൯. രാജവഗ്ഗോ

൧൭൩. പുബ്ബേ അപ്പടിസംവിദിതോ രഞ്ഞോ അന്തേപുരം പവിസന്തോ ദ്വേ ആപത്തിയോ ആപജ്ജതി. പഠമം പാദം ഉമ്മാരം അതിക്കാമേതി, ആപത്തി ദുക്കടസ്സ; ദുതിയം പാദം അതിക്കാമേതി, ആപത്തി പാചിത്തിയസ്സ.

രതനം ഉഗ്ഗണ്ഹന്തോ ദ്വേ ആപത്തിയോ ആപജ്ജതി. ഗണ്ഹാതി, പയോഗേ ദുക്കടം; ഗഹിതേ ആപത്തി പാചിത്തിയസ്സ.

സന്തം ഭിക്ഖും അനാപുച്ഛാ വികാലേ ഗാമം പവിസന്തോ ദ്വേ ആപത്തിയോ ആപജ്ജതി. പഠമം പാദം പരിക്ഖേപം അതിക്കാമേതി, ആപത്തി ദുക്കടസ്സ; ദുതിയം പാദം അതിക്കാമേതി, ആപത്തി പാചിത്തിയസ്സ.

അട്ഠിമയം വാ ദന്തമയം വാ വിസാണമയം വാ സൂചിഘരം കാരാപേന്തോ ദ്വേ ആപത്തിയോ ആപജ്ജതി. കാരാപേതി, പയോഗേ ദുക്കടം; കാരാപിതേ ആപത്തി പാചിത്തിയസ്സ.

പമാണാതിക്കന്തം മഞ്ചം വാ പീഠം വാ കാരാപേന്തോ ദ്വേ ആപത്തിയോ ആപജ്ജതി. കാരാപേതി, പയോഗേ ദുക്കടം; കാരാപിതേ ആപത്തി പാചിത്തിയസ്സ.

മഞ്ചം വാ പീഠം വാ തൂലോനദ്ധം കാരാപേന്തോ ദ്വേ ആപത്തിയോ ആപജ്ജതി. കാരാപേതി, പയോഗേ ദുക്കടം; കാരാപിതേ ആപത്തി പാചിത്തിയസ്സ.

പമാണാതിക്കന്തം നിസീദനം കാരാപേന്തോ ദ്വേ ആപത്തിയോ ആപജ്ജതി. കാരാപേതി, പയോഗേ ദുക്കടം; കാരാപിതേ ആപത്തി പാചിത്തിയസ്സ.

പമാണാതിക്കന്തം കണ്ഡുപ്പടിച്ഛാദിം കാരാപേന്തോ ദ്വേ ആപത്തിയോ ആപജ്ജതി. കാരാപേതി, പയോഗേ ദുക്കടം; കാരാപിതേ ആപത്തി പാചിത്തിയസ്സ.

പമാണാതിക്കന്തം വസ്സികസാടികം കാരാപേന്തോ ദ്വേ ആപത്തിയോ ആപജ്ജതി. കാരാപേതി, പയോഗേ ദുക്കടം; കാരാപിതേ ആപത്തി പാചിത്തിയസ്സ.

ചീവരം കാരാപേന്തോ കതി ആപത്തിയോ ആപജ്ജതി? സുഗതചീവരപ്പമാണം ചീവരം കാരാപേന്തോ ദ്വേ ആപത്തിയോ ആപജ്ജതി. കാരാപേതി, പയോഗേ ദുക്കടം; കാരാപിതേ ആപത്തി പാചിത്തിയസ്സ – സുഗതചീവരപ്പമാണം ചീവരം കാരാപേന്തോ ഇമാ ദ്വേ ആപത്തിയോ ആപജ്ജതി.

രാജവഗ്ഗോ നവമോ. ഖുദ്ദകാ നിട്ഠിതാ.