൪. തുവട്ടവഗ്ഗോ

൨൩൪. ദ്വേ ഭിക്ഖുനിയോ ഏകമഞ്ചേ തുവട്ടേന്തിയോ ദ്വേ ആപത്തിയോ ആപജ്ജന്തി. നിപജ്ജന്തി, പയോഗേ ദുക്കടം; നിപന്നേ, ആപത്തി പാചിത്തിയസ്സ.

ദ്വേ ഭിക്ഖുനിയോ ഏകത്ഥരണപാവുരണാ തുവട്ടേന്തിയോ ദ്വേ ആപത്തിയോ ആപജ്ജന്തി. നിപജ്ജന്തി, പയോഗേ ദുക്കടം; നിപന്നേ, ആപത്തി പാചിത്തിയസ്സ.

ഭിക്ഖുനിയാ സഞ്ചിച്ച അഫാസും കരോന്തീ ദ്വേ ആപത്തിയോ ആപജ്ജതി. കരോതി, പയോഗേ ദുക്കടം; കതേ, ആപത്തി പാചിത്തിയസ്സ.

ദുക്ഖിതം സഹജീവിനിം നേവ ഉപട്ഠേന്തീ ന ഉപട്ഠാപനായ ഉസ്സുക്കം കരോന്തീ ഏകം ആപത്തിം ആപജ്ജതി. പാചിത്തിയം.

ഭിക്ഖുനിയാ ഉപസ്സയം ദത്വാ കുപിതാ അനത്തമനാ നിക്കഡ്ഢന്തീ ദ്വേ ആപത്തിയോ ആപജ്ജതി. നിക്കഡ്ഢതി, പയോഗേ ദുക്കടം; നിക്കഡ്ഢിതേ, ആപത്തി പാചിത്തിയസ്സ.

സംസട്ഠാ ഭിക്ഖുനീ യാവതതിയം സമനുഭാസനായ ന പടിനിസ്സജ്ജന്തീ ദ്വേ ആപത്തിയോ ആപജ്ജതി. ഞത്തിയാ ദുക്കടം; കമ്മവാചാപരിയോസാനേ ആപത്തി പാചിത്തിയസ്സ.

അന്തോരട്ഠേ സാസങ്കസമ്മതേ സപ്പടിഭയേ അസത്ഥികാ ചാരികം ചരന്തീ ദ്വേ ആപത്തിയോ ആപജ്ജതി. പടിപജ്ജതി, പയോഗേ ദുക്കടം; പടിപന്നേ, ആപത്തി പാചിത്തിയസ്സ.

തിരോരട്ഠേ സാസങ്കസമ്മതേ സപ്പടിഭയേ അസത്ഥികാ ചാരികം ചരന്തീ ദ്വേ ആപത്തിയോ ആപജ്ജതി. പടിപജ്ജതി, പയോഗേ ദുക്കടം; പടിപന്നേ, ആപത്തി പാചിത്തിയസ്സ.

അന്തോവസ്സം ചാരികം ചരന്തീ ദ്വേ ആപത്തിയോ ആപജ്ജതി. പടിപജ്ജതി, പയോഗേ ദുക്കടം; പടിപന്നേ, ആപത്തി പാചിത്തിയസ്സ.

വസ്സംവുട്ഠാ ഭിക്ഖുനീ ചാരികം ന പക്കമന്തീ ഏകം ആപത്തിം ആപജ്ജതി. പാചിത്തിയം.

തുവട്ടവഗ്ഗോ ചതുത്ഥോ.