൮. ഭിക്ഖുനോവാദവഗ്ഗോ

൪൫൦. ‘‘കതിഹി നു ഖോ, ഭന്തേ, അങ്ഗേഹി സമന്നാഗതസ്സ ഭിക്ഖുനോ ഭിക്ഖുനിസങ്ഘേനേവ കമ്മം കാതബ്ബ’’ന്തി? ‘‘പഞ്ചഹുപാലി, അങ്ഗേഹി സമന്നാഗതസ്സ ഭിക്ഖുനോ ഭിക്ഖുനിസങ്ഘേനേവ കമ്മം കാതബ്ബം, അവന്ദിയോ സോ ഭിക്ഖു ഭിക്ഖുനിസങ്ഘേന. കതമേഹി പഞ്ചഹി? വിവരിത്വാ കായം ഭിക്ഖുനീനം ദസ്സേതി, ഊരും ദസ്സേതി, അങ്ഗജാതം ദസ്സേതി, ഉഭോ അംസകൂടേ ദസ്സേതി, ഓഭാസതി, ഗിഹീ സമ്പയോജേതി – ഇമേഹി ഖോ, ഉപാലി, പഞ്ചഹങ്ഗേഹി സമന്നാഗതസ്സ ഭിക്ഖുനോ ഭിക്ഖുനിസങ്ഘേനേവ കമ്മം കാതബ്ബം. അവന്ദിയോ സോ ഭിക്ഖു ഭിക്ഖുനിസങ്ഘേന.

‘‘അപരേഹിപി, ഉപാലി, പഞ്ചഹങ്ഗേഹി സമന്നാഗതസ്സ ഭിക്ഖുനോ ഭിക്ഖുനിസങ്ഘേനേവ കമ്മം കാതബ്ബം, അവന്ദിയോ സോ ഭിക്ഖു ഭിക്ഖുനിസങ്ഘേന. കതമേഹി പഞ്ചഹി? ഭിക്ഖുനീനം അലാഭായ പരിസക്കതി, ഭിക്ഖുനീനം അനത്ഥായ പരിസക്കതി, ഭിക്ഖുനീനം അവാസായ പരിസക്കതി, ഭിക്ഖുനിയോ അക്കോസതി പരിഭാസതി, ഭിക്ഖൂ ഭിക്ഖുനീഹി ഭേദേതി – ഇമേഹി ഖോ, ഉപാലി, പഞ്ചഹങ്ഗേഹി സമന്നാഗതസ്സ ഭിക്ഖുനോ ഭിക്ഖുനിസങ്ഘേനേവ കമ്മം കാതബ്ബം, അവന്ദിയോ സോ ഭിക്ഖു ഭിക്ഖുനിസങ്ഘേന.

‘‘അപരേഹിപി, ഉപാലി, പഞ്ചഹങ്ഗേഹി സമന്നാഗതസ്സ ഭിക്ഖുനോ ഭിക്ഖുനിസങ്ഘേനേവ കമ്മം കാതബ്ബം, അവന്ദിയോ സോ ഭിക്ഖു ഭിക്ഖുനിസങ്ഘേന. കതമേഹി പഞ്ചഹി? ഭിക്ഖുനീനം അലാഭായ പരിസക്കതി, ഭിക്ഖുനീനം അനത്ഥായ പരിസക്കതി, ഭിക്ഖുനീനം അവാസായ പരിസക്കതി, ഭിക്ഖുനിയോ അക്കോസതി പരിഭാസതി, ഭിക്ഖൂ ഭിക്ഖുനീഹി സമ്പയോജേതി – ഇമേഹി ഖോ, ഉപാലി, പഞ്ചഹങ്ഗേഹി സമന്നാഗതസ്സ ഭിക്ഖുനോ ഭിക്ഖുനിസങ്ഘേനേവ കമ്മം കാതബ്ബം, അവന്ദിയോ സോ ഭിക്ഖു ഭിക്ഖുനിസങ്ഘേനാ’’തി.

൪൫൧. ‘‘കതിഹി നു ഖോ, ഭന്തേ, അങ്ഗേഹി സമന്നാഗതായ ഭിക്ഖുനിയാ കമ്മം കാതബ്ബ’’ന്തി? പഞ്ചഹുപാലി, അങ്ഗേഹി സമന്നാഗതായ ഭിക്ഖുനിയാ കമ്മം കാതബ്ബം. കതമേഹി പഞ്ചഹി? വിവരിത്വാ കായം ഭിക്ഖൂനം ദസ്സേതി, ഊരും ദസ്സേതി, അങ്ഗജാതം ദസ്സേതി, ഉഭോ അംസകൂടേ ദസ്സേതി, ഓഭാസതി, ഗിഹീ സമ്പയോജേതി – ഇമേഹി ഖോ, ഉപാലി, പഞ്ചഹങ്ഗേഹി സമന്നാഗതായ ഭിക്ഖുനിയാ കമ്മം കാതബ്ബം.

‘‘അപരേഹിപി, ഉപാലി, പഞ്ചഹങ്ഗേഹി സമന്നാഗതായ ഭിക്ഖുനിയാ കമ്മം കാതബ്ബം. കതമേഹി പഞ്ചഹി? ഭിക്ഖൂനം അലാഭായ പരിസക്കതി, ഭിക്ഖൂനം അനത്ഥായ പരിസക്കതി, ഭിക്ഖൂനം അവാസായ പരിസക്കതി, ഭിക്ഖൂ അക്കോസതി പരിഭാസതി, ഭിക്ഖുനിയോ ഭിക്ഖൂഹി ഭേദേതി – ഇമേഹി ഖോ, ഉപാലി, പഞ്ചഹങ്ഗേഹി സമന്നാഗതായ ഭിക്ഖുനിയാ കമ്മം കാതബ്ബം.

‘‘അപരേഹിപി, ഉപാലി, പഞ്ചഹങ്ഗേഹി സമന്നാഗതായ ഭിക്ഖുനിയാ കമ്മം കാതബ്ബം. കതമേഹി പഞ്ചഹി? ഭിക്ഖൂനം അലാഭായ പരിസക്കതി, ഭിക്ഖൂനം അനത്ഥായ പരിസക്കതി, ഭിക്ഖൂനം അവാസായ പരിസക്കതി, ഭിക്ഖൂ അക്കോസതി പരിഭാസതി, ഭിക്ഖുനിയോ ഭിക്ഖൂഹി സമ്പയോജേതി – ഇമേഹി ഖോ, ഉപാലി, പഞ്ചഹങ്ഗേഹി സമന്നാഗതായ ഭിക്ഖുനിയാ കമ്മം കാതബ്ബ’’ന്തി.

൪൫൨. ‘‘കതിഹി നു ഖോ, ഭന്തേ, അങ്ഗേഹി സമന്നാഗതേന ഭിക്ഖുനാ ഭിക്ഖുനീനം ഓവാദോ ന ഠപേതബ്ബോ’’തി? ‘‘പഞ്ചഹുപാലി, അങ്ഗേഹി സമന്നാഗതേന ഭിക്ഖുനാ ഭിക്ഖുനീനം ഓവാദോ ന ഠപേതബ്ബോ. കതമേഹി പഞ്ചഹി? അലജ്ജീ ച ഹോതി, ബാലോ ച, അപകതത്തോ ച, ചാവനാധിപ്പായോ വത്താ ഹോതി, നോ വുട്ഠാനാധിപ്പായോ – ഇമേഹി ഖോ, ഉപാലി, പഞ്ചഹങ്ഗേഹി സമന്നാഗതേന ഭിക്ഖുനാ ഭിക്ഖുനീനം ഓവാദോ ന ഠപേതബ്ബോ.

‘‘അപരേഹിപി, ഉപാലി, പഞ്ചഹങ്ഗേഹി സമന്നാഗതേന ഭിക്ഖുനാ ഭിക്ഖുനീനം ഓവാദോ ന ഠപേതബ്ബോ. കതമേഹി പഞ്ചഹി? അപരിസുദ്ധകായസമാചാരോ ഹോതി, അപരിസുദ്ധവചീസമാചാരോ ഹോതി, അപരിസുദ്ധാജീവോ ഹോതി, ബാലോ ഹോതി, അബ്യത്തോ, ന പടിബലോ അനുയുഞ്ജിയമാനോ അനുയോഗം ദാതും – ഇമേഹി ഖോ, ഉപാലി, പഞ്ചഹങ്ഗേഹി സമന്നാഗതേന ഭിക്ഖുനാ ഭിക്ഖുനീനം ഓവാദോ ന ഠപേതബ്ബോ.

‘‘അപരേഹിപി, ഉപാലി, പഞ്ചഹങ്ഗേഹി സമന്നാഗതേന ഭിക്ഖുനാ ഭിക്ഖുനീനം ഓവാദോ ന ഠപേതബ്ബോ. കതമേഹി പഞ്ചഹി? കായികേന അനാചാരേന സമന്നാഗതോ ഹോതി, വാചസികേന അനാചാരേന സമന്നാഗതോ ഹോതി, കായികവാചസികേന അനാചാരേന സമന്നാഗതോ ഹോതി, ഭിക്ഖുനീനം അക്കോസകപരിഭാസകോ ഹോതി, ഭിക്ഖുനീഹി സദ്ധിം സംസട്ഠോ വിഹരതി അനനുലോമികേന സംസഗ്ഗേന – ഇമേഹി ഖോ, ഉപാലി, പഞ്ചഹങ്ഗേഹി സമന്നാഗതേന ഭിക്ഖുനാ ഭിക്ഖുനീനം ഓവാദോ ന ഠപേതബ്ബോ.

‘‘അപരേഹിപി, ഉപാലി, പഞ്ചഹങ്ഗേഹി സമന്നാഗതേന ഭിക്ഖുനാ ഭിക്ഖുനീനം ഓവാദോ ന ഠപേതബ്ബോ. കതമേഹി പഞ്ചഹി? അലജ്ജീ ച ഹോതി, ബാലോ ച, അപകതത്തോ ച, ഭണ്ഡനകാരകോ ച ഹോതി കലഹകാരകോ, സിക്ഖായ ച ന പരിപൂരികാരീ – ഇമേഹി ഖോ, ഉപാലി, പഞ്ചഹങ്ഗേഹി സമന്നാഗതേന ഭിക്ഖുനാ ഭിക്ഖുനീനം ഓവാദോ ന ഠപേതബ്ബോ’’തി.

൪൫൩. ‘‘കതിഹി നു ഖോ, ഭന്തേ, അങ്ഗേഹി സമന്നാഗതേന ഭിക്ഖുനാ ഭിക്ഖുനീനം ഓവാദോ ന ഗഹേതബ്ബോ’’തി? ‘‘പഞ്ചഹുപാലി, അങ്ഗേഹി സമന്നാഗതേന ഭിക്ഖുനാ ഭിക്ഖുനീനം ഓവാദോ ന ഗഹേതബ്ബോ. കതമേഹി പഞ്ചഹി? കായികേന അനാചാരേന സമന്നാഗതോ ഹോതി, വാചസികേന അനാചാരേന സമന്നാഗതോ ഹോതി, കായികവാചസികേന അനാചാരേന സമന്നാഗതോ ഹോതി, ഭിക്ഖുനീനം അക്കോസകപരിഭാസകോ ഹോതി, ഭിക്ഖുനീഹി സദ്ധിം സംസട്ഠോ വിഹരതി അനനുലോമികേന സംസഗ്ഗേന – ഇമേഹി ഖോ, ഉപാലി, പഞ്ചഹങ്ഗേഹി സമന്നാഗതേന ഭിക്ഖുനാ ഭിക്ഖുനീനം ഓവാദോ ന ഗഹേതബ്ബോ.

‘‘അപരേഹിപി, ഉപാലി, പഞ്ചഹങ്ഗേഹി സമന്നാഗതേന ഭിക്ഖുനാ ഭിക്ഖുനീനം ഓവാദോ ന ഗഹേതബ്ബോ. കതമേഹി പഞ്ചഹി? അലജ്ജീ ച ഹോതി, ബാലോ ച, അപകതത്തോ ച, ഗമികോ വാ ഹോതി, ഗിലാനോ വാ – ഇമേഹി ഖോ, ഉപാലി, പഞ്ചഹങ്ഗേഹി സമന്നാഗതേന ഭിക്ഖുനാ ഭിക്ഖുനീനം ഓവാദോ ന ഗഹേതബ്ബോ’’തി.

൪൫൪. ‘‘കതിഹി നു ഖോ, ഭന്തേ, അങ്ഗേഹി സമന്നാഗതേന ഭിക്ഖുനാ സദ്ധിം ന സാകച്ഛിതബ്ബോ’’തി? ‘‘പഞ്ചഹുപാലി, അങ്ഗേഹി സമന്നാഗതേന ഭിക്ഖുനാ സദ്ധിം ന സാകച്ഛിതബ്ബോ. കതമേഹി പഞ്ചഹി? ന അസേക്ഖേന സീലക്ഖന്ധേന സമന്നാഗതോ ഹോതി, ന അസേക്ഖേന സമാധിക്ഖന്ധേന സമന്നാഗതോ ഹോതി, ന അസേക്ഖേന പഞ്ഞാക്ഖന്ധേന സമന്നാഗതോ ഹോതി, ന അസേക്ഖേന വിമുത്തിക്ഖന്ധേന സമന്നാഗതോ ഹോതി, ന അസേക്ഖേന വിമുത്തിഞാണദസ്സനക്ഖന്ധേന സമന്നാഗതോ ഹോതി – ഇമേഹി ഖോ, ഉപാലി, പഞ്ചഹങ്ഗേഹി സമന്നാഗതേന ഭിക്ഖുനാ സദ്ധിം ന സാകച്ഛിതബ്ബോ. പഞ്ചഹുപാലി, അങ്ഗേഹി സമന്നാഗതേന ഭിക്ഖുനാ സദ്ധിം സാകച്ഛിതബ്ബോ. കതമേഹി പഞ്ചഹി? അസേക്ഖേന സീലക്ഖന്ധേന സമന്നാഗതോ ഹോതി, അസേക്ഖേന സമാധിക്ഖന്ധേന സമന്നാഗതോ ഹോതി, അസേക്ഖേന പഞ്ഞാക്ഖന്ധേന സമന്നാഗതോ ഹോതി, അസേക്ഖേന വിമുത്തിക്ഖന്ധേന സമന്നാഗതോ ഹോതി, അസേക്ഖേന വിമുത്തിഞാണദസ്സനക്ഖന്ധേന സമന്നാഗതോ ഹോതി – ഇമേഹി ഖോ, ഉപാലി, പഞ്ചഹങ്ഗേഹി സമന്നാഗതേന ഭിക്ഖുനാ സദ്ധിം സാകച്ഛിതബ്ബോ.

‘‘അപരേഹിപി, ഉപാലി, പഞ്ചഹങ്ഗേഹി സമന്നാഗതേന ഭിക്ഖുനാ സദ്ധിം ന സാകച്ഛിതബ്ബോ. കതമേഹി പഞ്ചഹി? ന അത്ഥപടിസമ്ഭിദാപത്തോ ഹോതി, ന ധമ്മപടിസമ്ഭിദാപത്തോ ഹോതി, ന നിരുത്തിപടിസമ്ഭിദാപത്തോ ഹോതി, ന പടിഭാനപടിസമ്ഭിദാപത്തോ ഹോതി, യഥാവിമുത്തം ചിത്തം ന പച്ചവേക്ഖിതാ – ഇമേഹി ഖോ, ഉപാലി, പഞ്ചഹങ്ഗേഹി സമന്നാഗതേന ഭിക്ഖുനാ സദ്ധിം ന സാകച്ഛിതബ്ബോ. പഞ്ചഹുപാലി, അങ്ഗേഹി സമന്നാഗതേന ഭിക്ഖുനാ സദ്ധിം സാകച്ഛിതബ്ബോ. കതമേഹി പഞ്ചഹി? അത്ഥപടിസമ്ഭിദാപത്തോ ഹോതി, ധമ്മപടിസമ്ഭിദാപത്തോ ഹോതി, നിരുത്തിപടിസമ്ഭിദാപത്തോ ഹോതി, പടിഭാനപടിസമ്ഭിദാപത്തോ ഹോതി, യഥാവിമുത്തം ചിത്തം പച്ചവേക്ഖിതാ – ഇമേഹി ഖോ, ഉപാലി, പഞ്ചഹങ്ഗേഹി സമന്നാഗതേന ഭിക്ഖുനാ സദ്ധിം സാകച്ഛിതബ്ബോ’’തി.

ഭിക്ഖുനോവാദവഗ്ഗോ നിട്ഠിതോ അട്ഠമോ.

തസ്സുദ്ദാനം –

ഭിക്ഖുനീഹേവ കാതബ്ബം, അപരേഹി തഥാ ദുവേ;

ഭിക്ഖുനീനം തയോ കമ്മാ, ന ഠപേതബ്ബാ ദ്വേ ദുകാ;

ന ഗഹേതബ്ബാ ദ്വേ വുത്താ, സാകച്ഛാസു ച ദ്വേ ദുകാതി.