၅. ဗြာဟ္မဏသစ္စသုတ္တံ

၁၈၅. ဧကံ သမယံ ဘဂဝါ ရာဇဂဟေ ဝိဟရတိ ဂိဇ္ဈကူဋေ ပဗ္ဗတေ. တေန ခေါ ပန သမယေန သမ္ဗဟုလာ အဘိညာတာ အဘိညာတာ ပရိဗ္ဗာဇကာ သိပ္ပိနိကာတီရေ ပရိဗ္ဗာဇကာရာမေ ပဋိဝသန္တိ၊ သေယျထိဒံ အန္နဘာရော ဝရဓရော သကုလုဒါယီ စ ပရိဗ္ဗာဇကော အညေ စ အဘိညာတာ အဘိညာတာ ပရိဗ္ဗာဇကာ. အထ ခေါ ဘဂဝါ သာယနှသမယံ ပဋိသလ္လာနာ ဝုဋ္ဌိတော ယေန သိပ္ပိနိကာတီရေ ပရိဗ္ဗာဇကာရာမော တေနုပသင်္ကမိ.

တေန ခေါ ပန သမယေန တေသံ အညတိတ္ထိယာနံ ပရိဗ္ဗာဇကာနံ သန္နိသိန္နာနံ သန္နိပတိတာနံ အယမန္တရာ ကထာ ဥဒပါဒိ – ‘‘ဣတိပိ ဗြာဟ္မဏသစ္စာနိ၊ ဣတိပိ ဗြာဟ္မဏသစ္စာနီ’’တိ. အထ ခေါ ဘဂဝါ ယေန တေ ပရိဗ္ဗာဇကာ တေနုပသင်္ကမိ၊ ဥပသင်္ကမိတွာ ပညတ္တေ အာသနေ နိသီဒိ. နိသဇ္ဇ ခေါ ဘဂဝါ တေ ပရိဗ္ဗာဇကေ ဧတဒဝေါစ –

‘‘ကာယ နုတ္ထ၊ ပရိဗ္ဗာဇကာ၊ ဧတရဟိ ကထာယ သန္နိသိန္နာ၊ ကာ စ ပန ဝေါ အန္တရာကထာ ဝိပ္ပကတာ’’တိ? ‘‘ဣဓ၊ ဘော ဂေါတမ၊ အမှာကံ သန္နိသိန္နာနံ သန္နိပတိတာနံ အယမန္တရာကထာ ဥဒပါဒိ – ‘ဣတိပိ ဗြာဟ္မဏသစ္စာနိ၊ ဣတိပိ ဗြာဟ္မဏသစ္စာနီ’’’တိ.

‘‘စတ္တာရိမာနိ၊ ပရိဗ္ဗာဇကာ၊ ဗြာဟ္မဏသစ္စာနိ မယာ သယံ အဘိညာ သစ္ဆိကတွာ ပဝေဒိတာနိ. ကတမာနိ စတ္တာရိ? ဣဓ၊ ပရိဗ္ဗာဇကာ၊ ဗြာဟ္မဏော ဧဝမာဟ – ‘သဗ္ဗေ ပါဏာ အဝဇ္ဈာ’တိ. ဣတိ ဝဒံ ဗြာဟ္မဏော သစ္စံ အာဟ၊ နော မုသာ. သော တေန န သမဏောတိ မညတိ၊ န ဗြာဟ္မဏောတိ မညတိ၊ န သေယျောဟမသ္မီတိ မညတိ၊ န သဒိသောဟမသ္မီတိ မညတိ၊ န ဟီနောဟမသ္မီတိ မညတိ. အပိ စ ယဒေဝ တတ္ထ သစ္စံ တဒဘိညာယ ပါဏာနံယေဝ အနုဒ္ဒယာယ [တဒဘိညာယ အနုဒယာယ (က.)] အနုကမ္ပာယ ပဋိပန္နော ဟောတိ.

‘‘ပုန စပရံ၊ ပရိဗ္ဗာဇကာ၊ ဗြာဟ္မဏော ဧဝမာဟ – ‘သဗ္ဗေ ကာမာ အနိစ္စာ ဒုက္ခာ ဝိပရိဏာမဓမ္မာ’တိ. ဣတိ ဝဒံ ဗြာဟ္မဏော သစ္စမာဟ၊ နော မုသာ. သော တေန န သမဏောတိ မညတိ၊ န ဗြာဟ္မဏောတိ မညတိ၊ န သေယျောဟမသ္မီတိ မညတိ၊ န သဒိသောဟမသ္မီတိ မညတိ၊ န ဟီနောဟမသ္မီတိ မညတိ. အပိ စ ယဒေဝ တတ္ထ သစ္စံ တဒဘိညာယ ကာမာနံယေဝ နိဗ္ဗိဒါယ ဝိရာဂါယ နိရောဓာယ ပဋိပန္နော ဟောတိ.

‘‘ပုန စပရံ၊ ပရိဗ္ဗာဇကာ၊ ဗြာဟ္မဏော ဧဝမာဟ – ‘သဗ္ဗေ ဘဝါ အနိစ္စာ။ပေ။ ဘဝါနံယေဝ နိဗ္ဗိဒါယ ဝိရာဂါယ နိရောဓာယ ပဋိပန္နော ဟောတိ.

‘‘ပုန စပရံ၊ ပရိဗ္ဗာဇကာ၊ ဗြာဟ္မဏော ဧဝမာဟ – ‘နာဟံ ကွစနိ [ကွစန (သီ. သျာ.)] ကဿစိ ကိဉ္စနတသ္မိံ န စ မမ ကွစနိ ကတ္ထစိ ကိဉ္စနတတ္ထီ’တိ. ဣတိ ဝဒံ ဗြာဟ္မဏော သစ္စံ အာဟ၊ နော မုသာ. သော တေန န သမဏောတိ မညတိ၊ န ဗြာဟ္မဏောတိ မညတိ၊ န သေယျောဟမသ္မီတိ မညတိ၊ န သဒိသောဟမသ္မီတိ မညတိ၊ န ဟီနောဟမသ္မီတိ မညတိ. အပိ စ ယဒေဝ တတ္ထ သစ္စံ တဒဘိညာယ အာကိဉ္စညံယေဝ ပဋိပဒံ ပဋိပန္နော ဟောတိ. ဣမာနိ ခေါ၊ ပရိဗ္ဗာဇကာ၊ စတ္တာရိ ဗြာဟ္မဏသစ္စာနိ မယာ သယံ အဘိညာ သစ္ဆိကတွာ ပဝေဒိတာနီ’’တိ. ပဉ္စမံ.