၄. မစ္ဆရီသုတ္တံ

၂၂၄. ‘‘ပဉ္စိမေ၊ ဘိက္ခဝေ၊ အာဒီနဝါ အတိနိဝါသေ. ကတမေ ပဉ္စ? အာဝါသမစ္ဆရီ ဟောတိ၊ ကုလမစ္ဆရီ ဟောတိ၊ လာဘမစ္ဆရီ ဟောတိ၊ ဝဏ္ဏမစ္ဆရီ ဟောတိ၊ ဓမ္မမစ္ဆရီ ဟောတိ. ဣမေ ခေါ၊ ဘိက္ခဝေ၊ ပဉ္စ အာဒီနဝါ အတိနိဝါသေ.

‘‘ပဉ္စိမေ၊ ဘိက္ခဝေ၊ အာနိသံသာ သမဝတ္ထဝါသေ. ကတမေ ပဉ္စ? န အာဝါသမစ္ဆရီ ဟောတိ၊ န ကုလမစ္ဆရီ ဟောတိ၊ န လာဘမစ္ဆရီ ဟောတိ၊ န ဝဏ္ဏမစ္ဆရီ ဟောတိ၊ န ဓမ္မမစ္ဆရီ ဟောတိ. ဣမေ ခေါ၊ ဘိက္ခဝေ၊ ပဉ္စ အာနိသံသာ သမဝတ္ထဝါသေ’’တိ. စတုတ္ထံ.