൧. ഏകകവാരോ

൩൨൧. ആപത്തികരാ ധമ്മാ ജാനിതബ്ബാ. അനാപത്തികരാ ധമ്മാ ജാനിതബ്ബാ. ആപത്തി ജാനിതബ്ബാ. അനാപത്തി ജാനിതബ്ബാ. ലഹുകാ ആപത്തി ജാനിതബ്ബാ. ഗരുകാ ആപത്തി ജാനിതബ്ബാ. സാവസേസാ ആപത്തി ജാനിതബ്ബാ. അനവസേസാ ആപത്തി ജാനിതബ്ബാ. ദുട്ഠുല്ലാ ആപത്തി ജാനിതബ്ബാ. അദുട്ഠുല്ലാ ആപത്തി ജാനിതബ്ബാ. സപ്പടികമ്മാ ആപത്തി ജാനിതബ്ബാ. അപ്പടികമ്മാ ആപത്തി ജാനിതബ്ബാ. ദേസനാഗാമിനീ ആപത്തി ജാനിതബ്ബാ. അദേസനാഗാമിനീ ആപത്തി ജാനിതബ്ബാ. അന്തരായികാ ആപത്തി ജാനിതബ്ബാ. അനന്തരായികാ ആപത്തി ജാനിതബ്ബാ. സാവജ്ജപഞ്ഞത്തി ആപത്തി ജാനിതബ്ബാ. അനവജ്ജപഞ്ഞത്തി ആപത്തി ജാനിതബ്ബാ. കിരിയതോ സമുട്ഠിതാ ആപത്തി ജാനിതബ്ബാ. അകിരിയതോ സമുട്ഠിതാ ആപത്തി ജാനിതബ്ബാ. കിരിയാകിരിയതോ സമുട്ഠിതാ ആപത്തി ജാനിതബ്ബാ. പുബ്ബാപത്തി ജാനിതബ്ബാ. അപരാപത്തി ജാനിതബ്ബാ. പുബ്ബാപത്തീനം അന്തരാപത്തി ജാനിതബ്ബാ. അപരാപത്തീനം അന്തരാപത്തി ജാനിതബ്ബാ. ദേസിതാ ഗണനൂപഗാ ആപത്തി ജാനിതബ്ബാ. ദേസിതാ ന ഗണനൂപഗാ ആപത്തി ജാനിതബ്ബാ. പഞ്ഞത്തി ജാനിതബ്ബാ. അനുപഞ്ഞത്തി ജാനിതബ്ബാ. അനുപ്പന്നപഞ്ഞത്തി ജാനിതബ്ബാ. സബ്ബത്ഥപഞ്ഞത്തി ജാനിതബ്ബാ. പദേസപഞ്ഞത്തി ജാനിതബ്ബാ. സാധാരണപഞ്ഞത്തി ജാനിതബ്ബാ. അസാധാരണപഞ്ഞത്തി ജാനിതബ്ബാ. ഏകതോപഞ്ഞത്തി ജാനിതബ്ബാ. ഉഭതോപഞ്ഞത്തി ജാനിതബ്ബാ. ഥുല്ലവജ്ജാ ആപത്തി ജാനിതബ്ബാ. അഥുല്ലവജ്ജാ ആപത്തി ജാനിതബ്ബാ. ഗിഹിപടിസംയുത്താ ആപത്തി ജാനിതബ്ബാ. ന ഗിഹിപടിസംയുത്താ ആപത്തി ജാനിതബ്ബാ. നിയതാ ആപത്തി ജാനിതബ്ബാ. അനിയതാ ആപത്തി ജാനിതബ്ബാ. ആദികരോ പുഗ്ഗലോ ജാനിതബ്ബോ. അനാദികരോ പുഗ്ഗലോ ജാനിതബ്ബോ. അധിച്ചാപത്തികോ പുഗ്ഗലോ ജാനിതബ്ബോ. അഭിണ്ഹാപത്തികോ പുഗ്ഗലോ ജാനിതബ്ബോ. ചോദകോ പുഗ്ഗലോ ജാനിതബ്ബോ. ചുദിതകോ പുഗ്ഗലോ ജാനിതബ്ബോ. അധമ്മചോദകോ പുഗ്ഗലോ ജാനിതബ്ബോ. അധമ്മചുദിതകോ പുഗ്ഗലോ ജാനിതബ്ബോ. ധമ്മചോദകോ പുഗ്ഗലോ ജാനിതബ്ബോ. ധമ്മചുദിതകോ പുഗ്ഗലോ ജാനിതബ്ബോ. നിയതോ പുഗ്ഗലോ ജാനിതബ്ബോ. അനിയതോ പുഗ്ഗലോ ജാനിതബ്ബോ. അഭബ്ബാപത്തികോ പുഗ്ഗലോ ജാനിതബ്ബോ. ഭബ്ബാപത്തികോ പുഗ്ഗലോ ജാനിതബ്ബോ. ഉക്ഖിത്തകോ പുഗ്ഗലോ ജാനിതബ്ബോ. അനുക്ഖിത്തകോ പുഗ്ഗലോ ജാനിതബ്ബോ. നാസിതകോ പുഗ്ഗലോ ജാനിതബ്ബോ. അനാസിതകോ പുഗ്ഗലോ ജാനിതബ്ബോ. സമാനസംവാസകോ പുഗ്ഗലോ ജാനിതബ്ബോ. അസമാനസംവാസകോ പുഗ്ഗലോ ജാനിതബ്ബോ. ഠപനം ജാനിതബ്ബന്തി.

ഏകകം നിട്ഠിതം.

തസ്സുദ്ദാനം –

കരാ ആപത്തി ലഹുകാ, സാവസേസാ ച ദുട്ഠുല്ലാ;

പടികമ്മദേസനാ ച, അന്തരാ വജ്ജകിരിയം.

കിരിയാകിരിയം പുബ്ബാ, അന്തരാ ഗണനൂപഗാ;

പഞ്ഞത്തി അനാനുപ്പന്ന, സബ്ബസാധാരണാ ച ഏകതോ [പഞ്ഞത്താനുപ്പന്നാ സബ്ബാ, സാധാരണാ ച ഏകതോ (സ്യാ.)].

ഥുല്ലഗിഹിനിയതാ ച, ആദി അധിച്ചചോദകോ;

അധമ്മധമ്മനിയതോ, അഭബ്ബോക്ഖിത്തനാസിതാ;

സമാനം ഠപനഞ്ചേവ, ഉദ്ദാനം ഏകകേ ഇദന്തി.