၆. သာမဏေရသုတ္တံ

၃၆. ‘‘ကတိဟိ နု ခေါ၊ ဘန္တေ၊ ဓမ္မေဟိ သမန္နာဂတေန ဘိက္ခုနာ သာမဏေရော ဥပဋ္ဌာပေတဗ္ဗော’’တိ? ‘‘ဒသဟိ ခေါ၊ ဥပါလိ၊ ဓမ္မေဟိ သမန္နာဂတေန ဘိက္ခုနာ သာမဏေရော ဥပဋ္ဌာပေတဗ္ဗော. ကတမေဟိ ဒသဟိ? ဣဓုပါလိ၊ ဘိက္ခု သီလဝါ ဟောတိ။ပေ။ သမာဒါယ သိက္ခတိ သိက္ခာပဒေသု၊ ဗဟုဿုတော ဟောတိ။ပေ။ ဒိဋ္ဌိယာ သုပ္ပဋိဝိဒ္ဓါ၊ ပါတိမောက္ခံ ခေါ ပနဿ ဝိတ္ထာရေန သွာဂတံ ဟောတိ သုဝိဘတ္တံ သုပ္ပဝတ္တံ သုဝိနိစ္ဆိတံ သုတ္တသော အနုဗျဉ္ဇနသော၊ ပဋိဗလော ဟောတိ ဂိလာနံ ဥပဋ္ဌာတုံ ဝါ ဥပဋ္ဌာပေတုံ ဝါ၊ ပဋိဗလော ဟောတိ အနဘိရတိံ ဝူပကာသေတုံ ဝါ ဝူပကာသာပေတုံ ဝါ၊ ပဋိဗလော ဟောတိ ဥပ္ပန္နံ ကုက္ကုစ္စံ ဓမ္မတော ဝိနောဒေတုံ၊ ပဋိဗလော ဟောတိ ဥပ္ပန္နံ ဒိဋ္ဌိဂတံ ဓမ္မတော ဝိဝေစေတုံ၊ ပဋိဗလော ဟောတိ အဓိသီလေ သမာဒပေတုံ၊ ပဋိဗလော ဟောတိ အဓိစိတ္တေ သမာဒပေတုံ၊ ပဋိဗလော ဟောတိ အဓိပညာယ သမာဒပေတုံ. ဣမေဟိ ခေါ၊ ဥပါလိ၊ ဒသဟိ ဓမ္မေဟိ သမန္နာဂတေန ဘိက္ခုနာ သာမဏေရော ဥပဋ္ဌာပေတဗ္ဗော’’တိ. ဆဋ္ဌံ.