൧൧. സങ്ഘഭേദകവഗ്ഗോ

൪൫൯. [ചൂളവ. ൩൫൪-൩൫൫; അ. നി. ൧൦.൩൮ ആദയോ] ‘‘കതിഹി നു ഖോ, ഭന്തേ, അങ്ഗേഹി സമന്നാഗതോ സങ്ഘഭേദകോ ആപായികോ നേരയികോ കപ്പട്ഠോ അതേകിച്ഛോ’’തി? ‘‘പഞ്ചഹുപാലി, അങ്ഗേഹി സമന്നാഗതോ സങ്ഘഭേദകോ ആപായികോ നേരയികോ കപ്പട്ഠോ അതേകിച്ഛോ. കതമേഹി പഞ്ചഹി? ഇധുപാലി, ഭിക്ഖു അധമ്മം ധമ്മോതി ദീപേതി, ധമ്മം അധമ്മോതി ദീപേതി, അവിനയം വിനയോതി ദീപേതി, വിനയം അവിനയോതി ദീപേതി, വിനിധായ ദിട്ഠിം കമ്മേന – ഇമേഹി ഖോ, ഉപാലി, പഞ്ചഹങ്ഗേഹി സമന്നാഗതോ സങ്ഘഭേദകോ ആപായികോ നേരയികോ കപ്പട്ഠോ അതേകിച്ഛോ.

‘‘അപരേഹിപി, ഉപാലി, പഞ്ചഹങ്ഗേഹി സമന്നാഗതോ സങ്ഘഭേദകോ ആപായികോ നേരയികോ കപ്പട്ഠോ അതേകിച്ഛോ. കതമേഹി പഞ്ചഹി? ഇധുപാലി, ഭിക്ഖു അധമ്മം ധമ്മോതി ദീപേതി, ധമ്മം അധമ്മോതി ദീപേതി, അവിനയം വിനയോതി ദീപേതി, വിനയം അവിനയോതി ദീപേതി, വിനിധായ ദിട്ഠിം ഉദ്ദേസേന – ഇമേഹി ഖോ, ഉപാലി, പഞ്ചഹങ്ഗേഹി സമന്നാഗതോ സങ്ഘഭേദകോ ആപായികോ നേരയികോ കപ്പട്ഠോ അതേകിച്ഛോ.

‘‘അപരേഹിപി, ഉപാലി, പഞ്ചഹങ്ഗേഹി സമന്നാഗതോ സങ്ഘഭേദകോ ആപായികോ നേരയികോ കപ്പട്ഠോ അതേകിച്ഛോ. കതമേഹി പഞ്ചഹി? ഇധുപാലി, ഭിക്ഖു അധമ്മം ധമ്മോതി ദീപേതി, ധമ്മം അധമ്മോതി ദീപേതി, അവിനയം വിനയോതി ദീപേതി, വിനയം അവിനയോതി ദീപേതി, വിനിധായ ദിട്ഠി വോഹരന്തോ – ഇമേഹി ഖോ, ഉപാലി, പഞ്ചഹങ്ഗേഹി സമന്നാഗതോ സങ്ഘഭേദകോ ആപായികോ നേരയികോ കപ്പട്ഠോ അതേകിച്ഛോ.

‘‘അപരേഹിപി, ഉപാലി, പഞ്ചഹങ്ഗേഹി സമന്നാഗതോ സങ്ഘഭേദകോ ആപായികോ നേരയികോ കപ്പട്ഠോ അതേകിച്ഛോ. കതമേഹി പഞ്ചഹി? ഇധുപാലി, ഭിക്ഖു അധമ്മം ധമ്മോതി ദീപേതി, ധമ്മം അധമ്മോതി ദീപേതി, അവിനയം വിനയോതി ദീപേതി, വിനയം അവിനയോതി ദീപേതി, വിനിധായ ദിട്ഠിം അനുസ്സാവനേന – ഇമേഹി ഖോ, ഉപാലി, പഞ്ചഹങ്ഗേഹി സമന്നാഗതോ സങ്ഘഭേദകോ ആപായികോ നേരയികോ കപ്പട്ഠോ അതേകിച്ഛോ.

‘‘അപരേഹിപി, ഉപാലി, പഞ്ചഹങ്ഗേഹി സമന്നാഗതോ സങ്ഘഭേദകോ ആപായികോ നേരയികോ കപ്പട്ഠോ അതേകിച്ഛോ. കതമേഹി പഞ്ചഹി? ഇധുപാലി, ഭിക്ഖു അധമ്മം ധമ്മോതി ദീപേതി, ധമ്മം അധമ്മോതി ദീപേതി, അവിനയം വിനയോതി ദീപേതി, വിനയം അവിനയോതി ദീപേതി, വിനിധായ ദിട്ഠിം സലാകഗ്ഗാഹേന – ഇമേഹി ഖോ, ഉപാലി, പഞ്ചഹങ്ഗേഹി സമന്നാഗതോ സങ്ഘഭേദകോ ആപായികോ നേരയികോ കപ്പട്ഠോ അതേകിച്ഛോ.

‘‘അപരേഹിപി, ഉപാലി, പഞ്ചഹങ്ഗേഹി സമന്നാഗതോ സങ്ഘഭേദകോ ആപായികോ നേരയികോ കപ്പട്ഠോ അതേകിച്ഛോ. കതമേഹി പഞ്ചഹി? ഇധുപാലി, ഭിക്ഖു അധമ്മം ധമ്മോതി ദീപേതി, ധമ്മം അധമ്മോതി ദീപേതി, അവിനയം വിനയോതി ദീപേതി, വിനയം അവിനയോതി ദീപേതി, വിനിധായ ഖന്തിം കമ്മേന…പേ… വിനിധായ ഖന്തിം ഉദ്ദേസേന…പേ… വിനിധായ ഖന്തിം വോഹരന്തോ…പേ… വിനിധായ ഖന്തിം അനുസ്സാവനേന…പേ… വിനിധായ ഖന്തിം സലാകഗ്ഗാഹേന – ഇമേഹി ഖോ, ഉപാലി, പഞ്ചഹങ്ഗേഹി സമന്നാഗതോ സങ്ഘഭേദകോ ആപായികോ നേരയികോ കപ്പട്ഠോ അതേകിച്ഛോ.

‘‘അപരേഹിപി, ഉപാലി, പഞ്ചഹങ്ഗേഹി സമന്നാഗതോ സങ്ഘഭേദകോ ആപായികോ നേരയികോ കപ്പട്ഠോ അതേകിച്ഛോ. കതമേഹി പഞ്ചഹി? ഇധുപാലി, ഭിക്ഖു അധമ്മം ധമ്മോതി ദീപേതി, ധമ്മം അധമ്മോതി ദീപേതി അവിനയം വിനയോതി ദീപേതി, വിനയം അവിനയോതി ദീപേതി, വിനിധായ രുചിം കമ്മേന…പേ… വിനിധായ രുചിം ഉദ്ദേസേന…പേ… വിനിധായ രുചിം വോഹരന്തോ…പേ… വിനിധായ രുചിം അനുസ്സാവനേന…പേ… വിനിധായ രുചിം സലാകഗ്ഗാഹേന – ഇമേഹി ഖോ, ഉപാലി, പഞ്ചഹങ്ഗേഹി സമന്നാഗതോ സങ്ഘഭേദകോ ആപായികോ നേരയികോ കപ്പട്ഠോ അതേകിച്ഛോ.

‘‘അപരേഹിപി, ഉപാലി, പഞ്ചഹങ്ഗേഹി സമന്നാഗതോ സങ്ഘഭേദകോ ആപായികോ നേരയികോ കപ്പട്ഠോ അതേകിച്ഛോ. കതമേഹി പഞ്ചഹി? ഇധുപാലി, ഭിക്ഖു അധമ്മം ധമ്മോതി ദീപേതി, ധമ്മം അധമ്മോതി ദീപേതി, അവിനയം വിനയോതി ദീപേതി, വിനയം അവിനയോതി ദീപേതി, വിനിധായ സഞ്ഞം കമ്മേന…പേ… വിനിധായ സഞ്ഞം ഉദ്ദേസേന…പേ… വിനിധായ സഞ്ഞം വോഹരന്തോ…പേ… വിനിധായ സഞ്ഞം അനുസ്സാവനേന…പേ… വിനിധായ സഞ്ഞം സലാകഗ്ഗാഹേന – ഇമേഹി ഖോ, ഉപാലി, പഞ്ചഹങ്ഗേഹി സമന്നാഗതോ സങ്ഘഭേദകോ ആപായികോ നേരയികോ കപ്പട്ഠോ അതേകിച്ഛോ’’തി.

സങ്ഘഭേദകവഗ്ഗോ നിട്ഠിതോ ഏകാദസമോ.

തസ്സുദ്ദാനം –

വിനിധായ ദിട്ഠിം കമ്മേന, ഉദ്ദേസേ വോഹരേന ച;

അനുസ്സാവനേ സലാകേന, പഞ്ചേതേ ദിട്ഠിനിസ്സിതാ;

ഖന്തിം രുചിഞ്ച സഞ്ഞഞ്ച, തയോ തേ പഞ്ചധാ നയാതി.