၇. ပဌမပါပဓမ္မသုတ္တံ

၂၀၇. ‘‘ပါပဉ္စ ဝေါ၊ ဘိက္ခဝေ၊ ဒေသေဿာမိ၊ ပါပေန ပါပတရဉ္စ၊ ကလျာဏဉ္စ၊ ကလျာဏေန ကလျာဏတရဉ္စ. တံ သုဏာထ။ပေ။.

‘‘ကတမော စ၊ ဘိက္ခဝေ၊ ပါပေါ? ဣဓ၊ ဘိက္ခဝေ၊ ဧကစ္စော ပါဏာတိပါတီ ဟောတိ။ပေ။ မိစ္ဆာဒိဋ္ဌိကော ဟောတိ. အယံ ဝုစ္စတိ၊ ဘိက္ခဝေ၊ ပါပေါ.

‘‘ကတမော စ၊ ဘိက္ခဝေ၊ ပါပေန ပါပတရော? ဣဓ၊ ဘိက္ခဝေ၊ ဧကစ္စော အတ္တနာ စ ပါဏာတိပါတီ ဟောတိ၊ ပရဉ္စ ပါဏာတိပါတေ သမာဒပေတိ။ပေ။ အတ္တနာ စ မိစ္ဆာဒိဋ္ဌိကော ဟောတိ၊ ပရဉ္စ မိစ္ဆာဒိဋ္ဌိယာ သမာဒပေတိ. အယံ ဝုစ္စတိ၊ ဘိက္ခဝေ၊ ပါပေန ပါပတရော.

‘‘ကတမော စ၊ ဘိက္ခဝေ၊ ကလျာဏော? ဣဓ၊ ဘိက္ခဝေ၊ ဧကစ္စော ပါဏာတိပါတာ ပဋိဝိရတော ဟောတိ။ပေ။ သမ္မာဒိဋ္ဌိကော ဟောတိ. အယံ ဝုစ္စတိ၊ ဘိက္ခဝေ၊ ကလျာဏော.

‘‘ကတမော စ၊ ဘိက္ခဝေ၊ ကလျာဏေန ကလျာဏတရော? ဣဓ၊ ဘိက္ခဝေ၊ ဧကစ္စော အတ္တနာ စ ပါဏာတိပါတာ ပဋိဝိရတော ဟောတိ၊ ပရဉ္စ ပါဏာတိပါတာ ဝေရမဏိယာ သမာဒပေတိ။ပေ။ အတ္တနာ စ သမ္မာဒိဋ္ဌိကော ဟောတိ၊ ပရဉ္စ သမ္မာဒိဋ္ဌိယာ သမာဒပေတိ. အယံ ဝုစ္စတိ၊ ဘိက္ခဝေ၊ ကလျာဏေန ကလျာဏတရော’’တိ. သတ္တမံ.