൨. കതാപത്തിവാരോ

൧. പാരാജികകണ്ഡം

൨൨൮. അവസ്സുതാ ഭിക്ഖുനീ അവസ്സുതസ്സ പുരിസപുഗ്ഗലസ്സ കായസംസഗ്ഗം സാദിയന്തീ കതി ആപത്തിയോ ആപജ്ജതി? അവസ്സുതാ ഭിക്ഖുനീ അവസ്സുതസ്സ പുരിസപുഗ്ഗലസ്സ കായസംസഗ്ഗം സാദിയന്തീ തിസ്സോ ആപത്തിയോ ആപജ്ജതി. അധക്ഖകം ഉബ്ഭജാണുമണ്ഡലം ഗഹണം സാദിയതി, ആപത്തി പാരാജികസ്സ; ഉബ്ഭക്ഖകം അധോജാണുമണ്ഡലം ഗഹണം സാദിയതി, ആപത്തി ഥുല്ലച്ചയസ്സ; കായപടിബദ്ധം ഗഹണം സാദിയതി, ആപത്തി ദുക്കടസ്സ – അവസ്സുതാ ഭിക്ഖുനീ അവസ്സുതസ്സ പുരിസപുഗ്ഗലസ്സ കായസംസഗ്ഗം സാദിയന്തീ ഇമാ തിസ്സോ ആപത്തിയോ ആപജ്ജതി.

വജ്ജപ്പടിച്ഛാദികാ ഭിക്ഖുനീ വജ്ജം പടിച്ഛാദേന്തീ കതി ആപത്തിയോ ആപജ്ജതി? വജ്ജപ്പടിച്ഛാദികാ ഭിക്ഖുനീ വജ്ജം പടിച്ഛാദേന്തീ തിസ്സോ ആപത്തിയോ ആപജ്ജതി. ജാനം പാരാജികം ധമ്മം പടിച്ഛാദേതി, ആപത്തി പാരാജികസ്സ; വേമതികാ പടിച്ഛാദേതി, ആപത്തി ഥുല്ലച്ചയസ്സ; ആചാരവിപത്തിം പടിച്ഛാദേതി, ആപത്തി ദുക്കടസ്സ – വജ്ജപ്പടിച്ഛാദികാ ഭിക്ഖുനീ വജ്ജം പടിച്ഛാദേന്തീ ഇമാ തിസ്സോ ആപത്തിയോ ആപജ്ജതി.

ഉക്ഖിത്താനുവത്തികാ ഭിക്ഖുനീ യാവതതിയം സമനുഭാസനായ ന പടിനിസ്സജ്ജന്തീ കതി ആപത്തിയോ ആപജ്ജതി? ഉക്ഖിത്താനുവത്തികാ ഭിക്ഖുനീ യാവതതിയം സമനുഭാസനായ ന പടിനിസ്സജ്ജന്തീ തിസ്സോ ആപത്തിയോ ആപജ്ജതി. ഞത്തിയാ ദുക്കടം; ദ്വീഹി കമ്മവാചാഹി ഥുല്ലച്ചയാ; കമ്മവാചാപരിയോസാനേ ആപത്തി പാരാജികസ്സ – ഉക്ഖിത്താനുവത്തികാ ഭിക്ഖുനീ യാവതതിയം സമനുഭാസനായ ന പടിനിസ്സജ്ജന്തീ ഇമാ തിസ്സോ ആപത്തിയോ ആപജ്ജതി.

അട്ഠമം വത്ഥും പരിപൂരേന്തീ കതി ആപത്തിയോ ആപജ്ജതി? അട്ഠമം വത്ഥും പരിപൂരേന്തീ തിസ്സോ ആപത്തിയോ ആപജ്ജതി. പുരിസേന – ‘‘ഇത്ഥന്നാമം ഓകാസം [ഇത്ഥന്നാമം ഗഹനം (സീ.), ഇത്ഥന്നാമം ഗബ്ഭം (സ്യാ.)] ആഗച്ഛാ’’തി വുത്താ ഗച്ഛതി, ആപത്തി ദുക്കടസ്സ; പുരിസസ്സ ഹത്ഥപാസം ഓക്കന്തമത്തേ ആപത്തി ഥുല്ലച്ചയസ്സ; അട്ഠമം വത്ഥും പരിപൂരേതി, ആപത്തി പാരാജികസ്സ – അട്ഠമം വത്ഥും പരിപൂരേന്തീ ഇമാ തിസ്സോ ആപത്തിയോ ആപജ്ജതി.

പാരാജികാ നിട്ഠിതാ.

൨. സങ്ഘാദിസേസകണ്ഡം

൨൨൯. ഉസ്സയവാദികാ ഭിക്ഖുനീ അഡ്ഡം കരോന്തീ തിസ്സോ ആപത്തിയോ ആപജ്ജതി. ഏകസ്സ ആരോചേതി, ആപത്തി ദുക്കടസ്സ; ദുതിയസ്സ ആരോചേതി, ആപത്തി ഥുല്ലച്ചയസ്സ; അഡ്ഡപരിയോസാനേ ആപത്തി സങ്ഘാദിസേസസ്സ.

ചോരിം വുട്ഠാപേന്തീ തിസ്സോ ആപത്തിയോ ആപജ്ജതി. ഞത്തിയാ ദുക്കടം; ദ്വീഹി കമ്മവാചാഹി ഥുല്ലച്ചയാ; കമ്മവാചാപരിയോസാനേ ആപത്തി സങ്ഘാദിസേസസ്സ.

ഏകാ ഗാമന്തരം ഗച്ഛന്തീ തിസ്സോ ആപത്തിയോ ആപജ്ജതി. ഗച്ഛതി, ആപത്തി ദുക്കടസ്സ; പഠമം പാദം പരിക്ഖേപം അതിക്കാമേതി, ആപത്തി ഥുല്ലച്ചയസ്സ; ദുതിയം പാദം അതിക്കാമേതി, ആപത്തി സങ്ഘാദിസേസസ്സ.

സമഗ്ഗേന സങ്ഘേന ഉക്ഖിത്തം ഭിക്ഖുനിം ധമ്മേന വിനയേന സത്ഥുസാസനേന അനപലോകേത്വാ കാരകസങ്ഘം അനഞ്ഞായ ഗണസ്സ ഛന്ദം ഓസാരേന്തീ തിസ്സോ ആപത്തിയോ ആപജ്ജതി. ഞത്തിയാ ദുക്കടം; ദ്വീഹി കമ്മവാചാഹി ഥുല്ലച്ചയാ; കമ്മവാചാപരിയോസാനേ ആപത്തി സങ്ഘാദിസേസസ്സ.

അവസ്സുതാ ഭിക്ഖുനീ അവസ്സുതസ്സ പുരിസപുഗ്ഗലസ്സ ഹത്ഥതോ ഖാദനീയം വാ ഭോജനീയം വാ സഹത്ഥാ പടിഗ്ഗഹേത്വാ ഭുഞ്ജന്തീ തിസ്സോ ആപത്തിയോ ആപജ്ജതി. ‘‘ഖാദിസ്സാമി ഭുഞ്ജിസ്സാമീ’’തി പടിഗ്ഗണ്ഹാതി, ആപത്തി ഥുല്ലച്ചയസ്സ; അജ്ഝോഹാരേ അജ്ഝോഹാരേ ആപത്തി സങ്ഘാദിസേസസ്സ; ഉദകദന്തപോനം പടിഗ്ഗണ്ഹാതി, ആപത്തി ദുക്കടസ്സ.

‘‘കിം തേ, അയ്യേ, ഏസോ പുരിസപുഗ്ഗലോ കരിസ്സതി അവസ്സുതോ വാ അനവസ്സുതോ വാ, യതോ ത്വം അനവസ്സുതാ! ഇങ്ഘ, അയ്യേ, യം തേ ഏസോ പുരിസപുഗ്ഗലോ ദേതി ഖാദനീയം വാ ഭോജനീയം വാ, തം ത്വം സഹത്ഥാ പടിഗ്ഗഹേത്വാ ഖാദ വാ ഭുഞ്ജ വാ’’തി ഉയ്യോജേന്തീ തിസ്സോ ആപത്തിയോ ആപജ്ജതി. തസ്സാ വചനേന ഖാദിസ്സാമി ഭുഞ്ജിസ്സാമീതി പടിഗ്ഗണ്ഹാതി, ആപത്തി ദുക്കടസ്സ; അജ്ഝോഹാരേ അജ്ഝോഹാരേ ആപത്തി ഥുല്ലച്ചയസ്സ; ഭോജനപരിയോസാനേ ആപത്തി സങ്ഘാദിസേസസ്സ.

കുപിതാ ഭിക്ഖുനീ യാവതതിയം സമനുഭാസനായ ന പടിനിസ്സജ്ജന്തീ തിസ്സോ ആപത്തിയോ ആപജ്ജതി. ഞത്തിയാ ദുക്കടം; ദ്വീഹി കമ്മവാചാഹി ഥുല്ലച്ചയാ; കമ്മവാചാപരിയോസാനേ ആപത്തി സങ്ഘാദിസേസസ്സ.

കിസ്മിഞ്ചിദേവ അധികരണേ പച്ചാകതാ ഭിക്ഖുനീ യാവതതിയം സമനുഭാസനായ ന പടിനിസ്സജ്ജന്തീ തിസ്സോ ആപത്തിയോ ആപജ്ജതി. ഞത്തിയാ ദുക്കടം; ദ്വീഹി കമ്മവാചാഹി ഥുല്ലച്ചയാ; കമ്മവാചാപരിയോസാനേ ആപത്തി സങ്ഘാദിസേസസ്സ.

സംസട്ഠാ ഭിക്ഖുനിയോ യാവതതിയം സമനുഭാസനായ ന പടിനിസ്സജ്ജന്തിയോ തിസ്സോ ആപത്തിയോ ആപജ്ജന്തി. ഞത്തിയാ ദുക്കടം; ദ്വീഹി കമ്മവാചാഹി ഥുല്ലച്ചയാ; കമ്മവാചാപരിയോസാനേ ആപത്തി സങ്ഘാദിസേസസ്സ.

‘‘സംസട്ഠാവ, അയ്യേ, തുമ്ഹേ വിഹരഥ. മാ തുമ്ഹേ നാനാ വിഹരിത്ഥാ’’തി ഉയ്യോജേന്തീ യാവതതിയം സമനുഭാസനായ ന പടിനിസ്സജ്ജന്തീ തിസ്സോ ആപത്തിയോ ആപജ്ജതി. ഞത്തിയാ ദുക്കടം; ദ്വീഹി കമ്മവാചാഹി ഥുല്ലച്ചയാ; കമ്മവാചാപരിയോസാനേ ആപത്തി സങ്ഘാദിസേസസ്സ.

സങ്ഘാദിസേസാ നിട്ഠിതാ.

൩. നിസ്സഗ്ഗിയകണ്ഡം

൨൩൦. പത്തസന്നിചയം കരോന്തീ ഏകം ആപത്തിം ആപജ്ജതി. നിസ്സഗ്ഗിയം പാചിത്തിയം.

അകാലചീവരം ‘‘കാലചീവര’’ന്തി അധിട്ഠഹിത്വാ ഭാജാപേന്തീ ദ്വേ ആപത്തിയോ ആപജ്ജതി. ഭാജാപേതി, പയോഗേ ദുക്കടം; ഭാജാപിതേ നിസ്സഗ്ഗിയം പാചിത്തിയം.

ഭിക്ഖുനിയാ സദ്ധിം ചീവരം പരിവത്തേത്വാ അച്ഛിന്ദന്തീ ദ്വേ ആപത്തിയോ ആപജ്ജതി. അച്ഛിന്ദതി, പയോഗേ ദുക്കടം; അച്ഛിന്നേ നിസ്സഗ്ഗിയം പാചിത്തിയം.

അഞ്ഞം വിഞ്ഞാപേത്വാ അഞ്ഞം വിഞ്ഞാപേന്തീ ദ്വേ ആപത്തിയോ ആപജ്ജതി. വിഞ്ഞാപേതി, പയോഗേ ദുക്കടം; വിഞ്ഞാപിതേ നിസ്സഗ്ഗിയം പാചിത്തിയം.

അഞ്ഞം ചേതാപേത്വാ അഞ്ഞം ചേതാപേന്തീ ദ്വേ ആപത്തിയോ ആപജ്ജതി. ചേതാപേതി, പയോഗേ ദുക്കടം; ചേതാപിതേ നിസ്സഗ്ഗിയം പാചിത്തിയം.

അഞ്ഞദത്ഥികേന പരിക്ഖാരേന അഞ്ഞുദ്ദിസികേന സങ്ഘികേന അഞ്ഞം ചേതാപേന്തീ ദ്വേ ആപത്തിയോ ആപജ്ജതി. ചേതാപേതി, പയോഗേ ദുക്കടം; ചേതാപിതേ നിസ്സഗ്ഗിയം പാചിത്തിയം.

അഞ്ഞദത്ഥികേ പരിക്ഖാരേന അഞ്ഞുദ്ദിസികേന സങ്ഘികേന സംയാചികേന അഞ്ഞം ചേതാപേന്തീ ദ്വേ ആപത്തിയോ ആപജ്ജതി. ചേതാപേതി, പയോഗേ ദുക്കടം; ചേതാപിതേ നിസ്സഗ്ഗിയം പാചിത്തിയം.

അഞ്ഞദത്ഥികേന പരിക്ഖാരേന അഞ്ഞുദ്ദിസികേന മഹാജനികേന അഞ്ഞം ചേതാപേന്തീ ദ്വേ ആപത്തിയോ ആപജ്ജതി. ചേതാപേതി, പയോഗേ ദുക്കടം; ചേതാപിതേ നിസ്സഗ്ഗിയം പാചിത്തിയം.

അഞ്ഞദത്ഥികേന പരിക്ഖാരേന അഞ്ഞുദ്ദിസികേന മഹാജനികേന സംയാചികേന അഞ്ഞം ചേതാപേന്തീ ദ്വേ ആപത്തിയോ ആപജ്ജതി. ചേതാപേതി, പയോഗേ ദുക്കടം; ചേതാപിതേ നിസ്സഗ്ഗിയം പാചിത്തിയം.

അഞ്ഞദത്ഥികേന പരിക്ഖാരേന അഞ്ഞുദ്ദിസികേ പുഗ്ഗലികേന സംയാചികേന അഞ്ഞം ചേതാപേന്തീ ദ്വേ ആപത്തിയോ ആപജ്ജതി. ചേതാപേതി, പയോഗേ ദുക്കടം; ചേതാപിതേ നിസ്സഗ്ഗിയം പാചിത്തിയം.

അതിരേകചതുക്കംസപരമം ഗരുപാവുരണം ചേതാപേന്തീ ദ്വേ ആപത്തിയോ ആപജ്ജതി. ചേതാപേതി, പയോഗേ ദുക്കടം; ചേതാപിതേ നിസ്സഗ്ഗിയം പാചിത്തിയം.

അതിരേകഅഡ്ഢതേയ്യകംസപരമം ലഹുപാവുരണം ചേതാപേന്തീ ദ്വേ ആപത്തിയോ ആപജ്ജതി. ചേതാപേതി, പയോഗേ ദുക്കടം; ചേതാപിതേ നിസ്സഗ്ഗിയം പാചിത്തിയം.

നിസ്സഗ്ഗിയാ പാചിത്തിയാ നിട്ഠിതാ.

൪. പാചിത്തിയകണ്ഡം

൧. ലസുണവഗ്ഗോ

൨൩൧. ലസുണം ഖാദന്തീ ദ്വേ ആപത്തിയോ ആപജ്ജതി. ഖാദിസ്സാമീതി പടിഗ്ഗണ്ഹാതി, ആപത്തി ദുക്കടസ്സ; അജ്ഝോഹാരേ അജ്ഝോഹാരേ ആപത്തി പാചിത്തിയസ്സ.

സമ്ബാധേ ലോമം സംഹരാപേന്തീ ദ്വേ ആപത്തിയോ ആപജ്ജതി. സംഹരാപേതി, പയോഗേ ദുക്കടം; സംഹരാപിതേ ആപത്തി പാചിത്തിയസ്സ.

തലഘാതകം കരോന്തീ ദ്വേ ആപത്തിയോ ആപജ്ജതി. കരോതി, പയോഗേ ദുക്കടം; കതേ ആപത്തി പാചിത്തിയസ്സ.

ജതുമട്ഠകം ആദിയന്തീ ദ്വേ ആപത്തിയോ ആപജ്ജതി. ആദിയതി, പയോഗേ ദുക്കടം, ആദിന്നേ ആപത്തി പാചിത്തിയസ്സ.

അതിരേകദ്വങ്ഗുലപബ്ബപരമം ഉദകസുദ്ധികം ആദിയന്തീ ദ്വേ ആപത്തിയോ ആപജ്ജതി. ആദിയതി, പയോഗേ ദുക്കടം; ആദിന്നേ ആപത്തി പാചിത്തിയസ്സ.

ഭിക്ഖുസ്സ ഭുഞ്ജന്തസ്സ പാനീയേന വാ വിധൂപനേന വാ ഉപതിട്ഠന്തീ ദ്വേ ആപത്തിയോ ആപജ്ജതി. ഹത്ഥപാസേ തിട്ഠതി, ആപത്തി പാചിത്തിയസ്സ; ഹത്ഥപാസം വിജഹിത്വാ തിട്ഠതി, ആപത്തി ദുക്കടസ്സ.

ആമകധഞ്ഞം വിഞ്ഞാപേത്വാ ഭുഞ്ജന്തീ ദ്വേ ആപത്തിയോ ആപജ്ജതി. ഭുഞ്ജിസ്സാമീതി പടിഗ്ഗണ്ഹാതി, ആപത്തി ദുക്കടസ്സ; അജ്ഝോഹാരേ അജ്ഝോഹാരേ ആപത്തി പാചിത്തിയസ്സ.

ഉച്ചാരം വാ പസ്സാവം വാ സങ്കാരം വാ വിഘാസം വാ തിരോകുട്ടേ വാ തിരോപാകാരേ വാ ഛഡ്ഡേന്തീ ദ്വേ ആപത്തിയോ ആപജ്ജതി. ഛഡ്ഡേതി, പയോഗേ ദുക്കടം; ഛഡ്ഡിതേ ആപത്തി പാചിത്തിയസ്സ.

ഉച്ചാരം വാ പസ്സാവം വാ സങ്കാരം വാ വിഘാസം വാ ഹരിതേ ഛഡ്ഡേന്തീ ദ്വേ ആപത്തിയോ ആപജ്ജതി. ഛഡ്ഡേതി, പയോഗേ ദുക്കടം; ഛഡ്ഡിതേ ആപത്തി പാചിത്തിയസ്സ.

നച്ചം വാ ഗീതം വാ വാദിതം വാ ദസ്സനായ ഗച്ഛന്തീ ദ്വേ ആപത്തിയോ ആപജ്ജതി. ഗച്ഛതി, ആപത്തി ദുക്കടസ്സ; യത്ഥ ഠിതാ പസ്സതി വാ സുണാതി വാ, ആപത്തി പാചിത്തിയസ്സ.

ലസുണവഗ്ഗോ പഠമോ.

൨. രത്തന്ധകാരവഗ്ഗോ

൨൩൨. രത്തന്ധകാരേ അപ്പദീപേ പുരിസേന സദ്ധിം ഏകേനേകാ സന്തിട്ഠന്തീ ദ്വേ ആപത്തിയോ ആപജ്ജതി. ഹത്ഥപാസേ തിട്ഠതി, ആപത്തി പാചിത്തിയസ്സ; ഹത്ഥപാസം വിജഹിത്വാ തിട്ഠതി, ആപത്തി ദുക്കടസ്സ.

പടിച്ഛന്നേ ഓകാസേ പുരിസേന സദ്ധിം ഏകേനേകാ സന്തിട്ഠന്തീ ദ്വേ ആപത്തിയോ ആപജ്ജതി. ഹത്ഥപാസേ തിട്ഠതി, ആപത്തി പാചിത്തിയസ്സ; ഹത്ഥപാസം വിജഹിത്വാ തിട്ഠതി, ആപത്തി ദുക്കടസ്സ.

അജ്ഝോകാസേ പുരിസേന സദ്ധിം ഏകേനേകാ സന്തിട്ഠന്തീ ദ്വേ ആപത്തിയോ ആപജ്ജതി. ഹത്ഥപാസേ തിട്ഠതി, ആപത്തി പാചിത്തിയസ്സ; ഹത്ഥപാസം വിജഹിത്വാ തിട്ഠതി, ആപത്തി ദുക്കടസ്സ.

രഥികായ വാ ബ്യൂഹേ വാ സിങ്ഘാടകേ വാ പുരിസേന സദ്ധിം ഏകേനേകാ സന്തിട്ഠന്തീ ദ്വേ ആപത്തിയോ ആപജ്ജതി. ഹത്ഥപാസേ തിട്ഠതി, ആപത്തി പാചിത്തിയസ്സ; ഹത്ഥപാസം വിജഹിത്വാ തിട്ഠതി, ആപത്തി ദുക്കടസ്സ.

പുരേഭത്തം കുലാനി ഉപസങ്കമിത്വാ ആസനേ നിസീദിത്വാ സാമികേ അനാപുച്ഛാ പക്കമന്തീ ദ്വേ ആപത്തിയോ ആപജ്ജതി. പഠമം പാദം അനോവസ്സകം അതിക്കാമേതി, ആപത്തി ദുക്കടസ്സ; ദുതിയം പാദം അതിക്കാമേതി, ആപത്തി പാചിത്തിയസ്സ.

പച്ഛാഭത്തം കുലാനി ഉപസങ്കമിത്വാ സാമികേ അനാപുച്ഛാ ആസനേ നിസീദന്തീ ദ്വേ ആപത്തിയോ ആപജ്ജതി. നിസീദതി, പയോഗേ ദുക്കടം; നിസിന്നേ ആപത്തി പാചിത്തിയസ്സ.

വികാലേ കുലാനി ഉപസങ്കമിത്വാ സാമികേ അനാപുച്ഛാ സേയ്യം സന്ഥരിത്വാ വാ സന്ഥരാപേത്വാ വാ അഭിനിസീദന്തീ ദ്വേ ആപത്തിയോ ആപജ്ജതി. അഭിനിസീദതി, പയോഗേ ദുക്കടം; അഭിനിസിന്നേ ആപത്തി പാചിത്തിയസ്സ.

ദുഗ്ഗഹിതേന ദൂപധാരിതേന പരം ഉജ്ഝാപേന്തീ ദ്വേ ആപത്തിയോ ആപജ്ജതി. ഉജ്ഝാപേതി, പയോഗേ ദുക്കടം; ഉജ്ഝാപിതേ ആപത്തി പാചിത്തിയസ്സ.

അത്താനം വാ പരം വാ നിരയേന വാ ബ്രഹ്മചരിയേന വാ അഭിസപന്തീ ദ്വേ ആപത്തിയോ ആപജ്ജതി. അഭിസപതി, പയോഗേ ദുക്കടം; അഭിസപിതേ ആപത്തി പാചിത്തിയസ്സ.

അത്താനം വധിത്വാ വധിത്വാ രോദന്തീ ദ്വേ ആപത്തിയോ ആപജ്ജതി. വധതി രോദതി, ആപത്തി പാചിത്തിയസ്സ; വധതി ന രോദതി, ആപത്തി ദുക്കടസ്സ.

രത്തന്ധകാരവഗ്ഗോ ദുതിയോ.

൩. നഹാനവഗ്ഗോ

൨൩൩. നഗ്ഗാ നഹായന്തീ ദ്വേ ആപത്തിയോ ആപജ്ജതി. നഹായതി, പയോഗേ ദുക്കടം; നഹാനപരിയോസാനേ ആപത്തി പാചിത്തിയസ്സ.

പമാണാതിക്കന്തം ഉദകസാടികം കാരാപേന്തീ ദ്വേ ആപത്തിയോ ആപജ്ജതി. കാരാപേതി, പയോഗേ ദുക്കടം; കാരാപിതേ, ആപത്തി പാചിത്തിയസ്സ.

ഭിക്ഖുനിയാ ചീവരം വിസിബ്ബേത്വാ വാ വിസിബ്ബാപേത്വാ വാ നേവ സിബ്ബേന്തീ ന സിബ്ബാപനായ ഉസ്സുക്കം കരോന്തീ ഏകം ആപത്തിം ആപജ്ജതി. പാചിത്തിയം.

പഞ്ചാഹികം സങ്ഘാടിചാരം അതിക്കാമേന്തീ ഏകം ആപത്തിം ആപജ്ജതി. പാചിത്തിയം. ചീവരസങ്കമനീയം ധാരേന്തീ ദ്വേ ആപത്തിയോ ആപജ്ജതി. ധാരേതി, പയോഗേ ദുക്കടം; ധാരിതേ, ആപത്തി പാചിത്തിയസ്സ.

ഗണസ്സ ചീവരലാഭം അന്തരായം കരോന്തീ ദ്വേ ആപത്തിയോ ആപജ്ജതി. കരോതി, പയോഗേ ദുക്കടം; കതേ, ആപത്തി പാചിത്തിയസ്സ.

ധമ്മികം ചീവരവിഭങ്ഗം പടിബാഹന്തീ ദ്വേ ആപത്തിയോ ആപജ്ജതി. പടിബാഹതി, പയോഗേ ദുക്കടം; പടിബാഹിതേ, ആപത്തി പാചിത്തിയസ്സ.

അഗാരികസ്സ വാ പരിബ്ബാജകസ്സ വാ പരിബ്ബാജികായ വാ സമണചീവരം ദേന്തീ ദ്വേ ആപത്തിയോ ആപജ്ജതി. ദേതി, പയോഗേ ദുക്കടം; ദിന്നേ, ആപത്തി പാചിത്തിയസ്സ.

ദുബ്ബലചീവരപച്ചാസാ ചീവരകാലസമയം അതിക്കാമേന്തീ ദ്വേ ആപത്തിയോ ആപജ്ജതി. അതിക്കാമേതി, പയോഗേ ദുക്കടം; അതിക്കാമിതേ, ആപത്തി പാചിത്തിയസ്സ.

ധമ്മികം കഥിനുദ്ധാരം പടിബാഹന്തീ ദ്വേ ആപത്തിയോ ആപജ്ജതി. പടിബാഹതി, പയോഗേ ദുക്കടം; പടിബാഹിതേ, ആപത്തി പാചിത്തിയസ്സ.

നഹാനവഗ്ഗോ തതിയോ.

൪. തുവട്ടവഗ്ഗോ

൨൩൪. ദ്വേ ഭിക്ഖുനിയോ ഏകമഞ്ചേ തുവട്ടേന്തിയോ ദ്വേ ആപത്തിയോ ആപജ്ജന്തി. നിപജ്ജന്തി, പയോഗേ ദുക്കടം; നിപന്നേ, ആപത്തി പാചിത്തിയസ്സ.

ദ്വേ ഭിക്ഖുനിയോ ഏകത്ഥരണപാവുരണാ തുവട്ടേന്തിയോ ദ്വേ ആപത്തിയോ ആപജ്ജന്തി. നിപജ്ജന്തി, പയോഗേ ദുക്കടം; നിപന്നേ, ആപത്തി പാചിത്തിയസ്സ.

ഭിക്ഖുനിയാ സഞ്ചിച്ച അഫാസും കരോന്തീ ദ്വേ ആപത്തിയോ ആപജ്ജതി. കരോതി, പയോഗേ ദുക്കടം; കതേ, ആപത്തി പാചിത്തിയസ്സ.

ദുക്ഖിതം സഹജീവിനിം നേവ ഉപട്ഠേന്തീ ന ഉപട്ഠാപനായ ഉസ്സുക്കം കരോന്തീ ഏകം ആപത്തിം ആപജ്ജതി. പാചിത്തിയം.

ഭിക്ഖുനിയാ ഉപസ്സയം ദത്വാ കുപിതാ അനത്തമനാ നിക്കഡ്ഢന്തീ ദ്വേ ആപത്തിയോ ആപജ്ജതി. നിക്കഡ്ഢതി, പയോഗേ ദുക്കടം; നിക്കഡ്ഢിതേ, ആപത്തി പാചിത്തിയസ്സ.

സംസട്ഠാ ഭിക്ഖുനീ യാവതതിയം സമനുഭാസനായ ന പടിനിസ്സജ്ജന്തീ ദ്വേ ആപത്തിയോ ആപജ്ജതി. ഞത്തിയാ ദുക്കടം; കമ്മവാചാപരിയോസാനേ ആപത്തി പാചിത്തിയസ്സ.

അന്തോരട്ഠേ സാസങ്കസമ്മതേ സപ്പടിഭയേ അസത്ഥികാ ചാരികം ചരന്തീ ദ്വേ ആപത്തിയോ ആപജ്ജതി. പടിപജ്ജതി, പയോഗേ ദുക്കടം; പടിപന്നേ, ആപത്തി പാചിത്തിയസ്സ.

തിരോരട്ഠേ സാസങ്കസമ്മതേ സപ്പടിഭയേ അസത്ഥികാ ചാരികം ചരന്തീ ദ്വേ ആപത്തിയോ ആപജ്ജതി. പടിപജ്ജതി, പയോഗേ ദുക്കടം; പടിപന്നേ, ആപത്തി പാചിത്തിയസ്സ.

അന്തോവസ്സം ചാരികം ചരന്തീ ദ്വേ ആപത്തിയോ ആപജ്ജതി. പടിപജ്ജതി, പയോഗേ ദുക്കടം; പടിപന്നേ, ആപത്തി പാചിത്തിയസ്സ.

വസ്സംവുട്ഠാ ഭിക്ഖുനീ ചാരികം ന പക്കമന്തീ ഏകം ആപത്തിം ആപജ്ജതി. പാചിത്തിയം.

തുവട്ടവഗ്ഗോ ചതുത്ഥോ.

൫. ചിത്താഗാരവഗ്ഗോ

൨൩൫. രാജാഗാരം വാ ചിത്താഗാരം വാ ആരാമം വാ ഉയ്യാനം വാ പോക്ഖരണിം വാ ദസ്സനായ ഗച്ഛന്തീ ദ്വേ ആപത്തിയോ ആപജ്ജതി. ഗച്ഛതി, ആപത്തി ദുക്കടസ്സ; യത്ഥ ഠിതാ പസ്സതി, ആപത്തി പാചിത്തിയസ്സ.

ആസന്ദിം വാ പല്ലങ്കം വാ പരിഭുഞ്ജന്തീ ദ്വേ ആപത്തിയോ ആപജ്ജതി. പരിഭുഞ്ജതി, പയോഗേ ദുക്കടം; പരിഭുത്തേ, ആപത്തി പാചിത്തിയസ്സ.

സുത്തം കന്തന്തീ ദ്വേ ആപത്തിയോ ആപജ്ജതി. കന്തതി, പയോഗേ ദുക്കടം; ഉജ്ജവുജ്ജവേ, ആപത്തി പാചിത്തിയസ്സ.

ഗിഹിവേയ്യാവച്ചം കരോന്തീ ദ്വേ ആപത്തിയോ ആപജ്ജതി. കരോതി, പയോഗേ ദുക്കടം; കതേ, ആപത്തി പാചിത്തിയസ്സ.

ഭിക്ഖുനിയാ – ‘‘ഏഹായ്യേ ഇമം അധികരണം വൂപസമേഹീ’’തി വുച്ചമാനാ – ‘‘സാധൂ’’തി പടിസ്സുണിത്വാ നേവ വൂപസമേന്തീ ന വൂപസമായ ഉസ്സുക്കം കരോന്തീ ഏകം ആപത്തിം ആപജ്ജതി. പാചിത്തിയം.

അഗാരികസ്സ വാ പരിബ്ബാജകസ്സ വാ പരിബ്ബാജികായ വാ സഹത്ഥാ ഖാദനീയം വാ ഭോജനീയം വാ ദേന്തീ ദ്വേ ആപത്തിയോ ആപജ്ജതി. ദേതി, പയോഗേ ദുക്കടം; ദിന്നേ, ആപത്തി പാചിത്തിയസ്സ.

ആവസഥചീവരം അനിസ്സജ്ജിത്വാ പരിഭുഞ്ജന്തീ ദ്വേ ആപത്തിയോ ആപജ്ജതി. പരിഭുഞ്ജതി, പയോഗേ ദുക്കടം; പരിഭുത്തേ, ആപത്തി പാചിത്തിയസ്സ.

ആവസഥം അനിസ്സജ്ജിത്വാ ചാരികം പക്കമന്തീ ദ്വേ ആപത്തിയോ ആപജ്ജതി. പഠമം പാദം പരിക്ഖേപം അതിക്കാമേതി, ആപത്തി ദുക്കടസ്സ; ദുതിയം പാദം അതിക്കാമേതി, ആപത്തി പാചിത്തിയസ്സ.

തിരച്ഛാനവിജ്ജം പരിയാപുണന്തീ ദ്വേ ആപത്തിയോ ആപജ്ജതി. പരിയാപുണാതി, പയോഗേ ദുക്കടം; പദേ പദേ ആപത്തി പാചിത്തിയസ്സ.

തിരച്ഛാനവിജ്ജം വാചേന്തീ ദ്വേ ആപത്തിയോ ആപജ്ജതി. വാചേതി, പയോഗേ ദുക്കടം; പദേ പദേ ആപത്തി പാചിത്തിയസ്സ.

ചിത്താഗാരവഗ്ഗോ പഞ്ചമോ.

൬. ആരാമവഗ്ഗോ

൨൩൬. ജാനം സഭിക്ഖുകം ആരാമം അനാപുച്ഛാ പവിസന്തീ ദ്വേ ആപത്തിയോ ആപജ്ജതി. പഠമം പാദം പരിക്ഖേപം അതിക്കാമേതി, ആപത്തി ദുക്കടസ്സ; ദുതിയം പാദം അതിക്കാമേതി, ആപത്തി പാചിത്തിയസ്സ.

ഭിക്ഖും അക്കോസന്തീ പരിഭാസന്തീ ദ്വേ ആപത്തിയോ ആപജ്ജതി. അക്കോസതി, പയോഗേ ദുക്കടം; അക്കോസിതേ, ആപത്തി പാചിത്തിയസ്സ.

ചണ്ഡീകതാ ഗണം പരിഭാസന്തീ ദ്വേ ആപത്തിയോ ആപജ്ജതി. പരിഭാസതി, പയോഗേ ദുക്കടം; പരിഭാസിതേ, ആപത്തി പാചിത്തിയസ്സ.

നിമന്തിതാ വാ പവാരിതാ വാ ഖാദനീയം വാ ഭോജനീയം വാ ഭുഞ്ജന്തീ ദ്വേ ആപത്തിയോ ആപജ്ജതി. ‘‘ഖാദിസ്സാമി ഭുഞ്ജിസ്സാമീ’’തി പടിഗ്ഗണ്ഹാതി, ആപത്തി ദുക്കടസ്സ; അജ്ഝോഹാരേ അജ്ഝോഹാരേ ആപത്തി പാചിത്തിയസ്സ.

കുലം മച്ഛരായന്തീ ദ്വേ ആപത്തിയോ ആപജ്ജതി. മച്ഛരായതി, പയോഗേ ദുക്കടം; മച്ഛരിതേ, ആപത്തി പാചിത്തിയസ്സ.

അഭിക്ഖുകേ ആവാസേ വസ്സം വസന്തീ ദ്വേ ആപത്തിയോ ആപജ്ജതി. ‘‘വസ്സം വസിസ്സാമീ’’തി സേനാസനം പഞ്ഞപേതി പാനീയം പരിഭോജനീയം ഉപട്ഠപേതി പരിവേണം സമ്മജ്ജതി, ആപത്തി ദുക്കടസ്സ; സഹ അരുണുഗ്ഗമനാ ആപത്തി പാചിത്തിയസ്സ.

വസ്സംവുട്ഠാ ഭിക്ഖുനീ ഉഭതോസങ്ഘേ തീഹി ഠാനേഹി ന പവാരേന്തീ ഏകം ആപത്തിം ആപജ്ജതി. പാചിത്തിയം.

ഓവാദായ വാ സംവാസായ വാ ന ഗച്ഛന്തീ ഏകം ആപത്തിം ആപജ്ജതി. പാചിത്തിയം.

ഉപോസഥമ്പി ന പുച്ഛന്തീ ഓവാദമ്പി ന യാചന്തീ ഏകം ആപത്തിം ആപജ്ജതി. പാചിത്തിയം.

പസാഖേ ജാതം ഗണ്ഡം വാ രുധിതം വാ അനപലോകേത്വാ സങ്ഘം വാ ഗണം വാ പുരിസേന സദ്ധിം ഏകേനേകാ ഭേദാപേന്തീ ദ്വേ ആപത്തിയോ ആപജ്ജതി. ഭേദാപേതി, പയോഗേ ദുക്കടം; ഭിന്നേ, ആപത്തി പാചിത്തിയസ്സ.

ആരാമവഗ്ഗോ ഛട്ഠോ.

൭. ഗബ്ഭിനീവഗ്ഗോ

൨൩൭. ഗബ്ഭിനിം വുട്ഠാപേന്തീ ദ്വേ ആപത്തിയോ ആപജ്ജതി. വുട്ഠാപേതി, പയോഗേ ദുക്കടം; വുട്ഠാപിതേ, ആപത്തി പാചിത്തിയസ്സ.

പായന്തിം വുട്ഠാപേന്തീ ദ്വേ ആപത്തിയോ ആപജ്ജതി. വുട്ഠാപേതി, പയോഗേ ദുക്കടം; വുട്ഠാപിതേ, ആപത്തി പാചിത്തിയസ്സ.

ദ്വേ വസ്സാനി ഛസു ധമ്മേസു അസിക്ഖിതസിക്ഖം സിക്ഖമാനം വുട്ഠാപേന്തീ ദ്വേ ആപത്തിയോ ആപജ്ജതി. വുട്ഠാപേതി, പയോഗേ ദുക്കടം; വുട്ഠാപിതേ, ആപത്തി പാചിത്തിയസ്സ.

ദ്വേ വസ്സാനി ഛസു ധമ്മേസു സിക്ഖിതസിക്ഖം സിക്ഖമാനം സങ്ഘേന അസമ്മതം വുട്ഠാപേന്തീ ദ്വേ ആപത്തിയോ ആപജ്ജതി. വുട്ഠാപേതി, പയോഗേ ദുക്കടം; വുട്ഠാപിതേ, ആപത്തി പാചിത്തിയസ്സ.

ഊനദ്വാദസവസ്സം ഗിഹിഗതം വുട്ഠാപേന്തീ ദ്വേ ആപത്തിയോ ആപജ്ജതി. വുട്ഠാപേതി, പയോഗേ ദുക്കടം; വുട്ഠാപിതേ, ആപത്തി പാചിത്തിയസ്സ.

പരിപുണ്ണദ്വാദസവസ്സം ഗിഹിഗതം ദ്വേ വസ്സാനി ഛസു ധമ്മേസു അസിക്ഖിതസിക്ഖം വുട്ഠാപേന്തീ ദ്വേ ആപത്തിയോ ആപജ്ജതി. വുട്ഠാപേതി, പയോഗേ ദുക്കടം; വുട്ഠാപിതേ, ആപത്തി പാചിത്തിയസ്സ.

പരിപുണ്ണദ്വാദസവസ്സം ഗിഹിഗതം ദ്വേ വസ്സാനി ഛസു ധമ്മേസു സിക്ഖിതസിക്ഖം സങ്ഘേന അസമ്മതം വുട്ഠാപേന്തീ ദ്വേ ആപത്തിയോ ആപജ്ജതി. വുട്ഠാപേതി, പയോഗേ ദുക്കടം; വുട്ഠാപിതേ, ആപത്തി പാചിത്തിയസ്സ.

സഹജീവിനിം വുട്ഠാപേത്വാ ദ്വേ വസ്സാനി നേവ അനുഗ്ഗണ്ഹന്തീ നാനുഗ്ഗണ്ഹാപേന്തീ ഏകം ആപത്തിം ആപജ്ജതി. പാചിത്തിയം.

വുട്ഠാപിതം പവത്തിനിം ദ്വേ വസ്സാനി നാനുബന്ധന്തീ ഏകം ആപത്തിം ആപജ്ജതി. പാചിത്തിയം.

സഹജീവിനിം വുട്ഠാപേത്വാ നേവ വൂപകാസേന്തീ ന വൂപകാസാപേന്തീ ഏകം ആപത്തിം ആപജ്ജതി. പാചിത്തിയം.

ഗബ്ഭിനീവഗ്ഗോ സത്തമോ.

൮. കുമാരീഭൂതവഗ്ഗോ

൨൩൮. ഊനവീസതിവസ്സം കുമാരിഭൂതം വുട്ഠാപേന്തീ ദ്വേ ആപത്തിയോ ആപജ്ജതി. വുട്ഠാപേതി, പയോഗേ ദുക്കടം; വുട്ഠാപിതേ, ആപത്തി പാചിത്തിയസ്സ.

പരിപുണ്ണവീസതിവസ്സം കുമാരിഭൂതം ദ്വേ വസ്സാനി ഛസു ധമ്മേസു അസിക്ഖിതസിക്ഖം വുട്ഠാപേന്തീ ദ്വേ ആപത്തിയോ ആപജ്ജതി. വുട്ഠാപേതി, പയോഗേ ദുക്കടം; വുട്ഠാപിതേ, ആപത്തി പാചിത്തിയസ്സ.

പരിപുണ്ണവീസതിവസ്സം കുമാരിഭൂതം ദ്വേ വസ്സാനി ഛസു ധമ്മേസു സിക്ഖിതസിക്ഖം സങ്ഘേന അസമ്മതം വുട്ഠാപേന്തീ ദ്വേ ആപത്തിയോ ആപജ്ജതി. വുട്ഠാപേതി, പയോഗേ ദുക്കടം; വുട്ഠാപിതേ, ആപത്തി പാചിത്തിയസ്സ.

ഊനദ്വാദസവസ്സാ വുട്ഠാപേന്തീ ദ്വേ ആപത്തിയോ ആപജ്ജതി. വുട്ഠാപേതി, പയോഗേ ദുക്കടം; വുട്ഠാപിതേ, ആപത്തി പാചിത്തിയസ്സ.

പരിപുണ്ണദ്വാദസവസ്സാ സങ്ഘേന അസമ്മതാ വുട്ഠാപേന്തീ ദ്വേ ആപത്തിയോ ആപജ്ജതി. വുട്ഠാപേതി, പയോഗേ ദുക്കടം; വുട്ഠാപിതേ, ആപത്തി പാചിത്തിയസ്സ.

‘‘അലം താവ തേ, അയ്യേ, വുട്ഠാപിതേനാ’’തി വുച്ചമാനാ ‘‘സാധൂ’’തി പടിസ്സുണിത്വാ പച്ഛാ ഖീയനധമ്മം ആപജ്ജന്തീ ദ്വേ ആപത്തിയോ ആപജ്ജതി. ഖിയ്യതി, പയോഗേ ദുക്കടം; ഖിയ്യിതേ, ആപത്തി പാചിത്തിയസ്സ.

സിക്ഖമാനം – ‘‘സചേ മേ ത്വം, അയ്യേ, ചീവരം ദസ്സസി, ഏവാഹം തം വുട്ഠാപേസ്സാമീ’’തി വത്വാ നേവ വുട്ഠാപേന്തീ ന വുട്ഠാപനായ ഉസ്സുക്കം കരോന്തീ ഏകം ആപത്തിം ആപജ്ജതി. പാചിത്തിയം.

സിക്ഖമാനം – ‘‘സചേ മം ത്വം, അയ്യേ, ദ്വേ വസ്സാനി അനുബന്ധിസ്സസി, ഏവാഹം തം വുട്ഠാപേസ്സാമീ’’തി വത്വാ നേവ വുട്ഠാപേന്തീ ന വുട്ഠാപനായ ഉസ്സുക്കം കരോന്തീ ഏകം ആപത്തിം ആപജ്ജതി. പാചിത്തിയം.

പുരിസസംസട്ഠം കുമാരകസംസട്ഠം ചണ്ഡിം സോകാവാസം സിക്ഖമാനം വുട്ഠാപേന്തീ ദ്വേ ആപത്തിയോ ആപജ്ജതി. വുട്ഠാപേതി, പയോഗേ ദുക്കടം; വുട്ഠാപിതേ, ആപത്തി പാചിത്തിയസ്സ.

മാതാപിതൂഹി വാ സാമികേന വാ അനനുഞ്ഞാതം സിക്ഖമാനം വുട്ഠാപേന്തീ ദ്വേ ആപത്തിയോ ആപജ്ജതി. വുട്ഠാപേതി, പയോഗേ ദുക്കടം; വുട്ഠാപിതേ, ആപത്തി പാചിത്തിയസ്സ.

പാരിവാസികഛന്ദദാനേ സിക്ഖമാനം വുട്ഠാപേന്തീ ദ്വേ ആപത്തിയോ ആപജ്ജതി. വുട്ഠാപേതി, പയോഗേ ദുക്കടം; വുട്ഠാപിതേ, ആപത്തി പാചിത്തിയസ്സ.

അനുവസ്സം വുട്ഠാപേന്തീ ദ്വേ ആപത്തിയോ ആപജ്ജതി. വുട്ഠാപേതി, പയോഗേ ദുക്കടം; വുട്ഠാപിതേ, ആപത്തി പാചിത്തിയസ്സ.

ഏകം വസ്സം ദ്വേ വുട്ഠാപേന്തീ ദ്വേ ആപത്തിയോ ആപജ്ജതി. വുട്ഠാപേതി, പയോഗേ ദുക്കടം; വുട്ഠാപിതേ, ആപത്തി പാചിത്തിയസ്സ.

കുമാരീഭൂതവഗ്ഗോ അട്ഠമോ.

൯. ഛത്തുപാഹനവഗ്ഗോ

൨൩൯. ഛത്തുപാഹനം ധാരേന്തീ ദ്വേ ആപത്തിയോ ആപജ്ജതി. ധാരേതി, പയോഗേ ദുക്കടം; ധാരിതേ, ആപത്തി പാചിത്തിയസ്സ.

യാനേന യായന്തീ ദ്വേ ആപത്തിയോ ആപജ്ജതി. യായതി, പയോഗേ ദുക്കടം; യായിതേ, ആപത്തി പാചിത്തിയസ്സ.

സങ്ഘാണിം ധാരേന്തീ ദ്വേ ആപത്തിയോ ആപജ്ജതി. ധാരേതി, പയോഗേ ദുക്കടം; ധാരിതേ, ആപത്തി പാചിത്തിയസ്സ.

ഇത്ഥാലങ്കാരം ധാരേന്തീ ദ്വേ ആപത്തിയോ ആപജ്ജതി. ധാരേതി, പയോഗേ ദുക്കടം; ധാരിതേ, ആപത്തി പാചിത്തിയസ്സ.

ഗന്ധവണ്ണകേന നഹായന്തീ ദ്വേ ആപത്തിയോ ആപജ്ജതി. നഹായതി, പയോഗേ ദുക്കടം; നഹാനപരിയോസാനേ, ആപത്തി പാചിത്തിയസ്സ.

വാസിതകേന പിഞ്ഞാകേന നഹായന്തീ ദ്വേ ആപത്തിയോ ആപജ്ജതി. നഹായതി, പയോഗേ ദുക്കടം; നഹാനപരിയോസാനേ, ആപത്തി പാചിത്തിയസ്സ.

ഭിക്ഖുനിയാ ഉമ്മദ്ദാപേന്തീ പരിമദ്ദാപേന്തീ ദ്വേ ആപത്തിയോ ആപജ്ജതി. ഉമ്മദ്ദാപേതി, പയോഗേ ദുക്കടം; ഉമ്മദ്ദിതേ, ആപത്തി പാചിത്തിയസ്സ.

സിക്ഖമാനായ ഉമ്മദ്ദാപേന്തീ പരിമദ്ദാപേന്തീ ദ്വേ ആപത്തിയോ ആപജ്ജതി. ഉമ്മദ്ദാപേതി, പയോഗേ ദുക്കടം; ഉമ്മദ്ദിതേ, ആപത്തി പാചിത്തിയസ്സ.

സാമണേരിയാ ഉമ്മദ്ദാപേന്തീ പരിമദ്ദാപേന്തീ ദ്വേ ആപത്തിയോ ആപജ്ജതി. ഉമ്മദ്ദാപേതി, പയോഗേ ദുക്കടം; ഉമ്മദ്ദിതേ, ആപത്തി പാചിത്തിയസ്സ.

ഗിഹിനിയാ ഉമ്മദ്ദാപേന്തീ പരിമദ്ദാപേന്തീ ദ്വേ ആപത്തിയോ ആപജ്ജതി. ഉമ്മദ്ദാപേതി, പയോഗേ ദുക്കടം; ഉമ്മദ്ദിതേ, ആപത്തി പാചിത്തിയസ്സ.

ഭിക്ഖുസ്സ പുരതോ അനാപുച്ഛാ ആസനേ നിസീദന്തീ ദ്വേ ആപത്തിയോ ആപജ്ജതി. നിസീദതി, പയോഗേ ദുക്കടം; നിസിന്നേ, ആപത്തി പാചിത്തിയസ്സ.

അനോകാസകതം ഭിക്ഖും പഞ്ഹം പുച്ഛന്തീ ദ്വേ ആപത്തിയോ ആപജ്ജതി. പുച്ഛതി, പയോഗേ ദുക്കടം; പുച്ഛിതേ, ആപത്തി പാചിത്തിയസ്സ.

അസങ്കച്ചികാ ഗാമം പവിസന്തീ ദ്വേ ആപത്തിയോ ആപജ്ജതി. പഠമം പാദം പരിക്ഖേപം അതിക്കാമേതി, ആപത്തി ദുക്കടസ്സ; ദുതിയം പാദം അതിക്കാമേതി, ആപത്തി പാചിത്തിയസ്സ.

ഛത്തുപാഹനവഗ്ഗോ നവമോ.

ഖുദ്ദകം നിട്ഠിതം.

൫. പാടിദേസനീയകണ്ഡം

൨൪൦. സപ്പിം വിഞ്ഞാപേത്വാ ഭുഞ്ജന്തീ ദ്വേ ആപത്തിയോ ആപജ്ജതി. ഭുഞ്ജിസ്സാമീതി പടിഗ്ഗണ്ഹാതി, ആപത്തി ദുക്കടസ്സ; അജ്ഝോഹാരേ അജ്ഝോഹാരേ ആപത്തി പാടിദേസനീയസ്സ.