၁၀. အာဃာတပဋိဝိနယသုတ္တံ

၃၀. [ဒီ. နိ. ၃.၃၄၀၊ ၃၅၉] ‘‘နဝယိမေ၊ ဘိက္ခဝေ၊ အာဃာတပဋိဝိနယာ. ကတမေ နဝ? ‘အနတ္ထံ မေ အစရိ [အစရီတိ (သျာ.)၊ ဧဝံ ‘‘စရတိ၊ စရိဿတိ’’ ပဒေသုပိ]၊ တံ ကုတေတ္ထ လဗ္ဘာ’တိ အာဃာတံ ပဋိဝိနေတိ၊ ‘အနတ္ထံ မေ စရတိ၊ တံ ကုတေတ္ထ လဗ္ဘာ’တိ အာဃာတံ ပဋိဝိနေတိ၊ ‘အနတ္ထံ မေ စရိဿတိ၊ တံ ကုတေတ္ထ လဗ္ဘာ’တိ အာဃာတံ ပဋိဝိနေတိ၊ ပိယဿ မေ မနာပဿ အနတ္ထံ အစရိ။ပေ။ အနတ္ထံ စရတိ။ပေ။ ‘အနတ္ထံ စရိဿတိ၊ တံ ကုတေတ္ထ လဗ္ဘာ’တိ အာဃာတံ ပဋိဝိနေတိ၊ အပ္ပိယဿ မေ အမနာပဿ အတ္ထံ အစရိ။ပေ။ အတ္ထံ စရတိ။ပေ။ ‘အတ္ထံ စရိဿတိ၊ တံ ကုတေတ္ထ လဗ္ဘာ’တိ အာဃာတံ ပဋိဝိနေတိ. ဣမေ ခေါ၊ ဘိက္ခဝေ၊ နဝ အာဃာတပဋိဝိနယာ’’တိ. ဒသမံ.