၉. ဂီတဿရသုတ္တံ

၂၀၉. [စူဠဝ. ၂၄၉] ‘‘ပဉ္စိမေ၊ ဘိက္ခဝေ၊ အာဒီနဝါ အာယတကေန ဂီတဿရေန ဓမ္မံ ဘဏန္တဿ. ကတမေ ပဉ္စ? အတ္တနာပိ တသ္မိံ သရေ သာရဇ္ဇတိ၊ ပရေပိ တသ္မိံ သရေ သာရဇ္ဇန္တိ၊ ဂဟပတိကာပိ ဥဇ္ဈာယန္တိ – ‘ယထေဝ မယံ ဂါယာမ၊ ဧဝမေဝံ ခေါ သမဏာ သကျပုတ္တိယာ ဂါယန္တီ’တိ၊ သရကုတ္တိမ္ပိ နိကာမယမာနဿ သမာဓိဿ ဘင်္ဂေါ ဟောတိ၊ ပစ္ဆိမာ ဇနတာ ဒိဋ္ဌာနုဂတိံ အာပဇ္ဇတိ. ဣမေ ခေါ၊ ဘိက္ခဝေ၊ ပဉ္စ အာဒီနဝါ အာယတကေန ဂီတဿရေန ဓမ္မံ ဘဏန္တဿာ’’တိ. နဝမံ.