൨. സങ്ഘാദിസേസകണ്ഡാദി

൨൫൦. ഉസ്സയവാദികാ ഭിക്ഖുനീ അഡ്ഡം കരണപച്ചയാ തിസ്സോ ആപത്തിയോ ആപജ്ജതി. ഏകസ്സ ആരോചേതി, ആപത്തി ദുക്കടസ്സ; ദുതിയസ്സ ആരോചേതി, ആപത്തി ഥുല്ലച്ചയസ്സ; അഡ്ഡപരിയോസാനേ ആപത്തി സങ്ഘാദിസേസസ്സ.

ചോരിം വുട്ഠാപനപച്ചയാ തിസ്സോ ആപത്തിയോ ആപജ്ജതി. ഞത്തിയാ ദുക്കടം; ദ്വീഹി കമ്മവാചാഹി ഥുല്ലച്ചയാ; കമ്മവാചാപരിയോസാനേ ആപത്തി സങ്ഘാദിസേസസ്സ.

ഏകാ ഗാമന്തരം ഗമനപച്ചയാ തിസ്സോ ആപത്തിയോ ആപജ്ജതി. ഗച്ഛതി, ആപത്തി ദുക്കടസ്സ; പഠമം പാദം പരിക്ഖേപം അതിക്കാമേതി, ആപത്തി ഥുല്ലച്ചയസ്സ; ദുതിയം പാദം അതിക്കാമേതി, ആപത്തി സങ്ഘാദിസേസസ്സ.

സമഗ്ഗേന സങ്ഘേന ഉക്ഖിത്തം ഭിക്ഖുനിം ധമ്മേന വിനയേന സത്ഥുസാസനേന അനപലോകേത്വാ കാരകസങ്ഘം അനഞ്ഞായ ഗണസ്സ ഛന്ദം ഓസാരണപച്ചയാ തിസ്സോ ആപത്തിയോ ആപജ്ജതി. ഞത്തിയാ ദുക്കടം; ദ്വീഹി കമ്മവാചാഹി ഥുല്ലച്ചയാ; കമ്മവാചാപരിയോസാനേ ആപത്തി സങ്ഘാദിസേസസ്സ.

അവസ്സുതാ ഭിക്ഖുനീ അവസ്സുതസ്സ പുരിസപുഗ്ഗലസ്സ ഹത്ഥതോ ഖാദനീയം വാ ഭോജനീയം വാ സഹത്ഥാ പടിഗ്ഗഹേത്വാ ഭുഞ്ജനപച്ചയാ തിസ്സോ ആപത്തിയോ ആപജ്ജതി. ‘‘ഖാദിസ്സാമി ഭുഞ്ജിസ്സാമീ’’തി പടിഗ്ഗണ്ഹാതി, ആപത്തി ഥുല്ലച്ചയസ്സ; അജ്ഝോഹാരേ അജ്ഝോഹാരേ ആപത്തി സങ്ഘാദിസേസസ്സ; ഉദകദന്തപോനം പടിഗ്ഗണ്ഹാതി, ആപത്തി ദുക്കടസ്സ.

‘‘കിം തേ, അയ്യേ, ഏസോ പുരിസപുഗ്ഗലോ കരിസ്സതി അവസ്സുതോ വാ അനവസ്സുതോ വാ, യതോ ത്വം അനവസ്സുതാ! ഇങ്ഘ, അയ്യേ, യം തേ ഏസോ പുരിസപുഗ്ഗലോ ദേതി ഖാദനീയം വാ ഭോജനീയം വാ തം ത്വം സഹത്ഥാ പടിഗ്ഗഹേത്വാ ഖാദ വാ ഭുഞ്ജ വാ’’തി, ഉയ്യോജനപച്ചയാ തിസ്സോ ആപത്തിയോ ആപജ്ജതി. തസ്സാ വചനേന ഖാദിസ്സാമി ഭുഞ്ജിസ്സാമീതി പടിഗ്ഗണ്ഹാതി, ആപത്തി ദുക്കടസ്സ; അജ്ഝോഹാരേ അജ്ഝോഹാരേ ആപത്തി ഥുല്ലച്ചയസ്സ; ഭോജനപരിയോസാനേ ആപത്തി സങ്ഘാദിസേസസ്സ.

കുപിതാ ഭിക്ഖുനീ യാവതതിയം സമനുഭാസനായ ന പടിനിസ്സജ്ജനപച്ചയാ തിസ്സോ ആപത്തിയോ ആപജ്ജതി. ഞത്തിയാ ദുക്കടം; ദ്വീഹി കമ്മവാചാഹി ഥുല്ലച്ചയാ; കമ്മവാചാപരിയോസാനേ ആപത്തി സങ്ഘാദിസേസസ്സ.

കിസ്മിഞ്ചിദേവ അധികരണേ പച്ചാകതാ ഭിക്ഖുനീ യാവതതിയം സമനുഭാസനായ ന പടിനിസ്സജ്ജനപച്ചയാ തിസ്സോ ആപത്തിയോ ആപജ്ജതി. ഞത്തിയാ ദുക്കടം; ദ്വീഹി കമ്മവാചാഹി ഥുല്ലച്ചയാ; കമ്മവാചാപരിയോസാനേ ആപത്തി സങ്ഘാദിസേസസ്സ.

സംസട്ഠാ ഭിക്ഖുനീ യാവതതിയം സമനുഭാസനായ ന പടിനിസ്സജ്ജനപച്ചയാ തിസ്സോ ആപത്തിയോ ആപജ്ജതി. ഞത്തിയാ ദുക്കടം; ദ്വീഹി കമ്മവാചാഹി ഥുല്ലച്ചയാ; കമ്മവാചാപരിയോസാനേ ആപത്തി സങ്ഘാദിസേസസ്സ.

‘‘സംസട്ഠാവ, അയ്യേ, തുമ്ഹേ വിഹരഥ, മാ തുമ്ഹേ നാനാ വിഹരിത്ഥാ’’തി ഉയ്യോജേന്തീ യാവതതിയം സമനുഭാസനായ ന പടിനിസ്സജ്ജനപച്ചയാ തിസ്സോ ആപത്തിയോ ആപജ്ജതി. ഞത്തിയാ ദുക്കടം; ദ്വീഹി കമ്മവാചാഹി ഥുല്ലച്ചയാ; കമ്മവാചാപരിയോസാനേ ആപത്തി സങ്ഘാദിസേസസ്സ.

ദസ സങ്ഘാദിസേസാ നിട്ഠിതാ…പേ….

(യഥാ ഹേട്ഠാ തഥാ വിത്ഥാരേതബ്ബാ പച്ചയമേവ നാനാകരണം)

ദധിം വിഞ്ഞാപേത്വാ ഭുഞ്ജനപച്ചയാ കതി ആപത്തിയോ ആപജ്ജതി? ദധിം വിഞ്ഞാപേത്വാ ഭുഞ്ജനപച്ചയാ ദ്വേ ആപത്തിയോ ആപജ്ജതി. ഭുഞ്ജിസ്സാമീതി പടിഗ്ഗണ്ഹാതി, ആപത്തി ദുക്കടസ്സ; അജ്ഝോഹാരേ അജ്ഝോഹാരേ ആപത്തി പാടിദേസനീയസ്സ – ദധിം വിഞ്ഞാപേത്വാ ഭുഞ്ജനപച്ചയാ ഇമാ ദ്വേ ആപത്തിയോ ആപജ്ജതി.

കതാപത്തിവാരോ നിട്ഠിതോ ദുതിയോ.