൮. അട്ഠകവാരോ

൩൨൮. അട്ഠാനിസംസേ സമ്പസ്സമാനേന ന സോ ഭിക്ഖു ആപത്തിയാ അദസ്സനേ ഉക്ഖിപിതബ്ബോ. അട്ഠാനിസംസേ സമ്പസ്സമാനേന പരേസമ്പി സദ്ധായ സാ ആപത്തി ദേസേതബ്ബാ. അട്ഠ യാവതതിയകാ. അട്ഠഹാകാരേഹി കുലാനി ദൂസേതി. അട്ഠ മാതികാ ചീവരസ്സ ഉപ്പാദായ. അട്ഠ മാതികാ കഥിനസ്സ ഉബ്ഭാരായ. അട്ഠ പാനാനി. [ചൂളവ. ൩൪൮; അ. നി. ൮.൭] അട്ഠഹി അസദ്ധമ്മേഹി അഭിഭൂതോ പരിയാദിന്നചിത്തോ ദേവദത്തോ ആപായികോ നേരയികോ കപ്പട്ഠോ അതേകിച്ഛോ. അട്ഠ ലോകധമ്മാ. അട്ഠ ഗരുധമ്മാ. അട്ഠ പാടിദേസനീയാ. അട്ഠങ്ഗികോ മുസാവാദോ. അട്ഠ ഉപോസഥങ്ഗാനി. അട്ഠ ദൂതേയ്യങ്ഗാനി. അട്ഠ തിത്ഥിയവത്താനി. അട്ഠ അച്ഛരിയാ അബ്ഭുതധമ്മാ മഹാസമുദ്ദേ. അട്ഠ അച്ഛരിയാ അബ്ഭുതധമ്മാ ഇമസ്മിം ധമ്മവിനയേ. അട്ഠ അനതിരിത്താ. അട്ഠ അതിരിത്താ. അട്ഠമേ അരുണുഗ്ഗമനേ നിസ്സഗ്ഗിയം ഹോതി. അട്ഠ പാരാജികാ. അട്ഠമം വത്ഥും പരിപൂരേന്തീ നാസേതബ്ബാ. അട്ഠമം വത്ഥും പരിപൂരേന്തിയാ ദേസിതാപി അദേസിതാ ഹോതി. അട്ഠവാചികാ ഉപസമ്പദാ. അട്ഠന്നം പച്ചുട്ഠാതബ്ബം. അട്ഠന്നം ആസനം ദാതബ്ബം. ഉപാസികാ അട്ഠ വരാനി യാചതി. അട്ഠഹങ്ഗേഹി സമന്നാഗതോ ഭിക്ഖു ഭിക്ഖുനോവാദകോ സമ്മന്നിതബ്ബോ [സമ്മനിതബ്ബോ (ക.)]. അട്ഠാനിസംസാ വിനയധരേ. അട്ഠ പരമാനി. തസ്സപാപിയസികകമ്മകതേന ഭിക്ഖുനാ അട്ഠസു ധമ്മേസു സമ്മാ വത്തിതബ്ബം. അട്ഠ അധമ്മികാനി പാതിമോക്ഖട്ഠപനാനി അട്ഠ ധമ്മികാനി പാതിമോക്ഖട്ഠപനാനീതി.

അട്ഠകം നിട്ഠിതം.

തസ്സുദ്ദാനം –

ന സോ ഭിക്ഖു പരേസമ്പി, യാവതതിയദൂസനാ;

മാതികാ കഥിനുബ്ഭാരാ, പാനാ അഭിഭൂതേന ച.

ലോകധമ്മാ ഗരുധമ്മാ, പാടിദേസനീയാ മുസാ;

ഉപോസഥാ ച ദൂതങ്ഗാ, തിത്ഥിയാ സമുദ്ദേപി ച.

അബ്ഭുതാ അനതിരിത്തം, അതിരിത്തം നിസ്സഗ്ഗിയം;

പാരാജികട്ഠമം വത്ഥു, അദേസിതൂപസമ്പദാ.

പച്ചുട്ഠാനാസനഞ്ചേവ, വരം ഓവാദകേന ച;

ആനിസംസാ പരമാനി, അട്ഠധമ്മേസു വത്തനാ;

അധമ്മികാ ധമ്മികാ ച, അട്ഠകാ സുപ്പകാസിതാതി.