၈. ဒန္တကဋ္ဌသုတ္တံ

၂၀၈. ‘‘ပဉ္စိမေ၊ ဘိက္ခဝေ၊ အာဒီနဝါ ဒန္တကဋ္ဌဿ အခါဒနေ. ကတမေ ပဉ္စ? အစက္ခုဿံ၊ မုခံ ဒုဂ္ဂန္ဓံ ဟောတိ၊ ရသဟရဏိယော န ဝိသုဇ္ဈန္တိ၊ ပိတ္တံ သေမှံ ဘတ္တံ ပရိယောနန္ဓတိ [ပရိယောနဒ္ဓန္တိ (သီ. ပီ.)၊ ပရိယောနဒ္ဓတိ (သျာ. ကံ. က.) စူဠဝ. ၂၈၂ ပဿိတဗ္ဗံ]၊ ဘတ္တမဿ နစ္ဆာဒေတိ. ဣမေ ခေါ၊ ဘိက္ခဝေ၊ ပဉ္စ အာဒီနဝါ ဒန္တကဋ္ဌဿ အခါဒနေ.

‘‘ပဉ္စိမေ၊ ဘိက္ခဝေ၊ အာနိသံသာ ဒန္တကဋ္ဌဿ ခါဒနေ. ကတမေ ပဉ္စ? စက္ခုဿံ၊ မုခံ န ဒုဂ္ဂန္ဓံ ဟောတိ၊ ရသဟရဏိယော ဝိသုဇ္ဈန္တိ၊ ပိတ္တံ သေမှံ ဘတ္တံ န ပရိယောနန္ဓတိ၊ ဘတ္တမဿ ဆာဒေတိ. ဣမေ ခေါ၊ ဘိက္ခဝေ၊ ပဉ္စ အာနိသံသာ ဒန္တကဋ္ဌဿ ခါဒနေ’’တိ. အဋ္ဌမံ.