൮. സഹധമ്മികവഗ്ഗോ

൧൭൨. ഭിക്ഖൂഹി സഹധമ്മികം വുച്ചമാനോ – ‘‘ന താവാഹം, ആവുസോ, ഏതസ്മിം സിക്ഖാപദേ സിക്ഖിസ്സാമി യാവ ന അഞ്ഞം ഭിക്ഖും ബ്യത്തം വിനയധരം പരിപുച്ഛിസ്സാമീ’’തി ഭണന്തോ ദ്വേ ആപത്തിയോ ആപജ്ജതി. ഭണതി, പയോഗേ ദുക്കടം; ഭണിതേ ആപത്തി പാചിത്തിയസ്സ.

വിനയം വിവണ്ണേന്തോ ദ്വേ ആപത്തിയോ ആപജ്ജതി. വിവണ്ണേതി, പയോഗേ ദുക്കടം; വിവണ്ണിതേ ആപത്തി പാചിത്തിയസ്സ.

മോഹേന്തോ ദ്വേ ആപത്തിയോ ആപജ്ജതി. അനാരോപിതേ മോഹേ മോഹേതി, ആപത്തി ദുക്കടസ്സ; ആരോപിതേ മോഹേ മോഹേതി, ആപത്തി പാചിത്തിയസ്സ.

ഭിക്ഖുസ്സ കുപിതോ അനത്തമനോ പഹാരം ദേന്തോ ദ്വേ ആപത്തിയോ ആപജ്ജതി. പഹരതി, പയോഗേ ദുക്കടം; പഹതേ ആപത്തി പാചിത്തിയസ്സ.

ഭിക്ഖുസ്സ കുപിതോ അനത്തമനോ തലസത്തികം ഉഗ്ഗിരന്തോ ദ്വേ ആപത്തിയോ ആപജ്ജതി. ഉഗ്ഗിരതി, പയോഗേ ദുക്കടം; ഉഗ്ഗിരിതേ ആപത്തി പാചിത്തിയസ്സ.

ഭിക്ഖും അമൂലകേന സങ്ഘാദിസേസേന അനുദ്ധംസേന്തോ ദ്വേ ആപത്തിയോ ആപജ്ജതി. അനുദ്ധംസേതി, പയോഗേ ദുക്കടം; അനുദ്ധംസിതേ ആപത്തി പാചിത്തിയസ്സ.

ഭിക്ഖുസ്സ സഞ്ചിച്ച കുക്കുച്ചം ഉപദഹന്തോ ദ്വേ ആപത്തിയോ ആപജ്ജതി. ഉപദഹതി, പയോഗേ ദുക്കടം; ഉപദഹിതേ ആപത്തി പാചിത്തിയസ്സ.

ഭിക്ഖൂനം ഭണ്ഡനജാതാനം കലഹജാതാനം വിവാദാപന്നാനം ഉപസ്സുതിം തിട്ഠന്തോ ദ്വേ ആപത്തിയോ ആപജ്ജതി. ‘‘സോസ്സാമീ’’തി ഗച്ഛതി, ആപത്തി ദുക്കടസ്സ; യത്ഥ ഠിതോ സുണാതി, ആപത്തി പാചിത്തിയസ്സ.

ധമ്മികാനം കമ്മാനം ഛന്ദം ദത്വാ പച്ഛാ ഖീയനധമ്മം ആപജ്ജന്തോ ദ്വേ ആപത്തിയോ ആപജ്ജതി. ഖിയ്യതി, പയോഗേ ദുക്കടം; ഖിയ്യിതേ ആപത്തി പാചിത്തിയസ്സ.

സങ്ഘേ വിനിച്ഛയകഥായ വത്തമാനായ ഛന്ദം അദത്വാ ഉട്ഠായാസനാ പക്കമന്തോ ദ്വേ ആപത്തിയോ ആപജ്ജതി. പരിസായ ഹത്ഥപാസം വിജഹന്തസ്സ ആപത്തി ദുക്കടസ്സ; വിജഹിതേ ആപത്തി പാചിത്തിയസ്സ.

സമഗ്ഗേന സങ്ഘേന ചീവരം ദത്വാ പച്ഛാ ഖീയനധമ്മം ആപജ്ജന്തോ ദ്വേ ആപത്തിയോ ആപജ്ജതി. ഖിയ്യതി, പയോഗേ ദുക്കടം; ഖിയ്യിതേ ആപത്തി പാചിത്തിയസ്സ.

ജാനം സങ്ഘികം ലാഭം പരിണതം പുഗ്ഗലസ്സ പരിണാമേന്തോ ദ്വേ ആപത്തിയോ ആപജ്ജതി. പരിണാമേതി, പയോഗേ ദുക്കടം; പരിണാമിതേ ആപത്തി പാചിത്തിയസ്സ.

സഹധമ്മികവഗ്ഗോ അട്ഠമോ.