၄. ဗဟုဘာဏိသုတ္တံ

၂၁၄. ‘‘ပဉ္စိမေ၊ ဘိက္ခဝေ၊ အာဒီနဝါ ဗဟုဘာဏိသ္မိံ ပုဂ္ဂလေ. ကတမေ ပဉ္စ? မုသာ ဘဏတိ၊ ပိသုဏံ ဘဏတိ၊ ဖရုသံ ဘဏတိ၊ သမ္ဖပ္ပလာပံ ဘဏတိ၊ ကာယဿ ဘေဒါ ပရံ မရဏာ အပါယံ ဒုဂ္ဂတိံ ဝိနိပါတံ နိရယံ ဥပပဇ္ဇတိ. ဣမေ ခေါ၊ ဘိက္ခဝေ၊ ပဉ္စ အာဒီနဝါ ဗဟုဘာဏိသ္မိံ ပုဂ္ဂလေ.

‘‘ပဉ္စိမေ၊ ဘိက္ခဝေ၊ အာနိသံသာ မန္တဘာဏိသ္မိံ ပုဂ္ဂလေ. ကတမေ ပဉ္စ? န မုသာ ဘဏတိ၊ န ပိသုဏံ ဘဏတိ၊ န ဖရုသံ ဘဏတိ၊ န သမ္ဖပ္ပလာပံ ဘဏတိ၊ ကာယဿ ဘေဒါ ပရံ မရဏာ သုဂတိံ သဂ္ဂံ လောကံ ဥပပဇ္ဇတိ. ဣမေ ခေါ၊ ဘိက္ခဝေ၊ ပဉ္စ အာနိသံသာ မန္တဘာဏိသ္မိံ ပုဂ္ဂလေ’’တိ. စတုတ္ထံ.