၆. အာနန္ဒသုတ္တံ

၃၇. ဧကံ သမယံ အာယသ္မာ အာနန္ဒော ကောသမ္ဗိယံ ဝိဟရတိ ဃောသိတာရာမေ. တတြ ခေါ အာယသ္မာ အာနန္ဒော ဘိက္ခူ အာမန္တေသိ – ‘‘အာဝုသော ဘိက္ခဝေ’’တိ. ‘‘အာဝုသော’’တိ ခေါ တေ ဘိက္ခူ အာယသ္မတော အာနန္ဒဿ ပစ္စဿောသုံ. အာယသ္မာ အာနန္ဒော ဧတဒဝေါစ –

‘‘အစ္ဆရိယံ၊ အာဝုသော၊ အဗ္ဘုတံ၊ အာဝုသော! ယာဝဉ္စိဒံ တေန ဘဂဝတာ ဇာနတာ ပဿတာ အရဟတာ သမ္မာသမ္ဗုဒ္ဓေန သမ္ဗာဓေ ဩကာသာဓိဂမော အနုဗုဒ္ဓေါ သတ္တာနံ ဝိသုဒ္ဓိယာ သောကပရိဒေဝါနံ သမတိက္ကမာယ ဒုက္ခဒေါမနဿာနံ အတ္ထင်္ဂမာယ ဉာယဿ အဓိဂမာယ နိဗ္ဗာနဿ သစ္ဆိကိရိယာယ. တဒေဝ နာမ စက္ခုံ ဘဝိဿတိ တေ ရူပါ တဉ္စာယတနံ နော ပဋိသံဝေဒိဿတိ [ပဋိသံဝေဒယတိ (က.)]. တဒေဝ နာမ သောတံ ဘဝိဿတိ တေ သဒ္ဒါ တဉ္စာယတနံ နော ပဋိသံဝေဒိဿတိ. တဒေဝ နာမ ဃာနံ ဘဝိဿတိ တေ ဂန္ဓာ တဉ္စာယတနံ နော ပဋိသံဝေဒိဿတိ. သာဝ နာမ ဇိဝှါ ဘဝိဿတိ တေ ရသာ တဉ္စာယတနံ နော ပဋိသံဝေဒိဿတိ. သောဝ နာမ ကာယော ဘဝိဿတိ တေ ဖောဋ္ဌဗ္ဗာ တဉ္စာယတနံ နော ပဋိသံဝေဒိဿတီ’’တိ.

ဧဝံ ဝုတ္တေ အာယသ္မာ ဥဒါယီ အာယသ္မန္တံ အာနန္ဒံ ဧတဒဝေါစ – ‘‘သညီမေဝ နု ခေါ၊ အာဝုသော အာနန္ဒ၊ တဒါယတနံ နော ပဋိသံဝေဒေတိ ဥဒါဟု အသညီ’’တိ? ‘‘သညီမေဝ ခေါ၊ အာဝုသော၊ တဒါယတနံ နော ပဋိသံဝေဒေတိ၊ နော အသညီ’’တိ.

‘‘ကိံသညီ ပနာဝုသော၊ တဒါယတနံ နော ပဋိသံဝေဒေတီ’’တိ? ‘‘ဣဓာဝုသော၊ ဘိက္ခု၊ သဗ္ဗသော ရူပသညာနံ သမတိက္ကမာ ပဋိဃသညာနံ အတ္ထင်္ဂမာ နာနတ္တသညာနံ အမနသိကာရာ ‘အနန္တော အာကာသော’တိ အာကာသာနဉ္စာယတနံ ဥပသမ္ပဇ္ဇ ဝိဟရတိ. ဧဝံသညီပိ ခေါ၊ အာဝုသော၊ တဒါယတနံ နော ပဋိသံဝေဒေတိ.

‘‘ပုန စပရံ၊ အာဝုသော၊ ဘိက္ခု သဗ္ဗသော အာကာသာနဉ္စာယတနံ သမတိက္ကမ္မ ‘အနန္တံ ဝိညာဏ’န္တိ ဝိညာဏဉ္စာယတနံ ဥပသမ္ပဇ္ဇ ဝိဟရတိ. ဧဝံသညီပိ ခေါ၊ အာဝုသော၊ တဒါယတနံ နော ပဋိသံဝေဒေတိ.

‘‘ပုန စပရံ၊ အာဝုသော၊ ဘိက္ခု သဗ္ဗသော ဝိညာဏဉ္စာယတနံ သမတိက္ကမ္မ ‘နတ္ထိ ကိဉ္စီ’တိ အာကိဉ္စညာယတနံ ဥပသမ္ပဇ္ဇ ဝိဟရတိ. ဧဝံသညီပိ ခေါ၊ အာဝုသော၊ တဒါယတနံ နော ပဋိသံဝေဒေတီ’’တိ.

‘‘ဧကမိဒါဟံ၊ အာဝုသော၊ သမယံ သာကေတေ ဝိဟရာမိ အဉ္ဇနဝနေ မိဂဒါယေ. အထ ခေါ၊ အာဝုသော၊ ဇဋိလဝါသိကာ [ဇဋိလဂါဟိယာ (သီ. ပီ.)၊ ဇဍိလဘာဂိကာ (သျာ.)] ဘိက္ခုနီ ယေနာဟံ တေနုပသင်္ကမိ၊ ဥပသင်္ကမိတွာ မံ အဘိဝါဒေတွာ ဧကမန္တံ အဋ္ဌာသိ. ဧကမန္တံ ဌိတာ ခေါ၊ အာဝုသော၊ ဇဋိလဝါသိကာ ဘိက္ခုနီ မံ ဧတဒဝေါစ – ‘ယာယံ၊ ဘန္တေ အာနန္ဒ၊ သမာဓိ န စာဘိနတော န စာပနတော န စ သသင်္ခါရနိဂ္ဂယှဝါရိတဂတော [သသင်္ခါရနိဂ္ဂယှဝါရိတဝတော (သီ. သျာ. ကံ. ပီ.)၊ သသင်္ခါရနိဂ္ဂယှဝါရိဝါဝဋော (က.) အ. နိ. ၃.၁၀၂၊ ၅.၂၇၊ ဒီ. နိ. ၃.၃၅၅]၊ ဝိမုတ္တတ္တာ ဌိတော၊ ဌိတတ္တာ သန္တုသိတော၊ သန္တုသိတတ္တာ နော ပရိတဿတိ. အယံ၊ ဘန္တေ အာနန္ဒ၊ သမာဓိ ကိံဖလော ဝုတ္တော ဘဂဝတာ’’’တိ?

‘‘ဧဝံ ဝုတ္တေ၊ သောဟံ၊ အာဝုသော၊ ဇဋိလဝါသိကံ ဘိက္ခုနိံ ဧတဒဝေါစံ – ‘ယာယံ၊ ဘဂိနိ၊ သမာဓိ န စာဘိနတော န စာပနတော န စ သသင်္ခါရနိဂ္ဂယှဝါရိတဂတော၊ ဝိမုတ္တတ္တာ ဌိတော၊ ဌိတတ္တာ သန္တုသိတော၊ သန္တုသိတတ္တာ နော ပရိတဿတိ. အယံ၊ ဘဂိနိ၊ သမာဓိ အညာဖလော ဝုတ္တော ဘဂဝတာ’တိ. ဧဝံသညီပိ ခေါ၊ အာဝုသော၊ တဒါယတနံ နော ပဋိသံဝေဒေတီ’’တိ. ဆဋ္ဌံ.