၃. ကာရကကပ္ပ
ဆဋ္ဌကဏ္ဍ
၂၇၁. ၊ ၈၈၊ ၃၀၈. ယသ္မာ ဒပေတိ ဘယမာဒတ္တေ ဝါ တဒပါဒါနံ.
ယသ္မာ ဝါ အပေတိ၊ ယသ္မာ ဝါ ဘယံ ဇာယတေ၊ ယသ္မာ ဝါ အာဒတ္တေ၊ တံ ကာရကံ အပါဒါနသညံ ဟောတိ.
တံ ယထာ? ဂါမာ အပေန္တိ မုနယော၊ နဂရာ နိဂ္ဂတော ရာဇာ၊ စောရာ ဘယံ ဇာယတေ၊ အာစရိယုပဇ္ဈာယေဟိ သိက္ခံ ဂဏှာတိ သိဿော.
အပါဒါနမိစ္စနေန ကွတ္ထော? အပါဒါနေ ပဉ္စမီ.
၂၇၂. ၊ ၃၀၉. ဓာတုနာ မာနမုပသဂ္ဂယောဂါဒွီသွပိ စ.
ဓာတုနာမာနံ ပယောဂေ စ ဥပသဂ္ဂယောဂါဒီသွပိ စ တံ ကာရကံ အပါဒါနသညံ ဟောတိ.
ဓာတူနံ ပယောဂေ တာဝ ဇိဣစ္စေတဿ ဓာတုဿ ပရာပုဗ္ဗဿ ပယောဂေ ယော အသဟော၊ သော အပါဒါနသညော ဟောတိ.
တံ ယထာ? ဗုဒ္ဓသ္မာ ပရာဇေန္တိ အညတိတ္ထိယာ.
ဘူဣစ္စေတဿ ဓာတုဿ ပပုဗ္ဗဿ ပယောဂေ ယတော အစ္ဆိန္နပ္ပဘဝေါ၊ သော အပါဒါနသညော ဟောတိ.
တံ ယထာ? ဟိမဝတာ ပဘဝန္တိ ပဉ္စ မဟာနဒိယော၊ အနဝတတ္တမှာ ပဘဝန္တိ မဟာသရာ၊ အစိရဝတိယာ ပဘဝန္တိ ကုန္နဒိယော.
နာမပ္ပယောဂေပိ တံ ကာရကံ အပါဒါနသညံ ဟောတိ.
တံ ယထာ? ဥရသ္မာ ဇာတော ပုတ္တော၊ ဘူမိတော နိဂ္ဂတော ရသော၊ ဥဘတော သုဇာတော ပုတ္တော မာတိတော စ ပိတိတော စ.
ဥပသဂ္ဂယောဂေ တံ ကာရကံ အပါဒါနသညံ ဟောတိ.
တံ ယထာ? အပသာလာယ အာယန္တိ ဝါဏိဇာ၊ အာဗြဟ္မလောကာ သဒ္ဒေါ အဗ္ဘုဂ္ဂစ္ဆတိ ဥပရိ ပဗ္ဗတာ ဒေဝေါ ဝဿတိ၊ ဗုဒ္ဓသ္မာ ပတိ သာရိပုတ္တော ဓမ္မဒေသနာယ ဘိက္ခူ အာလပတိ တေမာသံ၊ ဃတမဿ တေလသ္မာ ပတိ ဒဒါတိ၊ ဥပ္ပလမဿ ပဒုမသ္မာ ပတိ ဒဒါတိ၊ ကနကမဿ ဟိရညသ္မာ ပတိ ဒဒါတိ.
အာဒိဂ္ဂဟဏေန ကာရကမဇ္ဈေပိ ပဉ္စမီဝိဘတ္တိ ဟောတိ. ဣတော ပက္ခသ္မာ ဝိဇ္ဈတိ မိဂံ လုဒ္ဒကော၊ ကောသာ ဝိဇ္ဈတိ ကုဉ္ဇရံ၊ မာသသ္မာ ဘုဉ္ဇတိ ဘောဇနံ.
အပိဂ္ဂဟဏေန နိပါတပယောဂေပိ ပဉ္စမီဝိဘတ္တိ ဟောတိ ဒုတိယာ စ တတိယာ စ. ရဟိတာ မာတုဇာ ပုညံ ကတွာ ဒါနံ ဒေတိ၊ ရဟိတာ မာတုဇံ၊ ရဟိတာ မာတုဇေန ဝါ. ရိတေ သဒ္ဓမ္မာ ကုတော သုခံ လဘတိ၊ ရိတေ သဒ္ဓမ္မံ၊ ရိတေ သဒ္ဓမ္မေန ဝါ. တေ ဘိက္ခူ နာနာ ကုလာ ပဗ္ဗဇိတာ၊ ဝိနာ သဒ္ဓမ္မာ နတ္ထညော ကောစိ နာထော လောကေ ဝိဇ္ဇတိ၊ ဝိနာ သဒ္ဓမ္မံ၊ ဝိနာ သဒ္ဓမ္မေန ဝါ. ဝိနာ ဗုဒ္ဓသ္မာ၊ ဝိနာ ဗုဒ္ဓံ၊ ဝိနာ ဗုဒ္ဓေန ဝါ.
စဂ္ဂဟဏေန အညတ္ထာပိ ပဉ္စမီဝိဘတ္တိ ဟောတိ. ယတောဟံ ဘဂိနိ အရိယာယ ဇာတိယာ ဇာတော. ယတော သရာမိ အတ္တာနံ၊ ယတော ပတ္တောသ္မိ ဝိညုတံ၊ ယတွာဓိကရဏမေနံ စက္ခုန္ဒြိယံ အသံဝုတံ ဝိဟရန္တံ အဘိဇ္ဈာဒေါမနဿာ ပါပကာ အကုသလာ ဓမ္မာ အနွာသဝေယျုံ.
၂၇၃. ၊ ၃၁၀. ရက္ခဏတ္ထာနမိစ္ဆိတံ.
ရက္ခဏတ္ထာနံ ဓာတူနံ ပယောဂေ ယံ ဣစ္ဆိတံ၊ တံ ကာရကံ အပါဒါနသညံ ဟောတိ.
ကာကေ ရက္ခန္တိ တဏ္ဍုလာ၊ ယဝါ ပဋိသေဓေန္တိ ဂါဝေါ.
၂၇၄. ၊ ၃၁၁. ယေန ဝါ’ ဒဿနံ.
ယေန ဝါ အဒဿနမိစ္ဆိတံ၊ တံ ကာရကံ အပါဒါနသညံ ဟောတိ.
ဥပဇ္ဈာယာ အန္တရဓာယတိ သိဿော၊ မာတရာ စ ပိတရာ စ အန္တရဓာယတိ ပုတ္တော.
ဝါတိ ကိမတ္ထံ? သတ္တမီဝိဘတျတ္တံ. ဇေတဝနေ အန္တရဓာယတိ ဘဂဝါ.
၂၇၅. ၊ ၃၁၂. ဒူရန္တိ ကဒ္ဓ ကာလ နိမ္မာန တွာလောပ ဒိသာယောဂဝိဘတ္တာရပ္ပယောဂ သုဒ္ဓပ္ပမောစန ဟေတု ဝိဝိတ္တပ္ပမာဏ ပုဗ္ဗယောဂဗန္ဓန ဂုဏဝစန ပဉှ ကထန ထောကာကတ္တူသု စ.
ဒူရတ္ထေ၊ အန္တိကတ္ထေ၊ အဒ္ဓနိမ္မာနေ၊ ကာလနိမ္မာနေ၊ တွာလောပေ၊ ဒိသာယောဂေ၊ ဝိဘတ္တေ၊ အာရပ္ပယောဂေ၊ သုဒ္ဓေ၊ ပမောစနေ၊ ဟေတွတ္ထေ၊ ဝိဝိတ္တတ္ထေ၊ ပမာဏေ၊ ပုဗ္ဗယောဂေ၊ ဗန္ဓနတ္ထေ၊ ဂုဏဝစနေ၊ ပဉှေ၊ ကထနေ၊ ထောကေ၊ အကတ္တရိ စ ဣစ္စေတေသွတ္ထေသု၊ ပယောဂေသု စ၊ တံ ကာရကံ အပါဒါနသညံ ဟောတိ.
ဒူရတ္ထေတာဝ – ကီဝ ဒူရော ဣတော နဠကာရဂါမော၊ ဒူရတော ဝါ ဂမ္မ၊ အာရကာ တေ မောဃပုရိသာ ဣမသ္မာ ဓမ္မဝိနယာ. ဒုတိယာ စ တတိယာ စ၊ ဒူရံ ဂါမံ အာဝတော၊ ဒူရေန ဂါမေန ဝါ အာဂတော. အာရကာ ဣမံ ဓမ္မဝိနယံ၊ အနေန ဓမ္မဝိနယေန ဝါ ဣစ္စေဝမာဒိ.
အန္တိကတ္ထေ – အန္တိကံ ဂါမာ၊ အာသန္နံ ဂါမာ၊ သမီပံ ဂါမာ၊ သမီပံ သဒ္ဓမ္မာ. ဒုတိယာ စ တတိယာ စ၊ အန္တိကံ ဂါမံ၊ အန္တိကံ ဂါမေန ဝါ. အာသန္နံ ဂါမံ၊ အာသန္နံ ဂါမေန ဝါ. သမီပံ ဂါမံ. သမီပံ ဂါမေန ဝါ. သမီပံ သဒ္ဓမ္မံ၊ သမီပံ သဒ္ဓမ္မေန ဝါ ဣစ္စေဝမာဒိ.
အဒ္ဓနိမ္မာနေ – ဣတော မထုရာယ စတူသု ယောဇနေသု သင်္ကဿံ နာမ နဂရံ အတ္ထိ၊ တတ္ထ ဗဟူ ဇနာ ဝသန္တိ ဣစ္စေဝမာဒိ.
ကာလနိမ္မာနေ – ဣတော ဘိက္ခဝေ ဧကနဝုတိကပ္ပေ ဝိပဿီ နာမ ဘဂဝါ လောကေ ဥဒပါဒိ၊ ဣတော တိဏ္ဏံ မာသာနံ အစ္စယေန ပရိနိဗ္ဗာယိဿတိ ဣစ္စေဝမာဒိ.
တွာလောပေ ကမ္မာဓိကရဏေသု – ပါသာဒါ သင်္ကမေယျ၊ ပါသာဒံ အဘိရုဟိတွာ ဝါ. ပဗ္ဗတာ သင်္ကမေယျ၊ ပဗ္ဗတံ အဘိရုဟိတွာ ဝါ. ဟတ္ထိက္ခန္ဓာ သင်္ကမေယျ၊ ဟတ္ထိက္ခန္ဓံ အဘိရုဟိတွာ ဝါ. အာသနာ ဝုဋ္ဌဟေယျ. အာသနေ နိသီဒိတွာ ဝါ ဣစ္စေဝမာဒိ.
ဒိသာယောဂေ – အဝိစိတော ယာဝ ဥပရိဘဝဂ္ဂမန္တရေ ဗဟူ သတ္တနိကာယာ ဝသန္တိ၊ ယတော ခေမံ တတော ဘယံ၊ ပုရတ္ထိမတော၊ ဒက္ခိဏတော၊ ပစ္ဆိမတော၊ ဥတ္တရတော အဂ္ဂီ ပဇ္ဇလန္တိ၊ ယတော အဿောသုံ ဘဂဝန္တံ၊ ဥဒ္ဓံ ပါဒတလာ အဓော ကေသမတ္ထကာ ဣစ္စေဝမာဒိ.
ဝိဘတ္တေ – ယတော ပဏီတတရော ဝါ ဝိသိဋ္ဌတရော ဝါ နတ္ထိ. ဆဋ္ဌီ စ၊ ဆန္နဝုတီနံ ပါသဏ္ဍာနံ၊ ဓမ္မာနံ ပဝရံ ယဒိဒံ သုဂတဝိနယော ဣစ္စေဝမာဒိ.
အာရပ္ပယောဂေ – ဂါမဓမ္မာ ဝသလဓမ္မာ အသဒ္ဓမ္မာ အာရတိ ဝိရတိ ပဋိဝိရတိ၊ ပါဏာတိပါတာ ဝေရမဏီ ဣစ္စေဝမာဒိ.
သုဒ္ဓေ – လောဘနိယေဟိ ဓမ္မေဟိ သုဒ္ဓေါ အသံသဋ္ဌော၊ မာတိတော စ ပိတိတော စ သုဒ္ဓေါ အသံသဋ္ဌော အနုပကုဒ္ဓေါ အဂရဟိတော ဣစ္စေဝမာဒိ.
ပမောစနေ – ပရိမုတ္တော ဒုက္ခသ္မာတိ ဝဒါမိ၊ မုတ္တောသ္မိ မာရဗန္ဓနာ၊ န တေ မုစ္စန္တိ မစ္စုနာ ဣစ္စေဝမာဒိ.
ဟေတွတ္ထေ – ကသ္မာ ဟေတုနာ၊ ကေန ဟေတုနာ၊ ကိဿ ဟေတုနာ၊ ကသ္မာ နု တုမှံ ဒဟရာ န မီယရေ၊ ကသ္မာ ဣဓေဝ မရဏံ ဘဝိဿတိ ဣစ္စေဝမာဒိ.
ဝိဝိတ္တတ္ထေ – ဝိဝိတ္တော ပါပကာ ဓမ္မာ၊ ဝိဝိစ္စေဝ ကာမေဟိ ဝိဝိစ္စ အကုသလေဟိ ဓမ္မေဟိ ဣစ္စေဝမာဒိ.
ပမာဏေ – ဒီဃသော နဝဝိဒတ္ထိယော သုဂတဝိဒတ္ထိယာ ပမာဏိကာ ကာရေတဗ္ဗာ၊ မဇ္ဈိမဿ ပုရိသဿ အဍ္ဎ တေဠသဟတ္ထာ ဣစ္စေဝမာဒိ.
ပုဗ္ဗယောဂေ – ပုဗ္ဗေဝ သမ္မောဓာ ဣစ္စေဝမာဒိ.
ဗန္ဓနတ္ထေ – သတသ္မာ ဗန္ဓော နရော. တတိယာ စ၊ သတေန ဗန္ဓော နရော ရညာ ဣဏတ္ထေန ဣစ္စေဝမာဒိ.
ဂုဏဝစနေ – ပုညာယ သုဂတိံ ယန္တိ၊ စာဂါယ ဝိပုလံ ဓနံ၊ ပညာယ ဝိမုတ္တိမနော၊ ဣဿရိယာယ ဇနံ ရက္ခတိ ရာဇာ ဣစ္စေဝမာဒိ.
ပဉှေ တွာလောပေ ကမ္မာဓိကရဏေသု – အဘိဓမ္မာ ပုစ္ဆန္တိ၊ အဘိဓမ္မံ သုတွာ၊ အဘိဓမ္မေ ဌတွာ ဝါ. ဝိနယာ ပုစ္ဆန္တိ၊ ဝိနယံ သုတွာ၊ ဝိနယေ ဌတွာ ဝါ. ဒုတိယာ စ တတိယာ စ၊ အဘိဓမ္မံ၊ အဘိဓမ္မေန ဝါ. ဝိနယံ၊ ဝိနယေန ဝါ. ဧဝ သုတ္တာ၊ ဂေယျာ၊ ဂါထာယ၊ ဝေယျာကရဏာ၊ ဥဒါနာ၊ ဣတိဝုတ္တကာ၊ ဇာတကာ၊ အဗ္ဘုတဓမ္မာ၊ ဝေဒလ္လာ ဣစ္စေဝမာဒိ.
ကထနေ တွာလောပေ ကမ္မာဓိကရဏေသု – အဘိဓမ္မာ ကထယန္တိ၊ အဘိဓမ္မံ သုတွာ၊ အဘိဓမ္မေ ဌတွာ ဝါ. ဝိနယာ ကထယန္တိ၊ ဝိနယံ သုတွာ၊ ဝိနယေ ဌတွာ ဝါ. ဒုတိယာ စ တတိယာ စ၊ အဘိဓမ္မံ၊ အဘိဓမ္မေန ဝါ. ဝိနယံ ဝိနယေန ဝါ. ဧဝံ သုတ္တာ၊ ဂေယျာ၊ ဂါထာယ၊ ဝေယျာကရဏာ၊ ဥဒါနာ၊ ဣတိဝုတ္တကာ၊ ဇာတကာ၊ အဗ္ဘုတဓမ္မာ၊ ဝေဒလ္လာ ဣစ္စေဝမာဒိ.
ထောကေ – ထောကာ မုစ္စန္တိ. အပ္ပမတ္တကာ မုစ္စန္တိ၊ ကိစ္ဆာ မုစ္စန္တိ. တတိယာ စ. ထောကေန၊ အပ္ပမတ္တကေန၊ ကိစ္ဆေန ဝါ ဣစ္စေဝမာဒိ.
အကတ္တရိစ – ကမ္မဿ ကတတ္တာ ဥပစိတတ္တာ ဥဿန္နတ္တာ ဝိပုလတ္တာ စက္ခုဝိညာဏံ ဥပ္ပန္နံ ဟောတိ ဣစ္စေဝမာဒိ.
စဂ္ဂဟဏေန သေသေသုပိ ယေ မယာ နောပဒိဋ္ဌာ အပါဒါနပယောဂိကာ၊ တေ ပယောဂဝိစက္ခဏေဟိ ယထာယောဂံ ယောဇေတဗ္ဗာ.
၂၇၆. ၊ ၃၀၂. ယဿ ဒါတုကာမော ရောစတေ ဓာရယတေ ဝါ တံ သမ္ပဒါနံ.
ယဿ ဝါ ဒါတုကာမော ယဿ ဝါရောစတေ၊ ယဿ ဝါ ဓာရယတေ၊ တံ ကာရကံ သမ္ပဒါနသညံ ဟောတိ.
သမဏဿ စီဝရံ ဒဒါတိ၊ သမဏဿ ရောစတေ သစ္စံ၊ ဒေဝဒတ္တဿ သုဝဏ္ဏစ္ဆတ္တံ ဓာရယတေ ယညဒတ္တော.
သမ္ပဒါနမိစ္စနေန ကွတ္ထော? သမ္ပဒါနေ စတုတ္ထီ.
ဝါတိ ဝိကပ္ပနတ္ထံ၊ ဓာတုနာမာနံ ပယောဂေ ဝါ ဥပသဂ္ဂပ္ပယောဂေ ဝါ နိပါတပ္ပယောဂေ ဝါ သတိ အတ္ထဝိကပ္ပနတ္ထံ ဝါတိ ပဒံ ပယုဇ္ဇတိ.
၂၇၇. ၊ ၃၀၃. သိလာဃ ဟနု ဌာ သပ ဓာရ ပိဟ ကုဓ ဒုဟိဿောသူယ ရာဓိက္ခ ပစ္စာသုဏ အနုပတိဂိဏ ပုဗ္ဗကတ္တာရောစနတ္ထ တဒတ္ထ တုမတ္ထာလမတ္ထ မညာနာဒရပ္ပါဏိနိ၊ ဂတျတ္ထကမ္မနိ၊ အာသီသတ္ထ သမ္မုတိ ဘိယျ သတ္တမျတ္ထေသု စ.
သိလာဃ ဟနု ဌာ သပ ဓာရ ပိဟ ကုဓ ဒုဟ ဣဿဣစ္စေတေသံ ဓာတူနံ ပယောဂေ၊ ဥသူယတ္ထာနဉ္စ ပယောဂေ၊ ရာဓိက္ခပ္ပယောဂေ၊ ပစ္စာသုဏအနုပတိဂိဏာနံ ပုဗ္ဗကတ္တရိ၊ အာရောစနတ္ထေ၊ တဒတ္ထေ၊ တုမတ္ထေ၊ အလမတ္ထေ၊ မညတိပ္ပယောဂေ အနာဒရေ အပ္ပါဏိနိ၊ ဂတျတ္ထာနံ ဓာတူနံ ကမ္မနိ၊ အာသီသတ္ထေ စ သမ္မုတိ ဘိယျ သတ္တမျတ္ထေသု စ၊ တံ ကာရကံ သမ္ပဒါနသညံ ဟောတိ.
သိလာဃပ္ပယောဂေ တာဝ – ဗုဒ္ဓဿ သိလာဃတေ၊ ဓမ္မဿ သိလာဃတေ၊ သံဃဿ သိလာဃတေ၊ သကံဥပဇ္ဈာယဿ သိလာဃတေ၊ တဝ သိလာဃတေ မမ သိလာဃတေ ဣစ္စေဝမာဒိ.
ဟနုပ္ပယောဂေ – ဟနုတေ တုယှမေဝ၊ ဟနုတေ မယှမေဝ ဣစ္စေဝမာဒိ.
ဌာပယောဂေ – ဥပတိဋ္ဌေယျ သကျပုတ္တာနံ ဝဍ္ဎကီ၊ ဘိက္ခုဿ ဘုဉ္ဇန္တဿ ပါနီယေန ဝါ ဝိဓူပနေန ဝါ ဥပတိဋ္ဌေယျ ဘိက္ခုနီ ဣစ္စေဝမာဒိ.
သပပ္ပယောဂေ – တုယှံ သပတေ၊ မယှံ သပတေ ဣစ္စေဝမာဒိ.
ဓာရပ္ပယောဂေ – သုဝဏ္ဏံ တေ ဓာရယတေ ဣစ္စေဝမာဒိ.
ပိဟပ္ပယောဂေ – ဗုဒ္ဓဿ အညတိတ္ထိယာ ပိဟယန္တိ၊ ဒေဝါ ဒဿနကာမာ တေ၊ ယတော ဣစ္ဆာမိ ဘဒ္ဒန္တဿ၊ သမိဒ္ဓါနံ ပိဟယန္တိ ဒလိဒ္ဒါ ဣစ္စေဝမာဒိ.
ကုဓဒုဟဣဿဥသူယပ္ပယောဂေ – ကောဓယတိ ဒေဝ ဒတ္တဿ၊ တဿ ကုဇ္ဈ မဟာဝီရ၊ မာ ရဋ္ဌံ ဝိနဿ ဣဒံ. ဒုဟယတိ ဒိသာနံ မေဃော၊ တိတ္ထိယာ သမဏာနံ ဣဿယန္တိ ဂုဏဂိဒ္ဓေန၊ တိတ္ထိယာ သမဏာနံ ဣဿယန္တိ လာဘဂိဒ္ဓေန၊ ဒုဇ္ဇနာ ဂုဏဝန္တာနံ ဥသူယန္တိ ဂုဏဂိဒ္ဓေန၊ ကာ ဥသူယာ ဝိဇာနတံ ဣစ္စေဝမာဒိ.
ရာဓ ဣက္ခ ဣစ္စေတေသံ ဓာတူနံ ပယောဂေ ယဿ အကထိတဿ ပုစ္ဆနံ ကမ္မဝိက္ချာပနတ္ထဉ္စ၊ တံ ကာရကံ သမ္ပဒါနသညံ ဟောတိ၊ ဒုတိယာ စ.
အာရာဓောဟံ ရညော၊ အာရာဓောဟံ ရာဇာနံ၊ ကျာဟံ အယျာနံ အပရဇ္ဈာမိ၊ ကျာဟံ အယျေ အပရဇ္ဈာမိ၊ စက္ခုံ ဇနဿ ဒဿနာယ တံ ဝိယ မညေ၊ အာယသ္မတော ဥပါလိတ္ထေရဿ ဥပသမ္ပဒါပေက္ခော ဥပတိဿော၊ အာယသ္မန္တံ ဝါ ဣစ္စေဝမာဒိ.
ပစ္စာသုဏ အနုပတိဂိဏာနံ ပုဗ္ဗကတ္တရိ သုဏောတိဿ ပစ္စာယောဂေ ယဿ ကမ္မုနော ပုဗ္ဗဿ ယော ကတ္တာ၊ သော သမ္ပဒါနသညော ဟောတိ.
တံ ယထာ? ဘဂဝါ ဘိက္ခူ ဧတဒဝေါစ.
ဘိက္ခူတိ အကထီတ ကမ္မံ၊ ဧတန္တိ ကထိတကမ္မံ. ယဿ ကမ္မုနော ပုဗ္ဗဿ ယော ကတ္တာ၊ သော‘ဘဂဝါ’တိ ‘‘ယော ကရောတိ သ ကတ္တာ’’တိ သုတ္တဝစနေန ကတ္တုသညော. ဧဝံ ယဿ ကမ္မုနော ပုဗ္ဗဿ ယော ကတ္တာ၊ သော သမ္ပဒါနသညော ဟောတိ.
တံ ယထာ? တေ ဘိက္ခူ ဘဂဝတော ပစ္စဿောသုံ၊ အာသုဏန္တိ ဗုဒ္ဓဿ ဘိက္ခူ.
ဂိဏဿ အနုပတိယောဂေ ယဿ ကမ္မုနော ပုဗ္ဗဿ ယော ကတ္တာ၊ သော သမ္ပဒါနသညော ဟောတိ.
တံ ယထာ? ဘိက္ခု ဇနံ ဓမ္မံ သာဝေတိ၊ တဿ ဘိက္ခုနော ဇနော အနုဂိဏာတိ၊ တဿ ဘိက္ခုနော ဇနော ပတိဂိဏာတိ.
ယော ဝဒေတိ သ‘ကတ္တာ’တိ၊
ဝုတ္တံ ‘ကမ္မ’န္တိ ဝုစ္စတိ၊
ယော ပဋိဂ္ဂါဟကော တဿ၊
‘သမ္ပဒါနံ’ ဝိဇာနိယာ.
ဣစ္စေဝမာဒိ.
အာရောစနတ္ထေ – အာရောစယာမိ ဝေါ ဘိက္ခဝေ၊ အာမန္တယာမိ ဝေါ ဘိက္ခဝေ၊ ပဋိဝေဒယာမိ ဝေါ ဘိက္ခဝေ၊ အာရောစယာမိ တေ မဟာရာဇ၊ အာမန္တယာမိ တေ မဟာရာဇ၊ ပဋိဝေဒယာမိ တေ မဟာရာဇ ဣစ္စေဝမာဒိ.
တဒတ္ထေ – ဦနဿ ပါရိပူရိယာ တံ စီဝရံ နိက္ခိပိတဗ္ဗံ. ဗုဒ္ဓဿ အတ္ထာယ၊ ဓမ္မဿ အတ္ထာယ၊ သံဃဿ အတ္ထာယ၊ ဇီဝိတံ ပရိစ္စဇာမိ ဣစ္စေဝမာဒိ.
တုမတ္ထေ -လောကာနုကမ္ပာယ အတ္ထာယ ဟိတာယ သုခါယ ဒေဝမနုဿာနံ ဗုဒ္ဓေါ လောကေ ဥပ္ပဇ္ဇတိ. ဘိက္ခူနံ ဖာသုဝိဟာရာယ ဝိနယော ပညတ္တော ဣစ္စေဝမာဒိ.
အလမတ္ထပ္ပယောဂေ-အလမိတိ အရဟတိ ပဋိက္ခိတ္တေသု. အလံ မေ ဗုဒ္ဓေါ၊ အလံ မေ ရဇ္ဇံ၊ အလံ ဘိက္ခု ပတ္တဿ၊ အလံ မလ္လော မလ္လဿ၊ အရဟတိ မလ္လော မလ္လဿ. ပဋိက္ခိတ္တေ အလံ တေ ရူပံ ကရဏီယံ၊ အလံ မေ ဟိရညသုဝဏ္ဏေန ဣစ္စေဝမာဒိ.
မညတိပ္ပယောဂေ အနာဒရေ အပ္ပါဏိနိ-ကဋ္ဌဿ တုဝံ မညေ၊ ကလိင်္ဂရဿ တုဝံ မညေ.
အနာဒရေတိ ကိမတ္ထံ? သုဝဏ္ဏံ ဝိယ တံ မညေ.
အပ္ပါဏိနီတိ ကိမတ္ထံ? ဂဒြဘံ တုဝံ မညေ ဣစ္စေဝမာဒိ.
ဂတျတ္ထကမ္မနိ-ဂါမဿ ပါဒေန ဂတော၊ နဂရဿ ပါဒေန ဂတော၊ အပ္ပေါ သဂ္ဂါယ ဂစ္ဆတိ၊ သဂ္ဂဿ ဂမနေန ဝါ၊ မူလာယ ပဋိကဿေယျ သံဃော. ဒုတိယာ စ၊ ဂါမံ ပါဒေန ဂတော၊ နဂရံ ပါဒေန ဂတော၊ အပ္ပေါ သဂ္ဂံ ဂစ္ဆတိ၊ သဂ္ဂံ ဂမနေန ဝါ၊ မူလံ ပဋိကဿေယျ သံဃော ဣစ္စေဝမာဒိ.
အာသီသတ္ထေ-အာယသ္မတော ဒီဃာယုကော ဟောတု၊ ဘဒ္ဒံ ဘဝတော ဟောတု၊ ကုသလံ ဘဝတော ဟောတု၊ အနာမယံ ဘဝတော ဟောတု၊ သုခံ ဘဝတော ဟောတု၊ သွာဂတံ ဘဝတော ဟောတု၊ အတ္ထော ဘဝတော ဟောတု၊ ဟိတံ ဘဝတော ဟောတု ဣစ္စေဝမာဒိ.
သမ္မုတိပ္ပယောဂေ– အညတြ သံဃသမ္မုတိယာ ဘိက္ခုဿ ဝိပ္ပဝတ္ထုံ န ဝဋ္ဋတိ၊ သာဓု သမ္မုတိ မေ တဿ ဘဂဝတော ဒဿနာယ ဣစ္စေဝမာဒိ.
ဘိယျပ္ပယောဂေ – ဘိယျောသော မတ္တာယံ ဣစ္စေဝမာဒိ.
သတ္တမျတ္ထေ – တုယှဉ္စဿ အာဝိ ကရောမိ၊ တဿ မေ သက္ကော ပါတုရဟောသိ ဣစ္စေဝမာဒိ.
အတ္ထဂ္ဂဟဏေန ဗဟူသု အက္ခရပ္ပယောဂေသု ဒိဿတိ.
တံ ယထာ? ဥပမံ မတ ကရိဿာမိ၊ ဓမ္မံ ဝေါ ဒေသေဿာမိ.
သာရတ္ထေ စ – ဒေသေတု ဘန္တေ ဘဂဝါ ဓမ္မံ ဘိက္ခူနံ. တဿ ဖာသု ဝိဟာရာယ ဟောတိ၊ ဧတဿ ပဟိဏေယျ၊ ယထာ နော ဘဂဝါ ဗျာကရေယျ၊ တထာပိ တေသံ ဗျာကရိဿာမ၊ ကပ္ပတိ သမဏာနံ အာယောဂေါ၊ အမှာကံ မဏိနာ အတ္ထော၊ ကိမတ္ထော မေ ဗုဒ္ဓေန၊ သေယျော မေ အတ္ထော၊ ဗဟူပကာရာ ဘန္တေ မဟာပဇာ ပတိဂေါတမီ ဘဂဝတော၊ ဗဟူပကာရာ ဘိက္ခဝေ မာတာပိတရော ပုတ္တာနံ ဣစ္စေဝမာဒိ.
သေသေသု အက္ခရပ္ပယောဂေသုပိ အညေပိ ပယောဂါ ပယောဂဝိစက္ခဏေဟိ ယောဇေတဗ္ဗာ.
စဂ္ဂဟဏံ ဝိကပ္ပနတ္ထဝါဂ္ဂဟဏာနုကဍ္ဎနတ္ထံ. ယေ ကေစိ သဒ္ဒါ သမ္ပဒါနပ္ပယောဂိကာ မယာ နောပဒိဋ္ဌာ၊ တေသံ ဂဟဏတ္ထံ ဣဓ ဝိကပ္ပီယတိ ဝါသဒ္ဒေါ.
တံ ယထာ? ဘိက္ခုသံဃဿ ပဘူ အယံ ဘဂဝါ၊ ဒေသဿ ပဘူ အယံ ရာဇာ. ခေတ္တဿ ပဘူ အယံ ဂဟပတိ၊ အရညဿ ပဘူ အယံ လုဒ္ဒကော ဣစ္စေဝမာဒိ. ကွစိ ဒုတိယာ တတိယာ ပဉ္စမီ ဆဋ္ဌီ သတ္တမျတ္ထေသု စ.
၁၇၈. ၊ ၃၂၀. ယောဓာရော တမောကာသံ.
ယော အာဓာရော၊ တံ ဩကာသသညံ ဟောတိ. သွာဓာရော စတုဗ္ဗိဓော ဗျာပိကော၊ ဩပသိလေသိကော၊ ဝေသယိကော သာမီပိကော စာတိ.
တတ္ထ ဗျာပိကော တာဝ–ဇလေသု ခီရံ တိဋ္ဌတိ၊ တိလေသု တေလံ၊ ဥစ္ဆူသု ရသော.
ဩပသိလေသိကော–ပရိယင်္ကေ ရာဇာ သေတိ၊ အာသနေ ဥပဝိဋ္ဌော သံဃော.
ဝေသယိကော–ဘူမီသု မနုဿာ စရန္တိ၊ အန္တလိက္ခေ ဝါယူ ဝါယန္တိ. အာကာသေ သကုဏာ ပက္ခန္ဒန္တိ.
သာမီပိကော–ဝနေ ဟတ္ထိနော စရန္တိ၊ ဂင်္ဂါယံ ဃောသော တိဋ္ဌတိ၊ ဝဇေ ဂါဝေါ ဒုဟန္တိ၊ သာဝတ္ထိယံ ဝိဟရတိ ဇေတဝနေ.
ဩကာသမိစ္စနေန ကွတ္ထော? ဩကာသေ သတ္တမီ.
၂၇၉. ၊ ၂၉၂. ယေန ဝါ ကယိရတေ တံ ကရဏံ.
ယေန ဝါ ကယိရတေ၊ ယေန ဝါ ပဿတိ၊ ယေန ဝါ သုဏာတိ၊ တံ ကာရကံ ကရဏသညံ ဟောတိ.
ဒတ္တေန ဝိဟိံ လုနာတိ၊ ဝါသိယာ ကဋ္ဌံ တစ္ဆတိ၊ ဖရသုနာ ရုက္ခံ ဆိန္ဒတိ၊ ကုဒါလေန ပထဝိံ ခဏတိ၊ သတ္ထေန ကမ္မံ ကရောတိ. စက္ခုနာ ရူပံ ပဿတိ.
ကရဏမိစ္စနေန ကွတ္ထော? ကရဏေ တတိယာ.
၂၈၀. ၊ ၂၈၅. ယံ ကရောတိ တံ ကမ္မံ.
ယံ ဝါ ကရောတိ၊ ယံ ဝါ ပဿတိ၊ ယံ ဝါ သုဏာတိ၊ တံ ကာရကံ ကမ္မသညံ ဟောတိ.
ဆတ္တံ ကရောတိ၊ ရထံ ကရောတိ၊ ရူပံ ပဿတိ၊ သဒ္ဒံ သုဏာတိ၊ ကဏ္ဋကံ မဒ္ဒတိ၊ ဝိသံ ဂိလတိ.
ကမ္မမိစ္စနေန ကွတ္ထော? ကမ္မတ္ထေ ဒုတိယာ.
၂၈၁. ၊ ၂၉၄. ယော ကရောတိ သ ကတ္တာ.
ယော ကရောတိ၊ သော ကတ္တုသညော ဟောတိ.
အဟိနာ ဒဋ္ဌော နရော၊ ဂရုဠေန ဟတော နာဂေါ. ဗုဒ္ဓေန ဇိတော မာရော၊ ဥပဂုတ္တေန မာရော ဗန္ဓော.
ကတ္တုဣစ္စနေန ကွတ္ထော? ကတ္တရိ စ.
၂၈၂. ၊ ၂၉၅. ယော ကာရေတိ သ ဟေတု.
ယော ကတ္တာရံ ကာရေတိ၊ သော ဟေတုသညော ဟောတိ၊ ကတ္တာ စ.
သော ပုရိသော တံ ပုရိသံ ကမ္မံ ကာရေတိ သော ပုရိသော တေန ပုရိသေန ကမ္မံ ကာရေတိ၊ သော ပုရိသော တဿ ပုရိသဿ ကမ္မံ ကာရေတိ. ဧဝံ ဟာရေတိ ပါဌေတိ ပါစေတိ၊ ဓာရေတိ.
ဟေတုဣစ္စနေန ကွတ္ထော? ဓာတူဟိ ဏေ ဏယ ဏာပေ ဏာပယာ ကာရိတာနိ ဟေတွတ္ထေ.
၂၈၃. ၊ ၃၁၆. ယဿ ဝါ ပရိဂ္ဂဟော တံ သာမီ.
ယဿ ဝါ ပရိဂ္ဂဟော၊ တံ သာမီသညံ ဟောတိ.
တဿ ဘိက္ခုနော ပဋိဝီသော၊ တဿ ဘိက္ခုနော ပတ္တော၊ တဿ ဘိက္ခုနော စီဝရံ၊ အတ္တနော မုခံ.
သာမီဣစ္စနေန ကွတ္ထော? သာမိသ္မိံ ဆဋ္ဌီ.
၂၈၄. ၊ ၂၈၃. လိင်္ဂတ္ထေ ပဌမာ.
လိင်္ဂတ္ထာဘိဓာနမတ္တေ ပဌမာဝိဘတ္တိ ဟောတိ.
ပုရိသော၊ ပုရိသာ၊ ဧကော၊ ဒွေ၊ စ၊ ဝါ၊ ဟေ၊ အဟေ၊ ရေ၊ အရေ.
၂၈၅. ၊ ၇၀. အာလပနေ စ.
အာလပနတ္ထာ ဓိကေ လိင်္ဂတ္ထာဘိဓာနမတ္တေ စ ပဌမာဝိဘတ္တိ ဟောတိ.
ဘော ပုရိသ၊ ဘဝန္တော ပုရိသာ၊ ဘော ရာဇ၊ ဘဝန္တော ရာဇာနော၊ ဟေ သခေ၊ ဟေ သခိနော.
၂၈၆. ၊ ၂၉၁. ကရဏေ တတိယာ.
ကရဏကာရကေ တတိယာဝိဘတ္တိ ဟောတိ.
အဂ္ဂိနာ ကုဋိံ ဈာပေတိ၊ မနသာ စေ ပဒုဋ္ဌေန၊ မနသာ စေ ပသန္နေန၊ ကာယေန ကမ္မံ ကရောတိ.
၂၈၇. ၊ ၂၉၉. သဟာဒိယောဂေ စ.
သဟာဒိယောဂတ္ထေ စ တတိယာဝိဘတ္တိ ဟောတိ.
သဟာပိ ဂဂ္ဂေန သံဃော ဥပေါသထံ ကရေယျ၊ ဝိနာပိ ဂဂ္ဂေန၊ မဟတာ ဘိက္ခုသံဃေန သဒ္ဓိံ၊ သဟဿေန သမံ မိတာ.
၂၈၈. ၊ ၂၉၃. ကတ္တရိ စ.
ကတ္တရိ စ တတိယာဝိဘတ္တိ ဟောတိ.
ရညာ ဟတော ပေါသော၊ ယက္ခေန ဒိန္နော ဝရော၊ အဟိနာ ဒဋ္ဌော နရော.
၂၈၉. ၊ ၂၉၇. ဟေတွတ္ထေ စ.
ဟေတွတ္ထေ စ တတိယာဝိဘတ္တိ ဟောတိ.
အန္နေန ဝသတိ၊ ဓမ္မေန ဝသတိ၊ ဝိဇ္ဇာယ ဝသတိ၊ သက္ကာရေန ဝသတိ.
၂၉၀. ၊ ၂၉၈. သတ္တမျတ္ထေ စ.
သတ္တမျတ္ထေ စ တတိယာဝိဘတ္တိ ဟောတိ.
တေန ကာလေန၊ တေန သမယေန. (ယေန ကာလေန၊ ယေန သမယေန၊) တေန ခေါ ပန သမယေန.
၂၉၁. ၊ ၂၉၉. ယေနင်္ဂဝိကာရော.
ယေန ဗျာဓိမတာ အင်္ဂေန အင်္ဂိနော ဝိကာရော လက္ခီယတေ. တတ္ထ တတိယာဝိဘတ္တိ ဟောတိ.
အက္ခိနာ ကာဏော၊ ဟတ္ထေန ကုဏီ၊ ကာဏံ ပဿတိ နေတ္တေန၊ ပါဒေန ခဉ္ဇော၊ ပိဋ္ဌိယာ ခုဇ္ဇော.
၂၉၂. ၊ ၃၀၀. ဝိသေသနေ စ.
ဝိသေသနတ္ထေ စ တတိယာဝိဘတ္တိ ဟောတိ.
ဂေါတ္တေန ဂေါတမော နာထော၊ သုဝဏ္ဏေန အဘိရူပေါ၊ တပသာ ဥတ္တမော.
၂၉၃. ၊ ၃၀၁. သမ္ပဒါနေ စတုတ္ထီ.
သမ္ပဒါနကာရကေ စတုတ္ထီဝိဘတ္တိ ဟောတိ.