൧൦. ദസകവാരോ

൩൩൦. ദസ ആഘാതവത്ഥൂനി. ദസ ആഘാതപടിവിനയാ. ദസ വിനീതവത്ഥൂനി. ദസവത്ഥുകാ മിച്ഛാദിട്ഠി. ദസവത്ഥുകാ സമ്മാദിട്ഠി. ദസ അന്തഗ്ഗാഹികാ ദിട്ഠി. ദസ മിച്ഛത്താ. ദസ സമ്മത്താ. ദസ അകുസലകമ്മപഥാ. ദസ കുസലകമ്മപഥാ. ദസ അധമ്മികാ സലാകഗ്ഗാഹാ. ദസ ധമ്മികാ സലാകഗ്ഗാഹാ. സാമണേരാനം ദസ സിക്ഖാപദാനി. ദസഹങ്ഗേഹി സമന്നാഗതോ സാമണേരോ നാസേതബ്ബോ.

ദസഹങ്ഗേഹി സമന്നാഗതോ വിനയധരോ ബാലോ ത്വേവ സങ്ഖം ഗച്ഛതി – അത്തനോ ഭാസപരിയന്തം ന ഉഗ്ഗണ്ഹാതി, പരസ്സ ഭാസപരിയന്തം ന ഉഗ്ഗണ്ഹാതി, അത്തനോ ഭാസപരിയന്തം അനുഗ്ഗഹേത്വാ പരസ്സ ഭാസപരിയന്തം അനുഗ്ഗഹേത്വാ അധമ്മേന കാരേതി, അപ്പടിഞ്ഞായ ആപത്തിം ന ജാനാതി, ആപത്തിയാ മൂലം ന ജാനാതി, ആപത്തിസമുദയം ന ജാനാതി, ആപത്തിനിരോധം ന ജാനാതി, ആപത്തിനിരോധഗാമിനിം പടിപദം ന ജാനാതി.

ദസഹങ്ഗേഹി സമന്നാഗതോ വിനയധരോ പണ്ഡിതോ ത്വേവ സങ്ഖം ഗച്ഛതി – അത്തനോ ഭാസപരിയന്തം ഉഗ്ഗണ്ഹാതി, പരസ്സ ഭാസപരിയന്തം ഉഗ്ഗണ്ഹാതി, അത്തനോ ഭാസപരിയന്തം ഉഗ്ഗഹേത്വാ പരസ്സ ഭാസപരിയന്തം ഉഗ്ഗഹേത്വാ ധമ്മേന കാരേതി, പടിഞ്ഞായ ആപത്തിം ജാനാതി, ആപത്തിയാ മൂലം ജാനാതി, ആപത്തിസമുദയം ജാനാതി, ആപത്തിനിരോധം ജാനാതി, ആപത്തിനിരോധഗാമിനിം പടിപദം ജാനാതി.

അപരേഹിപി ദസഹങ്ഗേഹി സമന്നാഗതോ വിനയധരോ ബാലോ ത്വേവ സങ്ഖം ഗച്ഛതി – അധികരണം ന ജാനാതി, അധികരണസ്സ മൂലം ന ജാനാതി, അധികരണസമുദയം ന ജാനാതി, അധികരണനിരോധം ന ജാനാതി, അധികരണനിരോധഗാമിനിം പടിപദം ന ജാനാതി, വത്ഥും ന ജാനാതി, നിദാനം [ഉദ്ദാനം (ക.)] ന ജാനാതി, പഞ്ഞത്തിം ന ജാനാതി, അനുപഞ്ഞത്തിം ന ജാനാതി, അനുസന്ധിവചനപഥം ന ജാനാതി.

ദസഹങ്ഗേഹി സമന്നാഗതോ വിനയധരോ പണ്ഡിതോ ത്വേവ സങ്ഖം ഗച്ഛതി – അധികരണം ജാനാതി, അധികരണസ്സ മൂലം ജാനാതി, അധികരണസമുദയം ജാനാതി, അധികരണനിരോധം ജാനാതി, അധികരണനിരോധഗാമിനിം പടിപദം ജാനാതി, വത്ഥും ജാനാതി, നിദാനം ജാനാതി, പഞ്ഞത്തിം ജാനാതി, അനുപഞ്ഞത്തിം ജാനാതി, അനുസന്ധിവചനപഥം ജാനാതി.

അപരേഹിപി ദസഹങ്ഗേഹി സമന്നാഗതോ വിനയധരോ ബാലോ ത്വേവ സങ്ഖം ഗച്ഛതി – ഞത്തിം ന ജാനാതി, ഞത്തിയാ കരണം ന ജാനാതി, ന പുബ്ബകുസലോ ഹോതി, ന അപരകുസലോ ഹോതി, അകാലഞ്ഞൂ ച ഹോതി, ആപത്താനാപത്തിം ന ജാനാതി, ലഹുകഗരുകം ആപത്തിം ന ജാനാതി, സാവസേസാനവസേസം ആപത്തിം ന ജാനാതി, ദുട്ഠുല്ലാദുട്ഠുല്ലം ആപത്തിം ന ജാനാതി, ആചരിയപരമ്പരാ ഖോ പനസ്സ ന സുഗ്ഗഹിതാ ഹോതി ന സുമനസികതാ ന സൂപധാരിതാ.

ദസഹങ്ഗേഹി സമന്നാഗതോ വിനയധരോ പണ്ഡിതോ ത്വേവ സങ്ഖം ഗച്ഛതി – ഞത്തിം ജാനാതി, ഞത്തിയാ കരണം ജാനാതി, പുബ്ബകുസലോ ഹോതി, അപരകുസലോ ഹോതി, കാലഞ്ഞൂ ച ഹോതി, ആപത്താനാപത്തിം ജാനാതി, ലഹുകഗരുകം ആപത്തിം ജാനാതി, സാവസേസാനവസേസം ആപത്തിം ജാനാതി, ദുട്ഠുല്ലാദുട്ഠുല്ലം ആപത്തിം ജാനാതി, ആചരിയപരമ്പരാ ഖോ പനസ്സ സുഗ്ഗഹിതാ ഹോതി സുമനസികതാ സൂപധാരിതാ.

അപരേഹിപി ദസഹങ്ഗേഹി സമന്നാഗതോ വിനയധരോ ബാലോ ത്വേവ സങ്ഖം ഗച്ഛതി – ആപത്താനാപത്തിം ന ജാനാതി, ലഹുകഗരുകം ആപത്തിം ന ജാനാതി, സാവസേസാനവസേസം ആപത്തിം ന ജാനാതി, ദുട്ഠുല്ലാദുട്ഠുല്ലം ആപത്തിം ന ജാനാതി, ഉഭയാനി ഖോ പനസ്സ പാതിമോക്ഖാനി വിത്ഥാരേന ന സ്വാഗതാനി ഹോന്തി ന സുവിഭത്താനി ന സുപ്പവത്തീനി ന സുവിനിച്ഛിതാനി സുത്തസോ അനുബ്യഞ്ജനസോ, ആപത്താനാപത്തിം ന ജാനാതി, ലഹുകഗരുകം ആപത്തിം ന ജാനാതി, സാവസേസാനവസേസം ആപത്തിം ന ജാനാതി, ദുട്ഠുല്ലാദുട്ഠുല്ലം ആപത്തിം ന ജാനാതി, അധികരണേ ച ന വിനിച്ഛയകുസലോ ഹോതി.

ദസഹങ്ഗേഹി സമന്നാഗതോ വിനയധരോ പണ്ഡിതോ ത്വേവ സങ്ഖം ഗച്ഛതി – ആപത്താനാപത്തിം ജാനാതി, ലഹുകഗരുകം ആപത്തിം ജാനാതി, സാവസേസാനവസേസം ആപത്തിം ജാനാതി, ദുട്ഠുല്ലാദുട്ഠുല്ലം ആപത്തിം ജാനാതി, ഉഭയാനി ഖോ പനസ്സ പാതിമോക്ഖാനി വിത്ഥാരേന സ്വാഗതാനി ഹോന്തി സുവിഭത്താനി സുപ്പവത്തീനി സുവിനിച്ഛിതാനി സുത്തസോ അനുബ്യഞ്ജനസോ, ആപത്താനാപത്തിം ജാനാതി, ലഹുകഗരുകം ആപത്തിം ജാനാതി, സാവസേസാനവസേസം ആപത്തിം ജാനാതി, ദുട്ഠുല്ലാദുട്ഠുല്ലം ആപത്തിം ജാനാതി, അധികരണേ ച വിനിച്ഛയകുസലോ ഹോതി.

[അ. നി. ൧൦.൩൩] ദസഹങ്ഗേഹി സമന്നാഗതോ ഭിക്ഖു ഉബ്ബാഹികായ സമ്മന്നിതബ്ബോ. ദസ അത്ഥവസേ പടിച്ച തഥാഗതേന സാവകാനം സിക്ഖാപദം പഞ്ഞത്തം. ദസ ആദീനവാ രാജന്തേപുരപ്പവേസനേ. ദസ ദാനവത്ഥൂനി. ദസ രതനാനി. ദസവഗ്ഗോ ഭിക്ഖുസങ്ഘോ. ദസവഗ്ഗേന ഗണേന ഉപസമ്പാദേതബ്ബം. ദസ പംസുകൂലാനി. ദസ ചീവരധാരണാ [ചീവരധാരണാനി (സ്യാ.)]. ദസാഹപരമം അതിരേകചീവരം ധാരേതബ്ബം. ദസ സുക്കാനി. ദസ ഇത്ഥിയോ. ദസ ഭരിയായോ. വേസാലിയാ ദസ വത്ഥൂനി ദീപേന്തി. ദസ പുഗ്ഗലാ അവന്ദിയാ. ദസ അക്കോസവത്ഥൂനി. ദസഹാകാരേഹി പേസുഞ്ഞം ഉപസംഹരതി. ദസ സേനാസനാനി. ദസ വരാനി യാചിംസു. ദസ അധമ്മികാനി പാതിമോക്ഖട്ഠപനാനി. ദസ ധമ്മികാനി പാതിമോക്ഖട്ഠപനാനി. ദസാനിസംസാ യാഗുയാ. ദസ മംസാ അകപ്പിയാ. ദസ പരമാനി. ദസവസ്സേന ഭിക്ഖുനാ ബ്യത്തേന പടിബലേന പബ്ബാജേതബ്ബം ഉപസമ്പാദേതബ്ബം നിസ്സയോ ദാതബ്ബോ സാമണേരോ ഉപട്ഠാപേതബ്ബോ. ദസവസ്സായ ഭിക്ഖുനിയാ ബ്യത്തായ പടിബലായ പബ്ബാജേതബ്ബം ഉപസമ്പാദേതബ്ബം നിസ്സയോ ദാതബ്ബോ സാമണേരീ ഉപട്ഠാപേതബ്ബാ. ദസവസ്സായ ഭിക്ഖുനിയാ ബ്യത്തായ പടിബലായ വുട്ഠാപനസമ്മുതി സാദിതബ്ബാ. ദസവസ്സായ ഗിഹിഗതായ സിക്ഖാ ദാതബ്ബാതി.

ദസകം നിട്ഠിതം.

തസ്സുദ്ദാനം –

ആഘാതം വിനയം വത്ഥു, മിച്ഛാ സമ്മാ ച അന്തഗാ;

മിച്ഛത്താ ചേവ സമ്മത്താ, അകുസലാ കുസലാപി ച.

സലാകാ അധമ്മാ ധമ്മാ, സാമണേരാ ച നാസനാ;

ഭാസാധികരണഞ്ചേവ, ഞത്തിലഹുകമേവ ച.

ലഹുകാ ഗരുകാ ഏതേ, കണ്ഹസുക്കാ വിജാനഥ;

ഉബ്ബാഹികാ ച സിക്ഖാ ച, അന്തേപുരേ ച വത്ഥൂനി.

രതനം ദസവഗ്ഗോ ച, തഥേവ ഉപസമ്പദാ;

പംസുകൂലധാരണാ ച, ദസാഹസുക്കഇത്ഥിയോ.

ഭരിയാ ദസ വത്ഥൂനി, അവന്ദിയക്കോസേന ച;

പേസുഞ്ഞഞ്ചേവ സേനാനി, വരാനി ച അധമ്മികാ.

ധമ്മികാ യാഗുമംസാ ച, പരമാ ഭിക്ഖു ഭിക്ഖുനീ;

വുട്ഠാപനാ ഗിഹിഗതാ, ദസകാ സുപ്പകാസിതാതി.