၈. ဒုတိယပါပဓမ္မသုတ္တံ

၂၀၈. ‘‘ပါပဉ္စ ဝေါ၊ ဘိက္ခဝေ၊ ဒေသေဿာမိ၊ ပါပေန ပါပတရဉ္စ၊ ကလျာဏဉ္စ၊ ကလျာဏေန ကလျာဏတရဉ္စ. တံ သုဏာထ၊ သာဓုကံ မနသိကရောထ၊ ဘာသိဿာမီ’’တိ. ဧဝံ။ပေ။ ဧတဒဝေါစ –

‘‘ကတမော စ၊ ဘိက္ခဝေ၊ ပါပေါ? ဣဓ၊ ဘိက္ခဝေ၊ ဧကစ္စော မိစ္ဆာဒိဋ္ဌိကော ဟောတိ။ပေ။ မိစ္ဆာဉာဏီ ဟောတိ၊ မိစ္ဆာဝိမုတ္တိ ဟောတိ. အယံ ဝုစ္စတိ၊ ဘိက္ခဝေ၊ ပါပေါ.

‘‘ကတမော စ၊ ဘိက္ခဝေ၊ ပါပေန ပါပတရော? ဣဓ၊ ဘိက္ခဝေ၊ ဧကစ္စော အတ္တနာ စ မိစ္ဆာဒိဋ္ဌိကော ဟောတိ၊ ပရဉ္စ မိစ္ဆာဒိဋ္ဌိယာ သမာဒပေတိ။ပေ။ အတ္တနာ စ မိစ္ဆာဉာဏီ ဟောတိ၊ ပရဉ္စ မိစ္ဆာဉာဏေ သမာဒပေတိ၊ အတ္တနာ စ မိစ္ဆာဝိမုတ္တိ ဟောတိ၊ ပရဉ္စ မိစ္ဆာဝိမုတ္တိယာ သမာဒပေတိ. အယံ ဝုစ္စတိ၊ ဘိက္ခဝေ၊ ပါပေန ပါပတရော.

‘‘ကတမော စ၊ ဘိက္ခဝေ၊ ကလျာဏော? ဣဓ၊ ဘိက္ခဝေ၊ ဧကစ္စော သမ္မာဒိဋ္ဌိကော ဟောတိ ။ပေ။ သမ္မာဉာဏီ ဟောတိ၊ သမ္မာဝိမုတ္တိ ဟောတိ. အယံ ဝုစ္စတိ၊ ဘိက္ခဝေ၊ ကလျာဏော.

‘‘ကတမော စ၊ ဘိက္ခဝေ၊ ကလျာဏေန ကလျာဏတရော? ဣဓ၊ ဘိက္ခဝေ၊ ဧကစ္စော အတ္တနာ စ သမ္မာဒိဋ္ဌိကော ဟောတိ၊ ပရဉ္စ သမ္မာဒိဋ္ဌိယာ သမာဒပေတိ။ပေ။ အတ္တနာ စ သမ္မာဉာဏီ ဟောတိ၊ ပရဉ္စ သမ္မာဉာဏေ သမာဒပေတိ၊ အတ္တနာ စ သမ္မာဝိမုတ္တိ ဟောတိ၊ ပရဉ္စ သမ္မာဝိမုတ္တိယာ သမာဒပေတိ. အယံ ဝုစ္စတိ၊ ဘိက္ခဝေ၊ ကလျာဏေန ကလျာဏတရော’’တိ. အဋ္ဌမံ.