၄. ဒသကမ္မသုတ္တံ

၂၀၄. ‘‘အသပ္ပုရိသဉ္စ ဝေါ၊ ဘိက္ခဝေ၊ ဒေသေဿာမိ၊ အသပ္ပုရိသေန အသပ္ပုရိသတရဉ္စ၊ သပ္ပုရိသဉ္စ၊ သပ္ပုရိသေန သပ္ပုရိသတရဉ္စ. တံ သုဏာထ။ပေ။.

‘‘ကတမော စ၊ ဘိက္ခဝေ၊ အသပ္ပုရိသော? ဣဓ၊ ဘိက္ခဝေ၊ ဧကစ္စော ပါဏာတိပါတီ ဟောတိ၊ အဒိန္နာဒါယီ ဟောတိ၊ ကာမေသုမိစ္ဆာစာရီ ဟောတိ၊ မုသာဝါဒီ ဟောတိ၊ ပိသုဏဝါစော ဟောတိ၊ ဖရုသဝါစော ဟောတိ၊ သမ္ဖပ္ပလာပီ ဟောတိ၊ အဘိဇ္ဈာလု ဟောတိ၊ ဗျာပန္နစိတ္တော ဟောတိ၊ မိစ္ဆာဒိဋ္ဌိကော ဟောတိ. အယံ ဝုစ္စတိ၊ ဘိက္ခဝေ၊ အသပ္ပုရိသော.

‘‘ကတမော စ၊ ဘိက္ခဝေ၊ အသပ္ပုရိသေန အသပ္ပုရိသတရော? ဣဓ၊ ဘိက္ခဝေ၊ ဧကစ္စော အတ္တနာ စ ပါဏာတိပါတီ ဟောတိ၊ ပရဉ္စ ပါဏာတိပါတေ သမာဒပေတိ။ပေ။ အတ္တနာ စ အဘိဇ္ဈာလု ဟောတိ၊ ပရဉ္စ အဘိဇ္ဈာယ သမာဒပေတိ၊ အတ္တနာ စ ဗျာပန္နစိတ္တော ဟောတိ၊ ပရဉ္စ ဗျာပါဒေ သမာဒပေတိ၊ အတ္တနာ စ မိစ္ဆာဒိဋ္ဌိကော ဟောတိ၊ ပရဉ္စ မိစ္ဆာဒိဋ္ဌိယာ သမာဒပေတိ. အယံ ဝုစ္စတိ၊ ဘိက္ခဝေ၊ အသပ္ပုရိသေန အသပ္ပုရိသတရော.

‘‘ကတမော စ၊ ဘိက္ခဝေ၊ သပ္ပုရိသော? ဣဓ၊ ဘိက္ခဝေ၊ ဧကစ္စော ပါဏာတိပါတာ ပဋိဝိရတော ဟောတိ။ပေ။ အနဘိဇ္ဈာလု ဟောတိ၊ အဗျာပန္နစိတ္တော ဟောတိ၊ သမ္မာဒိဋ္ဌိကော ဟောတိ. အယံ ဝုစ္စတိ၊ ဘိက္ခဝေ၊ သပ္ပုရိသော.

‘‘ကတမော စ၊ ဘိက္ခဝေ၊ သပ္ပုရိသေန သပ္ပုရိသတရော? ဣဓ၊ ဘိက္ခဝေ၊ ဧကစ္စော အတ္တနာ စ ပါဏာတိပါတာ ပဋိဝိရတော ဟောတိ၊ ပရဉ္စ ပါဏာတိပါတာ ဝေရမဏိယာ သမာဒပေတိ။ပေ။ အတ္တနာ စ အနဘိဇ္ဈာလု ဟောတိ၊ ပရဉ္စ အနဘိဇ္ဈာယ သမာဒပေတိ၊ အတ္တနာ စ အဗျာပန္နစိတ္တော ဟောတိ၊ ပရဉ္စ အဗျာပါဒေ သမာဒပေတိ၊ အတ္တနာ စ သမ္မာဒိဋ္ဌိကော ဟောတိ၊ ပရဉ္စ သမ္မာဒိဋ္ဌိယာ သမာဒပေတိ. အယံ ဝုစ္စတိ၊ ဘိက္ခဝေ၊ သပ္ပုရိသေန သပ္ပုရိသတရော’’တိ. စတုတ္ထံ.