൪. ചതുക്കവാരോ

൩൨൪. അത്ഥാപത്തി സകവാചായ ആപജ്ജതി, പരവാചായ വുട്ഠാതി; അത്ഥാപത്തി പരവാചായ ആപജ്ജതി, സകവാചായ വുട്ഠാതി; അത്ഥാപത്തി സകവാചായ ആപജ്ജതി, സകവാചായ വുട്ഠാതി; അത്ഥാപത്തി പരവാചായ ആപജ്ജതി, പരവാചായ വുട്ഠാതി. അത്ഥാപത്തി കായേന ആപജ്ജതി, വാചായ വുട്ഠാതി; അത്ഥാപത്തി വാചായ ആപജ്ജതി, കായേന വുട്ഠാതി; അത്ഥാപത്തി കായേന ആപജ്ജതി, കായേന വുട്ഠാതി; അത്ഥാപത്തി വാചായ ആപജ്ജതി, വാചായ വുട്ഠാതി. അത്ഥാപത്തി പസുത്തോ ആപജ്ജതി, പടിബുദ്ധോ വുട്ഠാതി; അത്ഥാപത്തി പടിബുദ്ധോ ആപജ്ജതി, പസുത്തോ വുട്ഠാതി; അത്ഥാപത്തി പസുത്തോ ആപജ്ജതി, പസുത്തോ വുട്ഠാതി; അത്ഥാപത്തി പടിബുദ്ധോ ആപജ്ജതി, പടിബുദ്ധോ വുട്ഠാതി. അത്ഥാപത്തി അചിത്തകോ ആപജ്ജതി, സചിത്തകോ വുട്ഠാതി; അത്ഥാപത്തി സചിത്തകോ ആപജ്ജതി, അചിത്തകോ വുട്ഠാതി; അത്ഥാപത്തി അചിത്തകോ ആപജ്ജതി, അചിത്തകോ വുട്ഠാതി; അത്ഥാപത്തി സചിത്തകോ ആപജ്ജതി, സചിത്തകോ വുട്ഠാതി. അത്ഥാപത്തി ആപജ്ജന്തോ ദേസേതി; ദേസേന്തോ ആപജ്ജതി; അത്ഥാപത്തി ആപജ്ജന്തോ വുട്ഠാതി; വുട്ഠഹന്തോ ആപജ്ജതി. അത്ഥാപത്തി കമ്മേന ആപജ്ജതി, അകമ്മേന വുട്ഠാതി; അത്ഥാപത്തി അകമ്മേന ആപജ്ജതി, കമ്മേന വുട്ഠാതി; അത്ഥാപത്തി കമ്മേന ആപജ്ജതി, കമ്മേന വുട്ഠാതി; അത്ഥാപത്തി അകമ്മേന ആപജ്ജതി, അകമ്മേന വുട്ഠാതി.

[അ. നി. ൪.൨൫൦; ദീ. നി. ൩.൩൧൩; വിഭ. ൯൩൯] ചത്താരോ അനരിയവോഹാരാ – അദിട്ഠേ ദിട്ഠവാദിതാ, അസ്സുതേ സുതവാദിതാ, അമുതേ മുതവാദിതാ, അവിഞ്ഞാതേ വിഞ്ഞാതവാദിതാ. ചത്താരോ അരിയവോഹാരാ – അദിട്ഠേ അദിട്ഠവാദിതാ, അസ്സുതേ അസ്സുതവാദിതാ, അമുതേ അമുതവാദിതാ, അവിഞ്ഞാതേ അവിഞ്ഞാതവാദിതാ. അപരേപി ചത്താരോ അനരിയവോഹാരാ – ദിട്ഠേ അദിട്ഠവാദിതാ, സുതേ അസ്സുതവാദിതാ, മുതേ അമുതവാദിതാ, വിഞ്ഞാതേ അവിഞ്ഞാതവാദിതാ. ചത്താരോ അരിയവോഹാരാ – ദിട്ഠേ ദിട്ഠവാദിതാ, സുതേ സുതവാദിതാ, മുതേ മുതവാദിതാ, വിഞ്ഞാതേ വിഞ്ഞാതവാദിതാ.

ചത്താരോ പാരാജികാ ഭിക്ഖൂനം ഭിക്ഖുനീഹി സാധാരണാ; ചത്താരോ പാരാജികാ ഭിക്ഖുനീനം ഭിക്ഖൂഹി അസാധാരണാ. ചത്താരോ പരിക്ഖാരാ – അത്ഥി പരിക്ഖാരോ രക്ഖിതബ്ബോ ഗോപേതബ്ബോ മമായിതബ്ബോ പരിഭുഞ്ജിതബ്ബോ; അത്ഥി പരിക്ഖാരോ രക്ഖിതബ്ബോ ഗോപേതബ്ബോ മമായിതബ്ബോ, ന പരിഭുഞ്ജിതബ്ബോ; അത്ഥി പരിക്ഖാരോ രക്ഖിതബ്ബോ ഗോപേതബ്ബോ, ന മമായിതബ്ബോ ന പരിഭുഞ്ജിതബ്ബോ; അത്ഥി പരിക്ഖാരോ ന രക്ഖിതബ്ബോ ന ഗോപേതബ്ബോ, ന മമായിതബ്ബോ ന പരിഭുഞ്ജിതബ്ബോ. അത്ഥാപത്തി സമ്മുഖാ ആപജ്ജതി, പരമ്മുഖാ വുട്ഠാതി; അത്ഥാപത്തി പരമ്മുഖാ ആപജ്ജതി, സമ്മുഖാ വുട്ഠാതി; അത്ഥാപത്തി സമ്മുഖാ ആപജ്ജതി, സമ്മുഖാ വുട്ഠാതി; അത്ഥാപത്തി പരമ്മുഖാ ആപജ്ജതി, പരമ്മുഖാ വുട്ഠാതി. അത്ഥാപത്തി അജാനന്തോ ആപജ്ജതി, ജാനന്തോ വുട്ഠാതി; അത്ഥാപത്തി ജാനന്തോ ആപജ്ജതി, അജാനന്തോ വുട്ഠാതി; അത്ഥാപത്തി അജാനന്തോ ആപജ്ജതി, അജാനന്തോ വുട്ഠാതി; അത്ഥാപത്തി ജാനന്തോ ആപജ്ജതി, ജാനന്തോ വുട്ഠാതി.

ചതൂഹാകാരേഹി ആപത്തിം ആപജ്ജതി – കായേന ആപജ്ജതി, വാചായ ആപജ്ജതി, കായേന വാചായ ആപജ്ജതി, കമ്മവാചായ ആപജ്ജതി. അപരേഹിപി ചതൂഹാകാരേഹി ആപത്തിം ആപജ്ജതി – സങ്ഘമജ്ഝേ, ഗണമജ്ഝേ, പുഗ്ഗലസ്സ സന്തികേ, ലിങ്ഗപാതുഭാവേന. ചതൂഹാകാരേഹി ആപത്തിയാ വുട്ഠാതി – കായേന വുട്ഠാതി, വാചായ വുട്ഠാതി, കായേന വാചായ വുട്ഠാതി, കമ്മവാചായ വുട്ഠാതി. അപരേഹിപി ചതൂഹാകാരേഹി ആപത്തിയാ വുട്ഠാതി – സങ്ഘമജ്ഝേ, ഗണമജ്ഝേ, പുഗ്ഗലസ്സ സന്തികേ, ലിങ്ഗപാതുഭാവേന. സഹ പടിലാഭേന പുരിമം ജഹതി, പച്ഛിമേ പതിട്ഠാതി, വിഞ്ഞത്തിയോ പടിപ്പസ്സമ്ഭന്തി, പണ്ണത്തിയോ നിരുജ്ഝന്തി. സഹ പടിലാഭേന പച്ഛിമം ജഹതി, പുരിമേ പതിട്ഠാതി, വിഞ്ഞത്തിയോ പടിപ്പസ്സമ്ഭന്തി, പണ്ണത്തിയോ നിരുജ്ഝന്തി. ചതസ്സോ ചോദനാ – സീലവിപത്തിയാ ചോദേതി, ആചാരവിപത്തിയാ ചോദേതി, ദിട്ഠിവിപത്തിയാ ചോദേതി, ആജീവവിപത്തിയാ ചോദേതി. ചത്താരോ പരിവാസാ – പടിച്ഛന്നപരിവാസോ, അപ്പടിച്ഛന്നപരിവാസോ, സുദ്ധന്തപരിവാസോ, സമോധാനപരിവാസോ. ചത്താരോ മാനത്താ – പടിച്ഛന്നമാനത്തം, അപ്പടിച്ഛന്നമാനത്തം, പക്ഖമാനത്തം, സമോധാനമാനത്തം. ചത്താരോ മാനത്തചാരികസ്സ ഭിക്ഖുനോ രത്തിച്ഛേദാ – സഹവാസോ, വിപ്പവാസോ, അനാരോചനാ, ഊനേ ഗണേ ചരതി. ചത്താരോ സാമുക്കംസാ. ചത്താരോ പടിഗ്ഗഹിതപരിഭോഗാ – യാവകാലികം, യാമകാലികം, സത്താഹകാലികം, യാവജീവികം. ചത്താരി മഹാവികടാനി – ഗൂഥോ, മുത്തം, ഛാരികാ, മത്തികാ. ചത്താരി കമ്മാനി – അപലോകനകമ്മം, ഞത്തികമ്മം, ഞത്തിദുതിയകമ്മം, ഞത്തിചതുത്ഥകമ്മം. അപരാനിപി ചത്താരി കമ്മാനി – അധമ്മേന വഗ്ഗകമ്മം, അധമ്മേന സമഗ്ഗകമ്മം, ധമ്മേന വഗ്ഗകമ്മം, ധമ്മേന സമഗ്ഗകമ്മം. ചതസ്സോ വിപത്തിയോ – സീലവിപത്തി, ആചാരവിപത്തി, ദിട്ഠിവിപത്തി, ആജീവവിപത്തി. ചത്താരി അധികരണാനി – വിവാദാധികരണം, അനുവാദാധികരണം, ആപത്താധികരണം, കിച്ചാധികരണം. [അ. നി. ൪.൨൧൧] ചത്താരോ പരിസദൂസനാ – ഭിക്ഖു ദുസ്സീലോ പാപധമ്മോ പരിസദൂസനോ, ഭിക്ഖുനീ ദുസ്സീലാ പാപധമ്മാ പരിസദൂസനാ, ഉപാസകോ ദുസ്സീലോ പാപധമ്മോ പരിസദൂസനോ, ഉപാസികാ ദുസ്സീലാ പാപധമ്മാ പരിസദൂസനാ. ചത്താരോ പരിസസോഭനാ [പരിസസോഭണാ (സ്യാ. ക.)] – ഭിക്ഖു സീലവാ കല്യാണധമ്മോ പരിസസോഭനോ, ഭിക്ഖുനീ സീലവതീ കല്യാണധമ്മാ പരിസസോഭനാ, ഉപാസകോ സീലവാ കല്യാണധമ്മോ പരിസസോഭനോ, ഉപാസികാ സീലവതീ കല്യാണധമ്മാ പരിസസോഭനാ.

അത്ഥാപത്തി ആഗന്തുകോ ആപജ്ജതി, നോ ആവാസികോ; അത്ഥാപത്തി ആവാസികോ ആപജ്ജതി, നോ ആഗന്തുകോ; അത്ഥാപത്തി ആഗന്തുകോ ചേവ ആപജ്ജതി ആവാസികോ ച അത്ഥാപത്തി നേവ ആഗന്തുകോ ആപജ്ജതി, നോ ആവാസികോ. അത്ഥാപത്തി ഗമികോ ആപജ്ജതി, നോ ആവാസികോ; അത്ഥാപത്തി ആവാസികോ ആപജ്ജതി, നോ ഗമികോ; അത്ഥാപത്തി ഗമികോ ചേവ ആപജ്ജതി ആവാസികോ ച; അത്ഥാപത്തി നേവ ഗമികോ ആപജ്ജതി നോ ആവാസികോ. അത്ഥി വത്ഥുനാനത്തതാ നോ ആപത്തിനാനത്തതാ, അത്ഥി ആപത്തിനാനത്തതാ നോ വത്ഥുനാനത്തതാ, അത്ഥി വത്ഥുനാനത്തതാ ചേവ ആപത്തിനാനത്തതാ ച, അത്ഥി നേവ വത്ഥുനാനത്തതാ നോ ആപത്തിനാനത്തതാ. അത്ഥി വത്ഥുസഭാഗതാ നോ ആപത്തിസഭാഗതാ, അത്ഥി ആപത്തിസഭാഗതാ നോ വത്ഥുസഭാഗതാ, അത്ഥി വത്ഥുസഭാഗതാ ചേവ ആപത്തിസഭാഗതാ ച അത്ഥി നേവ വത്ഥുസഭാഗതാ നോ ആപത്തിസഭാഗതാ. അത്ഥാപത്തി ഉപജ്ഝായോ ആപജ്ജതി നോ സദ്ധിവിഹാരികോ, അത്ഥാപത്തി സദ്ധിവിഹാരികോ ആപജ്ജതി നോ ഉപജ്ഝായോ, അത്ഥാപത്തി ഉപജ്ഝായോ ചേവ ആപജ്ജതി സദ്ധിവിഹാരികോ ച, അത്ഥാപത്തി നേവ ഉപജ്ഝായോ ആപജ്ജതി നോ സദ്ധിവിഹാരികോ. അത്ഥാപത്തി ആചരിയോ ആപജ്ജതി നോ അന്തേവാസികോ, അത്ഥാപത്തി അന്തേവാസികോ ആപജ്ജതി നോ ആചരിയോ, അത്ഥാപത്തി ആചരിയോ ചേവ ആപജ്ജതി അന്തേവാസികോ ച, അത്ഥാപത്തി നേവ ആചരിയോ ആപജ്ജതി നോ അന്തേവാസികോ. ചത്താരോ പച്ചയാ അനാപത്തി വസ്സച്ഛേദസ്സ – സങ്ഘോ വാ ഭിന്നോ ഹോതി, സങ്ഘം വാ ഭിന്ദിതുകാമാ ഹോന്തി, ജീവിതന്തരായോ വാ ഹോതി, ബ്രഹ്മചരിയന്തരായോ വാ ഹോതി. ചത്താരി വചീദുച്ചരിതാനി – മുസാവാദോ, പിസുണാ വാചാ, ഫരുസാ വാചാ, സമ്ഫപ്പലാപോ. ചത്താരി വചീസുചരിതാനി – സച്ചവാചാ, അപിസുണാ വാചാ, സണ്ഹാ വാചാ, മന്താ ഭാസാ. അത്ഥി ആദിയന്തോ ഗരുകം ആപത്തിം ആപജ്ജതി, പയോജേന്തോ ലഹുകം; അത്ഥി ആദിയന്തോ ലഹുകം ആപത്തിം ആപജ്ജതി, പയോജേന്തോ ഗരുകം, അത്ഥി ആദിയന്തോപി പയോജേന്തോപി ഗരുകം ആപത്തിം ആപജ്ജതി; അത്ഥി ആദിയന്തോപി പയോജേന്തോപി ലഹുകം ആപത്തിം ആപജ്ജതി.

അത്ഥി പുഗ്ഗലോ അഭിവാദനാരഹോ, നോ പച്ചുട്ഠാനാരഹോ; അത്ഥി പുഗ്ഗലോ പച്ചുട്ഠാനാരഹോ, നോ അഭിവാദനാരഹോ; അത്ഥി പുഗ്ഗലോ അഭിവാദനാരഹോ ചേവ പച്ചുട്ഠാനാരഹോ ച; അത്ഥി പുഗ്ഗലോ നേവ അഭിവാദനാരഹോ നോ പച്ചുട്ഠാനാരഹോ. അത്ഥി പുഗ്ഗലോ ആസനാരഹോ, നോ അഭിവാദനാരഹോ; അത്ഥി പുഗ്ഗലോ അഭിവാദനാരഹോ, നോ ആസനാരഹോ; അത്ഥി പുഗ്ഗലോ ആസനാരഹോ ചേവ അഭിവാദനാരഹോ ച; അത്ഥി പുഗ്ഗലോ നേവ ആസനാരഹോ നോ അഭിവാദനാരഹോ. അത്ഥാപത്തി കാലേ ആപജ്ജതി, നോ വികാലേ; അത്ഥാപത്തി വികാലേ ആപജ്ജതി, നോ കാലേ; അത്ഥാപത്തി കാലേ ചേവ ആപജ്ജതി വികാലേ ച; അത്ഥാപത്തി നേവ കാലേ ആപജ്ജതി നോ വികാലേ. അത്ഥി പടിഗ്ഗഹിതം കാലേ കപ്പതി, നോ വികാലേ; അത്ഥി പടിഗ്ഗഹിതം വികാലേ കപ്പതി, നോ കാലേ; അത്ഥി പടിഗ്ഗഹിതം കാലേ ചേവ കപ്പതി വികാലേ ച; അത്ഥി പടിഗ്ഗഹിതം നേവ കാലേ കപ്പതി നോ വികാലേ. അത്ഥാപത്തി പച്ചന്തിമേസു ജനപദേസു ആപജ്ജതി, നോ മജ്ഝിമേസു; അത്ഥാപത്തി മജ്ഝിമേസു ജനപദേസു ആപജ്ജതി, നോ പച്ചന്തിമേസു; അത്ഥാപത്തി പച്ചന്തിമേസു ചേവ ജനപദേസു ആപജ്ജതി മജ്ഝിമേസു ച; അത്ഥാപത്തി നേവ പച്ചന്തിമേസു ജനപദേസു ആപജ്ജതി നോ മജ്ഝിമേസു. അത്ഥി പച്ചന്തിമേസു ജനപദേസു കപ്പതി, നോ മജ്ഝിമേസു; അത്ഥി മജ്ഝിമേസു ജനപദേസു കപ്പതി, നോ പച്ചന്തിമേസു; അത്ഥി പച്ചന്തിമേസു ചേവ ജനപദേസു കപ്പതി മജ്ഝിമേസു ച; അത്ഥി നേവ പച്ചന്തിമേസു ജനപദേസു കപ്പതി നോ മജ്ഝിമേസു. അത്ഥാപത്തി അന്തോ ആപജ്ജതി, നോ ബഹി; അത്ഥാപത്തി ബഹി ആപജ്ജതി, നോ അന്തോ; അത്ഥാപത്തി അന്തോ ചേവ ആപജ്ജതി ബഹി ച; അത്ഥാപത്തി നേവ അന്തോ ആപജ്ജതി നോ ബഹി. അത്ഥാപത്തി അന്തോസീമായ ആപജ്ജതി, നോ ബഹിസീമായ; അത്ഥാപത്തി ബഹിസീമായ ആപജ്ജതി, നോ അന്തോസീമായ; അത്ഥാപത്തി അന്തോസീമായ ചേവ ആപജ്ജതി ബഹിസീമായ ച; അത്ഥാപത്തി നേവ അന്തോസീമായ ആപജ്ജതി നോ ബഹിസീമായ. അത്ഥാപത്തി ഗാമേ ആപജ്ജതി, നോ അരഞ്ഞേ; അത്ഥാപത്തി അരഞ്ഞേ ആപജ്ജതി, നോ ഗാമേ; അത്ഥാപത്തി ഗാമേ ചേവ ആപജ്ജതി അരഞ്ഞേ ച; അത്ഥാപത്തി നേവ ഗാമേ ആപജ്ജതി നോ അരഞ്ഞേ.

ചതസ്സോ ചോദനാ – വത്ഥുസന്ദസ്സനാ, ആപത്തിസന്ദസ്സനാ, സംവാസപടിക്ഖേപോ, സാമീചിപടിക്ഖേപോ. ചത്താരോ പുബ്ബകിച്ചാ. ചത്താരോ പത്തകല്ലാ. ചത്താരി അനഞ്ഞപാചിത്തിയാനി. ചതസ്സോ ഭിക്ഖുസമ്മുതിയോ. [അ. നി. ൪.൧൭; വിഭ. ൯൩൯; ദീ. നി. ൩.൩൧൧] ചത്താരി അഗതിഗമനാനി – ഛന്ദാഗതിം ഗച്ഛതി, ദോസാഗതിം ഗച്ഛതി, മോഹാഗതിം ഗച്ഛതി, ഭയാഗതിം ഗച്ഛതി. ചത്താരി നാഗതിഗമനാനി – ന ഛന്ദാഗതിം ഗച്ഛതി, ന ദോസാഗതിം ഗച്ഛതി, ന മോഹാഗതിം ഗച്ഛതി, ന ഭയാഗതിം ഗച്ഛതി. ചതൂഹങ്ഗേഹി സമന്നാഗതോ അലജ്ജീ ഭിക്ഖു സങ്ഘം ഭിന്ദതി – ഛന്ദാഗതിം ഗച്ഛന്തോ, ദോസാഗതിം ഗച്ഛന്തോ, മോഹാഗതിം ഗച്ഛന്തോ, ഭയാഗതിം ഗച്ഛന്തോ. ചതൂഹങ്ഗേഹി സമന്നാഗതോ പേസലോ ഭിക്ഖു ഭിന്നം സങ്ഘം സമഗ്ഗം കരോതി – ന ഛന്ദാഗതിം ഗച്ഛന്തോ, ന ദോസാഗതിം ഗച്ഛന്തോ, ന മോഹാഗതിം ഗച്ഛന്തോ, ന ഭയാഗതിം ഗച്ഛന്തോ. ചതൂഹങ്ഗേഹി സമന്നാഗതസ്സ ഭിക്ഖുനോ വിനയോ ന പുച്ഛിതബ്ബോ – ഛന്ദാഗതിം ഗച്ഛതി, ദോസാഗതിം ഗച്ഛതി, മോഹാഗതിം ഗച്ഛതി, ഭയാഗതിം ഗച്ഛതി. ചതൂഹങ്ഗേഹി സമന്നാഗതേന ഭിക്ഖുനാ വിനയോ ന പുച്ഛിതബ്ബോ – ഛന്ദാഗതിം ഗച്ഛതി, ദോസാഗതിം ഗച്ഛതി, മോഹാഗതിം ഗച്ഛതി, ഭയാഗതിം ഗച്ഛതി. ചതൂഹങ്ഗേഹി സമന്നാഗതസ്സ ഭിക്ഖുനോ വിനയോ ന വിസ്സജ്ജേതബ്ബോ – ഛന്ദാഗതിം ഗച്ഛതി, ദോസാഗതിം ഗച്ഛതി, മോഹാഗതിം ഗച്ഛതി, ഭയാഗതിം ഗച്ഛതി. ചതൂഹങ്ഗേഹി സമന്നാഗതേന ഭിക്ഖുനാ വിനയോ ന വിസ്സജ്ജേതബ്ബോ – ഛന്ദാഗതിം ഗച്ഛതി, ദോസാഗതിം ഗച്ഛതി, മോഹാഗതിം ഗച്ഛതി, ഭയാഗതിം ഗച്ഛതി. ചതൂഹങ്ഗേഹി സമന്നാഗതസ്സ ഭിക്ഖുനോ അനുയോഗോ ന ദാതബ്ബോ – ഛന്ദാഗതിം ഗച്ഛതി, ദോസാഗതിം ഗച്ഛതി, മോഹാഗതിം ഗച്ഛതി, ഭയാഗതിം ഗച്ഛതി. ചതൂഹങ്ഗേഹി സമന്നാഗതേ ഭിക്ഖുനാ സദ്ധിം വിനയോ ന സാകച്ഛിതബ്ബോ – ഛന്ദാഗതിം ഗച്ഛതി, ദോസാഗതിം ഗച്ഛതി, മോഹാഗതിം ഗച്ഛതി, ഭയാഗതിം ഗച്ഛതി. അത്ഥാപത്തി ഗിലാനോ ആപജ്ജതി, നോ അഗിലാനോ; അത്ഥാപത്തി അഗിലാനോ ആപജ്ജതി, നോ ഗിലാനോ; അത്ഥാപത്തി ഗിലാനോ ചേവ ആപജ്ജതി അഗിലാനോ ച; അത്ഥാപത്തി നേവ ഗിലാനോ ആപജ്ജതി നോ അഗിലാനോ. ചത്താരി അധമ്മികാനി പാതിമോക്ഖട്ഠപനാനി. ചത്താരി ധമ്മികാനി പാതിമോക്ഖട്ഠപനാനി.

ചതുക്കം നിട്ഠിതം.

തസ്സുദ്ദാനം –

സകവാചായ കായേന, പസുത്തോ ച അചിത്തകോ;

ആപജ്ജന്തോ ച കമ്മേന, വോഹാരാ ചതുരോ തഥാ.

ഭിക്ഖൂനം ഭിക്ഖുനീനഞ്ച, പരിക്ഖാരോ ച സമ്മുഖാ;

അജാനകായേ മജ്ഝേ ച, വുട്ഠാതി ദുവിധാ തഥാ.

പടിലാഭേന ചോദനാ, പരിവാസാ ച വുച്ചതി;

മാനത്തചാരികാ ചാപി, സാമുക്കംസാ പടിഗ്ഗഹി.

മഹാവികടകമ്മാനി, പുന കമ്മേ വിപത്തിയോ;

അധികരണാ ദുസ്സീലാ ച, സോഭനാഗന്തുകേന ച.

ഗമികോ വത്ഥുനാനത്താ, സഭാഗുപജ്ഝായേന ച;

ആചരിയോ പച്ചയാ വാ, ദുച്ചരിതം സുചരിതം.

ആദിയന്തോ പുഗ്ഗലോ ച, അരഹോ ആസനേന ച;

കാലേ ച കപ്പതി ചേവ, പച്ചന്തിമേസു കപ്പതി.

അന്തോ അന്തോ ച സീമായ, ഗാമേ ച ചോദനായ ച;

പുബ്ബകിച്ചം പത്തകല്ലം, അനഞ്ഞാ സമ്മുതിയോ ച.

അഗതി നാഗതി ചേവ, അലജ്ജീ പേസലേന ച;

പുച്ഛിതബ്ബാ ദുവേ ചേവ, വിസ്സജ്ജേയ്യാ തഥാ ദുവേ;

അനുയോഗോ ച സാകച്ഛാ, ഗിലാനോ ഠപനേന ചാതി.