၉. ပဌမအာနန္ဒသုတ္တံ

၃၉. အထ ခေါ အာယသ္မာ အာနန္ဒော ယေန ဘဂဝါ တေနုပသင်္ကမိ၊ ဥပသင်္ကမိတွာ ဘဂဝန္တံ အဘိဝါဒေတွာ ဧကမန္တံ နိသီဒိ. ဧကမန္တံ နိသိန္နော ခေါ အာယသ္မာ အာနန္ဒော ဘဂဝန္တံ ဧတဒဝေါစ – ‘‘‘သံဃဘေဒေါ သံဃဘေဒေါ’တိ၊ ဘန္တေ၊ ဝုစ္စတိ. ကိတ္တာဝတာ နု ခေါ၊ ဘန္တေ၊ သံဃော ဘိန္နော ဟောတီ’’တိ? ‘‘ဣဓာနန္ဒ၊ ဘိက္ခူ အဓမ္မံ ဓမ္မောတိ ဒီပေန္တိ၊ ဓမ္မံ အဓမ္မောတိ ဒီပေန္တိ၊ အဝိနယံ ဝိနယောတိ ဒီပေန္တိ။ပေ။ ပညတ္တံ တထာဂတေန အပညတ္တံ တထာဂတေနာတိ ဒီပေန္တိ. တေ ဣမေဟိ ဒသဟိ ဝတ္ထူဟိ အဝကဿန္တိ အပကဿန္တိ အာဝေနိ ကမ္မာနိ ကရောန္တိ အာဝေနိ ပါတိမောက္ခံ ဥဒ္ဒိသန္တိ. ဧတ္တာဝတာ ခေါ၊ အာနန္ဒ၊ သံဃော ဘိန္နော ဟောတီ’’တိ.

‘‘သမဂ္ဂံ ပန၊ ဘန္တေ၊ သံဃံ ဘိန္ဒိတွာ ကိံ သော ပသဝတီ’’တိ? ‘‘ကပ္ပဋ္ဌိကံ၊ အာနန္ဒ၊ ကိဗ္ဗိသံ ပသဝတီ’’တိ. ‘‘ကိံ ပန၊ ဘန္တေ၊ ကပ္ပဋ္ဌိကံ ကိဗ္ဗိသ’’န္တိ? ‘‘ကပ္ပံ၊ အာနန္ဒ၊ နိရယမှိ ပစ္စတီတိ –

‘‘အာပါယိကော နေရယိကော၊ ကပ္ပဋ္ဌော သံဃဘေဒကော၊

ဝဂ္ဂရတော အဓမ္မဋ္ဌော၊ ယောဂက္ခေမာ ပဓံသတိ၊

သံဃံ သမဂ္ဂံ ဘိန္ဒိတွာ [ဘေတွာန (သီ. သျာ.)၊ ဘိတွာန (က.) စူဠဝ. ၃၅၄၊ ဣတိဝု. ၁၈၊ ကထာဝ. ၆၅၇] ကပ္ပံ နိရယမှိ ပစ္စတီ’’တိ. နဝမံ၊