൨൧. ഭജതിവാരോ
൩൧൮. വിവാദാധികരണം ചതുന്നം അധികരണാനം കതമം അധികരണം ഭജതി? കതമം അധികരണം ഉപനിസ്സിതം? കതമം അധികരണം പരിയാപന്നം? കതമേന അധികരണേന സങ്ഗഹിതം?
അനുവാദാധികരണം ചതുന്നം അധികരണാനം കതമം അധികരണം ഭജതി? കതമം അധികരണം ഉപനിസ്സിതം? കതമം അധികരണം പരിയാപന്നം? കതമേന അധികരണേന സങ്ഗഹിതം?
ആപത്താധികരണം ചതുന്നം അധികരണാനം കതമം അധികരണം ഭജതി? കതമം അധികരണം ഉപനിസ്സിതം? കതമം അധികരണം പരിയാപന്നം? കതമേന അധികരണേന സങ്ഗഹിതം?
കിച്ചാധികരണം ചതുന്നം അധികരണാനം കതമം അധികരണം ഭജതി? കതമം അധികരണം ഉപനിസ്സിതം? കതമം അധികരണം പരിയാപന്നം? കതമേന അധികരണേന സങ്ഗഹിതം?
വിവാദാധികരണം ചതുന്നം അധികരണാനം വിവാദാധികരണം ഭജതി, വിവാദാധികരണം ഉപനിസ്സിതം, വിവാദാധികരണം പരിയാപന്നം, വിവാദാധികരണേന സങ്ഗഹിതം.
അനുവാദാധികരണം ചതുന്നം അധികരണാനം അനുവാദാധികരണം ഭജതി, അനുവാദാധികരണം ഉപനിസ്സിതം, അനുവാദാധികരണം പരിയാപന്നം, അനുവാദാധികരണേന സങ്ഗഹിതം.
ആപത്താധികരണം ചതുന്നം അധികരണാനം ആപത്താധികരണം ഭജതി, ആപത്താധികരണം ഉപനിസ്സിതം, ആപത്താധികരണം പരിയാപന്നം, ആപത്താധികരണേന സങ്ഗഹിതം.
കിച്ചാധികരണം ചതുന്നം അധികരണാനം കിച്ചാധികരണം ഭജതി, കിച്ചാധികരണം ഉപനിസ്സിതം, കിച്ചാധികരണം പരിയാപന്നം, കിച്ചാധികരണേന സങ്ഗഹിതം.
൩൧൯. വിവാദാധികരണം സത്തന്നം സമഥാനം കതി സമഥേ ഭജതി, കതി സമഥേ ഉപനിസ്സിതം, കതി സമഥേ പരിയാപന്നം, കതിഹി സമഥേഹി സങ്ഗഹിതം, കതിഹി സമഥേഹി സമ്മതി?
അനുവാദാധികരണം സത്തന്നം സമഥാനം കതി സമഥേ ഭജതി, കതി സമഥേ ഉപനിസ്സിതം, കതി സമഥേ പരിയാപന്നം, കതിഹി സമഥേഹി സങ്ഗഹിതം, കതിഹി സമഥേഹി സമ്മതി?
ആപത്താധികരണം സത്തന്നം സമഥാനം കതി സമഥേ ഭജതി, കതി സമഥേ ഉപനിസ്സിതം, കതി സമഥേ പരിയാപന്നം, കതിഹി സമഥേഹി സങ്ഗഹിതം, കതിഹി സമഥേഹി സമ്മതി?
കിച്ചാധികരണം സത്തന്നം സമഥാനം കതി സമഥേ ഭജതി, കതി സമഥേ ഉപനിസ്സിതം, കതി സമഥേ പരിയാപന്നം, കതിഹി സമഥേഹി സങ്ഗഹിതം, കതിഹി സമഥേഹി സമ്മതി?
വിവാദാധികരണം സത്തന്നം സമഥാനം ദ്വേ സമഥേ ഭജതി, ദ്വേ സമഥേ ഉപനിസ്സിതം, ദ്വേ സമഥേ പരിയാപന്നം, ദ്വീഹി സമഥേഹി സങ്ഗഹിതം, ദ്വീഹി സമഥേഹി സമ്മതി – സമ്മുഖാവിനയേന ച യേഭുയ്യസികായ ച.
അനുവാദാധികരണം സത്തന്നം സമഥാനം ചത്താരോ സമഥേ ഭജതി, ചത്താരോ സമഥേ ഉപനിസ്സിതം, ചത്താരോ സമഥേ പരിയാപന്നം, ചതൂഹി സമഥേഹി സങ്ഗഹിതം, ചതൂഹി സമഥേഹി സമ്മതി – സമ്മുഖാവിനയേന ച സതിവിനയേന ച അമൂള്ഹവിനയേന ച തസ്സപാപിയസികായ ച.
ആപത്താധികരണം സത്തന്നം സമഥാനം തയോ സമഥേ ഭജതി, തയോ സമഥേ ഉപനിസ്സിതം, തയോ സമഥേ പരിയാപന്നം, തീഹി സമഥേഹി സങ്ഗഹിതം തീഹി സമഥേഹി സമ്മതി – സമ്മുഖാവിനയേന ച പടിഞ്ഞാതകരണേന തിണവത്ഥാരകേന ച.
കിച്ചാധികരണം സത്തന്നം സമഥാനം ഏകം സമഥം ഭജതി, ഏകം സമഥം ഉപനിസ്സിതം, ഏകം സമഥം പരിയാപന്നം, ഏകേന സമഥേന സങ്ഗഹിതം, ഏകേന സമഥേന സമ്മതി – സമ്മുഖാവിനയേനാതി.
ഭജതിവാരോ നിട്ഠിതോ ഏകവീസതിമോ.
സമഥഭേദോ നിട്ഠിതോ.
തസ്സുദ്ദാനം –
അധികരണം പരിയായം, സാധാരണാ ച ഭാഗിയാ;
സമഥാ സാധാരണികാ, സമഥസ്സ തബ്ഭാഗിയാ.
സമഥാ സമ്മുഖാ ചേവ, വിനയേന കുസലേന ച;
യത്ഥ സമഥസംസട്ഠാ, സമ്മന്തി ന സമ്മന്തി ച.
സമഥാധികരണഞ്ചേവ, സമുട്ഠാനം ഭജന്തി ചാതി.