അധികരണഭേദോ

൧. ഉക്കോടനഭേദാദി

൩൪൦. [ചൂളവ. ൨൧൫; പരി. ൨൭൫] ചത്താരി അധികരണാനി. വിവാദാധികരണം, അനുവാദാധികരണം, ആപത്താധികരണം, കിച്ചാധികരണം – ഇമാനി ചത്താരി അധികരണാനി.

ഇമേസം ചതുന്നം അധികരണാനം കതി ഉക്കോടാ? ഇമേസം ചതുന്നം അധികരണാനം ദസ ഉക്കോടാ. വിവാദാധികരണസ്സ ദ്വേ ഉക്കോടാ, അനുവാദാധികരണസ്സ ചത്താരോ ഉക്കോടാ, ആപത്താധികരണസ്സ തയോ ഉക്കോടാ, കിച്ചാധികരണസ്സ ഏകോ ഉക്കോടോ – ഇമേസം ചതുന്നം അധികരണാനം ഇമേ ദസ ഉക്കോടാ.

വിവാദാധികരണം ഉക്കോടേന്തോ കതി സമഥേ ഉക്കോടേതി? അനുവാദാധികരണം ഉക്കോടേന്തോ കതി സമഥേ ഉക്കോടേതി? ആപത്താധികരണം ഉക്കോടേന്തോ കതി സമഥേ ഉക്കോടേതി? കിച്ചാധികരണം ഉക്കോടേന്തോ കതി സമഥേ ഉക്കോടേതി?

വിവാദാധികരണം ഉക്കോടേന്തോ ദ്വേ സമഥേ ഉക്കോടേതി. അനുവാദാധികരണം ഉക്കോടേന്തോ ചത്താരോ സമഥേ ഉക്കോടേതി. ആപത്താധികരണം ഉക്കോടേന്തോ തയോ സമഥേ ഉക്കോടേതി. കിച്ചാധികരണം ഉക്കോടേന്തോ ഏകം സമഥം ഉക്കോടേതി.

൩൪൧. കതി ഉക്കോടാ? കതിഹാകാരേഹി ഉക്കോടനം പസവതി? കതിഹങ്ഗേഹി സമന്നാഗതോ പുഗ്ഗലോ അധികരണം ഉക്കോടേതി? കതി പുഗ്ഗലാ അധികരണം ഉക്കോടേന്താ ആപത്തിം ആപജ്ജന്തി?

ദ്വാദസ ഉക്കോടാ. ദസഹാകാരേഹി ഉക്കോടനം പസവതി. ചതൂഹങ്ഗേഹി സമന്നാഗതോ പുഗ്ഗലോ അധികരണം ഉക്കോടേതി. ചത്താരോ പുഗ്ഗലാ അധികരണം ഉക്കോടേന്താ ആപത്തിം ആപജ്ജന്തി?

കതമേ ദ്വാദസ ഉക്കോടാ? അകതം കമ്മം, ദുക്കടം കമ്മം, പുന കാതബ്ബം കമ്മം, അനിഹതം, ദുന്നിഹതം, പുന നിഹനിതബ്ബം, അവിനിച്ഛിതം, ദുവിനിച്ഛിതം, പുന വിനിച്ഛിതബ്ബം, അവൂപസന്തം, ദുവൂപസന്തം, പുന വൂപസമേതബ്ബന്തി – ഇമേ ദ്വാദസ ഉക്കോടാ.

കതമേഹി ദസഹാകാരേഹി ഉക്കോടനം പസവതി? തത്ഥ ജാതകം അധികരണം ഉക്കോടേതി, തത്ഥ ജാതകം വൂപസന്തം അധികരണം ഉക്കോടേതി, അന്തരാമഗ്ഗേ അധികരണം ഉക്കോടേതി, അന്തരാമഗ്ഗേ വൂപസന്തം അധികരണം ഉക്കോടേതി, തത്ഥ ഗതം അധികരണം ഉക്കോടേതി, തത്ഥ ഗതം വൂപസന്തം അധികരണം ഉക്കോടേതി, സതിവിനയം ഉക്കോടേതി, അമൂള്ഹവിനയം ഉക്കോടേതി, തസ്സപാപിയസികം ഉക്കോടേതി, തിണവത്ഥാരകം ഉക്കോടേതി – ഇമേഹി ദസഹാകാരേഹി ഉക്കോടനം പസവതി.

കതമേഹി ചതൂഹങ്ഗേഹി സമന്നാഗതോ പുഗ്ഗലോ അധികരണം ഉക്കോടേതി? ഛന്ദാഗതിം ഗച്ഛന്തോ അധികരണം ഉക്കോടേതി, ദോസാഗതിം ഗച്ഛന്തോ അധികരണം ഉക്കോടേതി, മോഹാഗതിം ഗച്ഛന്തോ അധികരണം ഉക്കോടേതി, ഭയാഗതിം ഗച്ഛന്തോ അധികരണം ഉക്കോടേതി – ഇമേഹി ചതൂഹങ്ഗേഹി സമന്നാഗതോ പുഗ്ഗലോ അധികരണം ഉക്കോടേതി.

കതമേ ചത്താരോ പുഗ്ഗലാ അധികരണം ഉക്കോടേന്താ ആപത്തിം ആപജ്ജന്തി? തദഹുപസമ്പന്നോ ഉക്കോടേതി ഉക്കോടനകം പാചിത്തിയം, ആഗന്തുകോ ഉക്കോടേതി ഉക്കോടനകം പാചിത്തിയം, കാരകോ ഉക്കോടേതി ഉക്കോടനകം പാചിത്തിയം, ഛന്ദദായകോ ഉക്കോടേതി ഉക്കോടനകം പാചിത്തിയം – ഇമേ ചത്താരോ പുഗ്ഗലാ അധികരണം ഉക്കോടേന്താ ആപത്തിം ആപജ്ജന്തി.

൨. അധികരണനിദാനാദി

൩൪൨. വിവാദാധികരണം കിംനിദാനം, കിംസമുദയം, കിംജാതികം, കിംപഭവം, കിംസമ്ഭാരം, കിംസമുട്ഠാനം? അനുവാദാധികരണം കിംനിദാനം, കിംസമുദയം, കിംജാതികം, കിംപഭവം, കിംസമ്ഭാരം, കിംസമുട്ഠാനം? ആപത്താധികരണം കിംനിദാനം, കിംസമുദയം, കിംജാതികം, കിംപഭവം, കിംസമ്ഭാരം, കിംസമുട്ഠാനം? കിച്ചാധികരണം കിംനിദാനം, കിംസമുദയം, കിംജാതികം, കിംപഭവം, കിംസമ്ഭാരം, കിംസമുട്ഠാനം?

വിവാദാധികരണം വിവാദനിദാനം വിവാദസമുദയം വിവാദജാതികം വിവാദപഭവം വിവാദസമ്ഭാരം വിവാദസമുട്ഠാനം. അനുവാദാധികരണം അനുവാദനിദാനം അനുവാദസമുദയം അനുവാദജാതികം അനുവാദപഭവം അനുവാദസമ്ഭാരം അനുവാദസമുട്ഠാനം. ആപത്താധികരണം ആപത്തിനിദാനം ആപത്തിസമുദയം ആപത്തിജാതികം ആപത്തിപഭവം ആപത്തിസമ്ഭാരം ആപത്തിസമുട്ഠാനം. കിച്ചാധികരണം കിച്ചയനിദാനം കിച്ചയസമുദയം കിച്ചയജാതികം കിച്ചയപഭവം കിച്ചയസമ്ഭാരം കിച്ചയസമുട്ഠാനം.

വിവാദാധികരണം കിംനിദാനം, കിംസമുദയം, കിംജാതികം, കിംപഭവം, കിംസമ്ഭാരം, കിംസമുട്ഠാനം? അനുവാദാധികരണം…പേ… ആപത്താധികരണം…പേ… കിച്ചാധികരണം കിംനിദാനം, കിംസമുദയം, കിംജാതികം, കിംപഭവം, കിംസമ്ഭാരം, കിംസമുട്ഠാനം?

വിവാദാധികരണം ഹേതുനിദാനം, ഹേതുസമുദയം, ഹേതുജാതികം, ഹേതുപഭവം, ഹേതുസമ്ഭാരം, ഹേതുസമുട്ഠാനം. അനുവാദാധികരണം…പേ… ആപത്താധികരണം…പേ… കിച്ചാധികരണം ഹേതുനിദാനം, ഹേതുസമുദയം, ഹേതുജാതികം, ഹേതുപഭവം, ഹേതുസമ്ഭാരം, ഹേതുസമുട്ഠാനം.

വിവാദാധികരണം കിംനിദാനം, കിംസമുദയം, കിംജാതികം, കിംപഭവം, കിംസമ്ഭാരം, കിംസമുട്ഠാനം? അനുവാദാധികരണം …പേ… ആപത്താധികരണം…പേ… കിച്ചാധികരണം കിംനിദാനം, കിംസമുദയം, കിംജാതികം, കിംപഭവം, കിംസമ്ഭാരം, കിംസമുട്ഠാനം?

വിവാദാധികരണം പച്ചയനിദാനം, പച്ചയസമുദയം, പച്ചയജാതികം, പച്ചയപഭവം, പച്ചയസമ്ഭാരം, പച്ചയസമുട്ഠാനം. അനുവാദാധികരണം…പേ… ആപത്താധികരണം…പേ… കിച്ചാധികരണം പച്ചയനിദാനം, പച്ചയസമുദയം, പച്ചയജാതികം, പച്ചയപഭവം, പച്ചയസമ്ഭാരം, പച്ചയസമുട്ഠാനം.

൩. അധികരണമൂലാദി

൩൪൩. ചതുന്നം അധികരണാനം കതി മൂലാനി, കതി സമുട്ഠാനാ? ചതുന്നം അധികരണാനം തേത്തിംസ മൂലാനി, തേത്തിംസ സമുട്ഠാനാ.

ചതുന്നം അധികരണാനം കതമാനി തേത്തിംസ മൂലാനി? വിവാദാധികരണസ്സ ദ്വാദസ മൂലാനി, അനുവാദാധികരണസ്സ ചുദ്ദസ മൂലാനി, ആപത്താധികരണസ്സ ഛ മൂലാനി, കിച്ചാധികരണസ്സ ഏകം മൂലം, സങ്ഘോ – ചതുന്നം അധികരണാനം ഇമാനി തേത്തിംസ മൂലാനി.

ചതുന്നം അധികരണാനം കതമേ തേത്തിംസ സമുട്ഠാനാ? വിവാദാധികരണസ്സ അട്ഠാരസഭേദകരവത്ഥൂനി സമുട്ഠാനാ, അനുവാദാധികരണസ്സ ചതസ്സോ വിപത്തിയോ സമുട്ഠാനാ, ആപത്താധികരണസ്സ സത്താപത്തിക്ഖന്ധാ സമുട്ഠാനാ, കിച്ചാധികരണസ്സ ചത്താരി കമ്മാനി സമുട്ഠാനാ – ചതുന്നം അധികരണാനം ഇമേ തേത്തിംസ സമുട്ഠാനാ.

൪. അധികരണപച്ചയാപത്തി

൩൪൪. വിവാദാധികരണം ആപത്താനാപത്തീതി? വിവാദാധികരണം ന ആപത്തി. കിം പന വിവാദാധികരണപച്ചയാ ആപത്തിം ആപജ്ജേയ്യാതി? ആമ, വിവാദാധികരണപച്ചയാ ആപത്തിം ആപജ്ജേയ്യ. വിവാദാധികരണപച്ചയാ കതി ആപത്തിയോ ആപജ്ജതി? വിവാദാധികരണപച്ചയാ ദ്വേ ആപത്തിയോ ആപജ്ജതി. ഉപസമ്പന്നം ഓമസതി, ആപത്തി പാചിത്തിയസ്സ; അനുപസമ്പന്നം ഓമസതി, ആപത്തി ദുക്കടസ്സ – വിവാദാധികരണപച്ചയാ ഇമാ ദ്വേ ആപത്തിയോ ആപജ്ജതി.

താ ആപത്തിയോ ചതുന്നം വിപത്തീനം കതി വിപത്തിയോ ഭജന്തി? ചതുന്നം അധികരണാനം കതമം അധികരണം? സത്തന്നം ആപത്തിക്ഖന്ധാനം കതിഹി ആപത്തിക്ഖന്ധേഹി സങ്ഗഹിതാ? ഛന്നം ആപത്തിസമുട്ഠാനാനം കതിഹി സമുട്ഠാനേഹി സമുട്ഠന്തി? കതിഹി അധികരണേഹി കതിസു ഠാനേസു കതിഹി സമഥേഹി സമ്മന്തി?

താ ആപത്തിയോ ചതുന്നം വിപത്തീനം ഏകം വിപത്തിം ഭജന്തി – ആചാരവിപത്തിം. ചതുന്നം അധികരണാനം, ആപത്താധികരണം. സത്തന്നം ആപത്തിക്ഖന്ധാനം ദ്വീഹി ആപത്തിക്ഖന്ധേഹി സങ്ഗഹിതാ – സിയാ പാചിത്തിയാപത്തിക്ഖന്ധേന, സിയാ ദുക്കടാപത്തിക്ഖന്ധേന. ഛന്നം ആപത്തിസമുട്ഠാനാനം തീഹി സമുട്ഠാനേഹി സമുട്ഠന്തി. ഏകേന അധികരണേന – കിച്ചാധികരണേന; തീസു ഠാനേസു – സങ്ഘമജ്ഝേ, ഗണമജ്ഝേ, പുഗ്ഗലസ്സ സന്തികേ; തീഹി സമഥേഹി സമ്മന്തി – സിയാ സമ്മുഖാവിനയേന ച പടിഞ്ഞാതകരണേന ച, സിയാ സമ്മുഖാവിനയേന ച തിണവത്ഥാരകേന ച.

൩൪൫. അനുവാദാധികരണം ആപത്താനാപത്തീതി? അനുവാദാധികരണം ന ആപത്തി. കിം പന അനുവാദാധികരണപച്ചയാ ആപത്തിം ആപജ്ജേയ്യാതി? ആമ, അനുവാദാധികരണപച്ചയാ ആപത്തിം ആപജ്ജേയ്യ. അനുവാദാധികരണപച്ചയാ, കതി ആപത്തിയോ ആപജ്ജതി? അനുവാദാധികരണപച്ചയാ തിസ്സോ ആപത്തിയോ ആപജ്ജതി. ഭിക്ഖും അമൂലകേന പാരാജികേന ധമ്മേന അനുദ്ധംസേതി, ആപത്തി സങ്ഘാദിസേസസ്സ; അമൂലകേന സങ്ഘാദിസേസേന അനുദ്ധംസേതി, ആപത്തി പാചിത്തിയസ്സ; അമൂലികായ ആചാരവിപത്തിയാ അനുദ്ധംസേതി, ആപത്തി ദുക്കടസ്സ – അനുവാദാധികരണപച്ചയാ ഇമാ തിസ്സോ ആപത്തിയോ ആപജ്ജതി.

താ ആപത്തിയോ ചതുന്നം വിപത്തീനം ദ്വേ വിപത്തിയോ ഭജന്തി – സിയാ സീലവിപത്തിം, സിയാ ആചാരവിപത്തിം. ചതുന്നം അധികരണാനം, ആപത്താധികരണം. സത്തന്നം ആപത്തിക്ഖന്ധാനം തീഹി ആപത്തിക്ഖന്ധേഹി സങ്ഗഹിതാ – സിയാ സങ്ഘാദിസേസാപത്തിക്ഖന്ധേന, സിയാ പാചിത്തിയാപത്തിക്ഖന്ധേന, സിയാ ദുക്കടാപത്തിക്ഖന്ധേന. ഛന്നം ആപത്തിസമുട്ഠാനാനം തീഹി സമുട്ഠാനേഹി സമുട്ഠന്തി. യാ താ ആപത്തിയോ ഗരുകാ താ ആപത്തിയോ ഏകേന അധികരണേന – കിച്ചാധികരണേന; ഏകമ്ഹി ഠാനേ – സങ്ഘമജ്ഝേ; ദ്വീഹി സമഥേഹി സമ്മന്തി – സമ്മുഖാവിനയേന ച പടിഞ്ഞാതകരണേന ച. യാ താ ആപത്തിയോ ലഹുകാ താ ആപത്തിയോ ഏകേന അധികരണേന – കിച്ചാധികരണേന; തീസു ഠാനേസു – സങ്ഘമജ്ഝേ ഗണമജ്ഝേ പുഗ്ഗലസ്സ സന്തികേ; തീഹി സമഥേഹി സമ്മന്തി – സിയാ സമ്മുഖാവിനയേന ച പടിഞ്ഞാതകരണേന ച, സിയാ സമ്മുഖാവിനയേന ച തിണവത്ഥാരകേന ച.

൩൪൬. ആപത്താധികരണം ആപത്താനാപത്തീതി? ആപത്താധികരണം ആപത്തി. കിം പന ആപത്താധികരണപച്ചയാ ആപത്തിം ആപജ്ജേയ്യാതി? ആമ, ആപത്താധികരണപച്ചയാ ആപത്തിം ആപജ്ജേയ്യ. ആപത്താധികരണപച്ചയാ കതി ആപത്തിയോ ആപജ്ജതി? ആപത്താധികരണപച്ചയാ ചതസ്സോ ആപത്തിയോ ആപജ്ജതി. ഭിക്ഖുനീ ജാനം പാരാജികം ധമ്മം [പാരാജികം ധമ്മം അജ്ഝാപന്നം (സ്യാ.)] പടിച്ഛാദേതി, ആപത്തി പാരാജികസ്സ; വേമതികാ പടിച്ഛാദേതി, ആപത്തി ഥുല്ലച്ചയസ്സ; ഭിക്ഖു സങ്ഘാദിസേസം പടിച്ഛാദേതി, ആപത്തി പാചിത്തിയസ്സ; ആചാരവിപത്തിം പടിച്ഛാദേതി, ആപത്തി ദുക്കടസ്സ – ആപത്താധികരണപച്ചയാ ഇമാ ചതസ്സോ ആപത്തിയോ ആപജ്ജതി.

താ ആപത്തിയോ ചതുന്നം വിപത്തീനം ദ്വേ വിപത്തിയോ ഭജന്തി – സിയാ സീലവിപത്തിം സിയാ ആചാരവിപത്തിം. ചതുന്നം അധികരണാനം – ആപത്താധികരണം. സത്തന്നം ആപത്തിക്ഖന്ധാനം ചതൂഹി ആപത്തിക്ഖന്ധേഹി സങ്ഗഹിതാ – സിയാ പാരാജികാപത്തിക്ഖന്ധേന, സിയാ ഥുല്ലച്ചയാപത്തിക്ഖന്ധേന, സിയാ പാചിത്തിയാപത്തിക്ഖന്ധേന, സിയാ ദുക്കടാപത്തിക്ഖന്ധേന. ഛന്നം ആപത്തിസമുട്ഠാനാനം ഏകേന സമുട്ഠാനേന സമുട്ഠന്തി – കായതോ ച വാചതോ ച ചിത്തതോ ച സമുട്ഠന്തി. യാ സാ ആപത്തി അനവസേസാ സാ ആപത്തി ന കതമേന അധികരണേന, ന കതമമ്ഹി ഠാനേ, ന കതമേന സമഥേന സമ്മതി. യാ താ ആപത്തിയോ ലഹുകാ താ ആപത്തിയോ ഏകേന അധികരണേന – കിച്ചാധികരണേന; തീസു ഠാനേസു – സങ്ഘമജ്ഝേ, ഗണമജ്ഝേ, പുഗ്ഗലസ്സ സന്തികേ; തീഹി സമഥേഹി സമ്മന്തി – സിയാ സമ്മുഖാവിനയേന ച പടിഞ്ഞാതകരണേന ച, സിയാ സമ്മുഖാവിനയേന ച തിണവത്ഥാരകേന ച.

൩൪൭. കിച്ചാധികരണം ആപത്താനാപത്തീതി? കിച്ചാധികരണം ന ആപത്തി. കിം പന കിച്ചാധികരണപച്ചയാ ആപത്തിം ആപജ്ജേയ്യാതി? ആമ, കിച്ചാധികരണപച്ചയാ ആപത്തിം ആപജ്ജേയ്യ. കിച്ചാധികരണപച്ചയാ കതി ആപത്തിയോ ആപജ്ജതി? കിച്ചാധികരണപച്ചയാ പഞ്ച ആപത്തിയോ ആപജ്ജതി. ഉക്ഖിത്താനുവത്തികാ ഭിക്ഖുനീ യാവതതിയം സമനുഭാസനായ ന പടിനിസ്സജ്ജതി, ഞത്തിയാ ദുക്കടം; ദ്വീഹി കമ്മവാചാഹി ഥുല്ലച്ചയാ; കമ്മവാചാപരിയോസാനേ ആപത്തി പാരാജികസ്സ; ഭേദകാനുവത്തകാ ഭിക്ഖൂ യാവതതിയം സമനുഭാസനായ ന പടിനിസ്സജ്ജന്തി, ആപത്തി സങ്ഘാദിസേസസ്സ; പാപികായ ദിട്ഠിയാ യാവതതിയം സമനുഭാസനായ ന പടിനിസ്സജ്ജന്തി, ആപത്തി പാചിത്തിയസ്സ – കിച്ചാധികരണപച്ചയാ ഇമാ പഞ്ച ആപത്തിയോ ആപജ്ജതി.

താ ആപത്തിയോ ചതുന്നം വിപത്തീനം ദ്വേ വിപത്തിയോ ഭജന്തി – സിയാ സീലവിപത്തിം സിയാ ആചാരവിപത്തിം. ചതുന്നം അധികരണാനം – ആപത്താധികരണം. സത്തന്നം ആപത്തിക്ഖന്ധാനം പഞ്ചഹി ആപത്തിക്ഖന്ധേഹി സങ്ഗഹിതാ – സിയാ പാരാജികാപത്തിക്ഖന്ധേന, സിയാ സങ്ഘാദിസേസാപത്തിക്ഖന്ധേന, സിയാ ഥുല്ലച്ചയാപത്തിക്ഖന്ധേന, സിയാ പാചിത്തിയാപത്തിക്ഖന്ധേന, സിയാ ദുക്കടാപത്തിക്ഖന്ധേന. ഛന്നം ആപത്തിസമുട്ഠാനാനം ഏകേന സമുട്ഠാനേന സമുട്ഠന്തി – കായതോ ച വാചതോ ച ചിത്തതോ ച സമുട്ഠന്തി. യാ സാ ആപത്തി അനവസേസാ സാ ആപത്തി ന കതമേന അധികരണേന, ന കതമമ്ഹി ഠാനേ, ന കതമേന സമഥേന സമ്മതി. യാ സാ ആപത്തി ഗരുകാ സാ ആപത്തി ഏകേന അധികരണേന – കിച്ചാധികരണേന; ഏകമ്ഹി ഠാനേ – സങ്ഘമജ്ഝേ; ദ്വീഹി സമഥേഹി സമ്മതി – സമ്മുഖാവിനയേന ച പടിഞ്ഞാതകരണേന ച. യാ താ ആപത്തിയോ ലഹുകാ താ ആപത്തിയോ ഏകേന അധികരണേന – കിച്ചാധികരണേന; തീസു ഠാനേസു – സങ്ഘമജ്ഝേ, ഗണമജ്ഝേ, പുഗ്ഗലസ്സ സന്തികേ; തീഹി സമഥേഹി സമ്മന്തി – സിയാ സമ്മുഖാവിനയേന ച പടിഞ്ഞാതകരണേന ച, സിയാ സമ്മുഖാവിനയേന ച തിണവത്ഥാരകേന ച.

൫. അധികരണാധിപ്പായോ

൩൪൮. വിവാദാധികരണം ഹോതി അനുവാദാധികരണം, ഹോതി ആപത്താധികരണം, ഹോതി കിച്ചാധികരണം. വിവാദാധികരണം ന ഹോതി അനുവാദാധികരണം, ന ഹോതി ആപത്താധികരണം, ന ഹോതി കിച്ചാധികരണം; അപി ച, വിവാദാധികരണപച്ചയാ ഹോതി അനുവാദാധികരണം, ഹോതി ആപത്താധികരണം, ഹോതി കിച്ചാധികരണം. യഥാ കഥം വിയ? [ചൂളവ. ൨൧൫; പരി. ൩൧൪] ഇധ ഭിക്ഖൂ വിവദന്തി – ധമ്മോതി വാ അധമ്മോതി വാ ദുട്ഠുല്ലാപത്തീതി വാ അദുട്ഠുല്ലാപത്തീതി വാ. യം തത്ഥ ഭണ്ഡനം കലഹോ വിഗ്ഗഹോ വിവാദോ നാനാവാദോ അഞ്ഞഥാവാദോ വിപച്ചതായ വോഹാരോ മേധകം, ഇദം വുച്ചതി വിവാദാധികരണം. വിവാദാധികരണേ സങ്ഘോ വിവദതി വിവാദാധികരണം. വിവദമാനോ അനുവദതി അനുവാദാധികരണം. അനുവദമാനോ ആപത്തിം ആപജ്ജതി ആപത്താധികരണം. തായ ആപത്തിയാ സങ്ഘോ കമ്മം കരോതി കിച്ചാധികരണം. ഏവം വിവാദാധികരണപച്ചയാ ഹോതി അനുവാദാധികരണം, ഹോതി ആപത്താധികരണം, ഹോതി കിച്ചാധികരണം.

അനുവാദാധികരണം ഹോതി ആപത്താധികരണം, ഹോതി കിച്ചാധികരണം, ഹോതി വിവാദാധികരണം. അനുവാദാധികരണം ന ഹോതി ആപത്താധികരണം, ന ഹോതി കിച്ചാധികരണം, ന ഹോതി വിവാദാധികരണം; അപി ച, അനുവാദാധികരണപച്ചയാ ഹോതി ആപത്താധികരണം, ഹോതി കിച്ചാധികരണം, ഹോതി വിവാദാധികരണം. യഥാ കഥം വിയ? ഇധ ഭിക്ഖൂ ഭിക്ഖും അനുവദന്തി സീലവിപത്തിയാ വാ ആചാരവിപത്തിയാ വാ ദിട്ഠിവിപത്തിയാ വാ ആജീവവിപത്തിയാ വാ. യോ തത്ഥ അനുവാദോ അനുവദനാ അനുല്ലപനാ അനുഭണനാ അനുസമ്പവങ്കതാ അബ്ഭുസ്സഹനതാ അനുബലപ്പദാനം, ഇദം വുച്ചതി അനുവാദാധികരണം. അനുവാദാധികരണേ സങ്ഘോ വിവദതി, വിവാദാധികരണം. വിവദമാനോ അനുവദതി, അനുവാദാധികരണം. അനുവദമാനോ ആപത്തിം ആപജ്ജതി, ആപത്താധികരണം. തായ ആപത്തിയാ സങ്ഘോ കമ്മം കരോതി, കിച്ചാധികരണം. ഏവം അനുവാദാധികരണപച്ചയാ ഹോതി ആപത്താധികരണം, ഹോതി കിച്ചാധികരണം, ഹോതി വിവാദാധികരണം.

ആപത്താധികരണം ഹോതി കിച്ചാധികരണം, ഹോതി വിവാദാധികരണം, ഹോതി അനുവാദാധികരണം. ആപത്താധികരണം ന ഹോതി കിച്ചാധികരണം, ന ഹോതി വിവാദാധികരണം, ന ഹോതി അനുവാദാധികരണം; അപി ച, ആപത്താധികരണപച്ചയാ ഹോതി കിച്ചാധികരണം, ഹോതി വിവാദാധികരണം, ഹോതി അനുവാദാധികരണം. യഥാ കഥം വിയ? [ചൂളവ. ൨൧൫; പരി. ൩൪൮] പഞ്ചപി ആപത്തിക്ഖന്ധാ ആപത്താധികരണം, സത്തപി ആപത്തിക്ഖന്ധാ ആപത്താധികരണം, ഇദം വുച്ചതി ആപത്താധികരണം. ആപത്താധികരണേ സങ്ഘോ വിവദതി വിവാദാധികരണം. വിവദമാനോ അനുവദതി അനുവാദാധികരണം. അനുവദമാനോ ആപത്തിം ആപജ്ജതി ആപത്താധികരണം. തായ ആപത്തിയാ സങ്ഘോ കമ്മം കരോതി കിച്ചാധികരണം. ഏവം ആപത്താധികരണപച്ചയാ ഹോതി കിച്ചാധികരണം, ഹോതി വിവാദാധികരണം, ഹോതി അനുവാദാധികരണം.

കിച്ചാധികരണം ഹോതി വിവാദാധികരണം, ഹോതി അനുവാദാധികരണം, ഹോതി ആപത്താധികരണം. കിച്ചാധികരണം ന ഹോതി വിവാദാധികരണം, ന ഹോതി അനുവാദാധികരണം, ന ഹോതി ആപത്താധികരണം; അപി ച, കിച്ചാധികരണപച്ചയാ ഹോതി വിവാദാധികരണം, ഹോതി അനുവാദാധികരണം, ഹോതി ആപത്താധികരണം. യഥാ കഥം വിയ? യാ സങ്ഘസ്സ കിച്ചയതാ കരണീയതാ അപലോകനകമ്മം ഞത്തികമ്മം ഞത്തിദുതിയകമ്മം ഞത്തിചതുത്ഥകമ്മം, ഇദം വുച്ചതി കിച്ചാധികരണം. കിച്ചാധികരണേ സങ്ഘോ വിവദതി വിവാദാധികരണം. വിവദമാനോ അനുവദതി അനുവാദാധികരണം. അനുവദമാനോ ആപത്തിം ആപജ്ജതി ആപത്താധികരണം. തായ ആപത്തിയാ സങ്ഘോ കമ്മം കരോതി കിച്ചാധികരണം. ഏവം കിച്ചാധികരണപച്ചയാ ഹോതി വിവാദാധികരണം, ഹോതി അനുവാദാധികരണം, ഹോതി ആപത്താധികരണം.

൬. പുച്ഛാവാരോ

൩൪൯. യത്ഥ സതിവിനയോ തത്ഥ സമ്മുഖാവിനയോ? യത്ഥ സമ്മുഖാവിനയോ തത്ഥ സതിവിനയോ? യത്ഥ അമൂള്ഹവിനയോ തത്ഥ സമ്മുഖാവിനയോ? യത്ഥ സമ്മുഖാവിനയോ തത്ഥ അമൂള്ഹവിനയോ? യത്ഥ പടിഞ്ഞാതകരണം തത്ഥ സമ്മുഖാവിനയോ? യത്ഥ സമ്മുഖാവിനയോ തത്ഥ പടിഞ്ഞാതകരണം? യത്ഥ യേഭുയ്യസികാ തത്ഥ സമ്മുഖാവിനയോ? യത്ഥ സമ്മുഖാവിനയോ തത്ഥ യേഭുയ്യസികാ? യത്ഥ തസ്സപാപിയസികാ തത്ഥ സമ്മുഖാവിനയോ? യത്ഥ സമ്മുഖാവിനയോ തത്ഥ തസ്സപാപിയസികാ? യത്ഥ തിണവത്ഥാരകോ തത്ഥ സമ്മുഖാവിനയോ? യത്ഥ സമ്മുഖാവിനയോ തത്ഥ തിണവത്ഥാരകോ?

൭. വിസ്സജ്ജനാവാരോ

൩൫൦. യസ്മിം സമയേ സമ്മുഖാവിനയേന ച സതിവിനയേന ച അധികരണം വൂപസമ്മതി – യത്ഥ സതിവിനയോ തത്ഥ സമ്മുഖാവിനയോ, യത്ഥ സമ്മുഖാവിനയോ തത്ഥ സതിവിനയോ, ന തത്ഥ അമൂള്ഹവിനയോ, ന തത്ഥ പടിഞ്ഞാതകരണം, ന തത്ഥ യേഭുയ്യസികാ, ന തത്ഥ തസ്സപാപിയസികാ, ന തത്ഥ തിണവത്ഥാരകോ. യസ്മിം സമയേ സമ്മുഖാവിനയേന ച അമൂള്ഹവിനയേന ച…പേ… സമ്മുഖാവിനയേന ച പടിഞ്ഞാതകരണേന ച…പേ… സമ്മുഖാവിനയേന ച യേഭുയ്യസികായ ച…പേ… സമ്മുഖാവിനയേന ച തസ്സപാപിയസികായ ച…പേ… സമ്മുഖാവിനയേന ച തിണവത്ഥാരകേന ച അധികരണം വൂപസമ്മതി – യത്ഥ തിണവത്ഥാരകോ തത്ഥ സമ്മുഖാവിനയോ, യത്ഥ സമ്മുഖാവിനയോ തത്ഥ തിണവത്ഥാരകോ, ന തത്ഥ സതിവിനയോ, ന തത്ഥ അമൂള്ഹവിനയോ, ന തത്ഥ പടിഞ്ഞാതകരണം, ന തത്ഥ യേഭുയ്യസികാ, ന തത്ഥ തസ്സപാപിയസികാ.

൮. സംസട്ഠവാരോ

൩൫൧. സമ്മുഖാവിനയോതി വാ സതിവിനയോതി വാ – ഇമേ ധമ്മാ സംസട്ഠാ ഉദാഹു വിസംസട്ഠാ? ലബ്ഭാ ച പനിമേസം ധമ്മാനം വിനിബ്ഭുജിത്വാ വിനിബ്ഭുജിത്വാ നാനാകരണം പഞ്ഞാപേതും? സമ്മുഖാവിനയോതി വാ അമൂള്ഹവിനയോതി വാ…പേ… സമ്മുഖാവിനയോതി വാ പടിഞ്ഞാതകരണന്തി വാ… സമ്മുഖാവിനയോതി വാ യേഭുയ്യസികാതി വാ… സമ്മുഖാവിനയോതി വാ തസ്സപാപിയസികാതി വാ… സമ്മുഖാവിനയോതി വാ തിണവത്ഥാരകോതി – ഇമേ ധമ്മാ സംസട്ഠാ ഉദാഹു വിസംസട്ഠാ? ലബ്ഭാ ച പനിമേസം ധമ്മാനം വിനിബ്ഭുജിത്വാ വിനിബ്ഭുജിത്വാ നാനാകരണം പഞ്ഞാപേതും?

സമ്മുഖാവിനയോതി വാ സതിവിനയോതി വാ – ഇമേ ധമ്മാ സംസട്ഠാ, നോ വിസംസട്ഠാ; ന ച ലബ്ഭാ ഇമേസം ധമ്മാനം വിനിബ്ഭുജിത്വാ വിനിബ്ഭുജിത്വാ നാനാകരണം പഞ്ഞാപേതും. സമ്മുഖാവിനയോതി വാ അമൂള്ഹവിനയോതി വാ…പേ… സമ്മുഖാവിനയോതി വാ പടിഞ്ഞാതകരണന്തി വാ… സമ്മുഖാവിനയോതി വാ യേഭുയ്യസികാതി വാ… സമ്മുഖാവിനയോതി വാ തസ്സപാപിയസികാതി വാ… സമ്മുഖാവിനയോതി വാ തിണവത്ഥാരകോതി വാ – ഇമേ ധമ്മാ സംസട്ഠാ, നോ വിസംസട്ഠാ; ന ച ലബ്ഭാ ഇമേസം ധമ്മാനം വിനിബ്ഭുജിത്വാ വിനിബ്ഭുജിത്വാ നാനാകരണം പഞ്ഞാപേതും.

൯. സത്തസമഥനിദാനം

൩൫൨. സമ്മുഖാവിനയോ കിംനിദാനോ, കിംസമുദയോ, കിംജാതികോ, കിംപഭവോ, കിംസമ്ഭാരോ കിംസമുട്ഠാനോ? സതിവിനയോ കിംനിദാനോ, കിംസമുദയോ, കിംജാതികോ, കിംപഭവോ, കിംസമ്ഭാരോ, കിംസമുട്ഠാനോ? അമൂള്ഹവിനയോ കിംനിദാനോ, കിംസമുദയോ, കിംജാതികോ, കിംപഭവോ, കിംസമ്ഭാരോ, കിംസമുട്ഠാനോ? പടിഞ്ഞാതകരണം കിംനിദാനം, കിംസമുദയം, കിംജാതികം, കിംപഭവം, കിംസമ്ഭാരം, കിംസമുട്ഠാനം? യേഭുയ്യസികാ കിംനിദാനാ, കിംസമുദയാ, കിംജാതികാ, കിംപഭവാ, കിംസമ്ഭാരാ, കിംസമുട്ഠാനാ? തസ്സപാപിയസികാ കിംനിദാനാ, കിംസമുദയാ, കിംജാതികാ, കിംപഭവാ, കിംസമ്ഭാരാ, കിംസമുട്ഠാനാ തിണവത്ഥാരകോ കിംനിദാനോ, കിംസമുദയോ, കിംജാതികോ, കിംപഭവോ, കിംസമ്ഭാരോ, കിംസമുട്ഠാനോ?

സമ്മുഖാവിനയോ നിദാനനിദാനോ, നിദാനസമുദയോ, നിദാനജാതികോ, നിദാനപഭവോ, നിദാനസമ്ഭാരോ, നിദാനസമുട്ഠാനോ. സതിവിനയോ…പേ… അമൂള്ഹവിനയോ…പേ… പടിഞ്ഞാതകരണം നിദാനനിദാനം, നിദാനസമുദയം, നിദാനജാതികം, നിദാനപഭവം, നിദാനസമ്ഭാരം, നിദാനസമുട്ഠാനം. യേഭുയ്യസികാ…പേ… തസ്സപാപിയസികാ നിദാനനിദാനാ, നിദാനസമുദയാ, നിദാനജാതികാ, നിദാനപഭവാ, നിദാനസമ്ഭാരാ, നിദാനസമുട്ഠാനാ. തിണവത്ഥാരകോ നിദാനനിദാനോ, നിദാനസമുദയോ, നിദാനജാതികോ, നിദാനപഭവോ, നിദാനസമ്ഭാരോ, നിദാനസമുട്ഠാനോ.

സമ്മുഖാവിനയോ ഹേതുനിദാനോ, ഹേതുസമുദയോ, ഹേതുജാതികോ, ഹേതുപഭവോ, ഹേതുസമ്ഭാരോ, ഹേതുസമുട്ഠാനോ. സതിവിനയോ…പേ… അമൂള്ഹവിനയോ…പേ… പടിഞ്ഞാതകരണം ഹേതുനിദാനം, ഹേതുസമുദയം, ഹേതുജാതികം, ഹേതുപഭവം, ഹേതുസമ്ഭാരം, ഹേതുസമുട്ഠാനം. യേഭുയ്യസികാ…പേ… തസ്സപാപിയസികാ ഹേതുനിദാനാ, ഹേതുസമുദയാ, ഹേതുജാതികാ, ഹേതുപഭവാ, ഹേതുസമ്ഭാരാ, ഹേതുസമുട്ഠാനാ. തിണവത്ഥാരകോ ഹേതുനിദാനോ, ഹേതുസമുദയോ, ഹേതുജാതികോ, ഹേതുപഭവോ, ഹേതുസമ്ഭാരോ, ഹേതുസമുട്ഠാനോ.

സമ്മുഖാവിനയോ കിംനിദാനോ, കിംസമുദയോ, കിംജാതികോ, കിംപഭവോ, കിംസമ്ഭാരോ, കിംസമുട്ഠാനോ? സതിവിനയോ…പേ… അമൂള്ഹവിനയോ…പേ… പടിഞ്ഞാതകരണം…പേ… യേഭുയ്യസികാ…പേ… തസ്സപാപിയസികാ…പേ… തിണവത്ഥാരകോ കിംനിദാനോ, കിംസമുദയോ, കിംജാതികോ, കിംപഭവോ, കിംസമ്ഭാരോ, കിംസമുട്ഠാനോ? സമ്മുഖാവിനയോ പച്ചയനിദാനോ, പച്ചയസമുദയോ, പച്ചയജാതികോ, പച്ചയപഭവോ, പച്ചയസമ്ഭാരോ, പച്ചയസമുട്ഠാനോ. സതിവിനയോ…പേ… അമൂള്ഹവിനയോ…പേ… പടിഞ്ഞാതകരണം പച്ചയനിദാനം, പച്ചയസമുദയം, പച്ചയജാതികം, പച്ചയപഭവം, പച്ചയസമ്ഭാരം, പച്ചയസമുട്ഠാനം. യേഭുയ്യസികാ…പേ… തസ്സപാപിയസികാ പച്ചയനിദാനാ, പച്ചയസമുദയാ, പച്ചയജാതികാ, പച്ചയപഭവാ, പച്ചയസമ്ഭാരാ, പച്ചയസമുട്ഠാനാ. തിണവത്ഥാരകോ പച്ചയനിദാനോ, പച്ചയസമുദയോ, പച്ചയജാതികോ, പച്ചയപഭവോ, പച്ചയസമ്ഭാരോ, പച്ചയസമുട്ഠാനോ.

൩൫൩. സത്തന്നം സമഥാനം കതി മൂലാനി, കതി സമുട്ഠാനാ? സത്തന്നം സമഥാനം ഛബ്ബീസ മൂലാനി, ഛത്തിംസ സമുട്ഠാനാ. സത്തന്നം സമഥാനം കതമാനി ഛബ്ബീ മൂലാനി? സമ്മുഖാവിനയസ്സ ചത്താരി മൂലാനി. സങ്ഘസമ്മുഖതാ, ധമ്മസമ്മുഖതാ, വിനയസമ്മുഖതാ, പുഗ്ഗലസമ്മുഖതാ; സതിവിനയസ്സ ചത്താരി മൂലാനി; അമൂള്ഹവിനയസ്സ ചത്താരി മൂലാനി; പടിഞ്ഞാതകരണസ്സ ദ്വേ മൂലാനി – യോ ച ദേസേതി യസ്സ ച ദേസേതി; യേഭുയ്യസികായ ചത്താരി മൂലാനി; തസ്സപാപിയസികായ ചത്താരി മൂലാനി; തിണവത്ഥാരകസ്സ ചത്താരി മൂലാനി – സങ്ഘസമ്മുഖതാ, ധമ്മസമ്മുഖതാ, വിനയസമ്മുഖതാ, പുഗ്ഗലസമ്മുഖതാ – സത്തന്നം സമഥാനം ഇമാനി ഛബ്ബീസ മൂലാനി.

സത്തന്നം സമഥാനം കതമേ ഛത്തിംസ സമുട്ഠാനാ? സതിവിനയസ്സ കമ്മസ്സ കിരിയാ, കരണം, ഉപഗമനം, അജ്ഝുപഗമനം, അധിവാസനാ, അപ്പടിക്കോസനാ. അമൂള്ഹവിനയസ്സ കമ്മസ്സ…പേ… പടിഞ്ഞാതകരണസ്സ കമ്മസ്സ… യേഭുയ്യസികായ കമ്മസ്സ… തസ്സപാപിയസികായ കമ്മസ്സ… തിണവത്ഥാരകസ്സ കമ്മസ്സ കിരിയാ, കരണം, ഉപഗമനം, അജ്ഝുപഗമനം, അധിവാസനാ, അപ്പടിക്കോസനാ – സത്തന്നം സമഥാനം ഇമേ ഛത്തിംസ സമുട്ഠാനാ.

൧൦. സത്തസമഥനാനത്ഥാദി

൩൫൪. സമ്മുഖാവിനയോതി വാ സതിവിനയോതി വാ – ഇമേ ധമ്മാ നാനത്ഥാ നാനാബ്യഞ്ജനാ ഉദാഹു ഏകത്ഥാ ബ്യഞ്ജനമേവ നാനം? സമ്മുഖാവിനയോതി വാ അമൂള്ഹവിനയോതി വാ…പേ… സമ്മുഖാവിനയോതി വാ പടിഞ്ഞാതകരണന്തി വാ… സമ്മുഖാവിനയോതി വാ യേഭുയ്യസികാതി വാ… സമ്മുഖാവിനയോതി വാ തസ്സപാപിയസികാതി വാ… സമ്മുഖാവിനയോതി വാ തിണവത്ഥാരകോതി വാ – ഇമേ ധമ്മാ നാനത്ഥാ നാനാബ്യഞ്ജനാ ഉദാഹു ഏകത്ഥാ ബ്യഞ്ജനമേവ നാനം? സമ്മുഖാവിനയോതി വാ സതിവിനയോതി വാ – ഇമേ ധമ്മാ നാനത്ഥാ ചേവ നാനാബ്യഞ്ജനാ ച. സമ്മുഖാവിനയോതി വാ അമൂള്ഹവിനയോതി വാ…പേ… സമ്മുഖാവിനയോതി വാ പടിഞ്ഞാതകരണന്തി വാ… സമ്മുഖാവിനയോതി വാ യേഭുയ്യസികാതി വാ… സമ്മുഖാവിനയോതി വാ തസ്സപാപിയസികാതി വാ… സമ്മുഖാവിനയോതി വാ തിണവത്ഥാരകോതി വാ – ഇമേ ധമ്മാ നാനത്ഥാ ചേവ നാനാ ബ്യഞ്ജനാ ച.

൩൫൫. [ചൂളവ. ൨൨൪] വിവാദോ വിവാദാധികരണം, വിവാദോ നോ അധികരണം, അധികരണം നോ വിവാദോ, അധികരണഞ്ചേവ വിവാദോ ച? സിയാ വിവാദോ വിവാദാധികരണം, സിയാ വിവാദോ നോ അധികരണം, സിയാ അധികരണം നോ വിവാദോ, സിയാ അധികരണഞ്ചേവ വിവാദോ ച.

തത്ഥ കതമോ വിവാദോ വിവാദാധികരണം? ഇധ ഭിക്ഖൂ വിവദന്തി ധമ്മോതി വാ അധമ്മോതി വാ…പേ… ദുട്ഠുല്ലാ ആപത്തീതി വാ അദുട്ഠുല്ലാ ആപത്തീതി വാ. യം തത്ഥ ഭണ്ഡനം, കലഹോ, വിഗ്ഗഹോ, വിവാദോ, നാനാവാദോ, അഞ്ഞഥാവാദോ, വിപച്ചതായ വോഹാരോ, മേധകം – അയം വിവാദോ വിവാദാധികരണം.

തത്ഥ കതമോ വിവാദോ നോ അധികരണം? മാതാപി പുത്തേന വിവദതി, പുത്തോപി മാതരാ വിവദതി, പിതാപി പുത്തേന വിവദതി, പുത്തോപി പിതരാ വിവദതി, ഭാതാപി ഭാതരാ വിവദതി, ഭാതാപി ഭഗിനിയാ വിവദതി, ഭഗിനീപി ഭാതരാ വിവദതി, സഹായോപി സഹായേന വിവദതി – അയം വിവാദോ നോ അധികരണം.

തത്ഥ കതമം അധികരണം നോ വിവാദോ? അനുവാദാധികരണം, ആപത്താധികരണം, കിച്ചാധികരണം – ഇദം അധികരണം നോ വിവാദോ.

തത്ഥ കതമം അധികരണഞ്ചേവ വിവാദോ ച? വിവാദാധികരണം അധികരണഞ്ചേവ വിവാദോ ച.

൩൫൬. [ചൂളവ. ൨൨൪ ആദയോ] അനുവാദോ അനുവാദാധികരണം, അനുവാദോ നോ അധികരണം, അധികരണം നോ അനുവാദോ, അധികരണഞ്ചേവ അനുവാദോ ച? സിയാ അനുവാദോ അനുവാദാധികരണം, സിയാ അനുവാദോ നോ അധികരണം, സിയാ അധികരണം നോ അനുവാദോ, സിയാ അധികരണഞ്ചേവ അനുവാദോ ച.

തത്ഥ കതമോ അനുവാദോ അനുവാദാധികരണം? ഇധ ഭിക്ഖൂ ഭിക്ഖും അനുവദന്തി സീലവിപത്തിയാ വാ ആചാരവിപത്തിയാ വാ ദിട്ഠിവിപത്തിയാ വാ ആജീവവിപത്തിയാ വാ. യോ തത്ഥ അനുവാദോ, അനുവദനാ അനുല്ലപനാ അനുഭണനാ അനുസമ്പവങ്കതാ അബ്ഭുസ്സഹനതാ അനുബലപ്പദാനം – അയം അനുവാദോ അനുവാദാധികരണം.

തത്ഥ കതമോ അനുവാദോ നോ അധികരണം? മാതാപി പുത്തം അനുവദതി, പുത്തോപി മാതരം അനുവദതി, പിതാപി പുത്തം അനുവദതി, പുത്തോപി പിതരം അനുവദതി, ഭാതാപി ഭാതരം അനുവദതി, ഭാതാപി ഭഗിനിം അനുവദതി, ഭഗിനീപി ഭാതരം അനുവദതി, സഹായോപി സഹായം അനുവദതി – അയം അനുവാദോ നോ അധികരണം.

തത്ഥ കതമം അധികരണം നോ അനുവാദോ? ആപത്താധികരണം കിച്ചാധികരണം വിവാദാധികരണം – ഇദം അധികരണം നോ അനുവാദോ.

തത്ഥ കതമം അധികരണഞ്ചേവ അനുവാദോ ച? അനുവാദാധികരണം അധികരണഞ്ചേവ അനുവാദോ ച.

൩൫൭. ആപത്തി ആപത്താധികരണം, ആപത്തി നോ അധികരണം, അധികരണം നോ ആപത്തി, അധികരണഞ്ചേവ ആപത്തി ച? സിയാ ആപത്തി ആപത്താധികരണം, സിയാ ആപത്തി നോ അധികരണം, സിയാ അധികരണം നോ ആപത്തി, സിയാ അധികരണഞ്ചേവ ആപത്തി ച.

തത്ഥ കതമാ ആപത്തി ആപത്താധികരണം? പഞ്ചപി ആപത്തിക്ഖന്ധാ ആപത്താധികരണം. സത്തപി ആപത്തിക്ഖന്ധാ ആപത്താധികരണം. അയം ആപത്തി ആപത്താധികരണം.

തത്ഥ കതമാ ആപത്തി നോ അധികരണം? സോതാപത്തി സമാപത്തി – അയം ആപത്തി നോ അധികരണം.

തത്ഥ കതമം അധികരണം നോ ആപത്തി? കിച്ചാധികരണം വിവാദാധികരണം അനുവാദാധികരണം – ഇദം അധികരണം നോ ആപത്തി.

തത്ഥ കതമം അധികരണഞ്ചേവ ആപത്തി ച? ആപത്താധികരണം അധികരണഞ്ചേവ ആപത്തി ച.

൩൫൮. [ചൂളവ. ൨൨൩] കിച്ചം കിച്ചാധികരണം, കിച്ചം നോ അധികരണം, അധികരണം നോ കിച്ചം, അധികരണഞ്ചേവ കിച്ചഞ്ച? സിയാ കിച്ചം കിച്ചാധികരണം, സിയാ കിച്ചം നോ അധികരണം, സിയാ അധികരണം നോ കിച്ചം, സിയാ അധികരണഞ്ചേവ കിച്ചഞ്ച.

തത്ഥ കതമം കിച്ചം കിച്ചാധികരണം? യാ സങ്ഘസ്സ കിച്ചയതാ കരണീയതാ അപലോകനകമ്മം ഞത്തികമ്മം ഞത്തിദുതിയകമ്മം ഞത്തിചതുത്ഥകമ്മം – ഇദം കിച്ചം കിച്ചാധികരണം.

തത്ഥ കതമം കിച്ചം നോ അധികരണം? ആചരിയകിച്ചം ഉപജ്ഝായകിച്ചം [ഉപജ്ഝായകിച്ചം സകിച്ചം (ക.)] സമാനുപജ്ഝായകിച്ചം സമാനാചരിയകിച്ചം – ഇദം കിച്ചം നോ അധികരണം.

തത്ഥ കതമം അധികരണം നോ കിച്ചം? വിവാദാധികരണം അനുവാദാധികരണം ആപത്താധികരണം – ഇദം അധികരണം നോ കിച്ചം.

തത്ഥ കതമം അധികരണഞ്ചേവ കിച്ചഞ്ച? കിച്ചാധികരണം അധികരണഞ്ചേവ കിച്ചം ചാതി.

അധികരണഭേദോ നിട്ഠിതോ.