စတုတ္ထကဏ္ဍ

၃၀. ၊ ၅၈. အံ ဗျဉ္ဇနေ နိဂ္ဂဟိတံ.

နိဂ္ဂဟိတံ ခေါ ဗျဉ္ဇနေ ပရေ အံ ဣတိ ဟောတိ.

ဧဝံ ဝုတ္တေ၊ တံ သာဓူတိ ပဋိဿုဏိတွာ.

၃၁. ၊ ၄၉. ဝဂ္ဂန္တံ ဝါ ဝဂ္ဂေ.

ဝဂ္ဂဘူတေ ဗျဉ္ဇနေ ပရေ နိဂ္ဂဟိတံ ခေါ ဝဂ္ဂန္တံ ဝါ ပပ္ပေါတိ.

တန္နိစ္စုတံ၊ ဓမ္မဉ္စရေ သုစရိတံ၊ စိရပ္ပဝါသိံ ပုရိသံ. သန္တန္တဿ မနံ ဟောတိ၊ တင်္ကာရုဏိကံ၊ ဧဝင်္ခေါ ဘိက္ခဝေ သိက္ခိတဗ္ဗံ.

ဝါဂ္ဂဟဏေနနိဂ္ဂဟိတံ ခေါ လကာရာဒေသော ဟောတိ. ပုဂ္ဂလံ.

ဝါတိ ကသ္မာ? န တံ ကမ္မံ ကတံ သာဓု.

၃၂. ၊ ၅၀. ဧဟေ ဥံ.

ဧကာရဟကာရေ ပရေ နိဂ္ဂဟိတံ ခေါ ဉကာရံ ပပ္ပေါတိ ဝါ.

ပစ္စတ္တညေဝ ပရိနိဗ္ဗာယိဿာမိ၊ တညေဝေတ္ထ ပဋိပုစ္ဆိဿာမိ၊ ဧဝဉှိ ဝေါ ဘိက္ခဝေ သိက္ခိတဗ္ဗံ. တဉှိ တဿ မုသာ ဟောတိ.

ဝါတိ ကသ္မာ? ဧဝမေတံ အဘိညာယ၊ ဧဝံ ဟောတိ သုဘာသိတံ.

၃၃. ၊ ၅၀. သယေ စ.

နိဂ္ဂဟိတံ ခေါ ယကာရေ ပရေ သဟ ယကာရေန ဉကာရံ ပပ္ပေါတိ ဝါ.

သညောဂေါ၊ သညုတ္တံ.

ဝါတိ ကသ္မာ? သံယောဂေါ၊ သံယုတ္တံ.

၃၄. ၊ ၅၂. မဒါ သရေ.

နိဂ္ဂဟိတဿ ခေါ သရေ ပရေ မကာရဒကာရာဒေသာ ဟောန္တိ ဝါ.

တမဟံ ဗြူမိ ဗြာဟ္မဏံ၊ ဧတဒဝေါစ သတ္ထာ.

ဝါတိ ကသ္မာ? အက္ကောစ္ဆိ မံ အဝဓိ မံ၊ အဇိနိ မံ အဟာသိ မေ.

၃၅. ၊ ၃၄. ယ ဝ မ ဒ န တ ရ လာ စာဂမာ.

သရေ ပရေ ယကာရော ဝကာရော မကာရော ဒကာရော နကာရော တကာရော ရကာရော လကာရော ဣမေ အာဂမာ ဟောန္တိ ဝါ.

နယိမဿ ဝိဇ္ဇာ၊ ယထယိဒံ စိတ္တံ. မိဂီ ဘန္တာ ဝုဒိက္ခတိ၊ သိတ္တာ တေ လဟု မေဿတိ၊ အသိတ္တာ တေ ဂရု မေဿတိ. အဿော ဘဒြော ကသာမိဝ၊ သမ္မဒညာ ဝိမုတ္တာနံ. မနသာဒညာ ဝိမုတ္တာနံ၊ အတ္တဒတ္ထမဘိညာယ. စိရံနာယတိ၊ ဣတော နာယတိ. ယသ္မာတိဟ ဘိက္ခဝေ၊ တသ္မာတိဟ ဘိက္ခဝေ၊ အဇ္ဇတဂ္ဂေ ပါဏုပေတံ. သဗ္ဘိရေဝ သမာသေထ၊ အာရဂ္ဂေရိဝ သာသပေါ၊ သာသပေါရိဝ အာရဂ္ဂါ. ဆဠဘိညာ၊ သဠာယတနံ.

ဝါတိ ကသ္မာ? ဧဝံ မဟိဒ္ဓိယာ ဧသာ၊ အက္ကောစ္ဆိ မံ အဝဓိ မံ၊ အဇိနိ မံ အဟာသိ မေ၊ အဇေယျော အနုဂါမိကော.

စဂ္ဂဟဏေန ဣဓေဝ မကာရဿ ပကာရော ဟောတိ. စိရပ္ပဝါသိံ ပုရိသံ.

ကကာရဿ စ ဒကာရော ဟောတိ. သဒတ္ထပသုတော သိယာ.

ဒကာရဿ စ တကာရော ဟောတိ၊ သုဂတော.

၃၆. ၊ ၄၇. ကွစိ ဩ ဗျဉ္ဇနေ.

ဗျဉ္ဇနေ ပရေ ကွစိ ဩကာရာဂမော ဟောတိ.

အတိပ္ပဂေါ ခေါ တာဝ သာဝတ္ထိယံ ပိဏ္ဍာယ စရိတုံ. ပရောသဟဿံ.

ကွစီကိ ကသ္မာ? ဧထ ပဿထိမံ လောကံ၊ အန္ဓီဘူတော အယံ လောကော.

၃၇. ၊ ၅၇. နိဂ္ဂဟိတဉ္စ.

နိဂ္ဂဟိတဉ္စာဂမော ဟောတိ သရေ ဝါ ဗျဉ္ဇနေ ဝါ ပရေ ကွစိ.

စက္ခုံဥဒပါဒိ၊ အဝံသိရော၊ ယာဝဉ္စိဓ ဘိက္ခဝေ ပုရိမံ ဇာတိံ သရာမိ၊ အဏုံထူလာနိ သဗ္ဗသော၊ မနောပုဗ္ဗင်္ဂမာ ဓမ္မာ.

ကွစီတိ ကသ္မာ? ဣဓေဝ နံ ပသံသန္တိ၊ ပေစ္စ သဂ္ဂေ ပမောဒတိ၊ န ဟိ ဧတေဟိ ယာနေဟိ၊ ဂစ္ဆေယျ အဂတံ ဒိသံ.

စဂ္ဂဟဏေန ဝိသဒ္ဒဿ စ ပကာရော ဟောတိ. ပစေဿတိ၊ ဝိစေဿတိ ဝါ.

၃၈. ၊ ၅၃. ကွစိ လောပံ.

နိဂ္ဂဟိတံ ခေါ သရေ ပရေ ကွစိ လောပံ ပပ္ပေါတိ.

တာသာဟံ သန္တိကေ၊ ဝိဒူနဂ္ဂမိတိ.

ကွစီတိ ကသ္မာ? အဟမေဝ နူန ဗာလော ဧတမတ္ထံ ဝိဒိတွာန.

၃၉. ၊ ၅၄. ဗျဉ္ဇနေ စ.

နိဂ္ဂဟိတံ ခေါ ဗျဉ္ဇနေ ပရေ ကွစိ လောပံ ပပ္ပေါတိ.

အရိယသစ္စာနဒဿနံ၊ ဧတံ ဗုဒ္ဓါနသာသနံ.

ကွစီတိ ကသ္မာ? ဧတံ မင်္ဂလမုတ္တမံ၊ တံ ဝေါ ဝဒါမိ ဘဒ္ဒန္တေ.

၄၀. ၊ ၅၅. ပရော ဝါသရော.

နိဂ္ဂဟိတမှာ ပရော သရော လောပံ ပပ္ပေါတိ ဝါ.

ဘာသိတံ အဘိနန္ဒုန္တိ၊ ဥတ္တတ္တံဝ၊ ယထာဗီဇံဝ၊ ယထာဓညံဝ.

ဝါတိ ကသ္မာ? အဟမေဝ နူန ဗာလော၊ ဧတဒဟောသိ.

၄၁. ၊ ၅၆. ဗျဉ္ဇနော စ ဝိသညောဂေါ.

နိဂ္ဂဟိတမှာ ပရသ္မိံ သရေ လုတ္တေ ယဒိ ဗျဉ္ဇနော သသညောဂေါ ဝိသညောဂေါ ဟောတိ.

ဧဝံသ တေ အာသဝေါ၊ ပုပ္ဖံသာ ဥပ္ပဇ္ဇိ.

လုတ္တေတိ ကသ္မာ? ဧဝမဿ ဝိဒူနဂ္ဂမိတိ.

စဂ္ဂဟဏေန တိဏ္ဏံ ဗျဉ္ဇနာနမန္တရေ ယေ သရူပါ၊ တေသမ္ပိ လောပေါ ဟောတိ. အဂျာဂါရံ၊ ပဋိသန္ထာရဝုတျဿ.

ဣတိ သန္ဓိကပ္ပေ စတုတ္ထော ကဏ္ဍော.