၅. အဋ္ဌင်္ဂိကသုတ္တံ

၂၀၅. ‘‘အသပ္ပုရိသဉ္စ ဝေါ၊ ဘိက္ခဝေ၊ ဒေသေဿာမိ၊ အသပ္ပုရိသေန အသပ္ပုရိသတရဉ္စ၊ သပ္ပုရိသဉ္စ၊ သပ္ပုရိသေန သပ္ပုရိသတရဉ္စ. တံ သုဏာထ။ပေ။.

‘‘ကတမော စ၊ ဘိက္ခဝေ၊ အသပ္ပုရိသော? ဣဓ၊ ဘိက္ခဝေ၊ ဧကစ္စော မိစ္ဆာဒိဋ္ဌိကော ဟောတိ၊ မိစ္ဆာသင်္ကပ္ပေါ ဟောတိ၊ မိစ္ဆာဝါစော ဟောတိ၊ မိစ္ဆာကမ္မန္တော ဟောတိ၊ မိစ္ဆာအာဇီဝေါ ဟောတိ၊ မိစ္ဆာဝါယာမော ဟောတိ၊ မိစ္ဆာသတိ ဟောတိ၊ မိစ္ဆာသမာဓိ ဟောတိ. အယံ ဝုစ္စတိ၊ ဘိက္ခဝေ၊ အသပ္ပုရိသော.

‘‘ကတမော စ၊ ဘိက္ခဝေ၊ အသပ္ပုရိသေန အသပ္ပုရိသတရော? ဣဓ ဘိက္ခဝေ၊ ဧကစ္စော အတ္တနာ စ မိစ္ဆာဒိဋ္ဌိကော ဟောတိ၊ ပရဉ္စ မိစ္ဆာဒိဋ္ဌိယာ သမာဒပေတိ၊ အတ္တနာ စ မိစ္ဆာသင်္ကပ္ပေါ ဟောတိ၊ ပရဉ္စ မိစ္ဆာသင်္ကပ္ပေ သမာဒပေတိ၊ အတ္တနာ စ မိစ္ဆာဝါစော ဟောတိ၊ ပရဉ္စ မိစ္ဆာဝါစာယ သမာဒပေတိ၊ အတ္တနာ စ မိစ္ဆာကမ္မန္တော ဟောတိ၊ ပရဉ္စ မိစ္ဆာကမ္မန္တေ သမာဒပေတိ၊ အတ္တနာ စ မိစ္ဆာအာဇီဝေါ ဟောတိ၊ ပရဉ္စ မိစ္ဆာအာဇီဝေ သမာဒပေတိ၊ အတ္တနာ စ မိစ္ဆာဝါယာမော ဟောတိ၊ ပရဉ္စ မိစ္ဆာဝါယာမေ သမာဒပေတိ၊ အတ္တနာ စ မိစ္ဆာသတိ ဟောတိ၊ ပရဉ္စ မိစ္ဆာသတိယာ သမာဒပေတိ၊ အတ္တနာ စ မိစ္ဆာသမာဓိ ဟောတိ၊ ပရဉ္စ မိစ္ဆာသမာဓိမှိ သမာဒပေတိ. အယံ ဝုစ္စတိ၊ ဘိက္ခဝေ၊ အသပ္ပုရိသေန အသပ္ပုရိသတရော.

‘‘ကတမော စ၊ ဘိက္ခဝေ၊ သပ္ပုရိသော? ဣဓ၊ ဘိက္ခဝေ၊ ဧကစ္စော သမ္မာဒိဋ္ဌိကော ဟောတိ၊ သမ္မာသင်္ကပ္ပေါ ဟောတိ၊ သမ္မာဝါစော ဟောတိ၊ သမ္မာကမ္မန္တော ဟောတိ၊ သမ္မာအာဇီဝေါ ဟောတိ၊ သမ္မာဝါယာမော ဟောတိ၊ သမ္မာသတိ ဟောတိ၊ သမ္မာသမာဓိ ဟောတိ. အယံ ဝုစ္စတိ၊ ဘိက္ခဝေ၊ သပ္ပုရိသော.

‘‘ကတမော စ၊ ဘိက္ခဝေ၊ သပ္ပုရိသေန သပ္ပုရိသတရော? ဣဓ၊ ဘိက္ခဝေ၊ ဧကစ္စော အတ္တနာ စ သမ္မာဒိဋ္ဌိကော ဟောတိ၊ ပရဉ္စ သမ္မာဒိဋ္ဌိယာ သမာဒပေတိ၊ အတ္တနာ စ သမ္မာသင်္ကပ္ပေါ ဟောတိ၊ ပရဉ္စ သမ္မာသင်္ကပ္ပေ သမာဒပေတိ၊ အတ္တနာ စ သမ္မာဝါစော ဟောတိ၊ ပရဉ္စ သမ္မာဝါစာယ သမာဒပေတိ၊ အတ္တနာ စ သမ္မာကမ္မန္တော ဟောတိ၊ ပရဉ္စ သမ္မာကမ္မန္တေ သမာဒပေတိ၊ အတ္တနာ စ သမ္မာအာဇီဝေါ ဟောတိ၊ ပရဉ္စ သမ္မာအာဇီဝေ သမာဒပေတိ၊ အတ္တနာ စ သမ္မာဝါယာမော ဟောတိ၊ ပရဉ္စ သမ္မာဝါယာမေ သမာဒပေတိ၊ အတ္တနာ စ သမ္မာသတိ ဟောတိ၊ ပရဉ္စ သမ္မာသတိယာ သမာဒပေတိ၊ အတ္တနာ စ သမ္မာသမာဓိ ဟောတိ၊ ပရဉ္စ သမ္မာသမာဓိမှိ သမာဒပေတိ. အယံ ဝုစ္စတိ၊ ဘိက္ခဝေ၊ သပ္ပုရိသေန သပ္ပုရိသတရော’’တိ. ပဉ္စမံ.