൨. കതാപത്തിവാരോ

൧. പാരാജികകണ്ഡം

൧൫൭. മേഥുനം ധമ്മം പടിസേവന്തോ കതി ആപത്തിയോ ആപജ്ജതി? മേഥുനം ധമ്മം പടിസേവന്തോ തിസ്സോ ആപത്തിയോ ആപജ്ജതി. അക്ഖായിതേ സരീരേ മേഥുനം ധമ്മം പടിസേവതി, ആപത്തി പാരാജികസ്സ; യേഭുയ്യേന ഖായിതേ സരീരേ മേഥുനം ധമ്മം പടിസേവതി, ആപത്തി ഥുല്ലച്ചയസ്സ; വട്ടകതേ [വിവടകതേ (സ്യാ.)] മുഖേ അച്ഛുപന്തം അങ്ഗജാതം പവേസേതി, ആപത്തി ദുക്കടസ്സ – മേഥുനം ധമ്മം പടിസേവന്തോ ഇമാ തിസ്സോ ആപത്തിയോ ആപജ്ജതി.

൧൫൮. അദിന്നം ആദിയന്തോ കതി ആപത്തിയോ ആപജ്ജതി? അദിന്നം ആദിയന്തോ തിസ്സോ ആപത്തിയോ ആപജ്ജതി. പഞ്ചമാസകം വാ അതിരേകപഞ്ചമാസകം വാ അഗ്ഘനകം അദിന്നം ഥേയ്യസങ്ഖാതം ആദിയതി, ആപത്തി പാരാജികസ്സ; അതിരേകമാസകം വാ ഊനപഞ്ചമാസകം വാ അഗ്ഘനകം അദിന്നം ഥേയ്യസങ്ഖാതം ആദിയതി, ആപത്തി ഥുല്ലച്ചയസ്സ; മാസകം വാ ഊനമാസകം വാ അഗ്ഘനകം അദിന്നം ഥേയ്യസങ്ഖാതം ആദിയതി, ആപത്തി ദുക്കടസ്സ – അദിന്നം ആദിയന്തോ ഇമാ തിസ്സോ ആപത്തിയോ ആപജ്ജതി.

൧൫൯. സഞ്ചിച്ച മനുസ്സവിഗ്ഗഹം ജീവിതാ വോരോപേന്തോ കതി ആപത്തിയോ ആപജ്ജതി? സഞ്ചിച്ച മനുസ്സവിഗ്ഗഹം ജീവിതാ വോരോപേന്തോ തിസ്സോ ആപത്തിയോ ആപജ്ജതി. മനുസ്സം ഓദിസ്സ ഓപാതം ഖണതി ‘‘പപതിത്വാ മരിസ്സതീ’’തി, ആപത്തി ദുക്കടസ്സ; പപതിതേ ദുക്ഖാ വേദനാ ഉപ്പജ്ജതി, ആപത്തി ഥുല്ലച്ചയസ്സ; മരതി, ആപത്തി പാരാജികസ്സ – സഞ്ചിച്ച മനുസ്സവിഗ്ഗഹം ജീവിതാ വോരോപേന്തോ ഇമാ തിസ്സോ ആപത്തിയോ ആപജ്ജതി.

൧൬൦. അസന്തം അഭൂതം ഉത്തരിമനുസ്സധമ്മം ഉല്ലപന്തോ കതി ആപത്തിയോ ആപജ്ജതി? അസന്തം അഭൂതം ഉത്തരിമനുസ്സധമ്മം ഉല്ലപന്തോ തിസ്സോ ആപത്തിയോ ആപജ്ജതി. പാപിച്ഛോ ഇച്ഛാപകതോ അസന്തം അഭൂതം ഉത്തരിമനുസ്സധമ്മം ഉല്ലപതി, ആപത്തി പാരാജികസ്സ; ‘‘യോ തേ വിഹാരേ വസതി, സോ ഭിക്ഖു അരഹാ’’തി ഭണതി, പടിവിജാനന്തസ്സ ആപത്തി ഥുല്ലച്ചയസ്സ; ന പടിവിജാനന്തസ്സ ആപത്തി ദുക്കടസ്സ – അസന്തം അഭൂതം ഉത്തരിമനുസ്സധമ്മം ഉല്ലപന്തോ ഇമാ തിസ്സോ ആപത്തിയോ ആപജ്ജതി.

ചത്താരോ പാരാജികാ നിട്ഠിതാ.

൨. സങ്ഘാദിസേസകണ്ഡം

൧൬൧. ഉപക്കമിത്വാ അസുചിം മോചേന്തോ തിസ്സോ ആപത്തിയോ ആപജ്ജതി. ചേതേതി ഉപക്കമതി മുച്ചതി, ആപത്തി സങ്ഘാദിസേസസ്സ; ചേതേതി ഉപക്കമതി ന മുച്ചതി, ആപത്തി ഥുല്ലച്ചയസ്സ; പയോഗേ ദുക്കടം.

മാതുഗാമേന സദ്ധിം കായസംസഗ്ഗം സമാപജ്ജന്തോ തിസ്സോ ആപത്തിയോ ആപജ്ജതി. കായേന കായം ആമസതി, ആപത്തി സങ്ഘാദിസേസസ്സ; കായേന കായപടിബദ്ധം ആമസതി, ആപത്തി ഥുല്ലച്ചയസ്സ; കായപടിബദ്ധേന കായപടിബദ്ധം ആമസതി, ആപത്തി ദുക്കടസ്സ.

മാതുഗാമം ദുട്ഠുല്ലാഹി വാചാഹി ഓഭാസേന്തോ തിസ്സോ ആപത്തിയോ ആപജ്ജതി. വച്ചമഗ്ഗം പസ്സാവമഗ്ഗം ആദിസ്സ വണ്ണമ്പി ഭണതി, അവണ്ണമ്പി ഭണതി, ആപത്തി സങ്ഘാദിസേസസ്സ; വച്ചമഗ്ഗം പസ്സാവമഗ്ഗം ഠപേത്വാ അധക്ഖകം ഉബ്ഭജാണുമണ്ഡലം ആദിസ്സ വണ്ണമ്പി ഭണതി അവണ്ണമ്പി ഭണതി, ആപത്തി ഥുല്ലച്ചയസ്സ; കായപടിബദ്ധം ആദിസ്സ വണ്ണമ്പി ഭണതി അവണ്ണമ്പി ഭണതി, ആപത്തി ദുക്കടസ്സ.

അത്തകാമപാരിചരിയാ വണ്ണം ഭാസന്തോ തിസ്സോ ആപത്തിയോ ആപജ്ജതി. മാതുഗാമസ്സ സന്തികേ അത്തകാമപാരിചരിയായ വണ്ണം ഭാസതി, ആപത്തി സങ്ഘാദിസേസസ്സ; പണ്ഡകസ്സ സന്തികേ അത്തകാമപാരിചരിയായ വണ്ണം ഭാസതി, ആപത്തി ഥുല്ലച്ചയസ്സ; തിരച്ഛാനഗതസ്സ സന്തികേ അത്തകാമപാരിചരിയായ വണ്ണം ഭാസതി, ആപത്തി ദുക്കടസ്സ.

സഞ്ചരിത്തം സമാപജ്ജന്തോ തിസ്സോ ആപത്തിയോ ആപജ്ജതി. പടിഗ്ഗണ്ഹാതി വീമംസതി പച്ചാഹരതി, ആപത്തി സങ്ഘാദിസേസസ്സ; പടിഗ്ഗണ്ഹാതി വീമംസതി ന പച്ചാഹരതി, ആപത്തി ഥുല്ലച്ചയസ്സ; പടിഗ്ഗണ്ഹാതി ന വീമംസതി ന പച്ചാഹരതി, ആപത്തി ദുക്കടസ്സ.

സഞ്ഞാചികായ കുടിം കാരാപേന്തോ തിസ്സോ ആപത്തിയോ ആപജ്ജതി. കാരാപേതി, പയോഗേ ദുക്കടം; ഏകം പിണ്ഡം അനാഗതേ, ആപത്തി ഥുല്ലച്ചയസ്സ; തസ്മിം പിണ്ഡേ ആഗതേ, ആപത്തി സങ്ഘാദിസേസസ്സ.

മഹല്ലകം വിഹാരം കാരാപേന്തോ തിസ്സോ ആപത്തിയോ ആപജ്ജതി. കാരാപേതി, പയോഗേ ദുക്കടം; ഏകം പിണ്ഡം അനാഗതേ, ആപത്തി ഥുല്ലച്ചയസ്സ; തസ്മിം പിണ്ഡേ ആഗതേ, ആപത്തി സങ്ഘാദിസേസസ്സ.

ഭിക്ഖും അമൂലകേന പാരാജികേന ധമ്മേന അനുദ്ധംസേന്തോ തിസ്സോ ആപത്തിയോ ആപജ്ജതി. അനോകാസം കാരാപേത്വാ ചാവനാധിപ്പായോ വദേതി, ആപത്തി സങ്ഘാദിസേസേന ദുക്കടസ്സ; ഓകാസം കാരാപേത്വാ അക്കോസാധിപ്പായോ വദേതി, ആപത്തി ഓമസവാദസ്സ.

ഭിക്ഖും അഞ്ഞഭാഗിയസ്സ അധികരണസ്സ കിഞ്ചി ദേസം ലേസമത്തം ഉപാദായ പാരാജികേന ധമ്മേന അനുദ്ധംസേന്തോ തിസ്സോ ആപത്തിയോ ആപജ്ജതി. അനോകാസം കാരാപേത്വാ ചാവനാധിപ്പായോ വദേതി, ആപത്തി സങ്ഘാദിസേസേന ദുക്കടസ്സ; ഓകാസം കാരാപേത്വാ അക്കോസാധിപ്പായോ വദേതി, ആപത്തി ഓമസവാദസ്സ.

സങ്ഘഭേദകോ ഭിക്ഖു യാവതതിയം സമനുഭാസനായ ന പടിനിസ്സജ്ജന്തോ തിസ്സോ ആപത്തിയോ ആപജ്ജതി. ഞത്തിയാ ദുക്കടം; ദ്വീഹി കമ്മവാചാഹി ഥുല്ലച്ചയാ; കമ്മവാചാപരിയോസാനേ ആപത്തി സങ്ഘാദിസേസസ്സ.

ഭേദകാനുവത്തകാ ഭിക്ഖൂ യാവതതിയം സമനുഭാസനായ [സമനുഭാസിയമാനാ (സ്യാ.)] ന പടിനിസ്സജ്ജന്താ തിസ്സോ ആപത്തിയോ ആപജ്ജന്തി. ഞത്തിയാ ദുക്കടം; ദ്വീഹി കമ്മവാചാഹി ഥുല്ലച്ചയാ; കമ്മവാചാപരിയോസാനേ ആപത്തി സങ്ഘാദിസേസസ്സ.

ദുബ്ബചോ ഭിക്ഖു യാവതതിയം സമനുഭാസനായ [സമനുഭാസിയമാനോ (സ്യാ.)] ന പടിനിസ്സജ്ജന്തോ തിസ്സോ ആപത്തിയോ ആപജ്ജതി. ഞത്തിയാ ദുക്കടം; ദ്വീഹി കമ്മവാചാഹി ഥുല്ലച്ചയാ; കമ്മവാചാപരിയോസാനേ ആപത്തി സങ്ഘാദിസേസസ്സ.

കുലദൂസകോ ഭിക്ഖു യാവതതിയം സമനുഭാസനായ ന പടിനിസ്സജ്ജന്തോ തിസ്സോ ആപത്തിയോ ആപജ്ജതി. ഞത്തിയാ ദുക്കടം; ദ്വീഹി കമ്മവാചാഹി ഥുല്ലച്ചയാ; കമ്മവാചാപരിയോസാനേ ആപത്തി സങ്ഘാദിസേസസ്സ.

തേരസ സങ്ഘാദിസേസാ നിട്ഠിതാ.

൩. നിസ്സഗ്ഗിയകണ്ഡം

൧. കഥിനവഗ്ഗോ

൧൬൨. അതിരേകചീവരം ദസാഹം അതിക്കാമേന്തോ ഏകം ആപത്തിം ആപജ്ജതി. നിസ്സഗ്ഗിയം പാചിത്തിയം.

ഏകരത്തം തിചീവരേന വിപ്പവസന്തോ ഏകം ആപത്തിം ആപജ്ജതി. നിസ്സഗ്ഗിയം പാചിത്തിയം.

അകാലചീവരം പടിഗ്ഗഹേത്വാ മാസം അതിക്കാമേന്തോ ഏകം ആപത്തിം ആപജ്ജതി. നിസ്സഗ്ഗിയം പാചിത്തിയം.

അഞ്ഞാതികായ ഭിക്ഖുനിയാ പുരാണചീവരം ധോവാപേന്തോ ദ്വേ ആപത്തിയോ ആപജ്ജതി. ധോവാപേതി, പയോഗേ ദുക്കടം; ധോവാപിതേ നിസ്സഗ്ഗിയം പാചിത്തിയം.

അഞ്ഞാതികായ ഭിക്ഖുനിയാ ഹത്ഥതോ ചീവരം പടിഗ്ഗണ്ഹന്തോ ദ്വേ ആപത്തിയോ ആപജ്ജതി. ഗണ്ഹാതി, പയോഗേ ദുക്കടം; ഗഹിതേ നിസ്സഗ്ഗിയം പാചിത്തിയം.

അഞ്ഞാതകം ഗഹപതിം വാ ഗഹപതാനിം വാ ചീവരം വിഞ്ഞാപേന്തോ ദ്വേ ആപത്തിയോ ആപജ്ജതി. വിഞ്ഞാപേതി, പയോഗേ ദുക്കടം; വിഞ്ഞാപിതേ നിസ്സഗ്ഗിയം പാചിത്തിയം.

അഞ്ഞാതകം ഗഹപതിം വാ ഗഹപതാനിം വാ തതുത്തരി ചീവരം വിഞ്ഞാപേന്തോ ദ്വേ ആപത്തിയോ ആപജ്ജതി. വിഞ്ഞാപേതി, പയോഗേ ദുക്കടം; വിഞ്ഞാപിതേ നിസ്സഗ്ഗിയം പാചിത്തിയം.

പുബ്ബേ അപ്പവാരിതോ അഞ്ഞാതകം ഗഹപതികം ഉപസങ്കമിത്വാ ചീവരേ വികപ്പം ആപജ്ജന്തോ ദ്വേ ആപത്തിയോ ആപജ്ജതി. വികപ്പം ആപജ്ജതി, പയോഗേ ദുക്കടം; വികപ്പം ആപന്നേ നിസ്സഗ്ഗിയം പാചിത്തിയം.

പുബ്ബേ അപ്പവാരിതോ അഞ്ഞാതകേ ഗഹപതികേ ഉപസങ്കമിത്വാ ചീവരേ വികപ്പം ആപജ്ജന്തോ ദ്വേ ആപത്തിയോ ആപജ്ജതി. വികപ്പം ആപജ്ജതി, പയോഗേ ദുക്കടം; വികപ്പം ആപന്നേ നിസ്സഗ്ഗിയം പാചിത്തിയം.

അതിരേകതിക്ഖത്തും ചോദനായ അതിരേകഛക്ഖത്തും ഠാനേന ചീവരം അഭിനിപ്ഫാദേന്തോ ദ്വേ ആപത്തിയോ ആപജ്ജതി. അഭിനിപ്ഫാദേതി, പയോഗേ ദുക്കടം; അഭിനിപ്ഫാദിതേ നിസ്സഗ്ഗിയം പാചിത്തിയം.

കഥിനവഗ്ഗോ പഠമോ.

൨. കോസിയവഗ്ഗോ

൧൬൩. കോസിയമിസ്സകം സന്ഥതം കാരാപേന്തോ ദ്വേ ആപത്തിയോ ആപജ്ജതി. കാരാപേതി, പയോഗേ ദുക്കടം; കാരാപിതേ നിസ്സഗ്ഗിയം പാചിത്തിയം.

സുദ്ധകാളകാനം ഏളകലോമാനം സന്ഥതം കാരാപേന്തോ ദ്വേ ആപത്തിയോ ആപജ്ജതി. കാരാപേതി, പയോഗേ ദുക്കടം; കാരാപിതേ നിസ്സഗ്ഗിയം പാചിത്തിയം.

അനാദിയിത്വാ തുലം ഓദാതാനം തുലം ഗോചരിയാനം നവം സന്ഥതം കാരാപേന്തോ ദ്വേ ആപത്തിയോ ആപജ്ജതി. കാരാപേതി, പയോഗേ ദുക്കടം; കാരാപിതേ നിസ്സഗ്ഗിയം പാചിത്തിയം.

അനുവസ്സം സന്ഥതം കാരാപേന്തോ ദ്വേ ആപത്തിയോ ആപജ്ജതി. കാരാപേതി, പയോഗേ ദുക്കടം; കാരാപിതേ നിസ്സഗ്ഗിയം പാചിത്തിയം.

അനാദിയിത്വാ പുരാണസന്ഥതസ്സ സാമന്താ സുഗതവിദത്ഥിം നവം നിസീദനസന്ഥതം കാരാപേന്തോ ദ്വേ ആപത്തിയോ ആപജ്ജതി. കാരാപേതി, പയോഗേ ദുക്കടം; കാരാപിതേ നിസ്സഗ്ഗിയം പാചിത്തിയം.

ഏളകലോമാനി പടിഗ്ഗഹേത്വാ തിയോജനം അതിക്കാമേന്തോ ദ്വേ ആപത്തിയോ ആപജ്ജതി. പഠമം പാദം തിയോജനം അതിക്കാമേതി, ആപത്തി ദുക്കടസ്സ; ദുതിയം പാദം അതിക്കാമേതി, നിസ്സഗ്ഗിയം പാചിത്തിയം.

അഞ്ഞാതികായ ഭിക്ഖുനിയാ ഏളകലോമാനി ധോവാപേന്തോ ദ്വേ ആപത്തിയോ ആപജ്ജതി. ധോവാപേതി, പയോഗേ ദുക്കടം; ധോവാപിതേ നിസ്സഗ്ഗിയം പാചിത്തിയം.

രൂപിയം പടിഗ്ഗണ്ഹന്തോ ദ്വേ ആപത്തിയോ ആപജ്ജതി. ഗണ്ഹാതി, പയോഗേ ദുക്കടം; ഗഹിതേ നിസ്സഗ്ഗിയം പാചിത്തിയം.

നാനപ്പകാരകം രൂപിയസംവോഹാരം സമാപജ്ജന്തോ ദ്വേ ആപത്തിയോ ആപജ്ജതി. സമാപജ്ജതി, പയോഗേ ദുക്കടം; സമാപന്നേ നിസ്സഗ്ഗിയം പാചിത്തിയം.

നാനപ്പകാരകം കയവിക്കയം സമാപജ്ജന്തോ ദ്വേ ആപത്തിയോ ആപജ്ജതി. സമാപജ്ജതി, പയോഗേ ദുക്കടം; സമാപന്നേ നിസ്സഗ്ഗിയം പാചിത്തിയം.

കോസിയവഗ്ഗോ ദുതിയോ.

൩. പത്തവഗ്ഗോ

൧൬൪. അതിരേകപത്തം ദസാഹം അതിക്കാമേന്തോ ഏകം ആപത്തിം ആപജ്ജതി. നിസ്സഗ്ഗിയം പാചിത്തിയം.

ഊനപഞ്ചബന്ധനേന പത്തേന അഞ്ഞം നവം പത്തം ചേതാപേന്തോ ദ്വേ ആപത്തിയോ ആപജ്ജതി. ചേതാപേതി, പയോഗേ ദുക്കടം; ചേതാപിതേ നിസ്സഗ്ഗിയം പാചിത്തിയം.

ഭേസജ്ജാനി പടിഗ്ഗഹേത്വാ സത്താഹം അതിക്കാമേന്തോ ഏകം ആപത്തിം ആപജ്ജതി. നിസ്സഗ്ഗിയം പാചിത്തിയം.

അതിരേകമാസേ സേസേ ഗിമ്ഹാനേ വസ്സികസാടികചീവരം പരിയേസന്തോ ദ്വേ ആപത്തിയോ ആപജ്ജതി. പരിയേസതി, പയോഗേ ദുക്കടം; പരിയിട്ഠേ നിസ്സഗ്ഗിയം പാചിത്തിയം.

ഭിക്ഖുസ്സ സാമം ചീവരം ദത്വാ കുപിതോ അനത്തമനോ അച്ഛിന്ദന്തോ ദ്വേ ആപത്തിയോ ആപജ്ജതി. അച്ഛിന്ദതി, പയോഗേ ദുക്കടം; അച്ഛിന്നേ നിസ്സഗ്ഗിയം പാചിത്തിയം.

സാമം സുത്തം വിഞ്ഞാപേത്വാ തന്തവായേഹി ചീവരം വായാപേന്തോ ദ്വേ ആപത്തിയോ ആപജ്ജതി. വായാപേതി, പയോഗേ ദുക്കടം; വായാപിതേ നിസ്സഗ്ഗിയം പാചിത്തിയം.

പുബ്ബേ അപ്പവാരിതോ അഞ്ഞാതകസ്സ ഗഹപതികസ്സ തന്തവായേ ഉപസങ്കമിത്വാ ചീവരേ വികപ്പം ആപജ്ജന്തോ ദ്വേ ആപത്തിയോ ആപജ്ജതി. വികപ്പം ആപജ്ജതി, പയോഗേ ദുക്കടം; വികപ്പം ആപന്നേ നിസ്സഗ്ഗിയം പാചിത്തിയം.

അച്ചേകചീവരം പടിഗ്ഗഹേത്വാ ചീവരകാലസമയം അതിക്കാമേന്തോ ഏകം ആപത്തിം ആപജ്ജതി. നിസ്സഗ്ഗിയം പാചിത്തിയം.

തിണ്ണം ചീവരാനം അഞ്ഞതരം ചീവരം അന്തരഘരേ നിക്ഖിപിത്വാ അതിരേകഛാരത്തം വിപ്പവസന്തോ ഏകം ആപത്തിം ആപജ്ജതി. നിസ്സഗ്ഗിയം പാചിത്തിയം.

ജാനം സങ്ഘികം ലാഭം പരിണതം അത്തനോ പരിണാമേന്തോ ദ്വേ ആപത്തിയോ ആപജ്ജതി. പരിണാമേതി, പയോഗേ ദുക്കടം; പരിണാമിതേ നിസ്സഗ്ഗിയം പാചിത്തിയം.

പത്തവഗ്ഗോ തതിയോ.

തിംസ നിസ്സഗ്ഗിയാ പാചിത്തിയാ നിട്ഠിതാ.

൪. പാചിത്തിയകണ്ഡം

൧. മുസാവാദവഗ്ഗോ

൧൬൫. സമ്പജാനമുസാവാദം ഭാസന്തോ കതി ആപത്തിയോ ആപജ്ജതി? സമ്പജാനമുസാവാദം ഭാസന്തോ പഞ്ച ആപത്തിയോ ആപജ്ജതി. പാപിച്ഛോ ഇച്ഛാപകതോ അസന്തം അഭൂതം ഉത്തരിമനുസ്സധമ്മം ഉല്ലപതി, ആപത്തി പാരാജികസ്സ; ഭിക്ഖും അമൂലകേന പാരാജികേന ധമ്മേന അനുദ്ധംസേതി, ആപത്തി സങ്ഘാദിസേസസ്സ; ‘‘യോ തേ വിഹാരേ വസതി, സോ ഭിക്ഖു അരഹാ’’തി ഭണതി, പടിവിജാനന്തസ്സ ആപത്തി ഥുല്ലച്ചയസ്സ; ന പടിവിജാനന്തസ്സ ആപത്തി ദുക്കടസ്സ; സമ്പജാനമുസാവാദേ പാചിത്തിയം – സമ്പജാനമുസാവാദം ഭാസന്തോ ഇമാ പഞ്ച ആപത്തിയോ ആപജ്ജതി.

ഓമസന്തോ ദ്വേ ആപത്തിയോ ആപജ്ജതി. ഉപസമ്പന്നം ഓമസതി, ആപത്തി പാചിത്തിയസ്സ; അനുപസമ്പന്നം ഓമസതി, ആപത്തി ദുക്കടസ്സ.

പേസുഞ്ഞം ഉപസംഹരന്തോ ദ്വേ ആപത്തിയോ ആപജ്ജതി. ഉപസമ്പന്നസ്സ പേസുഞ്ഞം ഉപസംഹരതി, ആപത്തി പാചിത്തിയസ്സ; അനുപസമ്പന്നസ്സ പേസുഞ്ഞം ഉപസംഹരതി, ആപത്തി ദുക്കടസ്സ.

അനുപസമ്പന്നം പദസോ ധമ്മം വാചേന്തോ ദ്വേ ആപത്തിയോ ആപജ്ജതി. വാചേതി, പയോഗേ ദുക്കടം; പദേ പദേ ആപത്തി പാചിത്തിയസ്സ.

അനുപസമ്പന്നേന ഉത്തരിദിരത്തതിരത്തം സഹസേയ്യം കപ്പേന്തോ ദ്വേ ആപത്തിയോ ആപജ്ജതി. നിപജ്ജതി, പയോഗേ ദുക്കടം; നിപന്നേ ആപത്തി പാചിത്തിയസ്സ.

മാതുഗാമേന സഹസേയ്യം കപ്പേന്തോ ദ്വേ ആപത്തിയോ ആപജ്ജതി. നിപജ്ജതി, പയോഗേ ദുക്കടം; നിപന്നേ ആപത്തി പാചിത്തിയസ്സ.

മാതുഗാമസ്സ ഉത്തരിഛപ്പഞ്ചവാചാഹി ധമ്മം ദേസേന്തോ ദ്വേ ആപത്തിയോ ആപജ്ജതി. ദേസേതി, പയോഗേ ദുക്കടം; പദേ പദേ ആപത്തി പാചിത്തിയസ്സ.

അനുപസമ്പന്നസ്സ ഉത്തരിമനുസ്സധമ്മം ഭൂതം ആരോചേന്തോ ദ്വേ ആപത്തിയോ ആപജ്ജതി. ആരോചേതി, പയോഗേ ദുക്കടം; ആരോചിതേ ആപത്തി പാചിത്തിയസ്സ.

ഭിക്ഖുസ്സ ദുട്ഠുല്ലം ആപത്തിം അനുപസമ്പന്നസ്സ ആരോചേന്തോ ദ്വേ ആപത്തിയോ ആപജ്ജതി. ആരോചേതി, പയോഗേ ദുക്കടം; ആരോചിതേ ആപത്തി പാചിത്തിയസ്സ.

പഥവിം ഖണന്തോ ദ്വേ ആപത്തിയോ ആപജ്ജതി. ഖണതി, പയോഗേ ദുക്കടം; പഹാരേ പഹാരേ ആപത്തി പാചിത്തിയസ്സ.

മുസാവാദവഗ്ഗോ പഠമോ.

൨. ഭൂതഗാമവഗ്ഗോ

൧൬൬. ഭൂതഗാമം പാതേന്തോ ദ്വേ ആപത്തിയോ ആപജ്ജതി. പാതേതി, പയോഗേ ദുക്കടം; പഹാരേ പഹാരേ ആപത്തി പാചിത്തിയസ്സ.

അഞ്ഞേനഞ്ഞം പടിചരന്തോ ദ്വേ ആപത്തിയോ ആപജ്ജതി. അനാരോപിതേ അഞ്ഞവാദകേ അഞ്ഞേനഞ്ഞം പടിചരതി, ആപത്തി ദുക്കടസ്സ; ആരോപിതേ അഞ്ഞവാദകേ അഞ്ഞേനഞ്ഞം പടിചരതി, ആപത്തി പാചിത്തിയസ്സ.

ഭിക്ഖും ഉജ്ഝാപേന്തോ ദ്വേ ആപത്തിയോ ആപജ്ജതി. ഉജ്ഝാപേതി, പയോഗേ ദുക്കടം; ഉജ്ഝാപിതേ ആപത്തി പാചിത്തിയസ്സ.

സങ്ഘികം മഞ്ചം വാ പീഠം വാ ഭിസിം വാ കോച്ഛം വാ അജ്ഝോകാസേ സന്ഥരിത്വാ അനുദ്ധരിത്വാ അനാപുച്ഛാ പക്കമന്തോ ദ്വേ ആപത്തിയോ ആപജ്ജതി. പഠമം പാദം ലേഡ്ഡുപാതം അതിക്കാമേതി, ആപത്തി ദുക്കടസ്സ; ദുതിയം പാദം അതിക്കാമേതി, ആപത്തി പാചിത്തിയസ്സ.

സങ്ഘികേ വിഹാരേ സേയ്യം സന്ഥരിത്വാ അനുദ്ധരിത്വാ അനാപുച്ഛാ പക്കമന്തോ ദ്വേ ആപത്തിയോ ആപജ്ജതി. പഠമം പാദം പരിക്ഖേപം അതിക്കാമേതി, ആപത്തി ദുക്കടസ്സ; ദുതിയം പാദം അതിക്കാമേതി, ആപത്തി പാചിത്തിയസ്സ.

സങ്ഘികേ വിഹാരേ ജാനം പുബ്ബുപഗതം ഭിക്ഖും അനുപഖജ്ജ സേയ്യം കപ്പേന്തോ ദ്വേ ആപത്തിയോ ആപജ്ജതി. നിപജ്ജതി, പയോഗേ ദുക്കടം; നിപന്നേ ആപത്തി പാചിത്തിയസ്സ.

ഭിക്ഖും കുപിതോ അനത്തമനോ സങ്ഘികാ വിഹാരാ നിക്കഡ്ഢേന്തോ ദ്വേ ആപത്തിയോ ആപജ്ജതി. നിക്കഡ്ഢതി, പയോഗേ ദുക്കടം; നിക്കഡ്ഢിതേ ആപത്തി പാചിത്തിയസ്സ.

സങ്ഘികേ വിഹാരേ ഉപരിവേഹാസകുടിയാ ആഹച്ചപാദകം മഞ്ചം വാ പീഠം വാ അഭിനിസീദന്തോ ദ്വേ ആപത്തിയോ ആപജ്ജതി. അഭിനിസീദതി, പയോഗേ ദുക്കടം; അഭിനിസിന്നേ ആപത്തി പാചിത്തിയസ്സ.

ദ്വത്തിപരിയായേ അധിട്ഠഹിത്വാ തതുത്തരി അധിട്ഠഹന്തോ ദ്വേ ആപത്തിയോ ആപജ്ജതി. അധിട്ഠേതി, പയോഗേ ദുക്കടം; അധിട്ഠിതേ ആപത്തി പാചിത്തിയസ്സ.

ജാനം സപ്പാണകം ഉദകം തിണം വാ മത്തികം വാ സിഞ്ചന്തോ ദ്വേ ആപത്തിയോ ആപജ്ജതി. സിഞ്ചതി, പയോഗേ ദുക്കടം; സിഞ്ചിതേ ആപത്തി പാചിത്തിയസ്സ.

ഭൂതഗാമവഗ്ഗോ ദുതിയോ.

൩. ഓവാദവഗ്ഗോ

൧൬൭. അസമ്മതോ ഭിക്ഖുനിയോ ഓവദന്തോ ദ്വേ ആപത്തിയോ ആപജ്ജതി. ഓവദതി, പയോഗേ ദുക്കടം; ഓവദിതേ ആപത്തി പാചിത്തിയസ്സ.

അത്ഥങ്ഗതേ സൂരിയേ ഭിക്ഖുനിയോ ഓവദന്തോ ദ്വേ ആപത്തിയോ ആപജ്ജതി. ഓവദതി, പയോഗേ ദുക്കടം; ഓവദിതേ ആപത്തി പാചിത്തിയസ്സ.

ഭിക്ഖുനുപസ്സയം ഉപസങ്കമിത്വാ ഭിക്ഖുനിയോ ഓവദന്തോ ദ്വേ ആപത്തിയോ ആപജ്ജതി. ഓവദതി, പയോഗേ ദുക്കടം; ഓവദിതേ ആപത്തി പാചിത്തിയസ്സ.

‘‘ആമിസഹേതു ഭിക്ഖൂ ഭിക്ഖുനിയോ ഓവദന്തീ’’തി ഭണന്തോ ദ്വേ ആപത്തിയോ ആപജ്ജതി. ഭണതി, പയോഗേ ദുക്കടം; ഭണിതേ ആപത്തി പാചിത്തിയസ്സ.

അഞ്ഞാതികായ ഭിക്ഖുനിയാ ചീവരം ദേന്തോ ദ്വേ ആപത്തിയോ ആപജ്ജതി. ദേതി, പയോഗേ ദുക്കടം; ദിന്നേ ആപത്തി പാചിത്തിയസ്സ.

അഞ്ഞാതികാ ഭിക്ഖുനിയാ ചീവരം സിബ്ബേന്തോ ദ്വേ ആപത്തിയോ ആപജ്ജതി. സിബ്ബേതി, പയോഗേ ദുക്കടം; ആരാപഥേ ആരാപഥേ ആപത്തി പാചിത്തിയസ്സ.

ഭിക്ഖുനിയാ സദ്ധിം സംവിധായ ഏകദ്ധാനമഗ്ഗം പടിപജ്ജന്തോ ദ്വേ ആപത്തിയോ ആപജ്ജതി. പടിപജ്ജതി, പയോഗേ ദുക്കടം; പടിപന്നേ ആപത്തി പാചിത്തിയസ്സ.

ഭിക്ഖുനിയാ സദ്ധിം സംവിധായ ഏകം നാവം അഭിരുഹന്തോ ദ്വേ ആപത്തിയോ ആപജ്ജതി. അഭിരുഹതി, പയോഗേ ദുക്കടം; അഭിരുള്ഹേ ആപത്തി പാചിത്തിയസ്സ.

ജാനം ഭിക്ഖുനിപരിപാചിതം പിണ്ഡപാതം ഭുഞ്ജന്തോ ദ്വേ ആപത്തിയോ ആപജ്ജതി. ‘‘ഭുഞ്ജിസ്സാമീ’’തി പടിഗ്ഗണ്ഹാതി, ആപത്തി ദുക്കടസ്സ; അജ്ഝോഹാരേ അജ്ഝോഹാരേ ആപത്തി പാചിത്തിയസ്സ.

ഭിക്ഖുനിയാ സദ്ധിം ഏകോ ഏകായ രഹോ നിസജ്ജം കപ്പേന്തോ ദ്വേ ആപത്തിയോ ആപജ്ജതി. നിസീദതി, പയോഗേ ദുക്കടം; നിസിന്നേ ആപത്തി പാചിത്തിയസ്സ.

ഓവാദവഗ്ഗോ തതിയോ.

൪. ഭോജനവഗ്ഗോ

൧൬൮. തതുത്തരി ആവസഥപിണ്ഡം ഭുഞ്ജന്തോ ദ്വേ ആപത്തിയോ ആപജ്ജതി. ഭുഞ്ജിസ്സാമീതി പടിഗ്ഗണ്ഹാതി, ആപത്തി ദുക്കടസ്സ; അജ്ഝോഹാരേ അജ്ഝോഹാരേ ആപത്തി പാചിത്തിയസ്സ.

ഗണഭോജനം ഭുഞ്ജന്തോ ദ്വേ ആപത്തിയോ ആപജ്ജതി. ഭുഞ്ജിസ്സാമീതി പടിഗ്ഗണ്ഹാതി, ആപത്തി ദുക്കടസ്സ; അജ്ഝോഹാരേ അജ്ഝോഹാരേ ആപത്തി പാചിത്തിയസ്സ.

പരമ്പരഭോജനം ഭുഞ്ജന്തോ ദ്വേ ആപത്തിയോ ആപജ്ജതി. ഭുഞ്ജിസ്സാമീതി പടിഗ്ഗണ്ഹാതി, ആപത്തി ദുക്കടസ്സ; അജ്ഝോഹാരേ അജ്ഝോഹാരേ ആപത്തി പാചിത്തിയസ്സ.

ദ്വത്തിപത്തപൂരേ പൂവേ പടിഗ്ഗഹേത്വാ തതുത്തരി പടിഗ്ഗണ്ഹന്തോ ദ്വേ ആപത്തിയോ ആപജ്ജതി. ഗണ്ഹാതി, പയോഗേ ദുക്കടം; ഗഹിതേ ആപത്തി പാചിത്തിയസ്സ.

ഭുത്താവീ പവാരിതോ അനതിരിത്തം ഖാദനീയം വാ ഭോജനീയം വാ ഭുഞ്ജന്തോ ദ്വേ ആപത്തിയോ ആപജ്ജതി. ഭുഞ്ജിസ്സാമീതി പടിഗ്ഗണ്ഹാതി, ആപത്തി ദുക്കടസ്സ; അജ്ഝോഹാരേ അജ്ഝോഹാരേ ആപത്തി പാചിത്തിയസ്സ.

ഭിക്ഖും ഭുത്താവിം പവാരിതം അനതിരിത്തേന ഖാദനീയേന വാ ഭോജനീയേന വാ അഭിഹട്ഠും പവാരേന്തോ ദ്വേ ആപത്തിയോ ആപജ്ജതി. തസ്സ വചനേന ഖാദിസ്സാമി ഭുഞ്ജിസ്സാമീതി പടിഗ്ഗണ്ഹാതി, ആപത്തി ദുക്കടസ്സ; ഭോജനപരിയോസാനേ ആപത്തി പാചിത്തിയസ്സ.

വികാലേ ഖാദനീയം വാ ഭോജനീയം വാ ഭുഞ്ജന്തോ ദ്വേ ആപത്തിയോ ആപജ്ജതി. ഖാദിസ്സാമി ഭുഞ്ജിസ്സാമീതി പടിഗ്ഗണ്ഹാതി, ആപത്തി ദുക്കടസ്സ; അജ്ഝോഹാരേ അജ്ഝോഹാരേ ആപത്തി പാചിത്തിയസ്സ.

സന്നിധികാരകം ഖാദനീയം വാ ഭോജനീയം വാ ഭുഞ്ജന്തോ ദ്വേ ആപത്തിയോ ആപജ്ജതി. ഖാദിസ്സാമി ഭുഞ്ജിസ്സാമീതി പടിഗ്ഗണ്ഹാതി, ആപത്തി ദുക്കടസ്സ; അജ്ഝോഹാരേ അജ്ഝോഹാരേ ആപത്തി പാചിത്തിയസ്സ.

പണീതഭോജനാനി അത്തനോ അത്ഥായ വിഞ്ഞാപേത്വാ ഭുഞ്ജന്തോ ദ്വേ ആപത്തിയോ ആപജ്ജതി. ഭുഞ്ജിസ്സാമീതി പടിഗ്ഗണ്ഹാതി, ആപത്തി ദുക്കടസ്സ; അജ്ഝോഹാരേ അജ്ഝോഹാരേ ആപത്തി പാചിത്തിയസ്സ.

അദിന്നം മുഖദ്വാരം ആഹാരം ആഹരന്തോ ദ്വേ ആപത്തിയോ ആപജ്ജതി. ഭുഞ്ജിസ്സാമീതി പടിഗ്ഗണ്ഹാതി, ആപത്തി ദുക്കടസ്സ; അജ്ഝോഹാരേ അജ്ഝോഹാരേ ആപത്തി പാചിത്തിയസ്സ.

ഭോജനവഗ്ഗോ ചതുത്ഥോ.

൫. അചേലകവഗ്ഗോ

൧൬൯. അചേലകസ്സ, വാ പരിബ്ബാജകസ്സ വാ പരിബ്ബാജികായ വാ സഹത്ഥാ ഖാദനീയം വാ ഭോജനീയം വാ ദേന്തോ ദ്വേ ആപത്തിയോ ആപജ്ജതി. ദേതി, പയോഗേ ദുക്കടം; ദിന്നേ ആപത്തി പാചിത്തിയസ്സ.

ഭിക്ഖും – ‘‘ഏഹാവുസോ, ഗാമം വാ നിഗമം വാ പിണ്ഡായ പവിസിസ്സാമാ’’തി തസ്സ ദാപേത്വാ വാ അദാപേത്വാ വാ ഉയ്യോജേന്തോ ദ്വേ ആപത്തിയോ ആപജ്ജതി. ഉയ്യോജേതി, പയോഗേ ദുക്കടം; ഉയ്യോജിതേ ആപത്തി പാചിത്തിയസ്സ.

സഭോജനേ കുലേ അനുപഖജ്ജ നിസജ്ജം കപ്പേന്തോ ദ്വേ ആപത്തിയോ ആപജ്ജതി. നിസീദതി, പയോഗേ ദുക്കടം; നിസിന്നേ ആപത്തി പാചിത്തിയസ്സ.

മാതുഗാമേന സദ്ധിം രഹോ പടിച്ഛന്നേ ആസനേ നിസജ്ജം കപ്പേന്തോ ദ്വേ ആപത്തിയോ ആപജ്ജതി. നിസീദതി, പയോഗേ ദുക്കടം; നിസിന്നേ ആപത്തി പാചിത്തിയസ്സ.

മാതുഗാമേന സദ്ധിം ഏകോ ഏകായ രഹോ നിസജ്ജം കപ്പേന്തോ ദ്വേ ആപത്തിയോ ആപജ്ജതി. നിസീദതി, പയോഗേ ദുക്കടം; നിസിന്നേ ആപത്തി പാചിത്തിയസ്സ.

നിമന്തിതോ സഭത്തോ സമാനോ പുരേഭത്തം പച്ഛാഭത്തം കുലേസു ചാരിത്തം ആപജ്ജന്തോ ദ്വേ ആപത്തിയോ ആപജ്ജതി. പഠമം പാദം ഉമ്മാരം അതിക്കാമേതി, ആപത്തി ദുക്കടസ്സ; ദുതിയം പാദം അതിക്കാമേതി, ആപത്തി പാചിത്തിയസ്സ.

തതുത്തരി ഭേസജ്ജം വിഞ്ഞാപേന്തോ ദ്വേ ആപത്തിയോ ആപജ്ജതി. വിഞ്ഞാപേതി, പയോഗേ ദുക്കടം; വിഞ്ഞാപിതേ ആപത്തി പാചിത്തിയസ്സ.

ഉയ്യുത്തം സേനം ദസ്സനായ ഗച്ഛന്തോ ദ്വേ ആപത്തിയോ ആപജ്ജതി. ഗച്ഛതി, ആപത്തി ദുക്കടസ്സ; യത്ഥ ഠിതോ പസ്സതി, ആപത്തി പാചിത്തിയസ്സ.

അതിരേകതിരത്തം സേനായ വസന്തോ ദ്വേ ആപത്തിയോ ആപജ്ജതി. വസതി, പയോഗേ ദുക്കടം; വസിതേ ആപത്തി പാചിത്തിയസ്സ.

ഉയ്യോധികം ഗച്ഛന്തോ ദ്വേ ആപത്തിയോ ആപജ്ജതി. ഗച്ഛതി, ആപത്തി ദുക്കടസ്സ; യത്ഥ ഠിതോ പസ്സതി, ആപത്തി പാചിത്തിയസ്സ.

അചേലകവഗ്ഗോ പഞ്ചമോ.

൬. സുരാമേരയവഗ്ഗോ

൧൭൦. മജ്ജം പിവന്തോ ദ്വേ ആപത്തിയോ ആപജ്ജതി. ‘‘പിവിസ്സാമീ’’തി പടിഗ്ഗണ്ഹാതി, ആപത്തി ദുക്കടസ്സ; അജ്ഝോഹാരേ അജ്ഝോഹാരേ ആപത്തി പാചിത്തിയസ്സ.

ഭിക്ഖും അങ്ഗുലിപതോദകേന ഹാസേന്തോ ദ്വേ ആപത്തിയോ ആപജ്ജതി. ഹാസേതി, പയോഗേ ദുക്കടം; ഹസിതേ ആപത്തി പാചിത്തിയസ്സ.

ഉദകേ കീളന്തോ ദ്വേ ആപത്തിയോ ആപജ്ജതി. ഹേട്ഠാഗോപ്ഫകേ ഉദകേ കീളതി, ആപത്തി ദുക്കടസ്സ; ഉപരിഗോപ്ഫകേ കീളതി, ആപത്തി പാചിത്തിയസ്സ.

അനാദരിയം കരോന്തോ ദ്വേ ആപത്തിയോ ആപജ്ജതി. കരോതി, പയോഗേ ദുക്കടം; കതേ ആപത്തി പാചിത്തിയസ്സ.

ഭിക്ഖും ഭിംസാപേന്തോ ദ്വേ ആപത്തിയോ ആപജ്ജതി. ഭിംസാപേതി, പയോഗേ ദുക്കടം; ഭിംസാപിതേ ആപത്തി പാചിത്തിയസ്സ.

ജോതിം സമാദഹിത്വാ വിസിബ്ബേന്തോ ദ്വേ ആപത്തിയോ ആപജ്ജതി. സമാദഹതി, പയോഗേ ദുക്കടം; സമാദഹിതേ ആപത്തി പാചിത്തിയസ്സ.

ഓരേനദ്ധമാസം നഹായന്തോ ദ്വേ ആപത്തിയോ ആപജ്ജതി. നഹായതി, പയോഗേ ദുക്കടം; നഹാനപരിയോസാനേ ആപത്തി പാചിത്തിയസ്സ.

അനാദിയിത്വാ തിണ്ണം ദുബ്ബണ്ണകരണാനം അഞ്ഞതരം ദുബ്ബണ്ണകരണം നവം ചീവരം പരിഭുഞ്ജന്തോ ദ്വേ ആപത്തിയോ ആപജ്ജതി. പരിഭുഞ്ജതി, പയോഗേ ദുക്കടം; പരിഭുത്തേ ആപത്തി പാചിത്തിയസ്സ.

ഭിക്ഖുസ്സ വാ ഭിക്ഖുനിയാ വാ സിക്ഖമാനായ വാ സാമണേരസ്സ വാ സാമണേരിയാ വാ സാമം ചീവരം വികപ്പേത്വാ അപ്പച്ചുദ്ധാരണം പരിഭുഞ്ജന്തോ ദ്വേ ആപത്തിയോ ആപജ്ജതി. പരിഭുഞ്ജതി, പയോഗേ ദുക്കടം; പരിഭുത്തേ ആപത്തി പാചിത്തിയസ്സ.

ഭിക്ഖുസ്സ പത്തം വാ ചീവരം വാ നിസീദനം വാ സൂചിഘരം വാ കായബന്ധനം വാ അപനിധേന്തോ ദ്വേ ആപത്തിയോ ആപജ്ജതി. അപനിധേതി, പയോഗേ ദുക്കടം; അപനിധിതേ ആപത്തി പാചിത്തിയസ്സ.

സുരാമേരയവഗ്ഗോ ഛട്ഠോ.

൭. സപ്പാണകവഗ്ഗോ

൧൭൧. സഞ്ചിച്ച പാണം ജീവിതാ വോരോപേന്തോ കതി ആപത്തിയോ ആപജ്ജതി? സഞ്ചിച്ച പാണം ജീവിതാ വോരോപേന്തോ ചതസ്സോ ആപത്തിയോ ആപജ്ജതി. അനോദിസ്സ ഓപാതം ഖണതി – ‘‘യോ കോചി പപതിത്വാ മരിസ്സതീ’’തി, ആപത്തി ദുക്കടസ്സ; മനുസ്സോ തസ്മിം പപതിത്വാ മരതി, ആപത്തി പാരാജികസ്സ; യക്ഖോ വാ പേതോ വാ തിരച്ഛാനഗതമനുസ്സവിഗ്ഗഹോ വാ തസ്മിം പപതിത്വാ മരതി, ആപത്തി ഥുല്ലച്ചയസ്സ; തിരച്ഛാനഗതോ തസ്മിം പപതിത്വാ മരതി, ആപത്തി പാചിത്തിയസ്സ – സഞ്ചിച്ച പാണം ജീവിതാ വോരോപേന്തോ ഇമാ ചതസ്സോ ആപത്തിയോ ആപജ്ജതി.

ജാനം സപ്പാണകം ഉദകം പരിഭുഞ്ജന്തോ ദ്വേ ആപത്തിയോ ആപജ്ജതി. പരിഭുഞ്ജതി, പയോഗേ ദുക്കടം; പരിഭുത്തേ ആപത്തി പാചിത്തിയസ്സ.

ജാനം യഥാധമ്മം നിഹതാധികരണം പുനകമ്മായ ഉക്കോടേന്തോ ദ്വേ ആപത്തിയോ ആപജ്ജതി. ഉക്കോടേതി, പയോഗേ ദുക്കടം; ഉക്കോടിതേ ആപത്തി പാചിത്തിയസ്സ.

ഭിക്ഖുസ്സ ജാനം ദുട്ഠുല്ലം ആപത്തിം പടിച്ഛാദേന്തോ ഏകം ആപത്തിം ആപജ്ജതി. പാചിത്തിയം.

ജാനം ഊനവീസതിവസ്സം പുഗ്ഗലം ഉപസമ്പാദേന്തോ ദ്വേ ആപത്തിയോ ആപജ്ജതി. ഉപസമ്പാദേതി, പയോഗേ ദുക്കടം; ഉപസമ്പാദിതേ ആപത്തി പാചിത്തിയസ്സ.

ജാനം ഥേയ്യസത്ഥേന സദ്ധിം സംവിധായ ഏകദ്ധാനമഗ്ഗം പടിപജ്ജന്തോ ദ്വേ ആപത്തിയോ ആപജ്ജതി. പടിപജ്ജതി, പയോഗേ ദുക്കടം; പടിപന്നേ ആപത്തി പാചിത്തിയസ്സ.

മാതുഗാമേന സദ്ധിം സംവിധായ ഏകദ്ധാനമഗ്ഗം പടിപജ്ജന്തോ ദ്വേ ആപത്തിയോ ആപജ്ജതി. പടിപജ്ജതി, പയോഗേ ദുക്കടം; പടിപന്നേ ആപത്തി പാചിത്തിയസ്സ.

പാപികായ ദിട്ഠിയാ യാവതതിയം സമനുഭാസനായ ന പടിനിസ്സജ്ജന്തോ ദ്വേ ആപത്തിയോ ആപജ്ജതി. ഞത്തിയാ ദുക്കടം; കമ്മവാചാപരിയോസാനേ ആപത്തി പാചിത്തിയസ്സ.

ജാനം തഥാവാദിനാ ഭിക്ഖുനാ അകടാനുധമ്മേന തം ദിട്ഠിം അപ്പടിനിസ്സട്ഠേന സദ്ധിം സമ്ഭുഞ്ജന്തോ ദ്വേ ആപത്തിയോ ആപജ്ജതി. സമ്ഭുഞ്ജതി, പയോഗേ ദുക്കടം; സമ്ഭുത്തേ ആപത്തി പാചിത്തിയസ്സ.

ജാനം തഥാനാസിതം സമണുദ്ദേസം ഉപലാപേന്തോ ദ്വേ ആപത്തിയോ ആപജ്ജതി. ഉപലാപേതി, പയോഗേ ദുക്കടം; ഉപലാപിതേ ആപത്തി പാചിത്തിയസ്സ.

സപ്പാണകവഗ്ഗോ സത്തമോ.

൮. സഹധമ്മികവഗ്ഗോ

൧൭൨. ഭിക്ഖൂഹി സഹധമ്മികം വുച്ചമാനോ – ‘‘ന താവാഹം, ആവുസോ, ഏതസ്മിം സിക്ഖാപദേ സിക്ഖിസ്സാമി യാവ ന അഞ്ഞം ഭിക്ഖും ബ്യത്തം വിനയധരം പരിപുച്ഛിസ്സാമീ’’തി ഭണന്തോ ദ്വേ ആപത്തിയോ ആപജ്ജതി. ഭണതി, പയോഗേ ദുക്കടം; ഭണിതേ ആപത്തി പാചിത്തിയസ്സ.

വിനയം വിവണ്ണേന്തോ ദ്വേ ആപത്തിയോ ആപജ്ജതി. വിവണ്ണേതി, പയോഗേ ദുക്കടം; വിവണ്ണിതേ ആപത്തി പാചിത്തിയസ്സ.

മോഹേന്തോ ദ്വേ ആപത്തിയോ ആപജ്ജതി. അനാരോപിതേ മോഹേ മോഹേതി, ആപത്തി ദുക്കടസ്സ; ആരോപിതേ മോഹേ മോഹേതി, ആപത്തി പാചിത്തിയസ്സ.

ഭിക്ഖുസ്സ കുപിതോ അനത്തമനോ പഹാരം ദേന്തോ ദ്വേ ആപത്തിയോ ആപജ്ജതി. പഹരതി, പയോഗേ ദുക്കടം; പഹതേ ആപത്തി പാചിത്തിയസ്സ.