൧. പാരാജികകണ്ഡം

൨൪൯. കായസംസഗ്ഗം സാദിയനപച്ചയാ കതി ആപത്തിയോ ആപജ്ജതി? കായസംസഗ്ഗം സാദിയനപച്ചയാ പഞ്ച ആപത്തിയോ ആപജ്ജതി. അവസ്സുതാ ഭിക്ഖുനീ അവസ്സുതസ്സ പുരിസപുഗ്ഗലസ്സ അധക്ഖകം ഉബ്ഭജാണുമണ്ഡലം ഗഹണം സാദിയതി, ആപത്തി പാരാജികസ്സ; ഭിക്ഖു കായേന കായം ആമസതി, ആപത്തി സങ്ഘാദിസേസസ്സ; കായേന കായപടിബദ്ധം ആമസതി, ആപത്തി ഥുല്ലച്ചയസ്സ; കായപടിബദ്ധേന കായപടിബദ്ധം ആമസതി, ആപത്തി ദുക്കടസ്സ; അങ്ഗുലിപതോദകേ പാചിത്തിയം – കായസംസഗ്ഗം സാദിയനപച്ചയാ ഇമാ പഞ്ച ആപത്തിയോ ആപജ്ജതി.

വജ്ജപ്പടിച്ഛാദനപച്ചയാ കതി ആപത്തിയോ ആപജ്ജതി? വജ്ജപ്പടിച്ഛാദനപച്ചയാ ചതസ്സോ ആപത്തിയോ ആപജ്ജതി. ഭിക്ഖുനീ ജാനം പാരാജികം ധമ്മം [ധമ്മം അജ്ഝാപന്നം (സ്യാ.)] പടിച്ഛാദേതി, ആപത്തി പാരാജികസ്സ; വേമതികാ പടിച്ഛാദേതി, ആപത്തി ഥുല്ലച്ചയസ്സ; ഭിക്ഖു സങ്ഘാദിസേസം പടിച്ഛാദേതി, ആപത്തി പാചിത്തിയസ്സ; ആചാരവിപത്തിം പടിച്ഛാദേതി, ആപത്തി ദുക്കടസ്സ – വജ്ജപ്പടിച്ഛാദനപച്ചയാ ഇമാ ചതസ്സോ ആപത്തിയോ ആപജ്ജതി.

യാവതതിയം സമനുഭാസനായ ന പടിനിസ്സജ്ജനപച്ചയാ കതി ആപത്തിയോ ആപജ്ജതി? യാവതതിയം സമനുഭാസനായ ന പടിനിസ്സജ്ജനപച്ചയാ പഞ്ച ആപത്തിയോ ആപജ്ജതി. ഉക്ഖിത്താനുവത്തികാ ഭിക്ഖുനീ യാവതതിയം സമനുഭാസനായ ന പടിനിസ്സജ്ജതി, ഞത്തിയാ ദുക്കടം; ദ്വീഹി കമ്മവാചാഹി ഥുല്ലച്ചയാ; കമ്മവാചാപരിയോസാനേ ആപത്തി പാരാജികസ്സ; ഭേദകാനുവത്തികാ ഭിക്ഖുനീ യാവതതിയം സമനുഭാസനായ ന പടിനിസ്സജ്ജതി, ആപത്തി സങ്ഘാദിസേസസ്സ; പാപികായ ദിട്ഠിയാ യാവതതിയം സമനുഭാസനായ ന പടിനിസ്സജ്ജതി, ആപത്തി പാചിത്തിയസ്സ – യാവതതിയം സമനുഭാസനായ ന പടിനിസ്സജ്ജനപച്ചയാ ഇമാ പഞ്ച ആപത്തിയോ ആപജ്ജതി.

അട്ഠമം വത്ഥും പരിപൂരണപച്ചയാ കതി ആപത്തിയോ ആപജ്ജതി? അട്ഠമം വത്ഥും പരിപൂരണപച്ചയാ തിസ്സോ ആപത്തിയോ ആപജ്ജതി. പുരിസേന – ‘‘ഇത്ഥന്നാമം ഓകാസം ആഗച്ഛാ’’തി വുത്താ ഗച്ഛതി, ആപത്തി ദുക്കടസ്സ; പുരിസസ്സ ഹത്ഥപാസം ഓക്കന്തമത്തേ ആപത്തി ഥുല്ലച്ചയസ്സ; അട്ഠമം വത്ഥും പരിപൂരേതി, ആപത്തി പാരാജികസ്സ – അട്ഠമം വത്ഥും പരിപൂരണപച്ചയാ ഇമാ തിസ്സോ ആപത്തിയോ ആപജ്ജതി.

പാരാജികാ നിട്ഠിതാ.