၇. သံဃဘေဒသုတ္တံ

၃၇. ‘‘‘သံဃဘေဒေါ သံဃဘေဒေါ’တိ၊ ဘန္တေ၊ ဝုစ္စတိ. ကိတ္တာဝတာ နု ခေါ၊ ဘန္တေ၊ သံဃော ဘိန္နော ဟောတီ’’တိ? ‘‘ဣဓုပါလိ၊ ဘိက္ခူ အဓမ္မံ ဓမ္မောတိ ဒီပေန္တိ၊ ဓမ္မံ အဓမ္မောတိ ဒီပေန္တိ၊ အဝိနယံ ဝိနယောတိ ဒီပေန္တိ၊ ဝိနယံ အဝိနယောတိ ဒီပေန္တိ၊ အဘာသိတံ အလပိတံ တထာဂတေန ဘာသိတံ လပိတံ တထာဂတေနာတိ ဒီပေန္တိ၊ ဘာသိတံ လပိတံ တထာဂတေန အဘာသိတံ အလပိတံ တထာဂတေနာတိ ဒီပေန္တိ၊ အနာစိဏ္ဏံ တထာဂတေန အာစိဏ္ဏံ တထာဂတေနာတိ ဒီပေန္တိ၊ အာစိဏ္ဏံ တထာဂတေန အနာစိဏ္ဏံ တထာဂတေနာတိ ဒီပေန္တိ၊ အပညတ္တံ တထာဂတေန ပညတ္တံ တထာဂတေနာတိ ဒီပေန္တိ၊ ပညတ္တံ တထာဂတေန အပညတ္တံ တထာဂတေနာတိ ဒီပေန္တိ. တေ ဣမေဟိ ဒသဟိ ဝတ္ထူဟိ အဝကဿန္တိ အပကဿန္တိ အာဝေနိ [အာဝေနိံ (စူဠဝ. ၃၅၂) အာဝေဏိ၊ အာဝေဏိကံ (တတ္ထေဝ အဓောလိပိ)] ကမ္မာနိ ကရောန္တိ အာဝေနိ ပါတိမောက္ခံ ဥဒ္ဒိသန္တိ. ဧတ္တာဝတာ ခေါ၊ ဥပါလိ၊ သံဃော ဘိန္နော ဟောတီ’’တိ. သတ္တမံ.