၃. သီလသုတ္တံ

၂၁၃. [မဟာဝ. ၂၀၉၊ ဒီ. နိ. ၃.၃၁၆] ‘‘ပဉ္စိမေ၊ ဘိက္ခဝေ၊ အာဒီနဝါ ဒုဿီလဿ သီလဝိပတ္တိယာ. ကတမေ ပဉ္စ? ဣဓ၊ ဘိက္ခဝေ၊ ဒုဿီလော သီလဝိပန္နော ပမာဒါဓိကရဏံ မဟတိံ ဘောဂဇာနိံ နိဂစ္ဆတိ. အယံ၊ ဘိက္ခဝေ၊ ပဌမော အာဒီနဝေါ ဒုဿီလဿ သီလဝိပတ္တိယာ.

‘‘ပုန စပရံ၊ ဘိက္ခဝေ၊ ဒုဿီလဿ သီလဝိပန္နဿ ပါပကော ကိတ္တိသဒ္ဒေါ အဗ္ဘုဂ္ဂစ္ဆတိ. အယံ၊ ဘိက္ခဝေ၊ ဒုတိယော အာဒီနဝေါ ဒုဿီလဿ သီလဝိပတ္တိယာ.

‘‘ပုန စပရံ၊ ဘိက္ခဝေ၊ ဒုဿီလော သီလဝိပန္နော ယညဒေဝ ပရိသံ ဥပသင်္ကမတိ – ယဒိ ခတ္တိယပရိသံ၊ ယဒိ ဗြာဟ္မဏပရိသံ၊ ယဒိ ဂဟပတိပရိသံ၊ ယဒိ သမဏပရိသံ – အဝိသာရဒေါ ဥပသင်္ကမတိ မင်္ကုဘူတော. အယံ၊ ဘိက္ခဝေ၊ တတိယော အာဒီနဝေါ ဒုဿီလဿ သီလဝိပတ္တိယာ.

‘‘ပုန စပရံ၊ ဘိက္ခဝေ၊ ဒုဿီလော သီလဝိပန္နော သမ္မူဠှော ကာလံ ကရောတိ. အယံ၊ ဘိက္ခဝေ၊ စတုတ္ထော အာဒီနဝေါ ဒုဿီလဿ သီလဝိပတ္တိယာ.

‘‘ပုန စပရံ၊ ဘိက္ခဝေ၊ ဒုဿီလော သီလဝိပန္နော ကာယဿ ဘေဒါ ပရံ မရဏာ အပါယံ ဒုဂ္ဂတိံ ဝိနိပါတံ နိရယံ ဥပပဇ္ဇတိ. အယံ၊ ဘိက္ခဝေ၊ ပဉ္စမော အာဒီနဝေါ ဒုဿီလဿ သီလဝိပတ္တိယာ. ဣမေ ခေါ၊ ဘိက္ခဝေ၊ ပဉ္စ အာဒီနဝါ ဒုဿီလဿ သီလဝိပတ္တိယာ.

‘‘ပဉ္စိမေ၊ ဘိက္ခဝေ၊ အာနိသံသာ သီလဝတော သီလသမ္ပဒါယ. ကတမေ ပဉ္စ? ဣဓ၊ ဘိက္ခဝေ၊ သီလဝါ သီလသမ္ပန္နော အပ္ပမာဒါဓိကရဏံ မဟန္တံ ဘောဂက္ခန္ဓံ အဓိဂစ္ဆတိ. အယံ၊ ဘိက္ခဝေ၊ ပဌမော အာနိသံသော သီလဝတော သီလသမ္ပဒါယ.

‘‘ပုန စပရံ၊ ဘိက္ခဝေ၊ သီလဝတော သီလသမ္ပန္နဿ ကလျာဏော ကိတ္တိသဒ္ဒေါ အဗ္ဘုဂ္ဂစ္ဆတိ. အယံ၊ ဘိက္ခဝေ၊ ဒုတိယော အာနိသံသော သီလဝတော သီလသမ္ပဒါယ.

‘‘ပုန စပရံ၊ ဘိက္ခဝေ၊ သီလဝါ သီလသမ္ပန္နော ယညဒေဝ ပရိသံ ဥပသင်္ကမတိ – ယဒိ ခတ္တိယပရိသံ၊ ယဒိ ဗြာဟ္မဏပရိသံ၊ ယဒိ ဂဟပတိပရိသံ၊ ယဒိ သမဏပရိသံ – ဝိသာရဒေါ ဥပသင်္ကမတိ အမင်္ကုဘူတော. အယံ ဘိက္ခဝေ၊ တတိယော အာနိသံသော သီလဝတော သီလသမ္ပဒါယ.

‘‘ပုန စပရံ၊ ဘိက္ခဝေ၊ သီလဝါ သီလသမ္ပန္နော အသမ္မူဠှော ကာလံ ကရောတိ. အယံ၊ ဘိက္ခဝေ၊ စတုတ္ထော အာနိသံသော သီလဝတော သီလသမ္ပဒါယ.

‘‘ပုန စပရံ၊ ဘိက္ခဝေ၊ သီလဝါ သီလသမ္ပန္နော ကာယဿ ဘေဒါ ပရံ မရဏာ သုဂတိံ သဂ္ဂံ လောကံ ဥပပဇ္ဇတိ. အယံ၊ ဘိက္ခဝေ၊ ပဉ္စမော အာနိသံသော သီလဝတော သီလသမ္ပဒါယ. ဣမေ ခေါ၊ ဘိက္ခဝေ၊ ပဉ္စ အာနိသံသာ သီလဝတော သီလသမ္ပဒါယာ’’တိ. တတိယံ.