၁၁. အနုပုဗ္ဗနိရောဓသုတ္တံ

၃၁. ‘‘နဝယိမေ၊ ဘိက္ခဝေ၊ အနုပုဗ္ဗနိရောဓာ. ကတမေ နဝ? ပဌမံ ဈာနံ သမာပန္နဿ ကာမသညာ [အာမိဿသညာ (သျာ.)] နိရုဒ္ဓါ ဟောတိ၊ ဒုတိယံ ဈာနံ သမာပန္နဿ ဝိတက္ကဝိစာရာ နိရုဒ္ဓါ ဟောန္တိ၊ တတိယံ ဈာနံ သမာပန္နဿ ပီတိ နိရုဒ္ဓါ ဟောတိ၊ စတုတ္ထံ ဈာနံ သမာပန္နဿ အဿာသပဿာသာ နိရုဒ္ဓါ ဟောန္တိ၊ အာကာသာနဉ္စာယတနံ သမာပန္နဿ ရူပသညာ နိရုဒ္ဓါ ဟောတိ၊ ဝိညာဏဉ္စာယတနံ သမာပန္နဿ အာကာသာနဉ္စာယတနသညာ နိရုဒ္ဓါ ဟောတိ၊ အာကိဉ္စညာယတနံ သမာပန္နဿ ဝိညာဏဉ္စာယတနသညာ နိရုဒ္ဓါ ဟောတိ၊ နေဝသညာနာသညာယတနံ သမာပန္နဿ အာကိဉ္စညာယတနသညာ နိရုဒ္ဓါ ဟောတိ၊ သညာဝေဒယိတနိရောဓံ သမာပန္နဿ သညာ စ ဝေဒနာ စ နိရုဒ္ဓါ ဟောန္တိ. ဣမေ ခေါ၊ ဘိက္ခဝေ၊ နဝ အနုပုဗ္ဗနိရောဓာ’’တိ [ဒီ. နိ. ၃.၃၄၄၊ ၃၄၉]. ဧကာဒသမံ.

သတ္တာဝါသဝဂ္ဂေါ တတိယော.