၆. ဒသမဂ္ဂသုတ္တံ

၂၀၆. ‘‘အသပ္ပုရိသဉ္စ ဝေါ၊ ဘိက္ခဝေ၊ ဒေသေဿာမိ၊ အသပ္ပုရိသေန အသပ္ပုရိသတရဉ္စ၊ သပ္ပုရိသဉ္စ၊ သပ္ပုရိသေန သပ္ပုရိသတရဉ္စ. တံ သုဏာထ။ပေ။.

‘‘ကတမော စ၊ ဘိက္ခဝေ၊ အသပ္ပုရိသော? ဣဓ၊ ဘိက္ခဝေ၊ ဧကစ္စော မိစ္ဆာဒိဋ္ဌိကော ဟောတိ ။ပေ။ မိစ္ဆာဉာဏီ ဟောတိ၊ မိစ္ဆာဝိမုတ္တိ ဟောတိ. အယံ ဝုစ္စတိ၊ ဘိက္ခဝေ၊ အသပ္ပုရိသော.

‘‘ကတမော စ၊ ဘိက္ခဝေ၊ အသပ္ပုရိသေန အသပ္ပုရိသတရော? ဣဓ၊ ဘိက္ခဝေ၊ ဧကစ္စော အတ္တနာ စ မိစ္ဆာဒိဋ္ဌိကော ဟောတိ၊ ပရဉ္စ မိစ္ဆာဒိဋ္ဌိယာ သမာဒပေတိ။ပေ။ အတ္တနာ စ မိစ္ဆာဉာဏီ ဟောတိ၊ ပရဉ္စ မိစ္ဆာဉာဏေ သမာဒပေတိ၊ အတ္တနာ စ မိစ္ဆာဝိမုတ္တိ ဟောတိ၊ ပရဉ္စ မိစ္ဆာဝိမုတ္တိယာ သမာဒပေတိ. အယံ ဝုစ္စတိ၊ ဘိက္ခဝေ၊ အသပ္ပုရိသေန အသပ္ပုရိသတရော.

‘‘ကတမော စ၊ ဘိက္ခဝေ၊ သပ္ပုရိသော? ဣဓ၊ ဘိက္ခဝေ၊ ဧကစ္စော သမ္မာဒိဋ္ဌိကော ဟောတိ။ပေ။ သမ္မာဉာဏီ ဟောတိ၊ သမ္မာဝိမုတ္တိ ဟောတိ. အယံ ဝုစ္စတိ၊ ဘိက္ခဝေ၊ သပ္ပုရိသော.

‘‘ကတမော စ၊ ဘိက္ခဝေ၊ သပ္ပုရိသေန သပ္ပုရိသတရော? ဣဓ၊ ဘိက္ခဝေ၊ ဧကစ္စော အတ္တနာ စ သမ္မာဒိဋ္ဌိကော ဟောတိ၊ ပရဉ္စ သမ္မာဒိဋ္ဌိယာ သမာဒပေတိ။ပေ။ အတ္တနာ စ သမ္မာဉာဏီ ဟောတိ၊ ပရဉ္စ သမ္မာဉာဏေ သမာဒပေတိ၊ အတ္တနာ စ သမ္မာဝိမုတ္တိ ဟောတိ၊ ပရဉ္စ သမ္မာဝိမုတ္တိယာ သမာဒပေတိ. အယံ ဝုစ္စတိ၊ ဘိက္ခဝေ၊ သပ္ပုရိသေန သပ္ပုရိသတရော’’တိ. ဆဋ္ဌံ.