၆. မိတ္တသုတ္တံ

၁၄၆. ‘‘ပဉ္စဟိ၊ ဘိက္ခဝေ၊ ဓမ္မေဟိ သမန္နာဂတော ဘိက္ခု မိတ္တော န သေဝိတဗ္ဗော. ကတမေဟိ ပဉ္စဟိ? ကမ္မန္တံ ကာရေတိ၊ အဓိကရဏံ အာဒိယတိ၊ ပါမောက္ခေသု ဘိက္ခူသု ပဋိဝိရုဒ္ဓေါ ဟောတိ၊ ဒီဃစာရိကံ အနဝတ္ထစာရိကံ [အဝတ္ထာနစာရိကံ (သျာ.)] အနုယုတ္တော ဝိဟရတိ၊ နပ္ပဋိဗလော ဟောတိ ကာလေန ကာလံ ဓမ္မိယာ ကထာယ သန္ဒဿေတုံ သမာဒပေတုံ သမုတ္တေဇေတုံ သမ္ပဟံသေတုံ. ဣမေဟိ ခေါ၊ ဘိက္ခဝေ၊ ပဉ္စဟိ ဓမ္မေဟိ သမန္နာဂတော ဘိက္ခု မိတ္တော န သေဝိတဗ္ဗော.

‘‘ပဉ္စဟိ၊ ဘိက္ခဝေ၊ ဓမ္မေဟိ သမန္နာဂတော ဘိက္ခု မိတ္တော သေဝိတဗ္ဗော. ကတမေဟိ ပဉ္စဟိ? န ကမ္မန္တံ ကာရေတိ၊ န အဓိကရဏံ အာဒိယတိ၊ န ပါမောက္ခေသု ဘိက္ခူသု ပဋိဝိရုဒ္ဓေါ ဟောတိ၊ န ဒီဃစာရိကံ အနဝတ္ထစာရိကံ အနုယုတ္တော ဝိဟရတိ၊ ပဋိဗလော ဟောတိ ကာလေန ကာလံ ဓမ္မိယာ ကထာယ သန္ဒဿေတုံ သမာဒပေတုံ သမုတ္တေဇေတုံ သမ္ပဟံသေတုံ. ဣမေဟိ ခေါ၊ ဘိက္ခဝေ၊ ပဉ္စဟိ ဓမ္မေဟိ သမန္နာဂတော ဘိက္ခု မိတ္တော သေဝိတဗ္ဗော’’တိ. ဆဋ္ဌံ.