၁၀. ဘရိယာသုတ္တံ

၆၃. အထ ခေါ ဘဂဝါ ပုဗ္ဗဏှသမယံ နိဝါသေတွာ ပတ္တစီဝရမာဒါယ ယေန အနာထပိဏ္ဍိကဿ ဂဟပတိဿ နိဝေသနံ တေနုပသင်္ကမိ၊ ဥပသင်္ကမိတွာ ပညတ္တေ အာသနေ နိသီဒိ. တေန ခေါ ပန သမယေန အနာထပိဏ္ဍိကဿ ဂဟပတိဿ နိဝေသနေ မနုဿာ ဥစ္စာသဒ္ဒါ မဟာသဒ္ဒါ ဟောန္တိ. အထ ခေါ အနာထပိဏ္ဍိကော ဂဟပတိ ယေန ဘဂဝါ တေနုပသင်္ကမိ၊ ဥပသင်္ကမိတွာ ဘဂဝန္တံ အဘိဝါဒေတွာ ဧကမန္တံ နိသီဒိ. ဧကမန္တံ နိသိန္နံ ခေါ အနာထပိဏ္ဍိကံ ဂဟပတိံ ဘဂဝါ ဧတဒဝေါစ –

‘‘ကိံ နု တေ၊ ဂဟပတိ၊ နိဝေသနေ မနုဿာ ဥစ္စာသဒ္ဒါ မဟာသဒ္ဒါ ကေဝဋ္ဋာ မညေ မစ္ဆဝိလောပေ’’တိ? ‘‘အယံ၊ ဘန္တေ၊ သုဇာတာ ဃရသုဏှာ အဍ္ဎကုလာ အာနီတာ. သာ နေဝ သဿုံ အာဒိယတိ၊ န သသုရံ အာဒိယတိ၊ န သာမိကံ အာဒိယတိ၊ ဘဂဝန္တမ္ပိ န သက္ကရောတိ န ဂရုံ ကရောတိ န မာနေတိ န ပူဇေတီ’’တိ.

အထ ခေါ ဘဂဝါ သုဇာတံ ဃရသုဏှံ အာမန္တေသိ – ‘‘ဧဟိ၊ သုဇာတေ’’တိ! ‘‘ဧဝံ၊ ဘန္တေ’’တိ ခေါ သုဇာတာ ဃရသုဏှာ ဘဂဝတော ပဋိဿုတွာ ယေန ဘဂဝါ တေနုပသင်္ကမိ၊ ဥပသင်္ကမိတွာ ဘဂဝန္တံ အဘိဝါဒေတွာ ဧကမန္တံ နိသီဒိ. ဧကမန္တံ နိသိန္နံ ခေါ သုဇာတံ ဃရသုဏှံ ဘဂဝါ ဧတဒဝေါစ –

‘‘သတ္တ ခေါ ဣမာ၊ သုဇာတေ၊ ပုရိသဿ ဘရိယာယော. ကတမာ သတ္တ? ဝဓကသမာ၊ စောရီသမာ၊ အယျသမာ၊ မာတာသမာ၊ ဘဂိနီသမာ၊ သခီသမာ၊ ဒါသီသမာ. ဣမာ ခေါ၊ သုဇာတေ၊ သတ္တ ပုရိသဿ ဘရိယာယော. တာသံ တွံ ကတမာ’’တိ? ‘‘န ခေါ အဟံ [နာဟံ (သျာ.)]၊ ဘန္တေ၊ ဣမဿ ဘဂဝတာ သံခိတ္တေန ဘာသိတဿ ဝိတ္ထာရေန အတ္ထံ အာဇာနာမိ. သာဓု မေ၊ ဘန္တေ၊ ဘဂဝါ တထာ ဓမ္မံ ဒေသေတု ယထာဟံ ဣမဿ ဘဂဝတာ သံခိတ္တေန ဘာသိတဿ ဝိတ္ထာရေန အတ္ထံ ဇာနေယျ’’န္တိ. ‘‘တေန ဟိ၊ သုဇာတေ၊ သုဏာဟိ၊ သာဓုကံ မနသိ ကရောဟိ၊ ဘာသိဿာမီ’’တိ. ‘‘ဧဝံ၊ ဘန္တေ’’တိ ခေါ သုဇာတာ ဃရသုဏှာ ဘဂဝတော ပစ္စဿောသိ. ဘဂဝါ ဧတဒဝေါစ –

‘‘ပဒုဋ္ဌစိတ္တာ အဟိတာနုကမ္ပိနီ၊

အညေသု ရတ္တာ အတိမညတေ ပတိံ၊

ဓနေန ကီတဿ ဝဓာယ ဥဿုကာ၊

ယာ ဧဝရူပါ ပုရိသဿ ဘရိယာ၊

‘ဝဓာ စ ဘရိယာ’တိ စ သာ ပဝုစ္စတိ.

‘‘ယံ ဣတ္ထိယာ ဝိန္ဒတိ သာမိကော ဓနံ၊

သိပ္ပံ ဝဏိဇ္ဇဉ္စ ကသိံ အဓိဋ္ဌဟံ၊

အပ္ပမ္ပိ တဿ အပဟာတုမိစ္ဆတိ၊

ယာ ဧဝရူပါ ပုရိသဿ ဘရိယာ၊

‘စောရီ စ ဘရိယာ’တိ စ သာ ပဝုစ္စတိ.

‘‘အကမ္မကာမာ အလသာ မဟဂ္ဃသာ၊

ဖရုသာ စ စဏ္ဍီ ဒုရုတ္တဝါဒိနီ၊

ဥဋ္ဌာယကာနံ အဘိဘုယျ ဝတ္တတိ၊

ယာ ဧဝရူပါ ပုရိသဿ ဘရိယာ၊

‘အယျာ စ ဘရိယာ’တိ စ သာ ပဝုစ္စတိ.

‘‘ယာ သဗ္ဗဒါ ဟောတိ ဟိတာနုကမ္ပိနီ၊

မာတာဝ ပုတ္တံ အနုရက္ခတေ ပတိံ၊

တတော ဓနံ သမ္ဘတမဿ ရက္ခတိ၊

ယာ ဧဝရူပါ ပုရိသဿ ဘရိယာ၊

‘မာတာ စ ဘရိယာ’တိ စ သာ ပဝုစ္စတိ.

‘‘ယထာပိ ဇေဋ္ဌာ ဘဂိနီ ကနိဋ္ဌကာ [ကဏိဋ္ဌာ (သီ.)၊ ကနိဋ္ဌာ (သျာ.)]၊

သဂါရဝါ ဟောတိ သကမှိ သာမိကေ၊

ဟိရီမနာ ဘတ္တုဝသာနုဝတ္တိနီ၊

ယာ ဧဝရူပါ ပုရိသဿ ဘရိယာ၊‘ဘဂိနီ စ ဘရိယာ’တိ စ သာ ပဝုစ္စတိ.

‘‘ယာစီဓ ဒိသွာန ပတိံ ပမောဒတိ၊

သခီ သခါရံဝ စိရဿမာဂတံ၊

ကောလေယျကာ သီလဝတီ ပတိဗ္ဗတာ၊

ယာ ဧဝရူပါ ပုရိသဿ ဘရိယာ၊

‘သခီ စ ဘရိယာ’တိ စ သာ ပဝုစ္စတိ.

‘‘အက္ကုဒ္ဓသန္တာ ဝဓဒဏ္ဍတဇ္ဇိတာ၊

အဒုဋ္ဌစိတ္တာ ပတိနော တိတိက္ခတိ၊

အက္ကောဓနာ ဘတ္တုဝသာနုဝတ္တိနီ၊

ယာ ဧဝရူပါ ပုရိသဿ ဘရိယာ၊

‘ဒါသီ စ ဘရိယာ’တိ စ သာ ပဝုစ္စတိ.

‘‘ယာစီဓ ဘရိယာ ဝဓကာတိ ဝုစ္စတိ၊

‘စောရီ စ အယျာ’တိ စ ယာ ပဝုစ္စတိ၊

ဒုဿီလရူပါ ဖရုသာ အနာဒရာ၊

ကာယဿ ဘေဒါ နိရယံ ဝဇန္တိ တာ.

‘‘ယာစီဓ မာတာ ဘဂိနီ သခီတိ စ၊

‘ဒါသီ စ ဘရိယာ’တိ စ သာ ပဝုစ္စတိ၊

သီလေ ဌိတတ္တာ စိရရတ္တသံဝုတာ၊

ကာယဿ ဘေဒါ သုဂတိံ ဝဇန္တိ တာ’’တိ.

‘‘ဣမာ ခေါ၊ သုဇာတေ၊ သတ္တ ပုရိသဿ ဘရိယာယော. တာသံ တွံ ကတမာ’’တိ? ‘‘အဇ္ဇတဂ္ဂေ မံ၊ ဘန္တေ၊ ဘဂဝါ ဒါသီသမံ သာမိကဿ ဘရိယံ ဓာရေတူ’’တိ. ဒသမံ.