൧൧. ഏകാദസകവാരോ

൩൩൧. ഏകാദ പുഗ്ഗലാ അനുപസമ്പന്നാ ന ഉപസമ്പാദേതബ്ബാ, ഉപസമ്പന്നാ നാസേതബ്ബാ. ഏകാദസ പാദുകാ അകപ്പിയാ. ഏകാദസ പത്താ അകപ്പിയാ. ഏകാദസ ചീവരാനി അകപ്പിയാനി. ഏകാദസ യാവതതിയകാ. ഭിക്ഖുനീനം ഏകാദസ അന്തരായികാ ധമ്മാ പുച്ഛിതബ്ബാ. ഏകാദസ ചീവരാനി അധിട്ഠാതബ്ബാനി. ഏകാദസ ചീവരാനി ന വികപ്പേതബ്ബാനി. ഏകാദസേ അരുണുഗ്ഗമനേ നിസ്സഗ്ഗിയം ഹോതി. ഏകാദസ ഗണ്ഠികാ കപ്പിയാ. ഏകാദസ വിധാ [വീഥാ (സ്യാ.)] കപ്പിയാ. ഏകാദസ പഥവീ അകപ്പിയാ. ഏകാദസ പഥവീ കപ്പിയാ. ഏകാദസ നിസ്സയപടിപ്പസ്സദ്ധിയോ. ഏകാദസ പുഗ്ഗലാ അവന്ദിയാ. ഏകാദസ പരമാനി. ഏകാദസ വരാനി യാചിംസു. ഏകാദസ സീമാദോസാ. അക്കോസകപരിഭാസകേ പുഗ്ഗലേ ഏകാദസാദീനവാ പാടികങ്ഖാ. [അ. നി. ൧൧.൧൫; മി. പ. ൪.൪.൬] മേത്തായ ചേതോവിമുത്തിയാ ആസേവിതായ ഭാവിതായ ബഹുലീകതായ യാനീകതായ വത്ഥുകതായ അനുട്ഠിതായ പരിചിതായ സുസമാരദ്ധായ ഏകാദസാനിസംസാ പാടികങ്ഖാ. സുഖം സുപതി, സുഖം പടിബുജ്ഝതി, ന പാപകം സുപിനം പസ്സതി, മനുസ്സാനം പിയോ ഹോതി, അമനുസ്സാനം പിയോ ഹോതി, ദേവതാ രക്ഖന്തി, നാസ്സ അഗ്ഗി വാ വിസം വാ സത്ഥം വാ കമതി, തുവട്ടം ചിത്തം സമാധിയതി, മുഖവണ്ണോ വിപ്പസീദതി, അസമ്മൂള്ഹോ കാലങ്കരോതി, ഉത്തരി അപ്പടിവിജ്ഝന്തോ ബ്രഹ്മലോകൂപഗോ ഹോതി – മേത്തായ ചേതോവിമുത്തിയാ ആസേവിതായ ഭാവിതായ ബഹുലീകതായ യാനീകതായ വത്ഥുകതായ അനുട്ഠിതായ പരിചിതായ സുസമാരദ്ധായ ഇമേ ഏകാദസാനിസംസാ പാടികങ്ഖാതി.

ഏകാദസകം നിട്ഠിതം.

തസ്സുദ്ദാനം –

നാസേതബ്ബാ പാദുകാ ച, പത്താ ച ചീവരാനി ച;

തതിയാ പുച്ഛിതബ്ബാ ച, അധിട്ഠാനവികപ്പനാ.

അരുണാ ഗണ്ഠികാ വിധാ, അകപ്പിയാ ച കപ്പിയം;

നിസ്സയാവന്ദിയാ ചേവ, പരമാനി വരാനി ച;

സീമാദോസാ ച അക്കോസാ, മേത്തായേകാദസാ കതാതി.

ഏകുത്തരികനയോ.

തസ്സുദ്ദാനം –

ഏകകാ ച ദുകാ ചേവ, തികാ ച ചതുപഞ്ചകാ;

ഛസത്തട്ഠനവകാ ച, ദസ ഏകാദസാനി ച.

ഹിതായ സബ്ബസത്താനം, ഞാതധമ്മേന താദിനാ;

ഏകുത്തരികാ വിമലാ, മഹാവീരേന ദേസിതാതി.

ഏകുത്തരികനയോ നിട്ഠിതോ.