၇. အသပ္ပုရိသဒါနသုတ္တံ

၁၄၇. ‘‘ပဉ္စိမာနိ၊ ဘိက္ခဝေ၊ အသပ္ပုရိသဒါနာနိ. ကတမာနိ ပဉ္စ? အသက္ကစ္စံ ဒေတိ၊ အစိတ္တီကတွာ [အစိတ္တိကတွာ (ပီ.)၊ အစိတိံ ကတွာ (သျာ.)၊ အစိတ္တိံ ကတွာ (က.)] ဒေတိ၊ အသဟတ္ထာ ဒေတိ၊ အပဝိဒ္ဓံ [အပဝိဋ္ဋံ (သျာ. ကံ.)] ဒေတိ၊ အနာဂမနဒိဋ္ဌိကော ဒေတိ. ဣမာနိ ခေါ၊ ဘိက္ခဝေ၊ ပဉ္စ အသပ္ပုရိသဒါနာနိ.

‘‘ပဉ္စိမာနိ၊ ဘိက္ခဝေ၊ သပ္ပုရိသဒါနာနိ. ကတမာနိ ပဉ္စ? သက္ကစ္စံ ဒေတိ၊ စိတ္တီကတွာ ဒေတိ၊ သဟတ္ထာ ဒေတိ၊ အနပဝိဒ္ဓံ ဒေတိ၊ အာဂမနဒိဋ္ဌိကော ဒေတိ. ဣမာနိ ခေါ၊ ဘိက္ခဝေ၊ ပဉ္စ သပ္ပုရိသဒါနာနီ’’တိ. သတ္တမံ.