၁. ပဌမဒီဃစာရိကသုတ္တံ

၂၂၁. ‘‘ပဉ္စိမေ၊ ဘိက္ခဝေ၊ အာဒီနဝါ ဒီဃစာရိကံ အနဝတ္ထစာရိကံ အနုယုတ္တဿ ဝိဟရတော. ကတမေ ပဉ္စ? အဿုတံ န သုဏာတိ၊ သုတံ န ပရိယောဒါပေတိ၊ သုတေနေကစ္စေန အဝိသာရဒေါ ဟောတိ၊ ဂါဠှံ [ဗာဠှံ (သျာ.)] ရောဂါတင်္ကံ ဖုသတိ၊ န စ မိတ္တဝါ ဟောတိ. ဣမေ ခေါ၊ ဘိက္ခဝေ၊ ပဉ္စ အာဒီနဝါ ဒီဃစာရိကံ အနဝတ္ထစာရိကံ အနုယုတ္တဿ ဝိဟရတော.

‘‘ပဉ္စိမေ၊ ဘိက္ခဝေ၊ အာနိသံသာ သမဝတ္ထစာရေ. ကတမေ ပဉ္စ? အဿုတံ သုဏာတိ၊ သုတံ ပရိယောဒါပေတိ၊ သုတေနေကစ္စေန ဝိသာရဒေါ ဟောတိ၊ န ဂါဠှံ ရောဂါတင်္ကံ ဖုသတိ၊ မိတ္တဝါ စ ဟောတိ. ဣမေ ခေါ၊ ဘိက္ခဝေ၊ ပဉ္စ အာနိသံသာ သမဝတ္ထစာရေ’’တိ. ပဌမံ.