၂. ဒုတိယဒီဃစာရိကသုတ္တံ

၂၂၂. ‘‘ပဉ္စိမေ၊ ဘိက္ခဝေ၊ အာဒီနဝါ ဒီဃစာရိကံ အနဝတ္ထစာရိကံ အနုယုတ္တဿ ဝိဟရတော. ကတမေ ပဉ္စ? အနဓိဂတံ နာဓိဂစ္ဆတိ၊ အဓိဂတာ ပရိဟာယတိ၊ အဓိဂတေနေကစ္စေန အဝိသာရဒေါ ဟောတိ၊ ဂါဠှံ ရောဂါတင်္ကံ ဖုသတိ၊ န စ မိတ္တဝါ ဟောတိ. ဣမေ ခေါ၊ ဘိက္ခဝေ၊ ပဉ္စ အာဒီနဝါ ဒီဃစာရိကံ အနဝတ္ထစာရိကံ အနုယုတ္တဿ ဝိဟရတော.

‘‘ပဉ္စိမေ၊ ဘိက္ခဝေ၊ အာနိသံသာ သမဝတ္ထစာရေ. ကတမေ ပဉ္စ? အနဓိဂတံ အဓိဂစ္ဆတိ၊ အဓိဂတာ န ပရိဟာယတိ၊ အဓိဂတေနေကစ္စေန ဝိသာရဒေါ ဟောတိ၊ န ဂါဠှံ ရောဂါတင်္ကံ ဖုသတိ၊ မိတ္တဝါ စ ဟောတိ. ဣမေ ခေါ၊ ဘိက္ခဝေ၊ ပဉ္စ အာနိသံသာ သမဝတ္ထစာရေ’’တိ. ဒုတိယံ.