൨൦. സമുട്ഠാപനവാരോ

൩൧൪. വിവാദാധികരണം ചതുന്നം അധികരണാനം കതമം അധികരണം സമുട്ഠാപേതി? വിവാദാധികരണം ചതുന്നം അധികരണാനം ന കതമം അധികരണം സമുട്ഠാപേതി; അപിച, വിവാദാധികരണപച്ചയാ ചത്താരോ അധികരണാ ജായന്തി. യഥാ കഥം വിയ? [ചൂളവ. ൨൧൫; പരി. ൩൪൮ ആദയോ] ഇധ ഭിക്ഖൂ വിവദന്തി – ‘‘ധമ്മോതി വാ, അധമ്മോതി വാ, വിനയോതി വാ, അവിനയോതി വാ, അഭാസിതം അലപിതം തഥാഗതേനാതി വാ, ഭാസിതം ലപിതം തഥാഗതേനാതി വാ, അനാചിണ്ണം തഥാഗതേനാതി വാ, ആചിണ്ണം തഥാഗതേനാതി വാ, അപഞ്ഞത്തം തഥാഗതേനാതി വാ, പഞ്ഞത്തം തഥാഗതേനാതി വാ, ആപത്തീതി വാ, അനാപത്തീതി വാ, ലഹുകാ ആപത്തീതി വാ, ഗരുകാ ആപത്തീതി വാ, സാവസേസാ ആപത്തീതി വാ, അനവസേസാ ആപത്തീതി വാ, ദുട്ഠുല്ലാ ആപത്തീതി വാ അദുട്ഠുല്ലാ ആപത്തീതി വാ’’. യം തത്ഥ ഭണ്ഡനം കലഹോ വിഗ്ഗഹോ വിവാദോ നാനാവാദോ അഞ്ഞഥാവാദോ വിപച്ചതായ വോഹാരോ മേധകം [മേധഗം (ക.)], ഇദം വുച്ചതി വിവാദാധികരണം. വിവാദാധികരണേ സങ്ഘോ വിവദതി. വിവാദാധികരണം വിവദമാനോ അനുവദതി. അനുവാദാധികരണം അനുവദമാനോ ആപത്തിം ആപജ്ജതി ആപത്താധികരണം. തായ ആപത്തിയാ സങ്ഘോ കമ്മം കരോതി കിച്ചാധികരണം. ഏവം വിവാദാധികരണപച്ചയാ ചത്താരോ അധികരണാ ജായന്തി.

൩൧൫. അനുവാദാധികരണം ചതുന്നം അധികരണാനം കതമം അധികരണം സമുട്ഠാപേതി? അനുവാദാധികരണം ചതുന്നം അധികരണാനം ന കതമം അധികരണം സമുട്ഠാപേതി; അപിച, അനുവാദാധികരണപച്ചയാ ചത്താരോ അധികരണാ ജായന്തി. യഥാ കഥം വിയ? [ചൂളവ. ൨൧൫; പരി. ൩൪൮ ആദയോ] ഇധ ഭിക്ഖൂ ഭിക്ഖും അനുവദന്തി സീലവിപത്തിയാ വാ ആചാരവിപത്തിയാ വാ ദിട്ഠിവിപത്തിയാ വാ ആജീവവിപത്തിയാ വാ. യോ തത്ഥ അനുവാദോ അനുവദനാ അനുല്ലപനാ അനുഭണനാ അനുസമ്പവങ്കതാ അബ്ഭുസ്സഹനതാ അനുബലപ്പദാനം, ഇദം വുച്ചതി അനുവാദാധികരണം. അനുവാദാധികരണേ സങ്ഘോ വിവദതി. വിവാദാധികരണം വിവദമാനോ അനുവദതി. അനുവാദാധികരണം അനുവദമാനോ ആപത്തിം ആപജ്ജതി ആപത്താധികരണം. തായ ആപത്തിയാ സങ്ഘോ കമ്മം കരോതി കിച്ചാധികരണം. ഏവം അനുവാദാധികരണപച്ചയാ ചത്താരോ അധികരണാ ജായന്തി.

൩൧൬. ആപത്താധികരണം ചതുന്നം അധികരണാനം കതമം അധികരണം സമുട്ഠാപേതി? ആപത്താധികരണം ചതുന്നം അധികരണാനം ന കതമം അധികരണം സമുട്ഠാപേതി; അപിച, ആപത്താധികരണപച്ചയാ ചത്താരോ അധികരണാ ജായന്തി. യഥാ കഥം വിയ? പഞ്ചപി ആപത്തിക്ഖന്ധാ ആപത്താധികരണം, സത്തപി ആപത്തിക്ഖന്ധാ ആപത്താധികരണം, ഇദം വുച്ചതി ആപത്താധികരണം. ആപത്താധികരണേ സങ്ഘോ വിവദതി. വിവാദാധികരണം വിവദമാനോ അനുവദതി. അനുവാദാധികരണം അനുവദമാനോ ആപത്തിം ആപജ്ജതി ആപത്താധികരണം. തായ ആപത്തിയാ സങ്ഘോ കമ്മം കരോതി കിച്ചാധികരണം. ഏവം ആപത്താധികരണപച്ചയാ ചത്താരോ അധികരണാ ജായന്തി.

൩൧൭. കിച്ചാധികരണം ചതുന്നം അധികരണാനം കതമം അധികരണം സമുട്ഠാപേതി? കിച്ചാധികരണം ചതുന്നം അധികരണാനം ന കതമം അധികരണം സമുട്ഠാപേതി, അപിച കിച്ചാധികരണപച്ചയാ ചത്താരോ അധികരണാ ജായന്തി. യഥാ കഥം വിയ? യാ സങ്ഘസ്സ കിച്ചയതാ കരണീയതാ അപലോകനകമ്മം ഞത്തികമ്മം ഞത്തിദുതിയകമ്മം ഞത്തിചതുത്ഥകമ്മം, ഇദം വുച്ചതി കിച്ചാധികരണം. കിച്ചാധികരണേ സങ്ഘോ വിവദതി. വിവാദാധികരണം വിവദമാനോ അനുവദതി. അനുവാദാധികരണം അനുവദമാനോ ആപത്തിം ആപജ്ജതി ആപത്താധികരണം. തായ ആപത്തിയാ സങ്ഘോ കമ്മം കരോതി കിച്ചാധികരണം. ഏവം കിച്ചാധികരണപച്ചയാ ചത്താരോ അധികരണാ ജായന്തി.

സമുട്ഠാപനവാരോ നിട്ഠിതോ വീസതിമോ.