော၊ ဇေယျော၊ ဇေဋ္ဌော.
၈၄. ၊ ၁၄၄. အဃောရဿမေကဝစနယောသွပိ စ.