၁၀. ဒုတိယအာနန္ဒသုတ္တံ

၄၀. ‘‘‘သံဃသာမဂ္ဂီ သံဃသာမဂ္ဂီ’တိ၊ ဘန္တေ၊ ဝုစ္စတိ. ကိတ္တာဝတာ နု ခေါ၊ ဘန္တေ၊ သံဃော သမဂ္ဂေါ ဟောတီ’’တိ? ‘‘ဣဓာနန္ဒ၊ ဘိက္ခူ အဓမ္မံ အဓမ္မောတိ ဒီပေန္တိ၊ ဓမ္မံ ဓမ္မောတိ ဒီပေန္တိ၊ အဝိနယံ အဝိနယောတိ ဒီပေန္တိ၊ ဝိနယံ ဝိနယောတိ ဒီပေန္တိ၊ အဘာသိတံ အလပိတံ တထာဂတေန အဘာသိတံ အလပိတံ တထာဂတေနာတိ ဒီပေန္တိ၊ ဘာသိတံ လပိတံ တထာဂတေန ဘာသိတံ လပိတံ တထာဂတေနာတိ ဒီပေန္တိ၊ အနာစိဏ္ဏံ တထာဂတေန အနာစိဏ္ဏံ တထာဂတေနာတိ ဒီပေန္တိ၊ အာစိဏ္ဏံ တထာဂတေန အာစိဏ္ဏံ တထာဂတေနာတိ ဒီပေန္တိ၊ အပညတ္တံ တထာဂတေန အပညတ္တံ တထာဂတေနာတိ ဒီပေန္တိ၊ ပညတ္တံ တထာဂတေန ပညတ္တံ တထာဂတေနာတိ ဒီပေန္တိ. တေ ဣမေဟိ ဒသဟိ ဝတ္ထူဟိ န အဝကဿန္တိ န အပကဿန္တိ န အာဝေနိ ကမ္မာနိ ကရောန္တိ န အာဝေနိ ပါတိမောက္ခံ ဥဒ္ဒိသန္တိ. ဧတ္တာဝတာ ခေါ၊ အာနန္ဒ၊ သံဃော သမဂ္ဂေါ ဟောတီ’’တိ.

‘‘ဘိန္နံ ပန၊ ဘန္တေ၊ သံဃံ သမဂ္ဂံ ကတွာ ကိံ သော ပသဝတီ’’တိ? ‘‘ဗြဟ္မံ၊ အာနန္ဒ၊ ပုညံ ပသဝတီ’’တိ. ‘‘ကိံ ပန၊ ဘန္တေ၊ ဗြဟ္မံ ပုည’’န္တိ? ‘‘ကပ္ပံ၊ အာနန္ဒ၊ သဂ္ဂမှိ မောဒတီတိ –

‘‘သုခါ သံဃဿ သာမဂ္ဂီ၊ သမဂ္ဂါနဉ္စ အနုဂ္ဂဟော၊

သမဂ္ဂရတော ဓမ္မဋ္ဌော၊ ယောဂက္ခေမာ န ဓံသတိ၊

သံဃံ သမဂ္ဂံ ကတွာန၊ ကပ္ပံ သဂ္ဂမှိ မောဒတီ’’တိ. ဒသမံ၊

ဥပါလိဝဂ္ဂေါ စတုတ္ထော.