൯. നവകവാരോ

൩൨൯. നവ ആഘാതവത്ഥൂനി. നവ ആഘാതപടിവിനയാ. നവ വിനീതവത്ഥൂനി. നവ പഠമാപത്തികാ. നവഹി സങ്ഘോ ഭിജ്ജതി. നവ പണീതഭോജനാനി. നവമംസേഹി ദുക്കടം. നവ പാതിമോക്ഖുദ്ദേസാ. നവ പരമാനി. നവ തണ്ഹാമൂലകാ ധമ്മാ. നവ വിധമാനാ. നവ ചീവരാനി അധിട്ഠാതബ്ബാനി. നവ ചീവരാനി ന വികപ്പേതബ്ബാനി. ദീഘസോ നവ വിദത്ഥിയോ സുഗതവിദത്ഥിയാ. നവ അധമ്മികാനി ദാനാനി. നവ അധമ്മികാ പടിഗ്ഗഹാ. നവ അധമ്മികാ പരിഭോഗാ – തീണി ധമ്മികാനി ദാനാനി, തയോ ധമ്മികാ പടിഗ്ഗഹാ, തയോ ധമ്മികാ പരിഭോഗാ. നവ അധമ്മികാ സഞ്ഞത്തിയോ [പഞ്ഞത്തിയോ (സബ്ബത്ഥ) അട്ഠകഥാ ച സമഥക്ഖന്ധകേ കണ്ഹപക്ഖനവകഞ്ച ഓലോകേതബ്ബം]. നവ ധമ്മികാ സഞ്ഞത്തിയോ. അധമ്മകമ്മേ ദ്വേ നവകാനി. ധമ്മകമ്മേ ദ്വേ നവകാനി. നവ അധമ്മികാനി പാതിമോക്ഖട്ഠപനാനി. നവ ധമ്മികാനി പാതിമോക്ഖട്ഠപനാനീതി.

നവകം നിട്ഠിതം.

തസ്സുദ്ദാനം –

ആഘാതവത്ഥുവിനയാ, വിനീതാ പഠമേന ച;

ഭിജ്ജതി ച പണീതഞ്ച, മംസുദ്ദേസപരമാനി ച.

തണ്ഹാ മാനാ അധിട്ഠാനാ, വികപ്പേ ച വിദത്ഥിയോ;

ദാനാ പടിഗ്ഗഹാ ഭോഗാ, തിവിധാ പുന ധമ്മികാ.

അധമ്മധമ്മസഞ്ഞത്തി, ദുവേ ദ്വേ നവകാനി ച;

പാതിമോക്ഖട്ഠപനാനി, അധമ്മധമ്മികാനി ചാതി.