൬. ആരാമവഗ്ഗോ

൨൩൬. ജാനം സഭിക്ഖുകം ആരാമം അനാപുച്ഛാ പവിസന്തീ ദ്വേ ആപത്തിയോ ആപജ്ജതി. പഠമം പാദം പരിക്ഖേപം അതിക്കാമേതി, ആപത്തി ദുക്കടസ്സ; ദുതിയം പാദം അതിക്കാമേതി, ആപത്തി പാചിത്തിയസ്സ.

ഭിക്ഖും അക്കോസന്തീ പരിഭാസന്തീ ദ്വേ ആപത്തിയോ ആപജ്ജതി. അക്കോസതി, പയോഗേ ദുക്കടം; അക്കോസിതേ, ആപത്തി പാചിത്തിയസ്സ.

ചണ്ഡീകതാ ഗണം പരിഭാസന്തീ ദ്വേ ആപത്തിയോ ആപജ്ജതി. പരിഭാസതി, പയോഗേ ദുക്കടം; പരിഭാസിതേ, ആപത്തി പാചിത്തിയസ്സ.

നിമന്തിതാ വാ പവാരിതാ വാ ഖാദനീയം വാ ഭോജനീയം വാ ഭുഞ്ജന്തീ ദ്വേ ആപത്തിയോ ആപജ്ജതി. ‘‘ഖാദിസ്സാമി ഭുഞ്ജിസ്സാമീ’’തി പടിഗ്ഗണ്ഹാതി, ആപത്തി ദുക്കടസ്സ; അജ്ഝോഹാരേ അജ്ഝോഹാരേ ആപത്തി പാചിത്തിയസ്സ.

കുലം മച്ഛരായന്തീ ദ്വേ ആപത്തിയോ ആപജ്ജതി. മച്ഛരായതി, പയോഗേ ദുക്കടം; മച്ഛരിതേ, ആപത്തി പാചിത്തിയസ്സ.

അഭിക്ഖുകേ ആവാസേ വസ്സം വസന്തീ ദ്വേ ആപത്തിയോ ആപജ്ജതി. ‘‘വസ്സം വസിസ്സാമീ’’തി സേനാസനം പഞ്ഞപേതി പാനീയം പരിഭോജനീയം ഉപട്ഠപേതി പരിവേണം സമ്മജ്ജതി, ആപത്തി ദുക്കടസ്സ; സഹ അരുണുഗ്ഗമനാ ആപത്തി പാചിത്തിയസ്സ.

വസ്സംവുട്ഠാ ഭിക്ഖുനീ ഉഭതോസങ്ഘേ തീഹി ഠാനേഹി ന പവാരേന്തീ ഏകം ആപത്തിം ആപജ്ജതി. പാചിത്തിയം.

ഓവാദായ വാ സംവാസായ വാ ന ഗച്ഛന്തീ ഏകം ആപത്തിം ആപജ്ജതി. പാചിത്തിയം.

ഉപോസഥമ്പി ന പുച്ഛന്തീ ഓവാദമ്പി ന യാചന്തീ ഏകം ആപത്തിം ആപജ്ജതി. പാചിത്തിയം.

പസാഖേ ജാതം ഗണ്ഡം വാ രുധിതം വാ അനപലോകേത്വാ സങ്ഘം വാ ഗണം വാ പുരിസേന സദ്ധിം ഏകേനേകാ ഭേദാപേന്തീ ദ്വേ ആപത്തിയോ ആപജ്ജതി. ഭേദാപേതി, പയോഗേ ദുക്കടം; ഭിന്നേ, ആപത്തി പാചിത്തിയസ്സ.

ആരാമവഗ്ഗോ ഛട്ഠോ.