൩. തികവാരോ

൩൨൩. അത്ഥാപത്തി തിട്ഠന്തേ ഭഗവതി ആപജ്ജതി, നോ പരിനിബ്ബുതേ; അത്ഥാപത്തി പരിനിബ്ബുതേ ഭഗവതി ആപജ്ജതി, നോ തിട്ഠന്തേ; അത്ഥാപത്തി തിട്ഠന്തേപി ഭഗവതി ആപജ്ജതി പരിനിബ്ബുതേപി. അത്ഥാപത്തി കാലേ ആപജ്ജതി, നോ വികാലേ; അത്ഥാപത്തി വികാലേ ആപജ്ജതി, നോ കാലേ; അത്ഥാപത്തി കാലേ ചേവ ആപജ്ജതി വികാലേ ച. അത്ഥാപത്തി രത്തിം ആപജ്ജതി, നോ ദിവാ; അത്ഥാപത്തി ദിവാ ആപജ്ജതി, നോ രത്തിം; അത്ഥാപത്തി രത്തിഞ്ചേവ ആപജ്ജതി ദിവാ ച. അത്ഥാപത്തി ദസവസ്സോ ആപജ്ജതി, നോ ഊനദസവസ്സോ; അത്ഥാപത്തി ഊനദസവസ്സോ ആപജ്ജതി, നോ ദസവസ്സോ; അത്ഥാപത്തി ദസവസ്സോ ചേവ ആപജ്ജതി ഊനദസവസ്സോ ച. അത്ഥാപത്തി പഞ്ചവസ്സോ ആപജ്ജതി, നോ ഊനപഞ്ചവസ്സോ; അത്ഥാപത്തി ഊനപഞ്ചവസ്സോ ആപജ്ജതി, നോ പഞ്ചവസ്സോ; അത്ഥാപത്തി പഞ്ചവസ്സോ ചേവ ആപജ്ജതി ഊനപഞ്ചവസ്സോ ച. അത്ഥാപത്തി കുസലചിത്തോ ആപജ്ജതി; അത്ഥാപത്തി അകുസലചിത്തോ ആപജ്ജതി; അത്ഥാപത്തി അബ്യാകതചിത്തോ ആപജ്ജതി. അത്ഥാപത്തി സുഖവേദനാസമങ്ഗീ ആപജ്ജതി; അത്ഥാപത്തി ദുക്ഖവേദനാസമങ്ഗീ ആപജ്ജതി; അത്ഥാപത്തി അദുക്ഖമസുഖവേദനാസമങ്ഗീ ആപജ്ജതി. തീണി ചോദനാവത്ഥൂനി – ദിട്ഠേന, സുതേന, പരിസങ്കായ. തയോ സലാകഗ്ഗാഹാ – ഗുള്ഹകോ, വിവടകോ [വിവട്ടകോ (ക.)], സകണ്ണജപ്പകോ. തയോ പടിക്ഖേപാ – മഹിച്ഛതാ, അസന്തുട്ഠിതാ [അസന്തുട്ഠതാ (സ്യാ.)], അസല്ലേഖതാ. തയോ അനുഞ്ഞാതാ – അപ്പിച്ഛതാ, സന്തുട്ഠിതാ, സല്ലേഖതാ. അപരേപി തയോ പടിക്ഖേപാ – മഹിച്ഛതാ, അസന്തുട്ഠിതാ, അമത്തഞ്ഞുതാ. തയോ അനുഞ്ഞാതാ – അപ്പിച്ഛതാ, സന്തുട്ഠിതാ, മത്തഞ്ഞുതാ. തിസ്സോ പഞ്ഞത്തിയോ – പഞ്ഞത്തി, അനുപഞ്ഞത്തി, അനുപ്പന്നപഞ്ഞത്തി. അപരാപി തിസ്സോ പഞ്ഞത്തിയോ – സബ്ബത്ഥപഞ്ഞത്തി, പദേസപഞ്ഞത്തി, സാധാരണപഞ്ഞത്തി. അപരാപി തിസ്സോ പഞ്ഞത്തിയോ – അസാധാരണപഞ്ഞത്തി, ഏകതോപഞ്ഞത്തി, ഉഭതോപഞ്ഞത്തി.

അത്ഥാപത്തി ബാലോ ആപജ്ജതി, നോ പണ്ഡിതോ; അത്ഥാപത്തി പണ്ഡിതോ ആപജ്ജതി, നോ ബാലോ; അത്ഥാപത്തി ബാലോ ചേവ ആപജ്ജതി പണ്ഡിതോ ച. അത്ഥാപത്തി കാളേ ആപജ്ജതി, നോ ജുണ്ഹേ; അത്ഥാപത്തി ജുണ്ഹേ ആപജ്ജതി, നോ കാളേ; അത്ഥാപത്തി കാളേ ചേവ ആപജ്ജതി ജുണ്ഹേ ച. അത്ഥി കാളേ കപ്പതി, നോ ജുണ്ഹേ; അത്ഥി ജുണ്ഹേ കപ്പതി, നോ കാളേ; അത്ഥി കാളേ ചേവ കപ്പതി ജുണ്ഹേ ച. അത്ഥാപത്തി ഹേമന്തേ ആപജ്ജതി, നോ ഗിമ്ഹേ നോ വസ്സേ; അത്ഥാപത്തി ഗിമ്ഹേ ആപജ്ജതി, നോ ഹേമന്തേ നോ വസ്സേ; അത്ഥാപത്തി വസ്സേ ആപജ്ജതി, നോ ഹേമന്തേ നോ ഗിമ്ഹേ. അത്ഥാപത്തി സങ്ഘോ ആപജ്ജതി, ന ഗണോ ന പുഗ്ഗലോ; അത്ഥാപത്തി ഗണോ ആപജ്ജതി, ന സങ്ഘോ ന പുഗ്ഗലോ; അത്ഥാപത്തി പുഗ്ഗലോ ആപജ്ജതി, ന സങ്ഘോ ന ഗണോ. അത്ഥി സങ്ഘസ്സ കപ്പതി, ന ഗണസ്സ ന പുഗ്ഗലസ്സ; അത്ഥി ഗണസ്സ കപ്പതി, ന സങ്ഘസ്സ ന പുഗ്ഗലസ്സ; അത്ഥി പുഗ്ഗലസ്സ കപ്പതി, ന സങ്ഘസ്സ ന ഗണസ്സ. തിസ്സോ ഛാദനാ വത്ഥും ഛാദേതി, നോ ആപത്തിം; ആപത്തിം ഛാദേതി, നോ വത്ഥും; വത്ഥുഞ്ചേവ ഛാദേതി ആപത്തിഞ്ച. തിസ്സോ പടിച്ഛാദിയോ – ജന്താഘരപടിച്ഛാദി, ഉദകപടിച്ഛാദി, വത്ഥപടിച്ഛാദി. [അ. നി. ൩.൧൩൨] തീണി പടിച്ഛന്നാനി വഹന്തി, നോ വിവടാനി – മാതുഗാമോ പടിച്ഛന്നോ വഹതി, നോ വിവടോ; ബ്രാഹ്മണാനം മന്താ പടിച്ഛന്നാ വഹന്തി, നോ വിവടാ; മിച്ഛാദിട്ഠി പടിച്ഛന്നാ വഹതി, നോ വിവടാ. തീണി വിവടാനി വിരോചന്തി, നോ പടിച്ഛന്നാനി – ചന്ദമണ്ഡലം വിവടം വിരോചതി, നോ പടിച്ഛന്നം; സൂരിയമണ്ഡലം വിവടം വിരോചതി, നോ പടിച്ഛന്നം; തഥാഗതപ്പവേദിതോ ധമ്മവിനയോ വിവടോ വിരോചതി, നോ പടിച്ഛന്നോ. തയോ സേനാസനഗ്ഗാഹാ – പുരിമകോ, പച്ഛിമകോ, അന്തരാമുത്തകോ. അത്ഥാപത്തി ഗിലാനോ ആപജ്ജതി, നോ അഗിലാനോ; അത്ഥാപത്തി അഗിലാനോ ആപജ്ജതി, നോ ഗിലാനോ; അത്ഥാപത്തി ഗിലാനോ ചേവ ആപജ്ജതി അഗിലാനോ ച.

തീണി അധമ്മികാനി പാതിമോക്ഖട്ഠപനാനി. തീണി ധമ്മികാനി പാതിമോക്ഖട്ഠപനാനി. തയോ പരിവാസാ – പടിച്ഛന്നപരിവാസോ, അപ്പടിച്ഛന്നപരിവാസോ, സുദ്ധന്തപരിവാസോ. തയോ മാനത്താ – പടിച്ഛന്നമാനത്തം, അപ്പടിച്ഛന്നമാനത്തം, പക്ഖമാനത്തം. തയോ പാരിവാസികസ്സ ഭിക്ഖുനോ രത്തിച്ഛേദാ – സഹവാസോ, വിപ്പവാസോ, അനാരോചനാ. അത്ഥാപത്തി അന്തോ ആപജ്ജതി, നോ ബഹി; അത്ഥാപത്തി ബഹി ആപജ്ജതി, നോ അന്തോ; അത്ഥാപത്തി അന്തോ ചേവ ആപജ്ജതി ബഹി ച. അത്ഥാപത്തി അന്തോസീമായ ആപജ്ജതി, നോ ബഹിസീമായ; അത്ഥാപത്തി ബഹിസീമായ ആപജ്ജതി, നോ അന്തോസീമായ; അത്ഥാപത്തി അന്തോസീമായ ചേവ ആപജ്ജതി ബഹിസീമായ ച. തീഹാകാരേഹി ആപത്തിം ആപജ്ജതി – കായേന ആപജ്ജതി, വാചായ ആപജ്ജതി, കായേന വാചായ ആപജ്ജതി. അപരേഹിപി തീഹാകാരേഹി ആപത്തിം ആപജ്ജതി – സങ്ഘമജ്ഝേ, ഗണമജ്ഝേ, പുഗ്ഗലസ്സ സന്തികേ. തീഹാകാരേഹി ആപത്തിയാ വുട്ഠാതി – കായേന വുട്ഠാതി, വാചായ വുട്ഠാതി, കായേന വാചായ വുട്ഠാതി. അപരേഹിപി തീഹാകാരേഹി ആപത്തിയാ വുട്ഠാതി – സങ്ഘമജ്ഝേ, ഗണമജ്ഝേ, പുഗ്ഗലസ്സ സന്തികേ. തീണി അധമ്മികാനി അമൂള്ഹവിനയസ്സ ദാനാനി. തീണി ധമ്മികാനി അമൂള്ഹവിനയസ്സ ദാനാനി.

[ചൂളവ. ൬] തീഹങ്ഗേഹി സമന്നാഗതസ്സ ഭിക്ഖുനോ ആകങ്ഖമാനോ സങ്ഘോ തജ്ജനീയകമ്മം കരേയ്യ – ഭണ്ഡനകാരകോ ഹോതി കലഹകാരകോ വിവാദകാരകോ ഭസ്സകാരകോ സങ്ഘേ അധികരണകാരകോ, ബാലോ ഹോതി അബ്യത്തോ, ആപത്തിബഹുലോ അനപദാനോ ഗിഹിസംസട്ഠോ വിഹരതി അനനുലോമികേഹി ഗിഹിസംസഗ്ഗേഹി. [ചൂളവ. ൧൫] തീഹങ്ഗേഹി സമന്നാഗതസ്സ ഭിക്ഖുനോ ആകങ്ഖമാനോ സങ്ഘോ നിയസ്സകമ്മം കരേയ്യ – ഭണ്ഡനകാരകോ ഹോതി…പേ… സങ്ഘേ അധികരണകാരകോ, ബാലോ ഹോതി അബ്യത്തോ, ആപത്തിബഹുലോ അനപദാനോ ഗിഹിസംസട്ഠോ വിഹരതി അനനുലോമികേഹി ഗിഹിസംസഗ്ഗേഹി. [ചൂളവ. ൨൭] തീഹങ്ഗേഹി സമന്നാഗതസ്സ ഭിക്ഖുനോ ആകങ്ഖമാനോ സങ്ഘോ പബ്ബാജനീയകമ്മം കരേയ്യ – ഭണ്ഡനകാരകോ ഹോതി…പേ… സങ്ഘേ അധികരണകാരകോ, ബാലോ ഹോതി അബ്യത്തോ, ആപത്തിബഹുലോ അനപദാനോ കുലദൂകകോ ഹോതി പാപസമാചാരോ പാപസമാചാരാ ദിസ്സന്തി ചേവ സുയ്യന്തി ച. തീഹങ്ഗേഹി സമന്നാഗതസ്സ ഭിക്ഖുനോ ആകങ്ഖമാനോ സങ്ഘോ പടിസാരണീയകമ്മം കരേയ്യ – ഭണ്ഡനകാരകോ ഹോതി…പേ… സങ്ഘേ അധികരണകാരകോ, ബാലോ ഹോതി അബ്യത്തോ, ആപത്തി ബഹുലോ അനപദാനോ ഗിഹീ അക്കോസതി പരിഭാസതി. [ചൂളവ. ൫൦] തീഹങ്ഗേഹി സമന്നാഗതസ്സ ഭിക്ഖുനോ ആകങ്ഖമാനോ സങ്ഘോ ആപത്തിയാ അദസ്സനേ ഉക്ഖേപനീയകമ്മം കരേയ്യ – ഭണ്ഡനകാരകോ ഹോതി…പേ… സങ്ഘേ അധികരണകാരകോ, ബാലോ ഹോതി അബ്യത്തോ, ആപത്തിബഹുലോ അനപദാനോ ആപത്തിം ആപജ്ജിത്വാ ന ഇച്ഛതി ആപത്തിം പസ്സിതും. [ചൂളവ. ൫൯] തീഹങ്ഗേഹി സമന്നാഗതസ്സ ഭിക്ഖുനോ ആകങ്ഖമാനോ സങ്ഘോ ആപത്തിയാ അപ്പടികമ്മേ ഉക്ഖേപനീയകമ്മം കരേയ്യ – ഭണ്ഡനകാരകോ ഹോതി…പേ… സങ്ഘേ അധികരണകാരകോ, ബാലോ ഹോതി അബ്യത്തോ, ആപത്തിബഹുലോ അനപദാനോ ആപത്തിം ആപജ്ജിത്വാ ന ഇച്ഛതി ആപത്തിം പടികാതും. [ചൂളവ. ൬൯] തീഹങ്ഗേഹി സമന്നാഗതസ്സ ഭിക്ഖുനോ ആകങ്ഖമാനോ സങ്ഘോ പാപികായ ദിട്ഠിയാ അപ്പടിനിസ്സഗ്ഗേ ഉക്ഖേപനീയകമ്മം കരേയ്യ – ഭണ്ഡനകാരകോ ഹോതി…പേ… സങ്ഘേ അധികരണകാരകോ, ബാലോ ഹോതി അബ്യത്തോ, ആപത്തിബഹുലോ അനപദാനോ ന ഇച്ഛതി പാപികം ദിട്ഠിം പടിനിസ്സജ്ജിതും.

തീഹങ്ഗേഹി സമന്നാഗതസ്സ ഭിക്ഖുനോ ആകങ്ഖമാനോ സങ്ഘോ ആഗാള്ഹായ ചേതേയ്യ – ഭണ്ഡനകാരകോ ഹോതി കലഹകാരകോ വിവാദകാരകോ ഭസ്സകാരകോ സങ്ഘേ അധികരണകാരകോ, ബാലോ ഹോതി അബ്യത്തോ ആപത്തിബഹുലോ അനപദാനോ, ഗിഹിസംസട്ഠോ വിഹരതി അനനുലോമികേഹി ഗിഹിസംസഗ്ഗേഹി. തീഹങ്ഗേഹി സമന്നാഗതസ്സ ഭിക്ഖുനോ കമ്മം കാതബ്ബം – അലജ്ജീ ച ഹോതി, ബാലോ ച, അപകതത്തോ ച. അപരേഹിപി തീഹങ്ഗേഹി സമന്നാഗതസ്സ ഭിക്ഖുനോ കമ്മം കാതബ്ബം – അധിസീലേ സീലവിപന്നോ ഹോതി, അജ്ഝാചാരേ ആചാരവിപന്നോ ഹോതി, അതിദിട്ഠിയാ ദിട്ഠിവിപന്നോ ഹോതി. അപരേഹിപി തീഹങ്ഗേഹി സമന്നാഗതസ്സ ഭിക്ഖുനോ കമ്മം കാതബ്ബം – കായികേന ദവേന സമന്നാഗതോ ഹോതി, വാചസികേന ദവേന സമന്നാഗതോ ഹോതി, കായികവാചസികേന ദവേന സമന്നാഗതോ ഹോതി. അപരേഹിപി തീഹങ്ഗേഹി സമന്നാഗതസ്സ ഭിക്ഖുനോ കമ്മം കാതബ്ബം – കായികേന അനാചാരേന സമന്നാഗതോ ഹോതി, വാചസികേന അനാചാരേന സമന്നാഗതോ ഹോതി, കായികവാചസികേന അനാചാരേന സമന്നാഗതോ ഹോതി. അപരേഹിപി തീഹങ്ഗേഹി സമന്നാഗതസ്സ ഭിക്ഖുനോ കമ്മം കാതബ്ബം – കായികേന ഉപഘാതികേന സമന്നാഗതോ ഹോതി, വാചസികേന ഉപഘാതികേന സമന്നാഗതോ ഹോതി, കായികവാചസികേന ഉപഘാതികേന സമന്നാഗതോ ഹോതി. അപരേഹിപി തീഹങ്ഗേഹി സമന്നാഗതസ്സ ഭിക്ഖുനോ കമ്മം കാതബ്ബം – കായികേന മിച്ഛാജീവേന സമന്നാഗതോ ഹോതി, വാചസികേന മിച്ഛാജീവേന സമന്നാഗതോ ഹോതി, കായികവാചസികേന മിച്ഛാജീവേന സമന്നാഗതോ ഹോതി. അപരേഹിപി തീഹങ്ഗേഹി സമന്നാഗതസ്സ ഭിക്ഖുനോ കമ്മം കാതബ്ബം – ആപത്തിം ആപന്നോ കമ്മകതോ ഉപസമ്പാദേതി, നിസ്സയം ദേതി, സാമണേരം ഉപട്ഠാപേതി. അപരേഹിപി തീഹങ്ഗേഹി സമന്നാഗതസ്സ ഭിക്ഖുനോ കമ്മം കാതബ്ബം – യായ ആപത്തിയാ സങ്ഘേന കമ്മം കതം ഹോതി തം ആപത്തിം ആപജ്ജതി, അഞ്ഞം വാ താദിസികം, തതോ വാ പാപിട്ഠതരം. അപരേഹിപി തീഹങ്ഗേഹി സമന്നാഗതസ്സ ഭിക്ഖുനോ കമ്മം കാതബ്ബം – ബുദ്ധസ്സ അവണ്ണം ഭാസതി, ധമ്മസ്സ അവണ്ണം ഭാസതി, സങ്ഘസ്സ അവണ്ണം ഭാസതി.

തീഹങ്ഗേഹി സമന്നാഗതസ്സ ഭിക്ഖുനോ സങ്ഘമജ്ഝേ ഉപോസഥം ഠപേന്തസ്സ – ‘‘അലം, ഭിക്ഖു, മാ ഭണ്ഡനം മാ കലഹം മാ വിഗ്ഗഹം മാ വിവാദ’’ന്തി ഓമദ്ദിത്വാ സങ്ഘേന ഉപോസഥോ കാതബ്ബോ – അലജ്ജീ ച ഹോതി, ബാലോ ച, അപകതത്തോ ച. തീഹങ്ഗേഹി സമന്നാഗതസ്സ ഭിക്ഖുനോ സങ്ഘമജ്ഝേ പവാരണം ഠപേന്തസ്സ – ‘‘അലം, ഭിക്ഖു, മാ ഭണ്ഡനം മാ കലഹം മാ വിഗ്ഗഹം മാ വിവാദ’’ന്തി ഓമദ്ദിത്വാ സങ്ഘേന പവാരേതബ്ബം – അലജ്ജീ ച ഹോതി, ബാലോ ച, അപകതത്തോ ച. തീഹങ്ഗേഹി സമന്നാഗതസ്സ ഭിക്ഖുനോ ന കാചി സങ്ഘസമ്മുതി ദാതബ്ബാ – അലജ്ജീ ച ഹോതി, ബാലോ ച, അപകതത്തോ ച. തീഹങ്ഗേഹി സമന്നാഗതേന ഭിക്ഖുനാ സങ്ഘേ ന വോഹരിതബ്ബം [സംഘോ ന വോഹരിതബ്ബോ (സ്യാ.)] – അലജ്ജീ ച ഹോതി, ബാലോ ച, അപകതത്തോ ച. തീഹങ്ഗേഹി സമന്നാഗതോ ഭിക്ഖു ന കിസ്മിം ചി പച്ചേകട്ഠാനേ ഠപേതബ്ബോ – അലജ്ജീ ച ഹോതി, ബാലോ ച, അപകതത്തോ ച. തീഹങ്ഗേഹി സമന്നാഗതസ്സ ഭിക്ഖുനോ നിസ്സായ ന വത്ഥബ്ബം – അലജ്ജീ ച ഹോതി, ബാലോ ച, അപകതത്തോ ച. തീഹങ്ഗേഹി സമന്നാഗതസ്സ ഭിക്ഖുനോ നിസ്സയോ ന ദാതബ്ബോ – അലജ്ജീ ച ഹോതി, ബാലോ ച, അപകതത്തോ ച. തീഹങ്ഗേഹി സമന്നാഗതസ്സ ഭിക്ഖുനോ ഓകാസകമ്മം കാരാപേന്തസ്സ നാലം ഓകാസകമ്മം കാതും – അലജ്ജീ ച ഹോതി, ബാലോ ച, അപകതത്തോ ച. തീഹങ്ഗേഹി സമന്നാഗതസ്സ ഭിക്ഖുനോ സവചനീയം നാദാതബ്ബം – അലജ്ജീ ച ഹോതി, ബാലോ ച, അപകതത്തോ ച. തീഹങ്ഗേഹി സമന്നാഗതസ്സ ഭിക്ഖുനോ വിനയോ ന പുച്ഛിതബ്ബോ – അലജ്ജീ ച ഹോതി, ബാലോ ച, അപകതത്തോ ച. തീഹങ്ഗേഹി സമന്നാഗതേന ഭിക്ഖുനാ വിനയോ ന പുച്ഛിതബ്ബോ – അലജ്ജീ ച ഹോതി, ബാലോ ച, അപകതത്തോ ച. തീഹങ്ഗേഹി സമന്നാഗതസ്സ ഭിക്ഖുനോ വിനയോ ന വിസ്സജ്ജേതബ്ബോ – അലജ്ജീ ച ഹോതി, ബാലോ ച, അപകതത്തോ ച. തീഹങ്ഗേഹി സമന്നാഗതേന ഭിക്ഖുനാ വിനയോ ന വിസ്സജ്ജേതബ്ബോ – അലജ്ജീ ച ഹോതി, ബാലോ ച, അപകതത്തോ ച. തീഹങ്ഗേഹി സമന്നാഗതസ്സ ഭിക്ഖുനോ അനുയോഗോ ന ദാതബ്ബോ – അലജ്ജീ ച ഹോതി, ബാലോ ച, അപകതത്തോ ച. തീഹങ്ഗേഹി സമന്നാഗതേന ഭിക്ഖുനാ സദ്ധിം വിനയോ ന സാകച്ഛിതബ്ബോ [സാകച്ഛാതബ്ബോ (ക.)] – അലജ്ജീ ച ഹോതി, ബാലോ ച, അപകതത്തോ ച. തീഹങ്ഗേഹി സമന്നാഗതേന ഭിക്ഖുനാ ന ഉപസമ്പാദേതബ്ബം ന നിസ്സയോ ദാതബ്ബോ ന സാമണേരോ ഉപട്ഠാപേതബ്ബോ – അലജ്ജീ ച ഹോതി, ബാലോ ച, അപകതത്തോ ച.

തയോ ഉപോസഥാ – ചാതുദ്ദസികോ, പന്നരസികോ, സാമഗ്ഗിഉപോസഥോ. അപരേപി തയോ ഉപോസഥാ – സങ്ഘേഉപോസഥോ, ഗണേഉപോസഥോ, പുഗ്ഗലേഉപോസഥോ. അപരേപി തയോ ഉപോസഥാ – സുത്തുദ്ദേസോഉപോസഥോ, പാരിസുദ്ധിഉപോസഥോ, അധിട്ഠാനുപോസഥോ. തിസ്സോ പവാരണാ – ചാതുദ്ദസികാ, പന്നരസികാ, സാമഗ്ഗിപവാരണാ. അപരാപി തിസ്സോ പവാരണാ – സങ്ഘേപവാരണാ, ഗണേപവാരണാ, പുഗ്ഗലേപവാരണാ. അപരാപി തിസ്സോ പവാരണാ – തേവാചികാപവാരണാ, ദ്വേവാചികാപവാരണാ, സമാനവസ്സികാപവാരണാ.

തയോ ആപായികാ നേരയികാ – ഇദമപ്പഹായ, യോ ച അബ്രഹ്മചാരീ ബ്രഹ്മചാരിപടിഞ്ഞോ, യോ ച സുദ്ധം ബ്രഹ്മചാരിം പരിസുദ്ധബ്രഹ്മചരിയം ചരന്തം അമൂലകേന അബ്രഹ്മചരിയേന അനുദ്ധംസേതി, യോ ചായം ഏവംവാദീ ഏവംദിട്ഠി [ഏവംദിട്ഠീ (സീ.)] – ‘‘നത്ഥി കാമേസു ദോസോ’’തി സോ കാമേസു പാതബ്യതം ആപജ്ജതി. [അ. നി. ൩.൭൦] തീണി അകുസലമൂലാനി – ലോഭോ അകുസലമൂലം, ദോസോ അകുസലമൂലം, മോഹോ അകുസലമൂലം. [അ. നി. ൩.൭൦] തീണി കുസലമൂലാനി – അലോഭോ കുസലമൂലം, അദോസോ കുസലമൂലം, അമോഹോ കുസലമൂലം. തീണി ദുച്ചരിതാനി – കായദുച്ചരിതം, വചീദുച്ചരിതം, മനോദുച്ചരിതം. തീണി സുചരിതാനി – കായസുചരിതം, വചീസുചരിതം, മനോസുചരിതം. തയോ അത്ഥവസേ പടിച്ച ഭഗവതാ കുലേസു തികഭോജനം പഞ്ഞത്തം – ദുമ്മങ്കൂനം പുഗ്ഗലാനം നിഗ്ഗഹായ, പേസലാനം ഭിക്ഖൂനം ഫാസുവിഹാരായ, ‘‘മാ പാപിച്ഛാ പക്ഖം നിസ്സായ സങ്ഘം ഭിന്ദേയ്യു’’ന്തി കുലാനുദ്ദയതായ ച. [ചൂളവ. ൩൫൦] തീഹി അസദ്ധമ്മേഹി അഭിഭൂതോ പരിയാദിന്നചിത്തോ ദേവദത്തോ ആപായികോ നേരയികോ കപ്പട്ഠോ അതേകിച്ഛോ പാപിച്ഛതാ പാപമിത്തതാ ഓരമത്തകേന വിസേസാധിഗമേന അന്തരാ വോസാനം ആപാദി. തിസ്സോ സമ്മുതിയോ – ദണ്ഡസമ്മുതി, സിക്കാസമ്മുതി, ദണ്ഡസിക്കാസമ്മുതി. തിസ്സോ പാദുകാ ധുവട്ഠാനികാ അസങ്കമനീയാ – വച്ചപാദുകാ, പസ്സാവപാദുകാ, ആചമനപാദുകാ. തിസ്സോ പാദഘംസനിയോ – സക്ഖരം, കഥലാ, സമുദ്ദഫേണകോതി.

തികം നിട്ഠിതം.

തസ്സുദ്ദാനം –

തിട്ഠന്തേ കാലേ രത്തിഞ്ച, ദസ പഞ്ച കുസലേന;

വേദനാ ചോദനാ വത്ഥു, സലാകാ ദ്വേ പടിക്ഖിപാ.

പഞ്ഞത്തി അപരേ ദ്വേ ച, ബാലോ കാളേ ച കപ്പതി;

ഹേമന്തേ സങ്ഘോ സങ്ഘസ്സ, ഛാദനാ ച പടിച്ഛാദി.

പടിച്ഛന്നാ വിവടാ ച, സേനാസനഗിലായനാ;

പാതിമോക്ഖം പരിവാസം, മാനത്താ പാരിവാസികാ.

അന്തോ അന്തോ ച സീമായ, ആപജ്ജതി പുനാപരേ;

വുട്ഠാതി അപരേ ചേവ, അമൂള്ഹവിനയാ ദുവേ.

തജ്ജനീയാ നിയസ്സാ ച, പബ്ബാജപടിസാരണീ;

അദസ്സനാ പടികമ്മേ, അനിസ്സഗ്ഗേ ച ദിട്ഠിയാ.

ആഗാള്ഹകമ്മാധിസീലേ, ദവാനാചാര ഘാതികാ;

ആജീവാപന്നാ താദിസികാ, അവണ്ണുപോസഥേന ച.

പവാരണാ സമ്മുതി ച, വോഹാരപച്ചേകേന ച;

ന വത്ഥബ്ബം ന ദാതബ്ബം, ഓകാസം ന കരേ തഥാ.

ന കരേ സവചനീയം, ന പുച്ഛിതബ്ബകാ ദുവേ;

ന വിസ്സജ്ജേ ദുവേ ചേവ, അനുയോഗമ്പി നോ ദദേ.

സാകച്ഛാ ഉപസമ്പദാ, നിസ്സയസാമണേരാ ച;

ഉപോസഥതികാ തീണി, പവാരണതികാ തയോ.

ആപായികാ അകുസലാ, കുസലാ ചരിതാ ദുവേ;

തികഭോജനസദ്ധമ്മേ, സമ്മുതി പാദുകേന ച;

പാദഘംസനികാ ചേവ, ഉദ്ദാനം തികകേ ഇദന്തി.