൫. പാരാജികാദിആപത്തി

൩൩൯. ‘പാരാജിക’ന്തി യം വുത്തം, തം സുണോഹി യഥാതഥം;

ചുതോ പരദ്ധോ ഭട്ഠോ ച, സദ്ധമ്മാ ഹി നിരങ്കതോ;

സംവാസോപി തഹിം നത്ഥി, തേനേതം ഇതി വുച്ചതി.

‘സങ്ഘാദിസേസോ’തി യം വുത്തം, തം സുണോഹി യഥാതഥം;

സങ്ഘോവ ദേതി പരിവാസം, മൂലായ പടികസ്സതി;

മാനത്തം ദേതി അബ്ഭേതി, തേനേതം ഇതി വുച്ചതി.

‘അനിയതോ’തി യം വുത്തം, തം സുണോഹി യഥാതഥം;

അനിയതോ ന നിയതോ, അനേകംസികതം പദം;

തിണ്ണമഞ്ഞതരം ഠാനം, ‘അനിയതോ’തി പവുച്ചതി.

‘ഥുല്ലച്ചയ’ന്തി യം വുത്തം, തം സുണോഹി യഥാതഥം;

ഏകസ്സ മൂലേ യോ ദേസേതി, യോ ച തം പടിഗണ്ഹതി;

അച്ചയോ തേന സമോ നത്ഥി, തേനേതം ഇതി വുച്ചതി.

‘നിസ്സഗ്ഗിയ’ന്തി യം വുത്തം, തം സുണോഹി യഥാതഥം;

സങ്ഘമജ്ഝേ ഗണമജ്ഝേ, ഏകസ്സേവ ച ഏകതോ;

നിസ്സജ്ജിത്വാന ദേസേതി, തേനേതം ഇതി വുച്ചതി.

‘പാചിത്തിയ’ന്തി യം വുത്തം, തം സുണോഹി യഥാതഥം;

പാതേതി കുസലം ധമ്മം, അരിയമഗ്ഗം അപരജ്ഝതി;

ചിത്തസംമോഹനട്ഠാനം, തേനേതം ഇതി വുച്ചതി.

‘പാടിദേസനീയ’ന്തി യം വുത്തം, തം സുണോഹി യഥാതഥം;

ഭിക്ഖു അഞ്ഞാതകോ സന്തോ, കിച്ഛാ ലദ്ധായ ഭോജനം;

സാമം ഗഹേത്വാ ഭുഞ്ജേയ്യ, ‘ഗാരയ്ഹ’ന്തി പവുച്ചതി.

നിമന്തനാസു ഭുഞ്ജന്താ ഛന്ദായ, വോസാസതി തത്ഥ ഭിക്ഖുനിം;

അനിവാരേത്വാ തഹിം ഭുഞ്ജേ, ഗാരയ്ഹന്തി പവുച്ചതി.

സദ്ധാചിത്തം കുലം ഗന്ത്വാ, അപ്പഭോഗം അനാളിയം [അനാള്ഹിയം (സീ. സ്യാ.)];

അഗിലാനോ തഹിം ഭുഞ്ജേ, ഗാരയ്ഹന്തി പവുച്ചതി.

യോ ചേ അരഞ്ഞേ വിഹരന്തോ, സാസങ്കേ സഭയാനകേ;

അവിദിതം തഹിം ഭുഞ്ജേ, ഗാരയ്ഹന്തി പവുച്ചതി.

ഭിക്ഖുനീ അഞ്ഞാതികാ സന്താ, യം പരേസം മമായിതം;

സപ്പി തേലം മധും ഫാണിതം, മച്ഛമംസം അഥോ ഖീരം;

ദധിം സയം വിഞ്ഞാപേയ്യ ഭിക്ഖുനീ, ഗാരയ്ഹപത്താ സുഗതസ്സ സാസനേ.

‘ദുക്കട’ന്തി യം വുത്തം, തം സുണോഹി യഥാതഥം;

അപരദ്ധം വിരദ്ധഞ്ച, ഖലിതം യഞ്ച ദുക്കടം.

യം മനുസ്സോ കരേ പാപം, ആവി വാ യദി വാ രഹോ;

‘ദുക്കട’ന്തി പവേദേന്തി, തേനേതം ഇതി വുച്ചതി.

‘ദുബ്ഭാസിത’ന്തി യം വുത്തം, തം സുണോഹി യഥാതഥം;

ദുബ്ഭാസിതം ദുരാഭട്ഠം, സംകിലിട്ഠഞ്ച യം പദം;

യഞ്ച വിഞ്ഞൂ ഗരഹന്തി, തേനേതം ഇതി വുച്ചതി.

‘സേഖിയ’ന്തി യം വുത്തം, തം സുണോഹി യഥാതഥം;

സേക്ഖസ്സ സിക്ഖമാനസ്സ, ഉജുമഗ്ഗാനുസാരിനോ.

ആദി ചേതം ചരണഞ്ച, മുഖം സഞ്ഞമസംവരോ;

സിക്ഖാ ഏതാദിസീ നത്ഥി, തേനേതം ഇതി വുച്ചതി.

[ഉദാ. ൪൫ ഉദാനേപി] ഛന്നമതിവസ്സതി, വിവടം നാതിവസ്സതി;

തസ്മാ ഛന്നം വിവരേഥ, ഏവം തം നാതിവസ്സതി.

ഗതി മിഗാനം പവനം, ആകാസോ പക്ഖിനം ഗതി;

വിഭവോ ഗതി ധമ്മാനം, നിബ്ബാനം അരഹതോ ഗതീതി.

ഗാഥാസങ്ഗണികം.

തസ്സുദ്ദാനം –

സത്തനഗരേസു പഞ്ഞത്താ, വിപത്തി ചതുരോപി ച;

ഭിക്ഖൂനം ഭിക്ഖുനീനഞ്ച, സാധാരണാ അസാധാരണാ;

സാസനം അനുഗ്ഗഹായ, ഗാഥാസങ്ഗണികം ഇദന്തി.

ഗാഥാസങ്ഗണികം നിട്ഠിതം.