၃. အတိနိဝါသသုတ္တံ

၂၂၃. ‘‘ပဉ္စိမေ၊ ဘိက္ခဝေ၊ အာဒီနဝါ အတိနိဝါသေ. ကတမေ ပဉ္စ? ဗဟုဘဏ္ဍော ဟောတိ ဗဟုဘဏ္ဍသန္နိစယော၊ ဗဟုဘေသဇ္ဇော ဟောတိ ဗဟုဘေသဇ္ဇသန္နိစယော၊ ဗဟုကိစ္စော ဟောတိ ဗဟုကရဏီယော ဗျတ္တော ကိံကရဏီယေသု၊ သံသဋ္ဌော ဝိဟရတိ ဂဟဋ္ဌပဗ္ဗဇိတေဟိ အနနုလောမိကေန ဂိဟိသံသဂ္ဂေန၊ တမှာ စ အာဝါသာ ပက္ကမန္တော သာပေက္ခော ပက္ကမတိ. ဣမေ ခေါ၊ ဘိက္ခဝေ၊ ပဉ္စ အာဒီနဝါ အတိနိဝါသေ.

‘‘ပဉ္စိမေ၊ ဘိက္ခဝေ၊ အာနိသံသာ သမဝတ္ထဝါသေ. ကတမေ ပဉ္စ? န ဗဟုဘဏ္ဍော ဟောတိ န ဗဟုဘဏ္ဍသန္နိစယော၊ န ဗဟုဘေသဇ္ဇော ဟောတိ န ဗဟုဘေသဇ္ဇသန္နိစယော၊ န ဗဟုကိစ္စော ဟောတိ န ဗဟုကရဏီယော န ဗျတ္တော ကိံကရဏီယေသု၊ အသံသဋ္ဌော ဝိဟရတိ ဂဟဋ္ဌပဗ္ဗဇိတေဟိ အနနုလောမိကေန ဂိဟိသံသဂ္ဂေန၊ တမှာ စ အာဝါသာ ပက္ကမန္တော အနပေက္ခော ပက္ကမတိ. ဣမေ ခေါ၊ ဘိက္ခဝေ၊ ပဉ္စ အာနိသံသာ သမဝတ္ထဝါသေ’’တိ. တတိယံ.