൫. ചിത്താഗാരവഗ്ഗോ

൨൩൫. രാജാഗാരം വാ ചിത്താഗാരം വാ ആരാമം വാ ഉയ്യാനം വാ പോക്ഖരണിം വാ ദസ്സനായ ഗച്ഛന്തീ ദ്വേ ആപത്തിയോ ആപജ്ജതി. ഗച്ഛതി, ആപത്തി ദുക്കടസ്സ; യത്ഥ ഠിതാ പസ്സതി, ആപത്തി പാചിത്തിയസ്സ.

ആസന്ദിം വാ പല്ലങ്കം വാ പരിഭുഞ്ജന്തീ ദ്വേ ആപത്തിയോ ആപജ്ജതി. പരിഭുഞ്ജതി, പയോഗേ ദുക്കടം; പരിഭുത്തേ, ആപത്തി പാചിത്തിയസ്സ.

സുത്തം കന്തന്തീ ദ്വേ ആപത്തിയോ ആപജ്ജതി. കന്തതി, പയോഗേ ദുക്കടം; ഉജ്ജവുജ്ജവേ, ആപത്തി പാചിത്തിയസ്സ.

ഗിഹിവേയ്യാവച്ചം കരോന്തീ ദ്വേ ആപത്തിയോ ആപജ്ജതി. കരോതി, പയോഗേ ദുക്കടം; കതേ, ആപത്തി പാചിത്തിയസ്സ.

ഭിക്ഖുനിയാ – ‘‘ഏഹായ്യേ ഇമം അധികരണം വൂപസമേഹീ’’തി വുച്ചമാനാ – ‘‘സാധൂ’’തി പടിസ്സുണിത്വാ നേവ വൂപസമേന്തീ ന വൂപസമായ ഉസ്സുക്കം കരോന്തീ ഏകം ആപത്തിം ആപജ്ജതി. പാചിത്തിയം.

അഗാരികസ്സ വാ പരിബ്ബാജകസ്സ വാ പരിബ്ബാജികായ വാ സഹത്ഥാ ഖാദനീയം വാ ഭോജനീയം വാ ദേന്തീ ദ്വേ ആപത്തിയോ ആപജ്ജതി. ദേതി, പയോഗേ ദുക്കടം; ദിന്നേ, ആപത്തി പാചിത്തിയസ്സ.

ആവസഥചീവരം അനിസ്സജ്ജിത്വാ പരിഭുഞ്ജന്തീ ദ്വേ ആപത്തിയോ ആപജ്ജതി. പരിഭുഞ്ജതി, പയോഗേ ദുക്കടം; പരിഭുത്തേ, ആപത്തി പാചിത്തിയസ്സ.

ആവസഥം അനിസ്സജ്ജിത്വാ ചാരികം പക്കമന്തീ ദ്വേ ആപത്തിയോ ആപജ്ജതി. പഠമം പാദം പരിക്ഖേപം അതിക്കാമേതി, ആപത്തി ദുക്കടസ്സ; ദുതിയം പാദം അതിക്കാമേതി, ആപത്തി പാചിത്തിയസ്സ.

തിരച്ഛാനവിജ്ജം പരിയാപുണന്തീ ദ്വേ ആപത്തിയോ ആപജ്ജതി. പരിയാപുണാതി, പയോഗേ ദുക്കടം; പദേ പദേ ആപത്തി പാചിത്തിയസ്സ.

തിരച്ഛാനവിജ്ജം വാചേന്തീ ദ്വേ ആപത്തിയോ ആപജ്ജതി. വാചേതി, പയോഗേ ദുക്കടം; പദേ പദേ ആപത്തി പാചിത്തിയസ്സ.

ചിത്താഗാരവഗ്ഗോ പഞ്ചമോ.